अमळनेरात पुन्हा नाट्यसंस्कृती रुजविण्याचा प्रयत्न,,पण अमळनेरकरांचा प्रतिसाद आवश्यक अनेक वर्षांनंतर नाट्यगृहात ‘वेगळं असं काहीतरी’चे १ नोव्हेंबरला होणार सादरीकरण

अमळनेर :-एकेकाळी अमळनेर शहर म्हणजे नाट्य रसिकांची भूमी म्हणून ओळख असताना काळाच्या ओघात नियमित होणारी नाट्यश्रुखला खंडित झाल्याने शौकीन रसिकांना धुळे व जळगावची वाट धरावी लागत होती मात्र जळगावातील श्री एन्टरटेन्मेंट व धुळे येथील रंगदेवता थिएटर्स यांनी अमळनेरकर रसिकांची ही तहान भागविण्यासाठी मोठे धाडस दाखवीत एक दर्जेदार नाटक आणण्यासाठी पुढाकार घेतला आहे.

       यानिमित्ताने साहित्य, कला आणि नाट्यसंस्कृतीची समृद्ध परंपरा लाभलेल्या अमळनेर शहरात व्यावसायिक नाटकांची चळवळ पुन्हा बळकट होणार आहे.सदर नाट्य संस्थेकडून रविवार, १ नोव्हेंबर रोजी ‘वेगळं असं काहीतरी’ या दोन अंकी कौटुंबिक व मनोरंजक नाटकाचा प्रयोग सादर होणार आहे. शहरातील छत्रपती शिवाजी महाराज नाट्यगृहात रात्री ८ वाजता या प्रयोगाच्या सादरीकरणाला सुरुवात होईल.

     दरम्यान अमळनेर शहरात दिवंगत उद्योगपती स्वर्गीय आर के दादा पाटील यांनी त्याकाळी नवरात्र उत्सव तथा इतर सांस्कृतिक कार्यक्रमांच्या माध्यमातून अनेक दर्जेदार नाटक अमळनेरात आणून मोठी मेजवानी अमळनेराना दिली.त्यानंतर माजी नगराध्यक्ष विनोद भैय्या पाटील यांनी देखील नाटक तथा अनेक सांस्कृतिक कार्यक्रम आयोजित करून ही परंपरा टिकवून ठेवली मात्र दरम्यानच्या काळात नाटक येण्याची परंपरा खंडित झाली.काही महिन्यांपूर्वी जयनिल फाऊंडेशनचे अध्यक्ष गौतम अनिल पाटील व वरुण राजेश पाटील यांनी छत्रपती संभाजी महाराज जयंतीला धर्मवीर छत्रपती संभाजी राजे हे महानाट्य अमळनेरात आणून रसिकांचे मन जिंकले.

         नाटकांची ओढ वाढली असताना अमळनेरमधील नाट्यरसिकांना दर्जेदार मराठी नाटकाचा आनंद घेण्यासाठी मुंबई, पुणे, नाशिक, धुळे व जळगाव यासारख्या शहरात जावे लागते. मात्र, आता व्यावसायिक नाटके, फोक कार्यक्रम आणि नामवंत कलाकारांचे कार्यक्रम थेट अमळनेरमध्ये आणण्याचा प्रयत्न श्री एन्टरटेन्मेंट व रंगदेवता थिएटर्सकडून केला जात आहे. शहरातील समृद्ध नाट्यपरंपरेला नवसंजीवनी देण्याच्या उद्देशाने हा उपक्रम राबविण्यात येत आहे.

         नाट्यसंस्कृती टिकविण्यासाठी केवळ प्रयोगांचे आयोजन पुरेसे नसून रसिक प्रेक्षकांची उपस्थिती आणि प्रतिसादही महत्त्वाचा आहे. त्यामुळे अमळनेरकरांनी सहकुटुंब नाट्यगृहात उपस्थित राहावे आणि या सांस्कृतिक चळवळीला बळ द्यावे, असे आवाहन आयोजकांनी केले आहे.

नाट्यप्रयोगासाठी भटू चौधरी (मो. : ७०२००५२३३८), विक्रम पाटील (मो. : ९८९२०३०१०४) व चंद्रशेखर पाटील (मो. : ९६६५३२५५५५) यांच्याशी संपर्क साधण्याचे आवाहन करण्यात आले आहे.

अमळनेरची स्वच्छता विनामूल्य करण्यास ‘आप’ची तयारी; नगरपरिषदेला दोन महिन्यांचे आव्हान कचरा संकलनाचा अतिरिक्त खर्च वाचवून निधी शहर विकासासाठी वापरण्याची मागणी; महेंद्र साळुंके व रामकृष्ण पाटील यांचे आवाहन

अमळनेर प्रतिनिधी : संत गाडगे महाराज यांच्या स्वच्छता आणि समाजसेवेच्या विचारांचा वारसा पुढे नेत अमळनेर शहर कचरामुक्त व स्वच्छ करण्यासाठी आम आदमी पार्टीच्या पदाधिकाऱ्यांनी पुढाकार घेतला आहे. शहरातील कचरा संकलन व स्वच्छतेचे काम विनामूल्य किंवा केवळ प्रत्यक्ष खर्चात करण्याची तयारी ‘आप’चे तालुकाध्यक्ष महेंद्र साळुंके आणि तालुका उपाध्यक्ष रामकृष्ण चिंतामण पाटील यांनी दर्शविली आहे.
शहरातील कचरा संकलन आणि स्वच्छतेसाठी नगरपरिषदेकडून लाखो रुपयांची कंत्राटे काढली जातात. मात्र, या कामांसाठी होणारा अतिरिक्त खर्च टाळून उपलब्ध निधी शहरातील रस्ते, पाणीपुरवठा, आरोग्य आणि इतर मूलभूत सुविधांच्या विकासासाठी वापरता येऊ शकतो, अशी भूमिका ‘आप’च्या पदाधिकाऱ्यांनी मांडली आहे.
टेंडरऐवजी प्रत्यक्ष खर्चात स्वच्छतेची तयारी
कचरा संकलन व स्वच्छतेसाठी कंत्राटदारांना मोठ्या प्रमाणावर निधी देण्याऐवजी हे काम सामाजिक बांधिलकीतून करण्याची तयारी असल्याचे पदाधिकाऱ्यांनी सांगितले. या कामासाठी आवश्यक असणारा प्रत्यक्ष खर्च उपलब्ध करून दिल्यास कोणताही नफा किंवा अतिरिक्त मोबदला न घेता शहर स्वच्छ करण्याचा प्रयत्न करू, असे त्यांनी स्पष्ट केले.
वाचलेला निधी शहराच्या विकासासाठी वापरा
सत्ता किंवा पद नसले तरी शहराच्या स्वच्छतेची आणि नागरिकांच्या आरोग्याची जबाबदारी प्रत्येक सामाजिक संघटनेने स्वीकारली पाहिजे. कंत्राट प्रक्रियेतील अनावश्यक खर्च कमी करून तो निधी शहराच्या इतर विकासकामांसाठी वापरावा, अशी मागणीही त्यांनी केली.
नगरपरिषदेला दोन महिन्यांचे प्रायोगिक आव्हान
आपली भूमिका प्रत्यक्ष कृतीतून सिद्ध करण्यासाठी नगरपरिषदेने कचरा संकलन व स्वच्छतेची जबाबदारी दोन महिन्यांच्या प्रायोगिक तत्त्वावर ‘आप’च्या पथकाकडे सोपवावी, असे आवाहन महेंद्र साळुंके व रामकृष्ण चिंतामण पाटील यांनी केले आहे. या कालावधीत स्वच्छतेच्या कामाचा दर्जा आणि परिणाम प्रत्यक्ष पाहता येतील, असा विश्वास त्यांनी व्यक्त केला.
संत गाडगे महाराज यांच्या विचारांनुसार स्वच्छता ही केवळ प्रशासनाची जबाबदारी नसून ती प्रत्येक नागरिकाची सामाजिक जबाबदारी आहे. या भूमिकेतून ‘आप’ने मांडलेल्या प्रस्तावावर नगरपरिषद प्रशासन काय भूमिका घेते, याकडे आता शहरवासीयांचे लक्ष लागले आहे.

 डि. आर. कन्या शाळेच्या कबड्डी संघाची दुहेरी विजेतेपदाला गवसणी; खेळाडूंचा पी.आय. दत्तात्रय निकम यांच्या हस्ते सन्मान जिल्हास्तरीय स्पर्धेसाठी संघ पात्र; २९ व ३० ऑक्टोबरला रंगणार पुढील सामने

अमळनेर प्रतिनिधी : क्रीडा व युवक सेवा संचालनालय, महाराष्ट्र राज्य, पुणे तसेच जिल्हा क्रीडा अधिकारी कार्यालय यांच्या वतीने आयोजित शासकीय शालेय कबड्डी स्पर्धेत अमळनेर येथील नामवंत खानदेश शिक्षण मंडळ संचलित श्रीमती द्रौ. रा. कन्या शाळेच्या कबड्डी संघाने घवघवीत यश संपादन केले आहे. माध्यमिक मुलींच्या संघाने दोन्ही गटांत विजेतेपद मिळवत दुहेरी मुकुट पटकावला असून जिल्हास्तरीय स्पर्धेसाठी पात्रता मिळविली आहे.

या यशाबद्दल संघातील खेळाडूंचा अमळनेर पोलीस ठाण्याचे पोलीस निरीक्षक श्री. दत्तात्रय निकम यांच्या हस्ते पुष्पगुच्छ व सन्मानचषक देऊन गौरव करण्यात आला. यावेळी त्यांनी खेळाडूंचे कौतुक करून आगामी जिल्हास्तरीय स्पर्धेसाठी शुभेच्छा दिल्या.

विजयी संघात कर्णधार अश्मिरा शाकिर शेख, उपकर्णधार पुनवी निकुंबे, कावेरी पाटील, कल्याणी पारधी, केतकी देशपांडे, इशा पाटील, मयुरी पवार, लीना गुरव, कामिनी सोनवणे, वैष्णवी पाटील, समीक्षा जाधव, रिशिका गोयल, स्नेहल पाटील आणि मोनिका भोई या खेळाडूंचा समावेश आहे.

या संघाची जिल्हास्तरीय स्पर्धा छत्रपती शिवाजी महाराज क्रीडा संकुल येथे २९ व ३० ऑक्टोबर २०२६ रोजी मॅटवर होणार आहे. या स्पर्धेतही संघाने उत्कृष्ट कामगिरी करावी, अशी अपेक्षा व्यक्त करण्यात येत आहे.

खेळाडूंच्या या यशाबद्दल शालेय समितीचे अध्यक्ष भाऊसाहेब जितेंद्र जैन, मुख्याध्यापिका सौ. एस. एस. सूर्यवंशी, उपमुख्याध्यापक श्री. एस. आर. शिंगाणे, पर्यवेक्षक श्री. एस. पी. वाघ, शिक्षक प्रतिनिधी सौ. पी. पी. जोशी, कार्यालय प्रमुख श्री. शाम पवार, श्री. एस. एस. माळी, श्रीमती आर. एस. सोनवणे आणि श्री. किरण सनेर यांनी अभिनंदन करून पुढील वाटचालीस शुभेच्छा दिल्या.

संघाला क्रीडा विभागप्रमुख श्रीमती आर. एस. सोनवणे यांनी मार्गदर्शन केले. त्यांच्या मार्गदर्शनाखाली खेळाडूंनी घेतलेल्या मेहनतीचे हे फलित असल्याची भावना व्यक्त करण्यात आली.

मनोज पाटील यांची नाशिक पश्चिम विभागाच्या काँग्रेस प्रभारीपदी नियुक्ती प्रदेशाध्यक्ष हर्षवर्धन सपकाळ यांच्याकडून जबाबदारी; अमळनेरच्या काँग्रेस कार्यकर्त्यांकडून अभिनंदन

अमळनेर प्रतिनिधी : अमळनेर येथील काँग्रेसचे ज्येष्ठ कार्यकर्ते तथा माजी नगरसेवक मनोज भाऊराव पाटील यांची महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांच्या २६ ऑक्टोबर २०२६ रोजीच्या पत्रान्वये नाशिक जिल्ह्याच्या पश्चिम विभागाच्या काँग्रेस पक्षाच्या प्रभारीपदी नियुक्ती करण्यात आली आहे. या नियुक्तीमुळे अमळनेरच्या राजकीय वर्तुळात आनंद व्यक्त होत असून, तालुक्यातील काँग्रेस पदाधिकारी व कार्यकर्त्यांनी त्यांचे अभिनंदन केले आहे.

मनोज पाटील यांनी अमळनेर नगरपरिषदेचे नगरसेवक म्हणून काम करताना बांधकाम समितीचे सभापतीपदही भूषविले आहे. या कार्यकाळात त्यांनी शहरातील नागरिकांच्या प्रश्नांना प्राधान्य देत विविध विकासकामांसाठी प्रयत्न केले. त्यांची काम करण्याची पद्धत, कार्यकर्त्यांना जोडून ठेवण्याची हातोटी, कर्तव्यदक्षता आणि संघटनात्मक कामातील सातत्य यामुळे त्यांनी काँग्रेस पक्षात आपली स्वतंत्र ओळख निर्माण केली आहे.

काँग्रेस पक्षाची संघटनात्मक बांधणी मजबूत करण्यासाठी त्यांनी केलेले प्रयत्न आणि कार्यकर्त्यांशी असलेला समन्वय लक्षात घेऊन प्रदेशाध्यक्ष हर्षवर्धन सपकाळ यांनी त्यांच्यावर नाशिक जिल्ह्याच्या पश्चिम विभागाच्या प्रभारीपदाची जबाबदारी सोपविली आहे. या नियुक्तीमुळे पक्षसंघटनेला बळ मिळेल, असा विश्वास काँग्रेस कार्यकर्त्यांकडून व्यक्त करण्यात येत आहे.

मनोज पाटील हे अमळनेरचे माजी विधान परिषद सभापती स्वर्गीय दाजीबा पर्वत पाटील यांचे सुपुत्र आहेत. राजकीय व सामाजिक कार्याचा वारसा लाभलेल्या मनोज पाटील यांच्याकडे आता नाशिक जिल्ह्यातील पक्षसंघटना अधिक सक्षम करण्याची महत्त्वपूर्ण जबाबदारी आली आहे.

या नियुक्तीबद्दल अमळनेर तालुका काँग्रेसचे पदाधिकारी भागवत सूर्यवंशी, गजेंद्र साळुंखे, सुलोचना वाघ, राजेंद्र चौधरी सर, संदीप घोरपडे, बन्सीलाल भागवत, शरद पाटील, कैलास पाटील, प्रवीण जैन, सईद तेली, डॉ. रवींद्र पाटील, सुधाकर भैसे, पी. वाय. पाटील, शिंदे, दिलीप पाटील, राकेश पवार, तौसीब तेली यांच्यासह काँग्रेसप्रेमींनी मनोज पाटील यांचे अभिनंदन करून पुढील वाटचालीस शुभेच्छा दिल्या.

रत्नाप्रिंप्री ३३/११ केव्ही उपकेंद्रातील नवीन ट्रान्सफॉर्मरचे आमदार अनिल पाटील यांच्या हस्ते लोकार्पण..! परिसरातील शेतकरी व ग्रामस्थांना मिळणार सुरळीत वीजपुरवठा; अनेक दिवसांची मागणी पूर्ण झाल्याने ग्रामस्थांमध्ये आनंद

अमळनेर:-विधानसभा मतदारसंघातील रत्नाप्रिंप्री, ता. पारोळा येथील ३३/११ केव्ही वीज उपकेंद्रातील नवीन ट्रान्सफॉर्मरचा लोकार्पण सोहळा सोमवार, दि. २६ ऑक्टोबर रोजी सकाळी १० वाजता महाराष्ट्र राज्याचे माजी मंत्री तथा आमदार अनिल भाईदास पाटील यांच्या शुभहस्ते उत्साहपूर्ण वातावरणात पार पडला.

         या नवीन ट्रान्सफॉर्मरमुळे रत्नाप्रिंप्रीसह होळप्रिंप्री व दबाप्रिंप्री परिसरातील शेती आणि घरगुती वीजपुरवठा अधिक सुरळीत होण्यास मदत होणार आहे. अनेक दिवसांपासून ग्रामस्थांकडून होत असलेली ही मागणी पूर्ण झाल्याने परिसरातील नागरिकांनी समाधान व आनंद व्यक्त केला.

 शेतकऱ्यांच्या अपेक्षा उंचावल्या-

     शेतीसाठी वीजपुरवठा हा शेतकऱ्यांच्या दैनंदिन कामकाजाचा अत्यंत महत्त्वाचा भाग आहे. त्याचप्रमाणे घरगुती वापरासाठीही अखंडित व सुरळीत वीजपुरवठा आवश्यक आहे. या पार्श्वभूमीवर रत्नाप्रिंप्री येथील उपकेंद्रात नवीन ट्रान्सफॉर्मर कार्यान्वित झाल्याने परिसरातील वीजपुरवठ्याची व्यवस्था अधिक सक्षम होण्यास हातभार लागणार आहे. त्यामुळे शेतकरी, व्यावसायिक आणि सर्वसामान्य ग्रामस्थांना दिलासा मिळण्याची अपेक्षा व्यक्त केली जात आहे.

       या लोकार्पण सोहळ्याप्रसंगी कार्यकारी अभियंता प्रदीप ग्रामोपाध्याय, उपकार्यकारी अभियंता अस्मार, उपकार्यकारी अभियंता विजय सहारे, सहाय्यक अभियंता गौतम मोरे, सहाय्यक अभियंता सचिन बागुल आणि सहाय्यक अभियंता अमित बोकाडे यांच्यासह वीज वितरण विभागाचे अधिकारी उपस्थित होते. यावेळी रत्नाप्रिंप्री, होळप्रिंप्री व दबाप्रिंप्री येथील ग्रामस्थ, राष्ट्रवादी काँग्रेस पक्षाचे कार्यकर्ते, महायुतीचे पदाधिकारी, कार्यकर्ते आणि विविध लोकप्रतिनिधी मोठ्या संख्येने सहभागी झाले होते.

        या कार्यक्रमाचे आयोजन संदीप मुरलीधर पाटील, रामकृष्ण मराठे, इंजि. भिकनराव हिलाल पाटील, अधिकार निंबा पाटील आणि प्रा. आर. व्ही. पाटील यांच्या माध्यमातून करण्यात आले. या उपक्रमाच्या निमित्ताने परिसरातील ग्रामस्थांनी एकत्र येत आनंद व्यक्त केला.

       “सुरळीत वीजपुरवठा, सक्षम शेती आणि गावांच्या विकासाला नवी दिशा!” या अपेक्षेसह रत्नाप्रिंप्री येथील या लोकार्पण सोहळ्याची परिसरात चर्चा होत असून, नवीन ट्रान्सफॉर्मरमुळे स्थानिक नागरिकांना दिलासा मिळेल, अशी आशा व्यक्त केली जात आहे.

अमळनेर तालुका क्रीडा संकुलाच्या सर्वांगीण विकासासाठी आढावा बैठक संपन्न आमदार अनिल पाटील यांच्या उपस्थितीत महत्त्वपूर्ण चर्चा

अमळनेर:-शहरातील तालुका क्रीडा संकुलाच्या सर्वांगीण विकासासाठी माजी मंत्री तथा आमदार अनिल भाईदास पाटील यांच्या प्रमुख उपस्थितीत अमळनेर येथील शासकीय विश्रामगृहात महत्त्वपूर्ण आढावा बैठक घेण्यात आली.
या बैठकीस खान्देश शिक्षण मंडळाचे कार्याध्यक्ष नीरज अग्रवाल, कार्योपाध्यक्ष जितेंद्र जैन तसेच संचालक योगेश मुंदडे व मान्यवर पदाधिकारी उपस्थित होते. यावेळी क्रीडा संकुलाच्या माध्यमातून आगामी काळात राबविण्यात येणाऱ्या विविध महत्त्वाकांक्षी योजना, नाविन्यपूर्ण उपक्रम आणि क्रीडा सुविधांच्या विस्ताराबाबत सविस्तर चर्चा करण्यात आली.
तसेच आजपर्यंत राबविण्यात आलेल्या योजनांचा आढावा घेत, उपलब्ध क्रीडा साहित्य, सुविधांची सद्यस्थिती आणि त्यामध्ये असलेल्या त्रुटी यांवरही सखोल विचारविनिमय करण्यात आला.

ध्येय एकच – अमळनेरच्या क्रीडा क्षेत्राला नवी उंची

अमळनेर तालुका क्रीडा संकुल हे केवळ क्रीडा सुविधा उपलब्ध करून देणारे केंद्र न राहता, उद्याच्या सक्षम खेळाडूंच्या स्वप्नांना बळ देणारे, त्यांच्या गुणवत्तेला वाव देणारे आणि जिल्ह्याच्या क्रीडा वैभवात मानाचा तुरा रोवणारे केंद्र बनावे, हीच या प्रयत्नांमागील खरी भावना आहे.जळगाव जिल्ह्यातील अमळनेर तालुका क्रीडा संकुल हे दर्जेदार, आधुनिक, अभिनव आणि जिल्ह्यातील एक आदर्श क्रीडा संकुल म्हणून नावारूपास यावे, यासाठी सर्व संबंधितांनी एकजुटीने, नियोजनबद्ध पद्धतीने आणि सातत्यपूर्ण प्रयत्न करणे आवश्यक आहे असे मत आमदार अनिल पाटील यांनी व्यक्त केले.
या अनुषंगाने आमदारांनी उपस्थित अधिकारीवर्गासोबत विविध विषयांवर चर्चा करून क्रीडा संकुलाच्या सद्यस्थितीचा आढावा घेण्यात आला. उपलब्ध सुविधांमध्ये सुधारणा करून भविष्यातील गरजांनुसार अधिक सक्षम व्यवस्था निर्माण करण्यावर भर देण्यात येणार असल्याचे यावेळी सांगण्यात आले.यावेळी क्रीडा क्षेत्रातील अधिकारी व पदाधिकारी उपस्थित होते.

क्रीडा क्षेत्राला नवी दिशा देण्यासाठी सारे कटिबद्ध

सक्षम क्रीडा सुविधा म्हणजे सक्षम खेळाडू आणि सक्षम खेळाडू म्हणजे उज्ज्वल भविष्य या ध्येयाने अमळनेरच्या क्रीडा क्षेत्राला नवी दिशा देण्यासाठी सर्वजण कटिबद्ध असल्याचे आमदार अनिल पाटील यांनी सांगितले.

धुळे रस्त्यावरील प्रवेशद्वाराला ‘छत्रपती शिवाजी महाराज प्रवेशद्वार’ नाव देण्याची शिवप्रेमींची मागणी २९ ऑक्टोबरच्या सर्वसाधारण सभेत अधिकृत नामकरणाचा विषय घेण्याची मागणी; नगरपालिकेत ठिय्या आंदोलनासह जोरदार घोषणाबाजी

अमळनेर प्रतिनिधी :अमळनेर शहरातील धुळे रस्त्यावरील मुख्य प्रवेशद्वाराला हिंदवी स्वराज्याचे संस्थापक छत्रपती शिवाजी महाराज यांचे नाव देऊन त्याचे अधिकृत नामकरण करण्यात यावे, या मागणीसाठी २७ ऑक्टोबर रोजी शहरातील शिवप्रेमींनी अमळनेर नगरपालिकेत ठिय्या आंदोलन केले. यावेळी शिवप्रेमींनी जोरदार घोषणाबाजी करत प्रशासनाचे लक्ष वेधले. तसेच, येत्या २९ ऑक्टोबर रोजी होणाऱ्या नगरपरिषदेच्या सर्वसाधारण सभेत हा विषय चर्चेसाठी घेऊन प्रवेशद्वाराच्या अधिकृत नामकरणाची घोषणा करावी, अशी मागणी मुख्याधिकाऱ्यांना निवेदनाद्वारे करण्यात आली.

धुळे रस्त्यावरील शहराच्या मुख्य प्रवेशद्वाराला छत्रपती शिवाजी महाराज यांचे नाव देण्यात यावे, ही मागणी शिवप्रेमींकडून सातत्याने मांडली जात आहे. यापूर्वीही २६ मे २०२६ आणि २४ सप्टेंबर २०२६ रोजी यासंदर्भात नगरपालिकेला निवेदने देण्यात आली होती. मात्र, मागणीवर अद्याप अधिकृत निर्णय जाहीर झालेला नसल्याने शिवप्रेमींनी पुन्हा एकदा आंदोलनाचा मार्ग स्वीकारला.

छत्रपती शिवाजी महाराज हे महाराष्ट्राच्या अस्मितेचे, स्वराज्याचे आणि शौर्याचे प्रतीक आहेत. त्यामुळे शहराच्या मुख्य प्रवेशद्वाराला त्यांचे नाव देणे ही शिवप्रेमींची भावना असून, या मागणीची दखल घेऊन नगरपरिषदेने ठोस निर्णय घ्यावा, अशी भूमिका आंदोलनकर्त्यांनी मांडली.

**२९ ऑक्टोबरच्या सभेकडे लक्ष**

नगरपरिषदेच्या २९ ऑक्टोबर रोजी होणाऱ्या सर्वसाधारण सभेत प्रवेशद्वाराच्या नामकरणाचा विषय अधिकृतपणे समाविष्ट करून त्यावर निर्णय घ्यावा, अशी प्रमुख मागणी निवेदनातून करण्यात आली आहे. वारंवार निवेदने देऊनही प्रश्न प्रलंबित असल्याने आता सर्वसाधारण सभेत याबाबत स्पष्ट भूमिका जाहीर होणार का, याकडे शहरातील शिवप्रेमींचे लक्ष लागले आहे.

शहराच्या मुख्य प्रवेशद्वाराला छत्रपती शिवाजी महाराज यांचे नाव देण्याच्या मागणीला आता आंदोलनाचे स्वरूप प्राप्त झाले असून, नगरपरिषद प्रशासन या मागणीवर कोणती भूमिका घेते आणि सर्वसाधारण सभेत काय निर्णय होतो, हे पाहणे महत्त्वाचे ठरणार आहे.

तालुकास्तरीय विज्ञान प्रदर्शनात साने गुरुजी कन्या हायस्कूलची गायत्री बोरसे प्रथम

अमळनेर : येथील अमळनेर शिक्षण प्रसारक मंडळ संचालित, साने गुरुजी कन्या हायस्कूलची इयत्ता १० वीची विद्यार्थिनी कु. गायत्री धनराज बोरसे हिने ५४ व्या तालुकास्तरीय विज्ञान प्रदर्शनात माध्यमिक व उच्च माध्यमिक गटातून प्रथम क्रमांक पटकावला आहे. भिका यशोद चौधरी हायस्कूल, शिरसाळे येथे या प्रदर्शनाचे शानदार आयोजन करण्यात आले होते.

गायत्रीने ‘शाश्वत आणि विकसित भारतासाठी विज्ञान, तंत्रज्ञान आणि नावोन्मेष’ या मुख्य विषयांतर्गत उत्कृष्ट वैज्ञानिक प्रकल्प सादर केला. तिला या प्रकल्पासाठी मार्गदर्शक विज्ञान शिक्षक श्री. दीपक रामभाऊ महाजन यांचे मोलाचे मार्गदर्शन लाभले. गायत्रीच्या या यशाबद्दल सर्व स्तरांतून कौतुकाचा वर्षाव होत आहे.

शाळेत आयोजित करण्यात आलेल्या विशेष गौरव सोहळ्यात अमळनेर शिवण प्रसारक मंडळाचे सचिव मा. श्री. दादासाहेब संदीप घोरपडे, उपाध्यक्ष मा. श्री. आप्पासाहेब गुणवंतराव पाटील, संचालक मंडळ सदस्य ॲड. नानासाहेब श्री. अशोक बाविस्कर, शिक्षणतज्ज्ञ मा. श्री. गोकुळ पाटील यांच्या हस्ते गायत्रीचा सत्कार करण्यात आला.

याप्रसंगी साने गुरुजी विद्या मंदिरचे मुख्याध्यापक श्री. संजीव पाटील, साने गुरुजी कन्या हायस्कूलच्या मुख्याध्यापिका श्रीमती अनिता बोरसे आणि ज्येष्ठ शिक्षक श्री. संजय जगताप यांनी गायत्रीला पुढील जिल्हास्तरीय स्पर्धेसाठी शुभेच्छा दिल्या. कार्यक्रमाचे सुंदर सूत्रसंचालन श्री. योगेश मोरे सर यांनी केले, तर उपस्थितांचे आभार प्रदर्शन श्री. किशोर अहिरराव सर यांनी केले.

सरस्वती माध्यमिक विद्यालयातील विद्यार्थ्यांना शैक्षणिक साहित्याचे वाटप डॉ. रवींद्र जैन व डॉ. मंजुश्री जैन यांचा स्तुत्य उपक्रम; पाचवी ते दहावीच्या विद्यार्थ्यांना इंग्लिश ग्रामर पुस्तके व कंपास पेट्यांचे वितरण

सडावण, प्रतिनिधी : विद्यार्थ्यांच्या शैक्षणिक प्रगतीला प्रोत्साहन देण्याच्या उद्देशाने जीवनतारा हॉस्पिटल, अमळनेर येथील डॉ. रवींद्र जैन व डॉ. मंजुश्री जैन यांच्या वतीने रुक्मिणीबाई प्रतिष्ठान संचलित सरस्वती माध्यमिक विद्यालय, सडावण (ता. अमळनेर) येथे पाचवी ते दहावीच्या सर्व विद्यार्थ्यांना इंग्लिश ग्रामर पुस्तके व कंपास पेट्यांचे वितरण करण्यात आले.

विद्यार्थ्यांना शिक्षणासाठी आवश्यक शैक्षणिक साहित्य उपलब्ध व्हावे, त्यांना अभ्यासाची गोडी लागावी आणि शैक्षणिक वाटचालीत प्रोत्साहन मिळावे, या दृष्टीने हा उपक्रम राबविण्यात आला. शैक्षणिक साहित्याच्या माध्यमातून विद्यार्थ्यांना अभ्यासासाठी मदत मिळणार असून, अशा उपक्रमांमुळे शिक्षणाविषयी सकारात्मक दृष्टिकोन निर्माण होण्यास हातभार लागतो.

कार्यक्रमाच्या प्रारंभी विद्यालयाचे मुख्याध्यापक उल्हास पाटील यांनी उपस्थित पाहुण्यांचे स्वागत केले. कार्यक्रमाचे सूत्रसंचालन उपशिक्षिका वैशाली शेवाळे यांनी केले.

विद्यार्थ्यांच्या शैक्षणिक हितासाठी राबविण्यात आलेला हा उपक्रम समाजातील शैक्षणिक जाणीव आणि विद्यार्थ्यांप्रती असलेली बांधिलकी अधोरेखित करणारा ठरला.

हिंगोणे खु. प्र. ज. येथे महर्षी वाल्मीक जयंती उत्साहात साजरी  महर्षी वाल्मीक मित्र मंडळाच्या वतीने विविध कार्यक्रमांचे आयोजन; प्रतिमापूजन करून अभिवादन

हिंगोणे खु. प्र. ज., प्रतिनिधी : हिंगोणे खु. प्र. ज. येथे महर्षी वाल्मीक मित्र मंडळाच्या वतीने महर्षी वाल्मीक जयंती मोठ्या उत्साहात आणि जल्लोषात साजरी करण्यात आली. जयंतीनिमित्त महर्षी वाल्मीक यांच्या प्रतिमेचे पूजन करून त्यांना अभिवादन करण्यात आले.

यावेळी महर्षी वाल्मीक यांच्या जीवनकार्याचा, साहित्यिक योगदानाचा आणि महान विचारांचा गौरव करण्यात आला. त्यांच्या आदर्शांचा अंगीकार करून समाजात नैतिक मूल्ये, एकता आणि बंधुभाव जपण्याचे आवाहन उपस्थितांनी केले.

महर्षी वाल्मीक जयंतीनिमित्त गावात उत्साहाचे वातावरण निर्माण झाले होते. या कार्यक्रमात महर्षी वाल्मीक मित्र मंडळाचे पदाधिकारी, सदस्य, ग्रामस्थ आणि समाजबांधव मोठ्या संख्येने सहभागी झाले होते.

महर्षी वाल्मीक यांच्या विचारांचा समाजात प्रसार करणे, सामाजिक एकोपा वाढविणे आणि बंधुभाव व सलोख्याची भावना दृढ करणे, हा जयंती उत्सवाचा मुख्य उद्देश असल्याचे यावेळी सांगण्यात आले. उत्साहपूर्ण वातावरणात जयंती उत्सव साजरा करण्यात आला.