महात्मा बळीराजांच्या जयघोषाने अमळनेर दुमदुमले! सवाद्य भव्य मिरवणूक; बळीराजा स्मारकावर आजी-माजी आमदारांसह मान्यवरांच्या हस्ते पूजन व अभिवादन

अमळनेर प्रतिनिधी : बलीप्रतिपदेच्या निमित्ताने सालाबादाप्रमाणे यंदाही अमळनेर शहरात महात्मा बळीराजा यांच्या प्रतिमेची सवाद्य भव्य मिरवणूक मोठ्या उत्साहात आणि मंगलमय वातावरणात काढण्यात आली. मिरवणुकीनंतर फुलांनी सजविण्यात आलेल्या बळीराजा स्मारकावर आजी-माजी आमदारांसह विविध क्षेत्रांतील मान्यवरांनी विधिवत पूजन करून महात्मा बळीराजांना अभिवादन केले. ‘इडा, पीडा टळो आणि बळीचे राज्य येवो’ या जयघोषाने संपूर्ण परिसर दुमदुमून गेला.

मिरवणुकीचा प्रारंभ पटवारी कॉलनी येथून करण्यात आला. मांडळ येथील ज्येष्ठ शेतकरी पंढरीनाथ पाटील आणि ज्येष्ठ कार्यकर्ते मनोहर निकम यांच्या हस्ते बैलगाडी व नांगरपूजन करून मिरवणुकीला सुरुवात झाली. यावेळी सेवानिवृत्त न्यायाधीश गुलाबराव पाटील, उपनगराध्यक्ष प्रशांत निकम, माजी नगरसेवक श्याम पाटील, अमळनेर अर्बन बँकेचे संचालक रणजित शिंदे, माजी सभापती डॉ. दीपक पाटील, मराठा सेवा संघाचे अध्यक्ष अशोक पाटील, कैलास पाटील, अरुण देशमुख, अशोक बिऱ्हाडे आदी मान्यवर उपस्थित होते.

प्रास्ताविकात प्रा. डॉ. लिलाधर पाटील यांनी महात्मा बळीराजा यांच्या कार्याची आणि विचारांची महती विशद केली. अमळनेर अर्बन बँकेच्या संचालिका सौ. वसुंधरा लांडगे यांनी जिजाऊ वंदना सादर केली. त्यानंतर शेतकरी गीतांच्या सुरावटी आणि बँडच्या गजरात मिरवणुकीला सुरुवात झाली. मराठा कॉलनी, शिरूड नाका, स्वामी समर्थ मंदिर, विजय मारुती, धुळे रोडमार्गे महाराणा प्रताप चौकातून ही मिरवणूक फुलांनी सजविण्यात आलेल्या महात्मा बळीराजा स्मारकापर्यंत पोहोचली.

मिरवणुकीच्या समारोपप्रसंगी माजी मंत्री तथा आमदार अनिल पाटील यांच्या हस्ते बळीराजा स्मारकावर विधिवत पूजन करण्यात आले. माजी आमदार डॉ. बी. एस. पाटील यांनी उपस्थितांना बलीप्रतिपदेच्या शुभेच्छा देताना, “इडा, पीडा टळून बळीचे राज्य यावे, यासाठी शेतकऱ्यांनी संघटित होणे गरजेचे आहे,” असे आवाहन केले.

मिरवणुकीतील सजविलेल्या वाहनावर महात्मा बळीराजा यांची भव्य प्रतिमा विराजमान होती. तसेच भव्य नांगरासोबत बाल शिवराय आणि राजमाता जिजाऊ उभे असलेली बैलगाडी नागरिकांचे विशेष आकर्षण ठरली. मिरवणुकीदरम्यान शहरातील विविध ठिकाणी नागरिकांनी बळीराजांच्या प्रतिमेचे दर्शन घेत पुष्पवृष्टी केली. शेतकरी, नागरिक, सामाजिक संघटनांचे पदाधिकारी आणि विविध क्षेत्रांतील मान्यवरांनी मोठ्या संख्येने सहभाग नोंदविला.

महात्मा बळीराजा यांचे शेतकरीहिताचे विचार, समतेचा संदेश आणि त्यांच्या कार्याचे स्मरण करीत उपस्थितांनी प्रतिमेला पुष्पहार अर्पण करून अभिवादन केले. पारंपरिक पद्धतीने झालेल्या या बळीराजा पूजन सोहळ्यामुळे शहरात उत्साहाचे आणि मंगलमय वातावरण निर्माण झाले.

कार्यक्रमाचे सूत्रसंचालन रणजित शिंदे यांनी केले, तर आभार उपनगराध्यक्ष प्रशांत निकम यांनी मानले.

यावेळी युवा कल्याण प्रतिष्ठानचे अध्यक्ष प्रा. अशोक पवार, शेतकी संघाचे संचालक संजय पाटील, विक्रांत पाटील, पत्रकार संघाचे अध्यक्ष चेतन राजपूत, डी. एम. पाटील, महेश पाटील, वाल्मीक पाटील, एल. टी. पाटील, सयाजीराव पाटील, विवेक पाटील, मराठा समाज मंडळाचे शेखर पाटील, दत्तू शामराव पाटील, नगरसेवक सचिन पाटील, संजय पाटील, पवार आप्पा, योगेश शिंदे, भरत बोरसे, बाळू संतोष पाटील यांच्यासह विविध संघटनांचे पदाधिकारी, कार्यकर्ते आणि नागरिक मोठ्या संख्येने उपस्थित होते.

साने गुरुजी कन्या विद्यालयात तयार केले आकर्षक आकाश कंदील विद्यार्थिनींच्या कल्पकतेला सर्जनशीलतेची जोड

अमळनेर – दिवाळीनिमित्त साने गुरुजी कन्या हायस्कूल अमळनेर येथे विद्यार्थिनींनी पर्यावरणपूरक टाकाऊ वस्तु पासून आकाश कंदील तयार करण्याचा अभिनव उपक्रम राबवला. पारंपारिक सजावटीला पर्यावरण संवर्धनाची जोड देत विद्यार्थिनींनी टाकाऊ व उपलब्ध साहित्याचा कल्पकतेने वापर करून आकर्षक कंदील तयार केले. या उपक्रमाचे संस्थाध्यक्ष हेमकांत पाटील, सचिव संदीप घोरपडे यांनी कौतुक केले.
विद्यार्थिनींच्या कलागुणांना वाव देण्यासाठी आकाश कंदील बनवण्याची कार्यशाळा घेण्यात आली. विद्यार्थिनींनी कार्यशाळेत बनवलेले कंदील बाबत कुतूहलपूर्वक माहिती विस्तार अधिकारी प्रमोद पाटील, मुख्याध्यापक सुनील पाटील यांनी जाणून घेतली. यावेळी मुख्याध्यापक डी.ए.धनगर, शिक्षक, शिक्षकेतर कर्मचारी उपस्थित होते. विद्यार्थिनींनी तयार केलेल्या कलाकृतीचे निरीक्षण करून स्वतःच्या कल्पकतेतून साकारलेले सुंदर कंदील पाहून विस्तार अधिकारी प्रमोद पाटील यांनी विद्यार्थ्यीनींचे कौतुक केले. अशा उपक्रमामुळे विद्यार्थ्यात सर्जनशीलता, कलात्मकता, स्वावलंबन व पर्यावरण जागरूकता निर्माण होते असे मत मान्यवरांनी व्यक्त केले. उपक्रम यशस्वीतेसाठी जे.एस.पाटील, दिलीप पाटील, मनीषा वैद्य, आर.एम.देशमुख, शैलेंद्र साळुंखे, मुकेश पाटील, दीपक महाजन, धनश्री वानखेडे, मोनाली वंजारी, धनश्री साळुंखे यांनी व विद्यार्थिनींनी परिश्रम घेतले. आकर्षक व पर्यावरणपूरक आकाश कंदील सर्वांचे लक्ष वेधून घेत होते.

दिवाळी सुट्टीचा सदुपयोग; तरुणांचे श्रमदानातून रस्त्यावरील खड्डे बुजविण्याचे काम

प्रगणे डांगरी ता अमळनेर : दिवाळीची सुट्टी मौजमजा आणि मनोरंजनात घालविण्याऐवजी सामाजिक कार्यासाठी उपयोगात आणत प्रगणे डांगरी येथील तरुणांनी स्तुत्य उपक्रम राबविला. प्रगणे डांगरी ते मारवड या रस्त्याची झालेली दुरवस्था लक्षात घेऊन गावातील तरुणांनी एकत्र येत श्रमदानातून रस्त्यावरील मोठमोठे खड्डे बुजविले. तरुणांच्या या पुढाकाराचे परिसरातून कौतुक होत आहे.

प्रगणे डांगरी ते मारवड या रस्त्यावर ठिकठिकाणी मोठमोठे खड्डे पडल्याने वाहनधारकांना मोठ्या अडचणींचा सामना करावा लागत होता. विशेषतः रुग्ण, विद्यार्थी, ज्येष्ठ नागरिक आणि नियमित प्रवास करणाऱ्या ग्रामस्थांना या खराब रस्त्याचा त्रास सहन करावा लागत होता. रस्त्याच्या दुरवस्थेमुळे अपघाताचा धोकाही निर्माण झाला होता.

ही समस्या लक्षात घेऊन दिवाळीच्या सुट्टीनिमित्त गावी आलेल्या तरुणांसह स्थानिक युवकांनी पुढाकार घेतला. शासकीय यंत्रणेची प्रतीक्षा न करता एकत्र येत श्रमदानातून खड्डे बुजविण्याचे काम हाती घेतले. स्वतः वेळ देऊन आणि सामूहिक प्रयत्नांतून तरुणांनी रस्त्याची सुधारणा करण्याचा प्रयत्न केला. त्यांच्या या उपक्रमामुळे ग्रामस्थांना दिलासा मिळण्यास मदत होणार आहे.

या श्रमदान उपक्रमात रणधीर पाटील, वीरभूषण पाटील, हर्षल पाटील, संदीप पाटील, संजय पाटील, दिनेश पाटील, हिलाल कोळी, लक्ष्मण पाटील, सचिन कोळी, सुनील वाडीले, निलेश पाटील, हंसराज पाटील, समाधान पाटील, सागर भोई, स्वप्निल कोळी, गोपाल पाटील, गजानन पाटील, दुर्गेश पाटील (राज), रोहित पाटील, राज वाघ, विशाल वाघ, जयेश कोळी, तुषार (ऋषि) पाटील, कल्पेश पाटील, हितेश पाटील, सौरव पाटील (ओम), यशोदीप पाटील (यश), आदित्य पाटील, गौरव (गोलू) कोळी, सार्थक पाटील, शिवा कोळी आणि धिरज कोळी आदी तरुणांनी सक्रिय सहभाग नोंदविला.

दिवाळीच्या सुट्टीत तरुणांनी दाखविलेली एकजूट आणि सामाजिक जाणिवेचे सर्वत्र कौतुक होत आहे. गावाच्या समस्या केवळ प्रशासनापुढे मांडण्यापुरत्या मर्यादित न ठेवता, शक्य तेथे स्वतः पुढाकार घेऊन त्यावर उपाययोजना करता येतात, हा सकारात्मक संदेश या उपक्रमातून देण्यात आला आहे.