महत्वाच्या
घडामोडी
सर्वाधिक वाचक
बातम्या
ढोल-ताशांच्या गजरात माहेरवाशिणींचे औक्षणासह स्वागत! गजरा, मेंदी, बांगड्यांच्या साजशृंगाराने नटल्या अमळनेरच्या लेकी
अमळनेर : माहेरच्या अंगणातील बालपणीच्या आठवणींना उजाळा देत, सासर-माहेर दोन्ही कुटुंबांना आपल्या कर्तृत्वाने आणि मायेने समृद्ध करणाऱ्या अमळनेरच्या लेकींचा स्नेहमेळा अर्थात ‘माहेरचा पारिजात’ या उपक्रमाची आज शनिवार, दि. 29 ऑगस्ट रोजी श्री मंगळग्रह मंदिरात सकाळच्या मंगलमय आणि अतिशय उत्साहपूर्ण वातावरणात सुरूवात झाली. आजपासून तीन दिवस अर्थात सोमवार, दि. 31 ऑगस्ट 2026 पर्यंत रंगणाऱ्या या स्नेहमेळ्याचे येथील अमळनेर महिला मंच ट्रस्टतर्फे आयोजन करण्यात आले आहे. त्यासाठी मंगळग्रह सेवा संस्थेचे त्यांना विशेष सहकार्य लाभले आहे.
माहेरच्या अंगणात जाऊन पुनश्च बालपण अनुभवता यावे, जुन्या आठवणींना उजाळा मिळावा आणि मैत्रिणींसोबत मनमोकळेपणाने गप्पागोष्टींची मैफल रंगावी, हा या स्नेहमेळ्याचा मुख्य उद्देश आहे.
या स्नेहमेळ्यांतर्गत सकाळी नऊ वाजता अमळनेर महिला मंच ट्रस्टतर्फे माहेरवाशिणींचे हळद-कुंकवाने औक्षण करीत ढोल-ताशांच्या गजरात स्वागत करण्यात आले. यावेळी त्यांना मोत्यांचे दागिने व गजरे भेट देण्यात आले. त्यानंतर श्री मंगळग्रह देवांची सामूहिकरित्या महाआरती झाली. साडेनऊ वाजता सर्व माहेरवाशिणींनी एकत्रित येत स्वयंपरिचय करून दिला. त्यानंतर सर्वांच्या हातावर कु. आकांक्षाताई, मयुरीताई व दीप्तीताई यांनी मेंदी रेखाटून त्यांना सौ. पूजाताई मोराणकर यांनी बांगड्यांसह सौभाग्याचे वाण देण्यात आले. दुपारी सव्वाबारा वाजता सर्व माहेरवाशिणींनी श्री मंगळग्रह देवांचा सामूहिक महाअभिषेक केला. तसेच पाहुणचार अर्थात खानदेशची खासियत असलेले पुरणपोळीचे भोजन घेतले. त्यानंतर दोन ते तीन या वेळेत सागर गोटे, काचा-कवड्या, चौपट, आट्यापाट्या, तळ्यात-मळ्यात, उभा खो-खो आदी पारंपरिक खेळ खेळण्यात आले. यावेळी माहेरवाशिणींनी झोक्यांवर बसून गाणी गात खऱ्या अर्थाने माहेरचा आनंद लुटला. सायंकाळी साडेपाच वाजता सामूहिक चहापानानंतर श्री मंगळग्रह देवांची सामूहिक सायंआरती करण्यात आली. त्यानंतर खासदार श्रीमती स्मिताताई वाघ, शहर विकास आघाडीच्या गटनेत्या सौ. जयश्रीताई पाटील व मंगळग्रह सेवा संस्थेचे अध्यक्ष डॉ. डिगंबर महाले यांच्या प्रमुख उपस्थितीत अमळनेरच्याच माहेरवाशिणी सहाय्यक कर निरीक्षक सौ. हर्षाताई साळुंखे यांचा विशेष सन्मान करण्यात आला. त्यानंतर सामूहिकरित्या मंगळागौरचे खेळ खेळण्यात आले. त्यानंतर रात्री उशिरा सामूहिक भोजनानंतर आजच्या दिवसाची सांगता झाली.
यावेळी अमळनेर महिला मंच ट्रस्टच्या अध्यक्षा सौ. कांचनताई शहा, उपाध्यक्षा सौ. तिलोत्तमाताई पाटील, सौ. सरोजताई भांडारकर, सचिव सौ. वसुंधराताई लांडगे व कोशाध्यक्षा प्रा. सौ. शीलाताई पाटील यांच्यासह कार्यकारी मंडळातील सदस्या उपस्थित होते.
सार्वजनिक आरोग्य क्षेत्रातील उल्लेखनीय कार्याबद्दल डॉ. मोहन बच्छाव यांचा ‘आरोग्यरत्न’ पुरस्काराने गौरव
सिन्नर : सार्वजनिक आरोग्य क्षेत्रात उल्लेखनीय, समर्पित आणि परिणामकारक कार्य केल्याबद्दल सिन्नर पंचायत समितीचे तालुका आरोग्य अधिकारी डॉ. मोहन सिताराम बच्छाव यांना प्रतिष्ठेच्या ‘पुढारी आरोग्यरत्न पुरस्काराने’ सन्मानित करण्यात आले. महाराष्ट्र राज्याचे आरोग्यमंत्री माननीय प्रकाशजी आबिटकर यांच्या हस्ते हा पुरस्कार प्रदान करण्यात आला.
ग्रामीण व सार्वजनिक आरोग्य व्यवस्थेत कार्यरत राहून नागरिकांना दर्जेदार आरोग्यसेवा उपलब्ध करून देणे, आरोग्यविषयक विविध उपक्रमांची प्रभावी अंमलबजावणी करणे तसेच आरोग्य यंत्रणेला अधिक सक्षम करण्यासाठी डॉ. बच्छाव यांनी केलेल्या उल्लेखनीय कार्याची दखल घेत त्यांना हा सन्मान देण्यात आला.
आरोग्य क्षेत्रातील त्यांच्या सातत्यपूर्ण योगदानाबद्दल मिळालेला हा पुरस्कार त्यांच्या कार्याची पोचपावती मानली जात आहे. सार्वजनिक आरोग्य व्यवस्थेत जबाबदारीने कार्य करताना लोकाभिमुख आरोग्यसेवेला प्राधान्य देणाऱ्या डॉ. बच्छाव यांच्या या गौरवामुळे सिन्नर तालुक्याच्या शिरपेचात आणखी एक मानाचा तुरा खोवला गेला आहे.
या पुरस्काराबद्दल डॉ. मोहन सिताराम बच्छाव यांचे आरोग्य विभागातील अधिकारी, कर्मचारी, सहकारी, मित्रपरिवार तसेच विविध स्तरांतून अभिनंदन होत असून, त्यांच्या पुढील कार्यासाठी शुभेच्छांचा वर्षाव होत आहे.
अमळनेरची सुकन्या दियाना(अमृता)खेळणार अंडर 15 क्रिकेट वर्ड कपमध्ये भारतीय संघात महाराष्ट्रातुन एकमेव अमृताची निवड, साऊथ आफ्रिकेत रंगणार वर्डकप
अमळनेर:-येथील सुप्रसिद्ध उद्योजक आर के पटेल परिवारातील सुकन्या दियाना उर्फ अमृता ही अंडर 15 क्रिकेट वर्ड कप स्पर्धेमध्ये खेळणार असुन महाराष्ट्रातुन एकमेव अमृताची भारतीय संघात निवड झाली आहे.साऊथ आफ्रिकेत 21 सप्टेंबर पासून हा वर्डकप होणार आहे.
दियाना ही अमळनेर येथील मुंदडा ग्लोबल स्कुल ची इयत्ता 8 वी ची विद्यार्थिनी असून स्वर्गीय उद्योजक आर.के.दादा पाटील यांची पणती,उद्योजक विनोदभैय्या पाटील व वसंत बापू पाटील यांची नात आणि मितेश पाटील व सौ मोनाली मितेश पाटील यांची कन्या आहे.गेल्या 3 वर्षांपासून ती क्रिकेट खेळत असताना नियमित सरावाने उत्तम खेळाडू ती झाली आहे.क्रिकेट असोसिएशनच्या माध्यमातून जळगाव येथे स्टेट लेव्हल स्पर्धा पार पडल्या होत्या.याठिकाणी राज्यभरातील अंडर 15 मधील क्रिकेट खेळाडू सहभागी झाले होते. तेथे डायना ने चांगल्या व्हीकेट्स व फलंदाजी करत उत्कृष्ठ खेळी करून पात्र ठरल्याने साऊथ आफ्रिका येथे होणाऱ्या अंडर 15 इंनडोअर क्रिकेट वर्डकप स्पर्धेसाठी भारतीय संघात तिची निवड झाली आहे.विशेष म्हणजे महाराष्ट्र राज्यातून भारतीय संघात निवड झालेली ती एकमेव खेळाडू आहे.
याआधी धुळे येथे झालेल्या अंडर 19 बॉईझ क्रिकेट सिरीज मध्ये देखील अमृताने धमाकेदार प्रदर्शन करत मॅन ऑफ द सिरिज चा बहुमान मिळविला होता.याशिवाय अनेक स्पर्धेत ती चमकली आहे.क्रिकेट साठी तिला प्रशिक्षक मिलिंद शिंदे व रोनक शेख यांचे मार्गदर्शन तिला लाभले असून वर्ड कप साठी बेंगलोर येथे 10 सप्टेंबर पासून सरावासाठी ती जाणार आहे.व त्यानंतर 21 सप्टेंबर पासून सुरू होणाऱ्या वर्ड कप साठी साऊथ आफ्रिका येथे ती रवाना होणार आहे.
सदर निवडीबद्दल राज्याच्या उपमुख्यमंत्री सुनेत्राताई पवार व कॅबिनेट मंत्री नामदार राधाकृष्ण विखे पाटील यांनी अहिल्यानगर येथे दियाना ला शुभेच्छा देऊन कौतुक व सत्कार केला.खासदार स्मिताताई वाघ,माजी मंत्री तथा आमदार अनिल भाईदास पाटील व मुंदडा ग्लोबल स्कुलचे चेअरमन ओमप्रकाश मुंदडा यांनी दियाना व तीच्या आईवडिलांचे अभिनंदन केले आहे.सर्वत्र तिच्यावर अभिनंदनाचा वर्षाव होत आहे.
