तासखेडा येथे स्मशानभूमीत वृक्षारोपणाने फुलली हिरवाई गावकऱ्यांचा स्तुत्य उपक्रम

अमळनेर (प्रतिनिधी):- जिथे जीवनाचा शेवट होतो, तिथेच नव्या जीवनाची सुरुवात व्हावी, या संकल्पनेतून तासखेडा येथे स्मशानभूमी परिसरात मोठ्या उत्साहात वृक्षारोपण करण्यात आले.

यावेळी माजी जिल्हा परिषद सदस्य तसेच नगरसेविका जयश्री पाटील यांच्या हस्ते वृक्षारोपण करून या उपक्रमाचा शुभारंभ करण्यात आला.

माजी सरपंच प्रदीप पाटील तसेच सरपंच कल्पना पाटील व ग्रामपंचायत सदस्य,ग्रामस्थ आणि तरुण मंडळाच्या पुढाकारातून स्मशानभूमी परिसरात वड, पिंपळ, कडुलिंब, आंबा, जांभूळ, बेल अशी 50 हून अधिक देशी झाडांची रोपं लावण्यात आली.झाडांना पाणी देणेकामी रावसाहेब पाटील व ए के पाटील यांनी पाण्याच्या टाक्या उपलब्ध करुन दिल्या.यावेळी प्रत्येक झाडाला ट्री गार्ड लावून पाणी देण्याची जबाबदारीही गावकऱ्यांनी घेतली.

“स्मशानभूमी म्हणजे फक्त दुःखाची जागा नाही, तर ती शांत, स्वच्छ आणि हिरवीगार असावी. आपल्या पूर्वजांच्या स्मरणार्थ लावलेले एक झाड पुढच्या पिढीसाठी ऑक्सिजन देईल,” अशी भावना यावेळी ग्रामस्थांनी व्यक्त केली.

या उपक्रमात महिला, ज्येष्ठ नागरिक आणि शाळेतील विद्यार्थ्यांनी मोठ्या संख्येने सहभाग घेतला. स्मशानभूमी परिसर स्वच्छ करून, झाडांसाठी खड्डे खोदून सर्वांनी श्रमदान केले.

पुढील काळात स्मशानभूमीला कुंपण, बसण्यासाठी बाके बसवण्याचा संकल्पही यावेळी करण्यात आला.

याप्रसंगी गावातील दिलीप बहिरम,संतोष बहिरम,सुनील पाटील,अभिमन पाटील,गुलाब पाटील,नागेश सोनार,मच्छिंद्र पाटील,निंबा पाटील,नाना पाटील,भारत पाटील,अनिल शिंदे,अनिल पाटील, बारकू पाटील,प्रमोद पाटील आमोदे येथील भिवराव पाटील,संजय पाटील ग्रामविकास अधिकारी आधार धनगर यांसह गावकरी उपस्थित होते.

या स्तुत्य उपक्रमाबद्दल सर्व स्तरातून गावकऱ्यांचे कौतुक होत आहे.

जागतिक जैवइंधन आघाडीत महत्त्वाच्या पदावर डॉ. तुषार पाटील यांची निवड भारत सरकारच्या पेट्रोलियम मंत्रालयाकडून नियुक्ती; ३५ देश आणि १२ आंतरराष्ट्रीय संघटनांशी समन्वयाची जबाबदारी

अमळनेर प्रतिनिधी : जागतिक स्तरावर भारताच्या नेतृत्वाखाली कार्यरत असलेल्या जागतिक जैवइंधन आघाडीमध्ये (Global Biofuel Alliance) महत्त्वाच्या पदावर डॉ. तुषार शिवाजीराव पाटील यांची निवड करण्यात आली आहे. भारत सरकारच्या पेट्रोलियम आणि नैसर्गिक वायू मंत्रालय, नवी दिल्ली यांच्याकडून त्यांची आंतरराष्ट्रीय उद्योग संपर्क विशेषज्ञ (International Industry Outreach Specialist) या पदावर नियुक्ती करण्यात आली आहे. त्यांच्या या निवडीमुळे अमळनेरच्या शिरपेचात मानाचा तुरा रोवला गेला आहे.

भारत, ब्राझील आणि अमेरिका यांच्या पुढाकारातून २०२३ मध्ये जागतिक जैवइंधन आघाडीची स्थापना करण्यात आली. भारताच्या नेतृत्वाखाली स्थापन झालेल्या या आघाडीच्या माध्यमातून जैवइंधन क्षेत्रातील आंतरराष्ट्रीय सहकार्य, उद्योगविकास आणि स्वच्छ ऊर्जेला प्रोत्साहन देण्याचे काम केले जाते. या आघाडीअंतर्गत डॉ. पाटील यांच्यावर ३५ देश आणि १२ आंतरराष्ट्रीय संघटनांशी संबंधित उद्योग संपर्क व समन्वयाची महत्त्वपूर्ण जबाबदारी सोपविण्यात आली आहे.

डॉ. तुषार पाटील यांची निवड विविध टप्प्यांवरील प्रोफाइल परीक्षण आणि मुलाखतींच्या फेऱ्यांनंतर करण्यात आली आहे. त्यांना जैवइंधन उद्योगातील १६ वर्षांचा प्रदीर्घ अनुभव असून, या काळात त्यांनी विविध देशांमध्ये भारतीय उद्योगाचे प्रतिनिधित्व केले आहे. त्यांच्या या अनुभवाचा आणि आंतरराष्ट्रीय स्तरावरील कार्याचा त्यांच्या निवडीसाठी विशेष फायदा झाला.

या पदावर ते नवी दिल्ली येथील संरक्षण भवनातून कार्यरत राहणार आहेत. जागतिक जैवइंधन आघाडीच्या कामकाजात आंतरराष्ट्रीय उद्योगांशी संपर्क प्रस्थापित करणे आणि विविध देश व संघटनांमध्ये समन्वय साधणे, अशी महत्त्वाची भूमिका ते पार पाडणार आहेत.

डॉ. तुषार शिवाजीराव पाटील हे श्री. अण्णासाहेब शिवाजीराव पाटील यांचे धाकटे सुपुत्र, तर दिवंगत डॉ. नितीन पाटील यांचे बंधू आहेत. त्यांच्या या प्रतिष्ठित निवडीबद्दल सर्व स्तरांतून अभिनंदन होत असून, त्यांच्या यशाचे कौतुक केले जात आहे.

अमळनेर अग्निशमन दलाची मध्यरात्री धावपळ; दोन ठिकाणच्या आगींवर नियंत्रण मिळवत अनर्थ टाळला! गांधीपुरा येथील भंगार गोदामासह सिंधी कॉलनीतील घराची आग विझवली; वृद्ध व्यक्तीला सुखरूप बाहेर काढले, रोकडही वाचवली

अमळनेर प्रतिनिधी : अमळनेर शहरात मध्यरात्रीच्या सुमारास दोन वेगवेगळ्या ठिकाणी आग लागल्याच्या घटना घडल्या. गांधीपुरा भागातील भंगार गोदाम आणि सिंधी कॉलनीतील घराला लागलेल्या आगीवर नगरपरिषदेच्या अग्निशमन दलाने तत्परतेने घटनास्थळी धाव घेत नियंत्रण मिळवले. अग्निशमन दलाच्या सतर्कतेमुळे दोन्ही घटनांमध्ये मोठा अनर्थ टळला.

पहिली घटना दि. ११ नोव्हेंबर रोजी रात्री ११.५७ वाजेच्या सुमारास गांधीपुरा भागात घडली. येथील ‘दानिश स्क्रॅप’ या भंगार गोदामाला आग लागल्याची माहिती नगरसेवक श्रीराम चौधरी व नावेद शेख यांनी अग्निशमन दलाला दिली. माहिती मिळताच अग्निशमन दलाचे कर्मचारी तातडीने घटनास्थळी दाखल झाले. अथक प्रयत्नांनंतर आगीवर पूर्णपणे नियंत्रण मिळवण्यात यश आले.

दुसरी घटना दि. १२ नोव्हेंबर रोजी पहाटे दोन वाजेच्या सुमारास सिंधी कॉलनीत घडली. प्रकाशलाल लखुमल डिंगराई यांच्या घराला आग लागल्याची माहिती नगरसेवक भरत ललवाणी यांनी दूरध्वनीद्वारे अग्निशमन दलाला दिली. अग्निशमन दलाने तत्काळ घटनास्थळी पोहोचून घरातील आग विझविण्याचे काम सुरू केले. यावेळी घरात एक वृद्ध व्यक्ती झोपलेली होती. घराचा दरवाजा उघडत नसल्याने काही काळ चिंतेचे वातावरण निर्माण झाले होते. मात्र, दरवाजा उघडल्यानंतर अग्निशमन कर्मचाऱ्यांनी वृद्ध व्यक्तीला सुखरूप बाहेर काढले. त्यामुळे मोठा अनर्थ टळला.

विशेष म्हणजे, आग विझविण्याच्या कामादरम्यान फायरमन दिनेश बिऱ्हाडे यांनी घरातील रोकड रक्कम आगीतून सुरक्षित बाहेर काढून ती घरमालकाकडे सुपूर्द केली. त्यांच्या या प्रामाणिकपणाचे आणि तत्परतेचे स्थानिक नागरिकांनी विशेष कौतुक केले.

या दोन्ही घटनांमध्ये अग्निशमन दलाचे कर्मचारी दिनेश बिऱ्हाडे, फारुक शेख, जफर पठाण, रफिक पठाण, सत्यन संदानशिव, मच्छिंद्र चौधरी, आकाश संदानशिव आणि प्रसेनजीत सोनवणे यांनी मोलाची कामगिरी बजावली.

मध्यरात्रीच्या संकटसमयी जीवाची पर्वा न करता तत्परतेने धाव घेणाऱ्या अमळनेर अग्निशमन दलाच्या कामगिरीचे नागरिकांकडून कौतुक होत आहे.