पर्यावरणपूरक दिवाळीचा संदेश देत प्रतापमध्ये आकाशकंदील निर्मितीचा उपक्रम! हिंदू-मुस्लिम विद्यार्थ्यांचा उत्स्फूर्त सहभाग; शिक्षकांनीही साकारले आकर्षक आकाशकंदील

प्रतिनिधी | अमळनेर : दिवाळीचा सण म्हणजे प्रकाश, आनंद आणि सर्जनशीलतेचा उत्सव. या सणाचे औचित्य साधून प्रताप हायस्कूलमध्ये पर्यावरणपूरक आकाशकंदील निर्मिती कार्यशाळेचे आयोजन करण्यात आले. केवळ आकाशकंदील तयार करण्यापुरता मर्यादित न राहता विद्यार्थ्यांमध्ये कलात्मकता, स्वावलंबन, पर्यावरणाविषयी जागरूकता आणि सामाजिक एकात्मतेची भावना रुजविणारा हा उपक्रम ठरला.

शाळेचे चेअरमन सीए नीरज अग्रवाल व मुख्याध्यापक ए. डी. भदाणे यांच्या मार्गदर्शनाखाली हा उपक्रम राबविण्यात आला. कार्यशाळेच्या प्रारंभी शाळेच्या वतीने इयत्ता पाचवी ते आठवीतील विद्यार्थ्यांना आकाशकंदील निर्मितीसाठी आवश्यक साहित्य उपलब्ध करून देण्यात आले. शाळेचे कला शिक्षक डी. एन. पालवे यांनी विद्यार्थ्यांना आकाशकंदील तयार करण्याचे प्रात्यक्षिकासह प्रशिक्षण दिले. त्यानंतर विद्यार्थ्यांनी स्वतःच्या कल्पकतेतून विविध आकर्षक आकाशकंदील तयार केले.

या कार्यशाळेचे विशेष वैशिष्ट्य म्हणजे हिंदू-मुस्लिम अशा सर्व धर्मांतील विद्यार्थ्यांनी एकत्रित सहभाग नोंदवत कलानिर्मितीचा आनंद घेतला. विद्यार्थ्यांसोबतच शिक्षकांनीही उत्स्फूर्तपणे सहभाग घेतला. शिक्षक निखिल पाटील, सचिन अहिरे, कृष्णा कोळी, सुहास खांजोडककर,जयश्री पाटील, नम्रता दोरकर तसेच लिपिक सागर पवार, शिपाई प्रसाद गोसावी यांनीही स्वतः आकाशकंदील तयार करून विद्यार्थ्यांचा उत्साह वाढविला.

विद्यार्थ्यांनी तयार केलेले सर्व आकाशकंदील दिवाळीनिमित्त शाळेच्या परिसरात लावण्यात आले. विद्यार्थ्यांच्या हातून साकारलेल्या या कलाकृतींनी शाळेचा परिसर उजळून निघाला. यावेळी विद्यार्थ्यांना पर्यावरणपूरक दिवाळी साजरी करण्याची शपथही देण्यात आली. पर्यावरणाला हानी पोहोचविणाऱ्या बाबी टाळून निसर्गपूरक पद्धतीने सण साजरे करण्याचा संदेश या उपक्रमातून देण्यात आला. विद्यार्थ्यांसाठी ही कार्यशाळा आनंददायी आणि प्रेरणादायी ठरली.

दुष्काळाच्या झळा सोसणाऱ्या ८५ कुटुंबांच्या दिवाळीत मंगळग्रह सेवा संस्थेने भरला गोडवा! तासखेड्यात गरजू कुटुंबांना दिवाळी फराळाचे वाटप; सामाजिक बांधिलकीतून माणुसकीचा उपक्रम

अमळनेर प्रतिनिधी : एका बाजूला दुष्काळाचे सावट आणि दुसरीकडे दिवाळीचा आनंद… अशा परिस्थितीत आर्थिक संकटाचा सामना करणाऱ्या गरजू कुटुंबांच्याही घरात दिवाळीचा आनंद फुलावा, त्यांच्या सणात गोडवा निर्माण व्हावा, या सामाजिक जाणिवेतून मंगळग्रह सेवा संस्थेने माणुसकीचा स्तुत्य उपक्रम राबविला आहे. संस्थेच्या वतीने तालुक्यातील विविध गावांमध्ये गरजू कुटुंबांना दिवाळी फराळाचे वाटप करण्यात येत असून, शुक्रवारी (दि. ६ नोव्हेंबर) तासखेडे येथे सुमारे ८५ गरजू कुटुंबांना फराळाची पाकिटे वितरित करण्यात आली.

या उपक्रमाप्रसंगी तासखेडे गावाचे सरपंच सुनील पाटील, मंगळग्रह सेवा संस्थेचे सचिव एस. बी. बाविस्कर, सहसचिव दिलीप बहिरम, मंगल सेवेकरी प्रकाश मेघा, बाळा पवार मंदिराचे सेवेकरी तसेच गावातील दगा भील, बापू बिऱ्हाडे, सांडू बिऱ्हाडे, संतोष पाटील, मच्छिंद्र पाटील यांच्यासह विविध सामाजिक कार्यकर्ते उपस्थित होते. त्यांनी या उपक्रमाच्या यशस्वीतेसाठी सहकार्य केले.

यावेळी संस्थेच्या पदाधिकाऱ्यांनी मंगळग्रह सेवा संस्थेच्या माध्यमातून राबविण्यात येणाऱ्या विविध सामाजिक उपक्रमांची माहिती दिली. दुष्काळाच्या पार्श्वभूमीवर गरजू शेतकरी, शेतमजूर आणि आर्थिकदृष्ट्या अडचणीत असलेल्या कुटुंबांना फराळ, कपडे व अन्नधान्याच्या स्वरूपात मदत करण्यासाठी दानशूर व्यक्तींनी पुढाकार घ्यावा, असे आवाहनही करण्यात आले.

सणाचा आनंद केवळ स्वतःपुरता मर्यादित न ठेवता गरजूंच्या आयुष्यातही आनंदाची फुले फुलविण्याचा संदेश मंगळग्रह सेवा संस्थेच्या या उपक्रमातून देण्यात आला.

वसुबारसनिमित्त श्री मंगळग्रह मंदिरात गोमाता व गोवत्साचे विधिवत पूजन

अमळनेर : येथील मंगळग्रह सेवा संस्था संचलित श्री मंगळग्रह मंदिरात दरवर्षीप्रमाणे यंदाही गुरुवार, दि. ५ नोव्हेंबर रोजी वसुबारस (गोवत्स द्वादशी) हा सण भक्तिभावाने साजरा करण्यात आला. यानिमित्त मंगळग्रह सेवा संस्थेचे अध्यक्ष डॉ. डिगंबर महाले व त्यांच्या धर्मपत्नी सौ. आशाताई महाले यांच्या शुभहस्ते गोमाता आणि गोवत्साचे (वासराचे) पारंपरिक पद्धतीने विधिवत पूजन करण्यात आले.

यावेळी मंगळग्रह सेवा संस्थेचे उपाध्यक्ष एस. एन. पाटील, सचिव सुरेश बाविस्कर, सहसचिव दिलीप बहिरम, खजिनदार गिरीश कुलकर्णी, विश्वस्त अनिल अहिरराव, डी. ए. सोनवणे, मंगल सेवेकरी प्रकाश मेखा यांच्यासह मंदिराचे पुरोहित व सेवेकरी उपस्थित होते. धार्मिक वातावरणात हा पूजन सोहळा पार पडला.