महत्वाच्या
घडामोडी
सर्वाधिक वाचक
बातम्या
अमळनेर नगर परिषदेत ‘नमस्ते दिवस’ उत्साहात साजरा; सफाई कर्मचाऱ्यांना PPE किट व आयुष्मान भारत कार्डचे वाटप
अमळनेर (प्रतिनिधी): केंद्र शासनाच्या NAMASTE (National Action for Mechanised Sanitation Ecosystem) अभियानांतर्गत अमळनेर नगरपरिषदेच्या वतीने ‘नमस्ते दिवस’ मोठ्या उत्साहात साजरा करण्यात आला. इंदिरा गांधी भवन येथे आयोजित या कार्यक्रमात शहराच्या स्वच्छतेसाठी अहोरात्र मेहनत घेणाऱ्या सफाई कर्मचाऱ्यांचा सन्मान करण्यात आला. यावेळी कर्मचाऱ्यांना PPE किट तसेच आयुष्मान भारत कार्ड वाटप करून त्यांच्या आरोग्य व सुरक्षिततेला प्राधान्य देण्याचा संदेश देण्यात आला.
लोकनियुक्त नगराध्यक्ष डॉ. श्री. परीक्षित बाविस्कर व मुख्याधिकारी श्री. गणेश शिंदे यांच्या मार्गदर्शनाखाली हा उपक्रम पार पडला. कार्यक्रमास आरोग्य सभापती श्री. रामकृष्ण पाटील, स्वच्छता निरीक्षक श्री. संतोष जाधव व स्वच्छता निरीक्षक श्री. किरण कंडारे यांची प्रमुख उपस्थिती होती.
यावेळी मान्यवरांनी सफाई कर्मचाऱ्यांशी संवाद साधत शहराच्या स्वच्छता व्यवस्थेत घंटागाडी चालक, वाहक तसेच घनकचरा प्रक्रिया केंद्रावर कार्यरत कर्मचारी यांचे योगदान अत्यंत महत्त्वाचे असल्याचे सांगितले. त्यांच्या आरोग्य, सुरक्षितता व कल्याणासाठी अमळनेर नगरपरिषद सातत्याने कटिबद्ध असून अशा विविध कल्याणकारी योजना प्रभावीपणे राबविल्या जातील, अशी ग्वाही त्यांनी दिली.
कार्यक्रमात उपस्थित महिला व पुरुष कर्मचाऱ्यांना ‘नमस्ते’ योजनेची सविस्तर माहिती, आरोग्यविषयक मार्गदर्शन तसेच सुरक्षिततेबाबत आवश्यक सूचना देण्यात आल्या. त्यानंतर आरोग्य सभापती श्री. रामकृष्ण पाटील, स्वच्छता निरीक्षक श्री. संतोष जाधव, स्वच्छता निरीक्षक श्री. किरण कंडारे आणि शहर समन्वयक श्री. गणेश गढरी यांच्या हस्ते सर्व कर्मचाऱ्यांना PPE किट व आयुष्मान भारत कार्ड वितरित करण्यात आले.
या उपक्रमामुळे सफाई कर्मचाऱ्यांमध्ये उत्साहाचे वातावरण निर्माण झाले असून त्यांनी अमळनेर नगरपरिषदेप्रती कृतज्ञता व्यक्त केली. अशा उपक्रमांमुळे कर्मचाऱ्यांचे मनोबल उंचावून शहरातील स्वच्छता सेवेची गुणवत्ता अधिक प्रभावी होईल, असा विश्वास उपस्थित मान्यवरांनी व्यक्त केला.
यावेळी शहरातील विविध भागांमध्ये कचरा वेचण्याचे काम करणाऱ्या नागरिकांनी स्वच्छता विभागाशी संपर्क साधून ‘नमस्ते’ योजनेअंतर्गत नाव नोंदणी करून शासनाच्या सुविधांचा लाभ घ्यावा, असे आवाहनही करण्यात आले.
कार्यक्रमाच्या यशस्वी आयोजनासाठी आरोग्य विभागातील योगेश पवार, श्यामराव करंदीकर, महेंद्र बिऱ्हाडे, अनंत संदानशिव, युनस शेख यांच्यासह सर्व कर्मचाऱ्यांनी मोलाचे सहकार्य केले.
मराठा समाज महिला मंडळाच्या वक्तृत्व स्पर्धेला महिलांचा उत्स्फूर्त प्रतिसाद; गुणवंत वक्त्यांचा सन्मान
अमळनेर : अमळनेर तालुका मराठा समाज महिला मंडळाच्या वतीने समाजातील गुणवंत व हौशी महिलांना आपल्या विचारांना प्रभावीपणे मांडण्यासाठी व्यासपीठ उपलब्ध करून देण्याच्या उद्देशाने आयोजित करण्यात आलेल्या अचानक दिलेल्या विषयांवरील वक्तृत्व स्पर्धेला महिलांचा उत्स्फूर्त प्रतिसाद लाभला. आत्मविश्वासपूर्ण सादरीकरण, प्रभावी मांडणी आणि ओघवत्या वक्तृत्वामुळे स्पर्धा रंगतदार ठरली.
स्पर्धेत जयश्री पवार यांनी प्रथम क्रमांक पटकावत विजेतेपद मिळविले. सीमा पाटील यांनी द्वितीय, तर स्वाती पाटील यांनी तृतीय क्रमांक मिळविला. उत्तेजनार्थ पारितोषिक रेखा मराठे व अपेक्षा पाटील यांना प्रदान करण्यात आले.
स्पर्धेत आशा पाटील, पूजा पाटील, श्वेता पाटील, शोभा पाटील, रजुताई सूर्यवंशी, मंगलाबाई पाटील, प्रतिभा शिसोदे, मनीषा पाटील, उर्मिला पाटील, प्रियदर्शनी भोसले, माधुरी पाटील आणि योगिता सूर्यवंशी यांनी उत्साहाने सहभाग नोंदवून आपल्या वक्तृत्वाची छाप पाडली.
कार्यक्रमाच्या अध्यक्षस्थानी सौ. जयश्री पाटील होत्या. प्रास्ताविक मंडळाच्या अध्यक्षा सौ. सुलोचना वाघ यांनी केले. सूत्रसंचालन सौ. गायत्री भदाणे व सौ. स्वप्ना पाटील यांनी केले. स्पर्धेचे परीक्षण सौ. भारती (आक्का) पाटील व सौ. भारती पाटील यांनी केले.
कार्यक्रमाच्या यशस्वी आयोजनासाठी मंडळाच्या मंगला पाटील, सुनीता पाटील, लीना पाटील, पद्मजा पाटील, माधुरी पाटील, मनीषा पाटील, प्रभावती पाटील, राजश्री पाटील, कृपाली पाटील व नलिनी पाटील यांनी विशेष परिश्रम घेतले. स्पर्धा पाहण्यासाठी महिला मोठ्या संख्येने उपस्थित राहिल्या. या उपक्रमामुळे महिलांच्या सुप्त कलागुणांना प्रोत्साहन मिळाल्याबद्दल उपस्थितांनी मराठा समाज महिला मंडळाचे कौतुक केले.
