मंगलमूर्ती चौकात बेशिस्त पार्किंगचा विळखा; वाहतूक कोंडीने नागरिक त्रस्त! प्रबुद्ध विहार परिसरात अपघातांचा धोका वाढला; वाहतूक पोलीस नेमून बेशिस्त वाहनचालकांवर कारवाई करण्याची नागरिकांची मागणी

अमळनेर : शहरातील कचेरी रोडवरून गलवाडे रोडकडे जाणाऱ्या मार्गावरील मंगलमूर्ती चौक तसेच प्रबुद्ध विहार परिसरात बेशिस्त पार्किंगमुळे वाहतुकीचा गंभीर प्रश्न निर्माण झाला आहे. या भागात रस्त्याच्या दुतर्फा मोठ्या प्रमाणावर चारचाकी व दुचाकी वाहने उभी केली जात असल्याने वाहतुकीला अडथळा निर्माण होत असून, नागरिकांना दररोज वाहतूक कोंडीचा सामना करावा लागत आहे.

मंगलमूर्ती चौक हा शहरातील अत्यंत वर्दळीचा मार्ग असून, या रस्त्यावरून दिवसभर वाहनांची मोठ्या प्रमाणावर ये-जा सुरू असते. मात्र, चौकात आणि बुद्ध विहाराजवळ अस्ताव्यस्त पद्धतीने वाहने उभी केली जात असल्याने रस्त्याची उपलब्ध जागा कमी होते. परिणामी वाहनचालकांना मार्ग काढताना मोठी कसरत करावी लागते. पादचाऱ्यांनाही जीव मुठीत धरून रस्त्यावरून मार्गक्रमण करावे लागत आहे.

या परिसरात वारंवार अपघात घडत असल्याची नागरिकांची तक्रार असून, बेशिस्त पार्किंगमुळे अपघातांचा धोका अधिकच वाढला आहे. विशेषतः गर्दीच्या वेळेत वाहतुकीचा पूर्णपणे खोळंबा होत असून, वाहनचालक आणि पादचारी दोघांनाही याचा त्रास सहन करावा लागत आहे.

या गंभीर समस्येकडे संबंधित प्रशासन आणि वाहतूक विभागाने तातडीने लक्ष देण्याची गरज आहे. मंगलमूर्ती चौकात तसेच प्रबुद्ध विहार परिसरात कायमस्वरूपी वाहतूक पोलीस कर्मचारी नेमण्यात यावा, रस्त्यावर अनधिकृतपणे वाहने उभी करणाऱ्या चालकांवर दंडात्मक कारवाई करावी आणि बेशिस्त पार्किंगला आळा घालण्यासाठी नियमित गस्त घालावी, अशी ठाम मागणी परिसरातील नागरिकांनी केली आहे.

अपघात होऊन जीवितहानी झाल्यानंतर उपाययोजना करण्यापेक्षा संभाव्य धोका ओळखून प्रशासनाने वेळीच ठोस पावले उचलावीत, अशी अपेक्षा नागरिकांकडून व्यक्त होत आहे.

तीन तासांच्या अथक प्रयत्नांनंतर चेंबरमध्ये अडकलेल्या दोन पिल्लांची सुखरूप सुटका अग्निशमन दलाची तत्परता; जेसीबीच्या साह्याने राबविले बचावकार्य

अमळनेर प्रतिनिधी : शहरातील ग्रामीण रुग्णालयाच्या बाजूला असलेल्या रस्त्यावरील चेंबरमध्ये कुत्र्याची दोन पिल्ले अडकल्याची घटना शुक्रवार, दि. १३ नोव्हेंबर रोजी दुपारी ४.५० वाजेच्या सुमारास निदर्शनास आली. पोलीस कर्मचारी सिद्धांत शिसोदे यांच्या ही बाब लक्षात येताच त्यांनी तत्काळ दूरध्वनीद्वारे अग्निशमन दलाला माहिती दिली.

माहिती मिळताच अग्निशमन दलाने तातडीने घटनास्थळी धाव घेतली. मुख्याधिकारी गणेश शिंदे यांच्या आदेशानुसार तसेच अग्निशमन अधिकारी गणेश गोसावी यांच्या मार्गदर्शनाखाली बचावकार्य सुरू करण्यात आले. चेंबरमध्ये अडकलेल्या दोन्ही पिल्लांना बाहेर काढण्यासाठी अग्निशमन दलाच्या कर्मचाऱ्यांनी तब्बल तीन तास अथक प्रयत्न केले. अखेर जेसीबीच्या साहाय्याने चेंबरमधून दोन्ही पिल्लांची सुखरूप सुटका करण्यात यश आले.

या बचावकार्यात अग्निशमन दलाचे कर्मचारी दिनेश बिऱ्हाडे, फारुक शेख, जफर पठाण, सत्यन संदानशिव, आकाश बाविस्कर आणि आकाश संदानशिव यांनी मोलाची भूमिका बजावली.

अग्निशमन दलाच्या कर्मचाऱ्यांनी दाखविलेली तत्परता, चिकाटी आणि प्राणिमात्रांप्रती असलेली संवेदनशीलता यामुळे दोन्ही पिल्लांना जीवदान मिळाले. या कामगिरीचे परिसरातून कौतुक होत आहे.

शिक्षकांच्या व्यावसायिक विकासासाठी दहा दिवसीय प्रशिक्षणाला सुरुवात साने गुरुजी विद्या मंदिरात निवड व वरिष्ठ श्रेणी प्रशिक्षण वर्गाचे आयोजन; गटशिक्षणाधिकारी कविता सुर्वे यांचे मार्गदर्शन

अमळनेर प्रतिनिधी : अमळनेर तालुका पंचायत समितीच्या शिक्षण विभागाच्या वतीने प्राथमिक, माध्यमिक व उच्च माध्यमिक शिक्षकांसाठी आयोजित करण्यात आलेल्या दहा दिवसीय निवड व वरिष्ठ श्रेणी प्रशिक्षण वर्गाला शुक्रवार, दि. १३ नोव्हेंबर रोजी शहरातील साने गुरुजी विद्या मंदिर येथे उत्साहात सुरुवात झाली. हे प्रशिक्षण दि. १३ ते २२ नोव्हेंबर या कालावधीत आयोजित करण्यात आले आहे.

या प्रशिक्षण वर्गाला गटशिक्षणाधिकारी कविता सुर्वे यांनी प्रत्यक्ष भेट देऊन उपस्थित शिक्षकांशी संवाद साधला. यावेळी त्यांनी शिक्षकांना मोलाचे मार्गदर्शन करताना अद्ययावत शैक्षणिक तंत्रज्ञान, नवीन अध्यापन पद्धती आणि ज्ञानाचा प्रभावी वापर करून विद्यार्थ्यांच्या शैक्षणिक गुणवत्तेत वाढ करण्याचे आवाहन केले.

या प्रशिक्षण वर्गाच्या यशस्वी नियोजनासाठी समन्वयक म्हणून किरण शिसोदे, तर सहसमन्वयक व विषयतज्ज्ञ म्हणून तुषार बाविस्कर, देवेंद्र पाटील, प्रशांत पाटील आणि किशोर पाटील जबाबदारी सांभाळत आहेत. तसेच निवड व वरिष्ठ श्रेणी प्रशिक्षणासाठी आनंदा बापू धनगर, सर्जेराव शिसोदे, सोपान भवरे, रवींद्र देवरे यांच्यासह इतर तज्ज्ञ शिक्षक मार्गदर्शन करीत आहेत.

या दहा दिवसीय प्रशिक्षणाच्या माध्यमातून शिक्षकांना शैक्षणिक क्षेत्रातील बदलते प्रवाह, आधुनिक अध्यापन तंत्र आणि व्यावसायिक कौशल्ये आत्मसात करण्याची संधी मिळणार असून, त्यांच्या सेवांतर्गत व व्यावसायिक विकासाला नवी दिशा मिळण्यास मदत होणार आहे.