अमळनेर | प्रतिनिधी
“खरा तो एकचि धर्म, जगाला प्रेम अर्पावे” हा मानवतेचा संदेश देणारे थोर समाजसेवक, साहित्यिक आणि राष्ट्रसेवक साने गुरुजी यांच्या स्मृतिदिनानिमित्त अमळनेरमध्ये त्यांच्या विचारांचा जिवंत वारसा अनुभवायला मिळाला. साने गुरुजी कर्मभूमी स्मारक प्रतिष्ठानच्या पुढाकाराने गुरुवारी (दि. ११) स्मारक परिसरातील रस्त्याची श्रमदानातून डागडुजी करण्यात आली. सामाजिक बांधिलकी, लोकसहभाग आणि श्रमप्रतिष्ठेचा अनोखा संगम असलेल्या या उपक्रमात विविध क्षेत्रांतील नागरिकांनी उत्स्फूर्त सहभाग नोंदवून साने गुरुजींना कृतीतून अभिवादन केले.
उपक्रमाचे उद्घाटन प्रतिष्ठानचे अध्यक्ष प्राचार्य डॉ. अरविंद सराफ यांच्या हस्ते करण्यात आले. यावेळी प्रतिष्ठानचे पदाधिकारी, खान्देशातील श्रमसंस्कार छावण्यांतून घडलेली तरुणाई, विविध सामाजिक संस्थांचे प्रतिनिधी, सामाजिक कार्यकर्ते आणि ग्रामस्थ मोठ्या संख्येने उपस्थित होते.
स्मारक परिसरातील रस्ता अनेक ठिकाणी खराब झाल्याने शेतकरी, विद्यार्थी, कामगार तसेच सर्वसामान्य नागरिकांना मोठ्या अडचणींचा सामना करावा लागत होता. याची दखल घेत नागरिकांनी स्वतः पुढाकार घेत रस्त्यावरील खड्डे बुजविणे, मुरूम टाकणे आणि रस्ता समतल करण्याची कामे श्रमदानातून पूर्ण केली. लोकसहभागाच्या बळावर सार्वजनिक प्रश्न सोडविण्याचा आदर्श यावेळी पाहायला मिळाला.
या उपक्रमासाठी स्वादिष्ट उद्योग समूहाचे निलेश पाटील, अमेय मुंदडा, डॉ. विकास हरताळकर, नगरसेवक अनिल महाजन, चेतन सोनार तसेच माजी नगरसेवक श्याम पाटील यांनी विशेष सहकार्य केले. त्यांच्या योगदानामुळे उपक्रम अधिक प्रभावीपणे राबविणे शक्य झाले.
सकाळी ६ वाजेपासून सुरू झालेल्या श्रमदानात डॉ. मिलिंद वैद्य, गोपाळ नेवे, चेतन भोई, शुभम पवार, प्रथमेश कोठावदे, दिलीप सोनवणे, संदीप घोरपडे, शिव निकम, सुनील वाघमोडे, डॉ. अतुल चौधरी, तुषार पाटील, किशोर महाजन, हेमंत बडगुजर, प्रणव पाटील, विक्रांत पाटील, दर्शना पवार, लोकेश वाणी, हेमंत भामरे, भागवत गुरुजी, डॉ. दिनेश पाटील, उमेश चौधरी, सुनील पाटील, संदीप चौधरी, सतीश देशमुख, रोहित चौधरी, डॉ. संदीप सराफ, गौरी सराफ, मनीष सराफ, आर. पी. पवार यांच्यासह असंख्य नागरिकांनी उत्साहाने सहभाग घेतला.
या उपक्रमातून साने गुरुजींनी दिलेला श्रमप्रतिष्ठा, लोकसहभाग, समाजसेवा आणि सामूहिक जबाबदारीचा संदेश प्रत्यक्ष कृतीतून जपला गेला. स्मृतिदिनाचे औचित्य साधून नागरिकांनी केवळ अभिवादन न करता समाजहितासाठी श्रमदानाचा मार्ग स्वीकारत साने गुरुजींच्या विचारांना खऱ्या अर्थाने उजाळा दिला.
उपक्रमाच्या यशस्वी आयोजनाबद्दल सहभागी नागरिकांचे आभार व्यक्त करताना, भविष्यातही लोकहित आणि समाजविकासासाठी अशाच विधायक उपक्रमांचे आयोजन करण्यात येणार असल्याचे प्रतिष्ठानतर्फे सांगण्यात आले.
पर्यावरण संवर्धन, शेतकरी हित आणि सामाजिक बांधिलकी जपत संवेदनशील नागरिकांनी श्रमदानातून आपले कर्तव्य पार पाडत समाजापुढे आदर्श निर्माण केला. यावेळी नागरिकांनी केवळ श्रमदानच नव्हे, तर लोकप्रतिनिधींच्या कर्तव्यभावनेबाबतही परखड भूमिका मांडली.
“खरंतर सध्या आपण निवडून दिलेल्या अनेक लोकप्रतिनिधींची कर्तव्यभावना हरवत चालली आहे. जनतेचे प्रश्न सोडविताना अहंकार आणि दंभ वाढताना दिसतो. जणू काही ते जनतेवर उपकारच करत आहेत, अशी भावना निर्माण होत आहे,” असे मत व्यक्त करण्यात आले.
नागरिकांनी यावेळी स्पष्ट केले की, कोणताही आमदार, खासदार किंवा मंत्री स्वतःच्या खिशातून खर्च करून जनतेची कामे करत नाही. लोकांची कामे करण्यासाठी त्यांना मानधन, विविध सुविधा आणि निवृत्तीनंतर पेन्शनची तरतूद असते. त्यामुळे जनसेवा ही त्यांची जबाबदारी असून त्याकडे उपकाराच्या दृष्टीने पाहिले जाऊ नये.
यावेळी लोकशाहीतील मतदारांच्या भूमिकेवरही भर देण्यात आला. “जोपर्यंत मतदार पैसे, प्रलोभने आणि व्यक्तिपूजेला बळी पडत राहतील, तोपर्यंत हे चित्र बदलणार नाही. नागरिकांनी विधायक मुद्दे, मुलभूत सुविधा आणि विकासाच्या आधारावर मतदान करणे आवश्यक आहे. तरुणाई, शेतकरी आणि महिला यांनी पाठीचा कणा ताठ ठेवून आपल्या हक्कांसाठी उभे राहिले पाहिजे,” असे आवाहन करण्यात आले.
समाजातील जागरूक नागरिकांनी एकत्र येत पर्यावरण संवर्धन, शेतकरी प्रश्न आणि मुलभूत गरजांशी संबंधित विषयांवर लवकरच व्यापक जनजागृती अभियान राबविण्याचा निर्धार व्यक्त केला.
शेवटी, “पाठीचा कणा ताठ असलेल्या आणि तो ताठ करण्याची इच्छा असलेल्या सर्व भाऊ-बहिणींना सोबत घेऊन समाजहिताच्या प्रश्नांवर संघर्ष सुरूच राहील. जनतेचा विश्वास, स्नेह आणि प्रेम हीच माझी खरी संपत्ती असून त्याच बळावर मी ठामपणे उभी आहे,” असा भावनिक संदेश देण्यात आला.
