अमळनेर शहरात ४०० ते ५०० अनधिकृत बॅनरचा सुळसुळाट! सार्वजनिक सुरक्षिततेला धोका निर्माण करणारे बॅनर हटवा; संबंधितांवर गुन्हे दाखल करा – जितेंद्र संदानशिव यांची पोलीस निरीक्षकांकडे तक्रार

अमळनेर : शहरातील मुख्य रस्ते, चौक, सार्वजनिक ठिकाणे तसेच विद्युत व पथदिव्यांच्या खांबांवर अनधिकृतपणे लावण्यात आलेले अंदाजे ४०० ते ५०० बॅनर, जाहिरात फलक व होर्डिंग्ज तातडीने हटविण्यात यावेत. तसेच विनापरवानगी बॅनर लावून सार्वजनिक मालमत्तेचे विद्रुपीकरण करणारे आणि नागरिकांच्या जीवितास धोका निर्माण करणाऱ्यांविरुद्ध कायदेशीर कारवाई करून गुन्हे दाखल करावेत, अशी मागणी जितेंद्र अनिल संदानशिव यांनी अमळनेर पोलीस ठाण्याचे पोलीस निरीक्षक यांच्याकडे लेखी तक्रारीद्वारे केली आहे.

सदानशिव यांनी ५ नोव्हेंबर रोजी दिलेल्या तक्रारीत म्हटले आहे की, अमळनेर शहरातील विविध मुख्य रस्ते, चौक आणि सार्वजनिक ठिकाणी मोठ्या प्रमाणावर बॅनर लावण्यात आले आहेत. विशेषतः विद्युत खांब व पथदिव्यांच्या खांबांवर लावण्यात आलेल्या बॅनरमुळे वाहनचालकांचे लक्ष विचलित होऊन अपघात होण्याची शक्यता आहे. तसेच जोरदार वाऱ्यामुळे बॅनर किंवा त्यांचे लोखंडी सांगाडे खाली कोसळल्यास वाहनचालक, पादचारी आणि नागरिकांच्या जीवितास गंभीर धोका निर्माण होऊ शकतो. त्यामुळे हा प्रश्न केवळ शहराच्या विद्रुपीकरणापुरता मर्यादित नसून सार्वजनिक सुरक्षिततेशी संबंधित असल्याचे त्यांनी नमूद केले आहे.

या तक्रारीत महाराष्ट्र मालमत्तेचे विद्रुपीकरण प्रतिबंध अधिनियम, १९९५ मधील कलम ३ व ४, तसेच भारतीय न्याय संहिता, २०२३ मधील कलम २८५ व १२५ यांचा उल्लेख करण्यात आला आहे. सक्षम प्राधिकरणाची लेखी परवानगी नसताना सार्वजनिक मालमत्तेवर जाहिरात फलक लावून विद्रुपीकरण केल्याचे आढळल्यास संबंधितांवर कारवाई करावी. सार्वजनिक मार्गावर अडथळा किंवा धोका निर्माण करणे तसेच निष्काळजीपणामुळे नागरिकांच्या सुरक्षिततेला धोका निर्माण होणे याबाबतही कायद्यानुसार तपास करून जबाबदारी निश्चित करावी, अशी मागणी करण्यात आली आहे.

तसेच शहरातील सर्व बॅनरची तातडीने पाहणी करून त्यांची अधिकृत परवानगी तपासावी, बॅनर लावणाऱ्या व्यक्ती, संस्था, मंडळे व जाहिरातदारांची ओळख पटवावी आणि बॅनर लावण्याचे आदेश देणाऱ्यांचीही चौकशी करावी, अशी मागणी करण्यात आली आहे. सार्वजनिक रस्त्यांवरील वाहतुकीस अडथळा निर्माण करणारे आणि नागरिकांच्या सुरक्षिततेस धोका पोहोचवणारे बॅनर हटविण्यासाठी नगरपरिषद प्रशासनाशी समन्वय साधून कार्यवाही करण्याचेही तक्रारीत नमूद आहे.

दखलपात्र गुन्हा निष्पन्न झाल्यास भारतीय नागरिक सुरक्षा संहिता, २०२३ च्या कलम १७३ अन्वये प्रथम माहिती अहवाल (FIR) नोंदवून दोषींवर कठोर कायदेशीर कारवाई करावी आणि केलेल्या कारवाईची माहिती लेखी स्वरूपात द्यावी, अशी अंतिम मागणी संदानशिव यांनी केली आहे.

या तक्रारीसोबत विद्युत खांबांवरील व मुख्य रस्त्यांवरील बॅनरची छायाचित्रे जोडण्यात आली असून, आवश्यकतेनुसार बॅनर लावलेल्या ठिकाणांची यादीही उपलब्ध करून देण्याची तयारी दर्शविण्यात आली आहे.

रोटरी क्लबचा माणुसकीचा दीपोत्सव; एचआयव्हीसह जीवन जगणाऱ्या बालकांना दिवाळी फराळासह पोषण किटचे वाटप! मुलींसाठी ६० फ्रॉकचे वितरण; आधार संस्था आणि अंकुर फाउंडेशनच्या सहकार्याने उपक्रम

अमळनेर प्रतिनिधी : दिवाळीचा आनंद समाजातील प्रत्येक घटकापर्यंत पोहोचावा, या सामाजिक भावनेतून रोटरी क्लब अमळनेरच्या वतीने एचआयव्हीसह जीवन जगणाऱ्या बालकांना व रुग्णांना दिवाळी फराळ, प्रोटीन किट तसेच सकस आहाराचे पाकीट वितरित करण्यात आले. हा उपक्रम ३ नोव्हेंबर रोजी रोटरी हॉल, अमळनेर येथे उत्साहात पार पडला.

कार्यक्रमाच्या प्रास्ताविकात रोटे. मकसूद बोहरी यांनी सांगितले की, आधार बहुउद्देशीय संस्थेच्या प्रमुख सौ. भारतीताई पाटील यांच्या प्रेरणेने तसेच आधार बहुउद्देशीय संस्था आणि अंकुर फाउंडेशन यांच्या संयुक्त सहकार्याने रोटरी क्लब अमळनेर गेल्या चार वर्षांपासून दर महिन्याला नियमितपणे प्रोटीन किटचे वाटप करीत आहे. एचआयव्हीसह जीवन जगणाऱ्या बालकांचे व रुग्णांचे आरोग्य आणि शारीरिक सुदृढता टिकून राहावी, यासाठी रोटरी क्लब सातत्याने प्रयत्नशील आहे. दरवर्षी दिवाळीनिमित्त फराळाचे वाटप करून त्यांच्या आनंदात भर घालण्याचा उपक्रमही राबविला जातो.

या कार्यक्रमाचे आणखी एक वैशिष्ट्य म्हणजे सौ. मेहराज हुसेन बोहरी यांनी स्वतः शिवलेल्या ‘बेस्ट आऊट ऑफ वेस्ट’ उपक्रमांतर्गत मुलींसाठी ६० फ्रॉकचे वितरण करण्यात आले. त्यांच्या या उपक्रमातून मुलींच्या चेहऱ्यावर आनंद फुलविण्याचा प्रयत्न करण्यात आला.

यावेळी स्वादिष्ट नमकीनचे प्रमुख रोटे. विजय भाऊ पाटील यांच्यातर्फे दिवाळी फराळाची पाकिटे, तर रोटे. प्रतीक खंडेरिया यांच्यातर्फे प्रोटीन किटचे वाटप करण्यात आले.

कार्यक्रमाला रोटरी क्लबचे अध्यक्ष रोटे. महेश पाटील, रोटे. चेलाराम सैनानी, रोटे. अजय रोडगे, रोटे. प्रतीक खंडेरिया, आधार बहुउद्देशीय संस्थेच्या सौ. डॉ. भारतीताई पाटील, सौ. रेणुका प्रसादताई तसेच आधार बहुउद्देशीय संस्था व अंकुर फाउंडेशनचे सर्व कर्मचारी उपस्थित होते.

दिवाळीच्या सणात समाजातील गरजू घटकांच्या जीवनात आनंदाचे रंग भरत रोटरी क्लबने सामाजिक बांधिलकीचा सुंदर परिचय करून दिला.

वाढदिवसाचा खर्च टाळून सभापती अशोक पाटील यांचा सामाजिक बांधिलकीचा आदर्श! मुख्यमंत्री सहायता निधीसाठी बाजार समितीतर्फे ५१ हजारांचा धनादेश; गरजू विद्यार्थ्यांना शैक्षणिक साहित्याचे वाटप

अमळनेर प्रतिनिधी : अमळनेर कृषी उत्पन्न बाजार समितीचे सभापती अशोक आधार पाटील यांनी आपला वाढदिवस मोठ्या थाटामाटात साजरा करण्याऐवजी राज्यातील दुष्काळी परिस्थितीचे गांभीर्य लक्षात घेऊन सामाजिक बांधिलकी जपण्याचा आदर्श घालून दिला. वाढदिवसानिमित्त होणारा अनावश्यक खर्च टाळून बाजार समितीतर्फे मुख्यमंत्री सहायता निधीसाठी ५१ हजार रुपयांचा धनादेश उपविभागीय अधिकारी मयूर भंगाळे यांच्यामार्फत सुपूर्द करण्यात आला.

अमळनेर तालुक्यातील दुष्काळी परिस्थिती आणि शेतकऱ्यांवर ओढवलेले संकट लक्षात घेता सभापती अशोक पाटील यांनी आपल्या वाढदिवसानिमित्त पुष्पगुच्छ आणू नयेत, तसेच कार्यकर्त्यांनी लावलेले वाढदिवसाचे बॅनर काढून टाकावेत, अशा सूचना दिल्या होत्या. बाजार समितीतील शेतकरी, कर्मचारीवृंद, हमाल-मापाडी आणि व्यापारी यांच्या वतीने दरवर्षीप्रमाणे वाढदिवस साजरा करण्याचे नियोजन होते. मात्र, दुष्काळाच्या पार्श्वभूमीवर उत्सवापेक्षा गरजूंच्या मदतीला प्राधान्य देण्याचा निर्णय त्यांनी घेतला.

त्यानुसार उपविभागीय अधिकारी मयूर भंगाळे यांच्या कार्यालयात जाऊन सभापती अशोक पाटील, संचालक समाधान धनगर, सचिव डॉ. उन्मेष राठोड, सहसचिव सुनील पाटील, योगेश महाजन, अशोक वाघ तसेच अमळनेर अर्बन बँकेचे संचालक रणजित शिंदे यांनी ५१ हजार रुपयांचा धनादेश मयूर भंगाळे यांच्याकडे सुपूर्द केला.

यासोबतच लोणसह ग्रामीण भागातील आणि आर्थिकदृष्ट्या दुर्बल कुटुंबांतील विद्यार्थ्यांना दुष्काळाचे शैक्षणिक परिणाम भोगावे लागू नयेत, या उद्देशाने सभापती अशोक पाटील यांनी विद्यार्थ्यांना शैक्षणिक साहित्याचे वाटप केले.

वाढदिवसाचा झगमगाट टाळून मदतीचा हात पुढे करणाऱ्या अशोक पाटील यांच्या या उपक्रमाचे सर्वत्र कौतुक होत असून, वाढदिवसही समाजोपयोगी कार्यातून साजरा करता येतो, असा सकारात्मक संदेश त्यांनी समाजासमोर ठेवला आहे.