अमळनेरात बुधवारपासून ‘प्रगतिशील महाराष्ट्र २०२६’चे भव्य प्रदर्शन केंद्र व राज्य सरकारच्या ७० हून अधिक योजनांची माहिती एकाच छताखाली; खासदार स्मिता वाघ यांचा पुढाकार

अमळनेर (प्रतिनिधी) : केंद्र व राज्य सरकारच्या विविध योजना, उपक्रम, आधुनिक तंत्रज्ञान आणि विकासकामांची माहिती सर्वसामान्य नागरिकांपर्यंत पोहोचविण्याच्या उद्देशाने ‘प्रगतिशील महाराष्ट्र २०२६’ या भव्य तीन दिवसीय प्रदर्शनाचे आयोजन अमळनेर येथे करण्यात आले आहे. खासदार स्मिता उदय वाघ यांच्या नेतृत्व व मार्गदर्शनाखाली दिल्ली येथील फ्रेंड्ज एक्झिबिशन अँड प्रमोशन संस्थेच्या वतीने हे प्रदर्शन ७ ते ९ ऑक्टोबरदरम्यान कलागुरू मंगल कार्यालयात होणार आहे.

प्रदर्शनाची माहिती देताना खासदार स्मिता वाघ यांनी सांगितले की, पंतप्रधान नरेंद्र मोदी तसेच मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या नेतृत्वाखाली देश व राज्याच्या प्रगतीचे विविध पैलू या प्रदर्शनातून नागरिकांना पाहता येणार आहेत. प्रदर्शन दररोज सकाळी १० ते सायंकाळी ५ वाजेपर्यंत सर्वांसाठी खुले राहणार आहे.

गतवर्षी जळगाव येथील जी.एस. मैदानावर झालेल्या प्रदर्शनाला नागरिकांचा उत्स्फूर्त प्रतिसाद मिळाला होता. त्याचा लाभ अमळनेर व परिसरातील नागरिकांनाही मिळावा, या उद्देशाने यंदा अमळनेर येथे आयोजन करण्यात आले आहे. एकाच जिल्ह्यात हे प्रदर्शन दुसऱ्यांदा होत असल्याचेही त्यांनी सांगितले.

या प्रदर्शनात कृषी व फलोत्पादन, विज्ञान व तंत्रज्ञान, संरक्षण तंत्रज्ञान, वित्त, बँकिंग व विमा, आरोग्य, वाणिज्य व व्यापार, ऊर्जा व पर्यावरण, शिक्षण, ग्राहक जागरूकता, माहिती व दळणवळण तंत्रज्ञान, वाहतूक, रेल्वे, पर्यटन, हस्तकला व हातमाग, रसायने व खते आदी क्षेत्रांतील योजनांची माहिती मिळणार आहे. केंद्र व राज्य सरकारच्या विविध विभागांचे अधिकारी, आयएएस अधिकारी, संचालक तसेच वैज्ञानिक नागरिकांना योजनांची माहिती देण्यासाठी उपस्थित राहणार आहेत.

शेतकरी, विद्यार्थी, महिला, युवक आणि उद्योजकांसह जळगाव जिल्ह्यातील नागरिकांनी या प्रदर्शनाला मोठ्या संख्येने भेट देऊन शासनाच्या योजनांची माहिती घ्यावी, असे आवाहन खासदार स्मिता वाघ यांनी केले.

७ ऑक्टोबरला सकाळी ११.३० वाजता उद्घाटन

प्रदर्शनाचा उद्घाटन सोहळा ७ ऑक्टोबर रोजी सकाळी ११.३० वाजता होणार आहे. खासदार स्मिता वाघ यांच्या हस्ते तसेच जिल्ह्यातील विविध लोकप्रतिनिधींच्या उपस्थितीत उद्घाटन करण्यात येणार असल्याची माहिती फ्रेंड्ज एक्झिबिशन अँड प्रमोशन संस्थेचे चेअरमन आनंद पाल यांनी दिली.

पत्रकार परिषदेला अखिला श्रीनिवासन, दीपकसिंह मेहता, साक्षी सैनी, दत्ता थोरे, संतोष पवार, नीरज अग्रवाल, डॉ अनिल शिंदे आदी उपस्थित होते.

वसतिगृहातील २४ तास सेवाभावाची दखल; चारुशीला महाजन यांना आदर्श अधिकारी-कर्मचारी पुरस्कार विद्यार्थिनींची सुरक्षितता, शिक्षण, आरोग्य आणि सर्वांगीण विकासासाठी अहोरात्र केलेल्या उल्लेखनीय कार्याचा शासनाकडून गौरव

जळगाव (प्रतिनिधी) : आदिवासी विकास विभागाच्या यावल प्रकल्प कार्यालयांतर्गत अमळनेर तालुक्यातील दहिवद शासकीय आश्रमशाळेत अधीक्षिका म्हणून कार्यरत असलेल्या चारुशीला महाजन यांना उत्कृष्ट, सातत्यपूर्ण आणि प्रामाणिक सेवेसाठी ‘आदर्श अधिकारी-कर्मचारी पुरस्कार’ जाहीर झाला आहे. जळगाव जिल्हाधिकारी कार्यालयात त्यांचा यथोचित सत्कार करण्यात आला.

पिंगळवाडे आश्रमशाळेपासून सुरू झालेल्या सेवाप्रवासात महाजन यांनी विद्यार्थिनींची सुरक्षितता, शिक्षण, आरोग्य आणि सर्वांगीण विकासाला नेहमीच प्राधान्य दिले. मुलींच्या वसतिगृहाची संवेदनशील जबाबदारी सांभाळताना त्यांनी वसतिगृहाला घर मानून २४ तास सेवाभावाने कर्तव्य बजावले.

वैयक्तिक अडचणी आणि कौटुंबिक जबाबदाऱ्यांवर मात करत त्यांनी केलेल्या सातत्यपूर्ण व प्रामाणिक सेवेची शासनाने घेतलेली दखल हा त्यांच्या संघर्ष, कर्तव्यनिष्ठा आणि अथक परिश्रमांचा गौरव असल्याची भावना परिवाराकडून व्यक्त करण्यात आली.

या यशामागे आई-वडिलांचे संस्कार, जीवनसाथी दीपक यांचे पाठबळ तसेच संपूर्ण परिवाराचा आधार लाभल्याचे नमूद करण्यात आले. त्यांच्या या सन्मानाबद्दल स्नेह परिवारासह विविध स्तरांतून अभिनंदन होत असून, पुढील सेवावाटचालीस शुभेच्छा देण्यात आल्या.

जोश, जिद्द आणि जल्लोष! अमळनेर तालुकास्तरीय मैदानी स्पर्धा थाटात संपन्न

अमळनेर (प्रतिनिधी) : क्रीडा व युवा सेवा संचालनालय, महाराष्ट्र राज्य पुणे, जिल्हा क्रीडा अधिकारी कार्यालय व जिल्हा क्रीडा परिषद जळगाव तसेच अमळनेर पंचायत समिती यांच्या संयुक्त विद्यमाने शासकीय शालेय तालुकास्तरीय मैदानी स्पर्धा तालुका क्रीडा संकुलाच्या मैदानावर उत्साहात पार पडल्या.

अमळनेर तालुक्यातील विविध शाळा व महाविद्यालयांतील १४, १७ व १९ वर्षांखालील मुला-मुलींनी स्पर्धेत उत्स्फूर्त सहभाग घेतला. माजी मंत्री तथा आमदार अनिलदादा पाटील यांच्या हस्ते मैदानपूजन, श्रीफळ वाढवून व क्रीडा मशाल प्रज्वलित करून स्पर्धेचे उद्घाटन करण्यात आले. यावेळी खा. शि. मं.चे कार्याध्यक्ष सी.ए. नीरज अग्रवाल, समन्वय समितीचे चेअरमन योगेश मुंदडे, प्रताप महाविद्यालयाचे उपप्राचार्य प्रा. ए.के. अग्रवाल, डी.आर. कन्या शाळेच्या मुख्याध्यापिका सौ. एस.एस. सूर्यवंशी, नरेंद्र घोडपडे, तालुका क्रीडा अध्यक्ष व पर्यवेक्षक एस.पी. वाघ, महेश माळी आदी उपस्थित होते.

यावेळी आमदार अनिल पाटील यांनी खेळामुळे विद्यार्थ्यांमध्ये सांघिक भावना, शिस्त, आत्मविश्वास व शारीरिक तंदुरुस्ती विकसित होते, असे सांगत खेळाडूंनी मेहनत, स्वच्छता आणि मोबाईलपासून दूर राहण्याचे आवाहन केले. उद्घाटनानंतर १०० मीटर धावण्याची स्पर्धा घेण्यात आली.

स्पर्धेच्या यशस्वितेसाठी पंच व क्रीडा समितीच्या सदस्यांनी परिश्रम घेतले.