लायन्स क्लब ऑफ अमळनेरच्या वतीने रंगभरण व चित्रकला स्पर्धेचे आयोजन

अमळनेर : लायन्स क्लब ऑफ अमळनेरच्या वतीने श्री गणेशोत्सवानिमित्त दिनांक *१८ सप्टेंबर २०२६* रोजी भगिनी मंडळ विद्यालय, अमळनेर येथे विद्यार्थ्यांसाठी *रंगभरण व चित्रकला स्पर्धेचे* आयोजन करण्यात आले. या स्पर्धेला विद्यार्थ्यांचा उत्स्फूर्त प्रतिसाद मिळाला असून सुमारे *७०० विद्यार्थ्यांनी* या स्पर्धेत सहभाग नोंदविला.

इयत्ता १ ली ते ३ रीच्या विद्यार्थ्यांसाठी रंगभरण स्पर्धा, तर इयत्ता ४ थी ते ७ वीच्या विद्यार्थ्यांसाठी चित्रकला स्पर्धा घेण्यात आली. विद्यार्थ्यांनी आपल्या कलागुणांचे सुंदर प्रदर्शन करत विविध रंगसंगती व कल्पक चित्रांद्वारे आपली सर्जनशीलता व्यक्त केली. विद्यार्थ्यांमध्ये कलात्मक दृष्टिकोन, कल्पनाशक्ती आणि आत्मविश्वास वाढविण्याच्या दृष्टीने या उपक्रमाचे विशेष महत्त्व आहे.

या कार्यक्रमास *लायन्स क्लब ऑफ अमळनेरचे अध्यक्ष Ln. जितेंद्रभाऊ पारख*, *सचिव Prof. Dr. जयेश गुजराथी*, तसेच ज्येष्ठ लायन सदस्य *Ln. Dr. रवींद्र कुलकर्णी*, *Ln. रवींद्रसिंग कालरा*, *Ln. योगेश मुंदडा*, *Ln. विनोद अग्रवाल*, *Ln. प्रदीप अग्रवाल* यांच्यासह लायन्स क्लबचे इतर सर्व सदस्य उपस्थित होते.

लायन्स क्लबच्या सदस्यांनी विद्यार्थ्यांना प्रोत्साहन देत त्यांच्या कलाकृतींचे कौतुक केले. विद्यार्थ्यांचा मोठ्या संख्येने सहभाग आणि उत्साह यामुळे हा उपक्रम अत्यंत यशस्वी ठरला. *विद्यार्थ्यांच्या सर्वांगीण विकासासाठी अशा प्रकारचे विविध शैक्षणिक व सांस्कृतिक उपक्रम सातत्याने राबविण्याचा लायन्स क्लब ऑफ अमळनेरचा प्रयत्न आहे*.

ZRUCC बैठकीत खानदेशच्या रेल्वे प्रश्नांची दमदार मांडणी ▪️प्रवाशांच्या समस्या, प्रलंबित मागण्या व रेल्वे सुविधांमध्ये सुधारणा करण्यासाठी प्रतिक जैन यांचा ठाम आवाज

धरणगाव / अमळनेर 

धरणगाव : मुंबई येथे पश्चिम रेल्वेच्या विभागीय रेल्वे वापरकर्ते सल्लागार समितीच्या झालेल्या बैठकीत खानदेशातील रेल्वे प्रवाशांच्या विविध प्रलंबित प्रश्नांसह रेल्वे सुविधांमध्ये आवश्यक सुधारणा करण्याच्या मागण्यांची प्रभावी व ठामपणे मांडणी करण्यात आली. झेडआरयुसीसी सदस्य प्रतिक विरचंद जैन यांनी खानदेशातील प्रवाशांच्या दैनंदिन अडचणी, रेल्वे सेवांबाबतच्या अपेक्षा तसेच प्रलंबित मागण्यांकडे रेल्वे प्रशासनाचे लक्ष वेधले. मुंबई येथे झालेल्या या बैठकीस पश्चिम रेल्वेचे महाव्यवस्थापक, वरिष्ठ रेल्वे अधिकारी तसेच झेड.आर.यु.सी.सी. सदस्य उपस्थित होते. या बैठकीच्या माध्यमातून खानदेशातील रेल्वे प्रवाशांच्या प्रश्नांना रेल्वेच्या वरिष्ठ पातळीवर थेट व्यासपीठ मिळाले. खानदेश हा रेल्वे वाहतुकीच्या दृष्टीने महत्त्वाचा प्रदेश असून, दररोज मोठ्या संख्येने नागरिक, विद्यार्थी, नोकरदार, व्यापारी, शेतकरी तसेच विविध कामानिमित्त प्रवास करणारे प्रवासी रेल्वे सेवेचा वापर करतात. त्यामुळे प्रवाशांच्या सोयीसाठी आवश्यक असलेल्या सुविधा, गाड्यांना थांबे, वेळापत्रकातील सुधारणा, प्रलंबित मागण्यांची पूर्तता तसेच स्थानकांवरील मूलभूत सुविधांकडे प्रशासनाने गांभीर्याने लक्ष देणे आवश्यक असल्याचे या बैठकीत अधोरेखित करण्यात आले. खानदेशातील रेल्वे प्रश्न केवळ स्थानिक पातळीवर न राहता ते रेल्वेच्या वरिष्ठ प्रशासनापर्यंत पोहोचविण्याचे काम सातत्याने केले जात आहे, अशी भूमिका प्रतिक जैन यांनी मांडली. प्रवाशांना अधिक सुलभ, सुरक्षित आणि प्रभावी रेल्वे सेवा उपलब्ध व्हावी, यासाठी उपलब्ध असलेल्या अधिकृत व्यासपीठाचा प्रभावी वापर करण्याचा प्रयत्न असल्याचे त्यांनी स्पष्ट केले. समितीच्या माध्यमातून प्रवाशांच्या समस्या थेट रेल्वे प्रशासनासमोर मांडता येत असल्याने खानदेशातील विविध रेल्वे प्रश्नांना भविष्यात सकारात्मक प्रतिसाद मिळण्याची अपेक्षा व्यक्त होत आहे. रेल्वे प्रशासनाने प्रवाशांच्या मागण्यांचा गांभीर्याने विचार करून आवश्यक त्या उपाययोजना कराव्यात, अशी अपेक्षा खानदेशातील रेल्वे प्रवाशांकडून व्यक्त होत आहे. खानदेशातील प्रवाशांचा आवाज रेल्वेच्या व्यासपीठावर सातत्याने बुलंद करण्याचा प्रयत्न राहील, असा निर्धार श्री. जैन यांनी व्यक्त केला.

श्री मंगळग्रह मंदिरात उद्या श्री मंगळ जन्मोत्सव सोहळा पंचामृत अभिषेक, ध्वजारोहण, ५६ भोग आणि श्री महाभोमयागाचे आयोजन; भाविकांना दर्शन, तीर्थप्रसादाचे निमंत्रण

अमळनेर : श्री मंगळग्रह देवांची विश्वातील एकमात्र स्वयंभू मूर्ती असलेल्या येथील श्री मंगळग्रह मंदिरात दरवर्षीप्रमाणे यंदाही परम पवित्र श्री मंगळ जन्मोत्सव सोहळा मोठ्या उत्साहात आणि भक्तिभावाने विधीवत साजरा होणार आहे. मंगळग्रह सेवा संस्थेने भाद्रपद शुद्ध दशमी अर्थात सोमवार, दि. २१ सप्टेंबर २०२६ रोजी या अलौकिक सोहळ्याचे आयोजन केले आहे. मंदिराच्या इतिहासात हा दिवस सर्वांत मोठा आणि परम पवित्र मानला जातो. यानिमित्त पहाटेपासूनच मंदिरात अतिशय भक्तिमय, चैतन्यमय आणि मंगलमय वातावरण असणार आहे.

दिवसभरातील कार्यक्रम

पहाटे ४ वाजता श्री मंगळग्रह देवांच्या मूर्तीवर वैशिष्ट्यपूर्ण पंचामृत अभिषेकाने या सोहळ्याची सुरूवात होईल. सकाळी ६ वाजता फुलांनी सजवलेल्या पाळण्यात देवांचा प्रतिकात्मक जन्मोत्सव साजरा होईल. सकाळी ७ वाजता मंदिरावरील जुने ध्वज विधीवत उतरवून नवे ध्वज लावण्यात येतील. त्यानंतर श्री मंगळग्रह देवांची महाआरती होऊन देवांना ५६ भोगांचा महाप्रसाद अर्पण केला जाईल. यानंतर दुपारी १ वाजता रेती, शेती आणि मातीशी निगडित असलेल्या समस्त मानवजातीच्या कल्याणासाठी श्री महाभोमयागाचेही आयोजन केले आहे. सायंकाळी ५ वाजता श्री मंगळग्रह देवांची मंदिर परिसरातून वाद्यवृंदासह वाजतगाजत पालखी मिरवणूक निघेल. त्यानंतर ६ वाजता श्री मंगळग्रह देवांची महाधुपारती होईल. 

भाविकांना आवाहन

श्री मंगळ जन्मोत्सव सोहळ्यासाठी सर्व भाविकांनी सकाळी ६ ते रात्री १० या वेळेत मोठ्या संख्येने उपस्थित राहून दर्शनाचा व तीर्थप्रसादाचा लाभ घ्यावा, असे आवाहन मंगळग्रह सेवा संस्थेचे समस्त विश्वस्त मंडळ व सेवेकऱ्यांनी केले आहे.

काय आहे मंदिराचे वेगळेपण?

खानदेशची भूमी गौरवान्वित करणारे हे मंदिर केवळ महाराष्ट्राचेच नव्हे, तर देश-विदेशातील लाखो भाविकांचे श्रद्धास्थान आहे. येथे श्री मंगळग्रह देवांची विश्वातील एकमात्र स्वयंभू मूर्ती आहे. या मूर्तीशेजारीच भूमीमातेची दाक्षिणात्य शैलीतील एकमेव मूर्ती आणि पंचमुखी हनुमानजींची मूर्ती आहे. तसेच परिसरात भगवान श्री गुरुदत्त-माता श्री अनघालक्ष्मी यांच्या मूर्ती असलेले कमंडलूस्थित आणि भगवान श्री कालभैरव-माता भैरवी यांचे त्रिशूलात्मकस्थित विश्वातील एकमात्र मंदिर आहे.

जळगांव जिल्हा कोरडा दुष्काळ जाहीर करावा व ताततीने दुष्काळी सवलती व मदत देण्याबाबत निवेदन सादर…

जळगांव : जळगांव जिल्ह्यातील यावर्षी पावसाचे प्रमाण अत्यल्प असून पावसातील खंड, पावसाचे अनियमित स्वरूप व सततची उष्णता यामुळे जळगांव जिल्ह्यातील शेतक-यांसमोर गंभीर संकट निर्माण झाले आहे. अनेक भांगामध्ये पावसाअभावी जमिनीतील ओलावा कमी झाला असून खरीप पिकांची वाढ खुंटलेली आहे. शेतक-यांनी बियाणे, खते औषधे व मशागतीसाठी मोठा खर्च केलेला असताना अपेक्षित उत्पादन मिळण्याची शक्यता कमी झाली आहे त्यामुळे शेतकरी आर्थिक अडचणीत सापडला असून जनावरांच्या चा-याबरोवर पिण्याचा पाण्याचाही प्रश्न गंभीर बनत आहे.

जळगांव जिल्ह्यातील सद्यस्थितीचा विचार करता प्रशासनाने केवळ कागदोपत्री आकडेवारीवर अवलंबून न राहता प्रत्यक्ष शेतशिवारात जाऊन पिकांची पाहणी व पंचनामे करणे अत्यंत आवश्यक आहे, त्यामुळे जळगांव जिल्हा कोरडा दुष्काळग्रस्त जाहीर करून शेतक-यांसाठी तातडीने मदत व सवलती देण्यात याव्यात ही नम्र विनंती.

प्रमुख मागण्या

१) जळगांव जिल्हा कोरडा दुष्काळग्रस्त जिल्हा म्हणून जाहीर करण्यासाठी शासनाकडे तातडीने प्रस्ताव पाठवावा.

२ ) जळगांव जिल्ह्यातील शेतक-यांना हेक्टरी ५००००/- रूपये नुकसान भरपाई मिळावी.

३) पात्र शेतक-यांना पीक विम्याची नुकसान भरपाई मिळण्यासाठी संबधीत विमा कंपनीने तातडीने कार्यवाही करावी.

४) पावसाअभावी निर्माण होणारी जनावरांच्या चा-याची समस्या लक्षात घेऊन चारा उपलब्ध करून देण्यात यावा.

५) शेतक-यांना शासनाकडून मिळणा-या सर्व सवलती व योजनांचा लाभ तातडीने देण्यात यावा.

६) शासनाने जाहीर केलेली कर्जमाफी तात्काळ उर्वरीत यादी जाहीर करून शेतक-यांचा खात्यावर पैसे जमा करावे.

७) मागील अतिवृष्टी व अवकाळी पावसाने झालेला नुकसानाचे पैसे तात्काळ शेतक-यांना दयावे.

८ ) शेतक-यांचा मुलांना फी माफी व एस. टी. पास सवलत देण्यात यावी.

९) नियमित कर्मफेड करणाऱ्या शेतकऱ्यांना ५० हजार रुपये प्रोत्साहनपर अनुदान तात्काळ द्यावे.

जळगांव जिल्ह्यातील शेतकरी बांधवांच्या हिताचा विचार करून वरील मागण्यांवर तातडीने सकारात्मक निर्णय घेऊन शासनाकडे योग्य तो प्रस्ताव पाठवावा ही नम्र विनंती. 

यावेळी जिल्हा अध्यक्ष प्रमोद पाटील, महानगर अध्यक्ष अशोक लाडवंजारी, दिलीप खोडपे सर, विकास पवार, वाय एस महाजन सर, ईजाज मलिक, कल्पिताताई पाटील, सुनिल भैय्या माळी, विलास पाटील, डॉ सुभाष देशमुख, किरणभाऊ राजपूत, अन्वर खाटीक, राजु मोरे, गणेश पाटील, भगवान सोनवणे, मजहरभाई पठाण, रईस खाटीक, प्रा एन डी पाटील, विनायक पाटील, प्रतिभाताई शिरसाट, सुमनताई बनसोडे, माधुरीताई पाटील, कलाताई शिरसाट, नारायण चौधरी, प्रा गोपाल पाचवणे, नईम खाटीक, संजय जाधव, दिलीप ताकवाले, वाल्मिक आमले, अकबर खान अजमिरी खान, लक्ष्मणराव पाटील, रियाज देशमुख, मोहित पवार, राजेंद्र चौधरी, फहरान खान इतर पदाधिकारी कार्यकर्ते उपस्थित होते.

बिबट्याच्या वावरामुळे घाबरू नका,मात्र सतर्क राहा  आमदार अनिल पाटील यांचे जनतेला आवाहन

अमळनेर : अमळनेर तालुक्यात गेल्या तीन चार दिवसांपासून दोन-तीन ठिकाणी बिबट्या आढळल्याच्या घटना घडल्या आहेत. विशेषतः नंदगाव शिवारात एकावर हल्ला आणि परिसरातील शेतशिवारात बिबट्याच्या पाऊलखुणा आणि अंतुर्ली परिसरात डोळे चमकणारा प्राणी दिसल्याच्या चर्चेने शेतकरी आणि ग्रामस्थांमध्ये भीतीचे वातावरण पसरले आहे.

      याशिवाय ढेकू रस्ता येथेही बकऱ्या चारणाऱ्याला दिसल्याची वार्ता पसरली.तसेच कालही पिळोदा ,धुपी ,देवळी शिवारात बिबट्याचा वावर आढळून पपईच्या शेतात तो लपला व त्यांनतर पळाला नंतर मक्याच्या शेतात दिसला,अशी वार्ता पसरल्याने शेतकरी भयभीत होऊन मजूरही घाबरलेले होते,.याठिकाणी देखील वन अधिकाऱ्यांनी तात्काळ दाखल होऊन सर्वत्र पाहणी केली.

       या पार्श्वभूमीवर आमदार अनिल पाटील यांनी वन अधिकारी छत्रपती चव्हाण यांचेशी संपर्क साधून संपुर्ण माहिती जाणून घेत त्यांना अधिक दक्ष होण्याच्या सूचना केल्या आहेत.तसेच जनतेला महत्त्वाचे आवाहनही केले आहे.

काय म्हणाले आमदार अनिल पाटील ?

     “अमळनेर तालुक्यात बिबट्या आढळल्याच्या घटना समोर आल्या आहेत. नागरिकांनी ही बाब केवळ अफवा समजून बेसावध राहू नये, तसेच विनाकारण पॅनिक होऊन घाबरूनही जाऊ नये.सर्व नागरिकांनी, विशेषतः शेतकरी बांधवांनी रात्री-अपरात्री एकट्याने शेतात जाणे टाळावे. शेतात जाताना सोबत २-३ जणांनी जावे, हातात बॅटरी, काठी ठेवावी. लहान मुलांना एकटे शेतात किंवा घराबाहेर सोडू नये. आपली व आपल्या जनावरांची काळजी घ्यावी.”

वन विभाग सतर्क, दोन पिंजरे लावले

       आमदार अनिल पाटील यांनी सांगितले की, या घटनेची माहिती मिळताच वन विभागाला सतर्क करण्यात आले आहे. वन विभागाने तालुक्यात दोन ठिकाणी पिंजरे लावले असून पिंजऱ्यात सावज म्हणून बकरी कोंडण्यात आली आहे.मात्र रात्री-अपरात्री शेतरस्त्यावरून जाणाऱ्या वाहनांच्या आवाजामुळे आणि वर्दळीमुळे तो हिंस्त्र प्राणी पिंजऱ्याजवळ येत नसावा, असा अंदाज वन अधिकाऱ्यांनी व्यक्त केला आहे.

         “मी स्वतः वन विभागाच्या वरिष्ठ अधिकाऱ्यांच्या सतत संपर्कात आहे. वन विभागाचे पथक गस्त घालत आहे. लवकरात लवकर बिबट्याचा वावर असेलच तर त्याला जेरबंद करून नागरिकांना दिलासा दिला जाईल. नागरिकांनी कोणतीही अफवा पसरवू नये आणि काही संशयास्पद दिसल्यास तात्काळ वन विभाग किंवा माझ्या कार्यालयाशी संपर्क साधावा,” असे आवाहन आमदार पाटील यांनी केले आहे.

डिजिटल सुरक्षेसाठी NCC कॅडेट्सचा पुढाकार सायबर गुन्ह्यांपासून संरक्षणासाठी जनजागृती; NCC कॅडेट्सचे ॲपद्वारे डिजिटल सुरक्षेकडे पाऊल

जळगाव : दिवसेंदिवस वाढत चाललेल्या डिजिटल व्यवहारांच्या पार्श्वभूमीवर सायबर गुन्ह्यांचे प्रमाणही वाढत आहे. या पार्श्वभूमीवर N.M. College, जळगाव येथे NCC कॅडेट्समध्ये डिजिटल सुरक्षा आणि सायबर गुन्ह्यांविषयी जागरूकता निर्माण करण्यासाठी विशेष जनजागृती कार्यक्रमाचे आयोजन करण्यात आले.

या कार्यक्रमात Cyber Warriors विद्या सोनवणे, साक्षी तानाजी पाटील, राहुल चोपडे आणि जय ठाकूर यांनी उपस्थित NCC कॅडेट्सना विविध प्रकारच्या सायबर फसवणुकींची सविस्तर माहिती देत, अशा गुन्ह्यांपासून स्वतःचे संरक्षण करण्यासाठी आवश्यक प्रतिबंधात्मक उपाय समजावून सांगितले.

सध्याच्या काळात मोठ्या प्रमाणावर घडणाऱ्या फेक कॉल, बनावट मेसेज, OTP फ्रॉड, फिशिंग, सोशल मीडिया फसवणूक, बनावट वेबसाइट, फेक ॲप तसेच ऑनलाइन आर्थिक फसवणूक याबाबत कॅडेट्सना मार्गदर्शन करण्यात आले. सायबर गुन्हेगारांकडून वापरण्यात येणाऱ्या विविध पद्धती आणि त्यापासून सावध राहण्यासाठी घ्यावयाची काळजी याविषयी प्रात्यक्षिक स्वरूपात माहिती देण्यात आली.

डिजिटल व्यवहार करताना केवळ अधिकृत ॲप आणि वेबसाइटचा वापर करणे, आपले पासवर्ड सुरक्षित ठेवणे, OTP किंवा गोपनीय माहिती कोणालाही न देणे तसेच संशयास्पद लिंकवर क्लिक न करणे, यावर विशेष भर देण्यात आला. सोशल मीडिया आणि ऑनलाइन व्यवहार करताना सजगता व जबाबदारीने वागणे हीच डिजिटल सुरक्षेची पहिली पायरी असल्याचे यावेळी स्पष्ट करण्यात आले.

कार्यक्रमादरम्यान Quick Heal Foundation Anti Fraud App ची सविस्तर माहिती उपस्थितांना देण्यात आली. सायबर फसवणुकीपासून अधिक प्रभावीपणे सावध राहण्यासाठी या ॲपचे महत्त्व समजावून सांगण्यात आले. यावेळी उपस्थित NCC कॅडेट्सकडून ॲपचे activation करण्यात आले.

या उपक्रमासाठी Field Work Volunteer भारती पाटील यांनी मोलाचे सहकार्य केले. तसेच संपूर्ण कार्यक्रमाला डॉ. आर. बी. आमले यांचे मार्गदर्शन लाभले.

डिजिटल युगात तंत्रज्ञानाचा सुरक्षित आणि जबाबदारीने वापर करण्याचा संदेश देणारा हा उपक्रम NCC कॅडेट्ससाठी अत्यंत उपयुक्त ठरला. ‘सावधानता हीच सायबर सुरक्षेची गुरुकिल्ली’ या भावनेतून कॅडेट्सनी डिजिटल सुरक्षेचा संदेश आत्मसात करीत समाजातही सायबर जागरूकता निर्माण करण्याचा संकल्प केला.

पी. बी. ए. इंग्लिश मीडियम स्कूलच्या मुलींची टेबल टेनिसमध्ये दैदिप्यमान कामगिरी जिल्हास्तरीय स्पर्धेत विजेतेपदावर मोहोर; विभागीय स्पर्धेसाठी दिमाखदार निवड

अमळनेर : अनुभूती इंटरनॅशनल इंग्लिश मीडियम स्कूल, जळगाव येथे आयोजित करण्यात आलेल्या जिल्हास्तरीय टेबल टेनिस स्पर्धेत पी. बी. ए. इंग्लिश मीडियम स्कूलच्या १७ वर्षे वयोगटातील मुलींच्या संघाने ऐतिहासिक व नेत्रदीपक कामगिरी करत जिल्हास्तरावर प्रथम क्रमांकाचे विजेतेपद पटकावले. या शानदार विजयासह संघाची विभागीय स्पर्धेसाठी निवड झाली आहे.

जळगाव जिल्ह्यातील अनेक नामांकित व प्रतिष्ठित शाळांनी या स्पर्धेत उत्स्फूर्त सहभाग नोंदविला होता. अत्यंत चुरशीच्या, कस पणाला लावणाऱ्या आणि प्रत्येक सामन्यात उत्कंठा वाढविणाऱ्या वातावरणात ही स्पर्धा पार पडली. पी. बी. ए. इंग्लिश मीडियम स्कूलच्या मुलींनी आपल्या उत्कृष्ट खेळाचे प्रदर्शन करीत प्रतिस्पर्धी संघांवर निर्विवाद वर्चस्व प्रस्थापित केले.

स्पर्धेतील तीन ते चार पात्रता फेरीचे सामने यशस्वीपणे पार करीत पी. बी. ए. इंग्लिश मीडियम स्कूलच्या संघाने नामांकित शाळांच्या संघांना पराभूत केले. उपांत्यपूर्व सामन्यात रुस्तम इंग्लिश मीडियम स्कूलचा पराभव करीत संघाने अंतिम फेरीत दिमाखात प्रवेश केला. अंतिम सामन्यात अनुभूती स्कूलच्या संघावर मात करीत पी. बी. ए. इंग्लिश मीडियम स्कूलच्या मुलींनी जिल्हास्तरावर प्रथम क्रमांकाचे सुवर्णमय विजेतेपद आपल्या नावावर केले.

या ऐतिहासिक विजयामुळे शाळेच्या शिरपेचात आणखी एक मानाचा तुरा रोवला गेला असून, विजयी संघाची विभागीय स्पर्धेसाठी निवड झाली आहे. अथक मेहनत, जिद्द, आत्मविश्वास, सांघिक भावना आणि तंत्रशुद्ध खेळाच्या जोरावर विद्यार्थिनींनी मिळविलेल्या या यशाचे सर्व स्तरांतून कौतुक होत आहे.

या दैदिप्यमान कामगिरीत अक्षरा जे. पाटील, विनिता डी. कोळी, हर्षिता जे. वाधवानी, हिताक्षी ए. पाटील आणि ग्रंथी के. पटेल या खेळाडूंनी उत्कृष्ट खेळाचे प्रदर्शन करीत संघाच्या विजयात मोलाची भूमिका बजावली. त्यांच्या या स्पृहणीय कामगिरीबद्दल त्यांचे सर्वत्र अभिनंदन होत आहे.

विजयी खेळाडूंना क्रीडा शिक्षक रोहन मुंदडा, महेश माळी आणि विनायक सूर्यवंशी यांचे तंत्रशुद्ध प्रशिक्षण व मोलाचे मार्गदर्शन लाभले. तसेच शिक्षकेतर कर्मचारी मंगलबाई पाटील यांचे विशेष सहकार्य लाभले.

या उल्लेखनीय यशाबद्दल विजयी विद्यार्थिनींचे शाळेचे चेअरमन डॉ. संदेश गुजराथी, मुख्याध्यापक जे. एस. देवरे, पर्यवेक्षक महेश माळी, पर्यवेक्षिका मीनाक्षी बारी, प्रशांत वंजारी, अश्विन चौधरी तसेच शिक्षकवृंद व शिक्षकेतर कर्मचारीवृंद यांनी अभिनंदन करून त्यांच्या यशाचे कौतुक केले.

पी. बी. ए. इंग्लिश मीडियम स्कूलच्या मुलींनी मिळविलेले हे जिल्हास्तरीय विजेतेपद त्यांच्या क्रीडाक्षेत्रातील जिद्द, मेहनत आणि गुणवत्तेची साक्ष देणारे असून, आता विभागीय स्पर्धेतही दमदार कामगिरी करण्यासाठी संपूर्ण शाळा परिवाराच्या शुभेच्छा या खेळाडूंना लाभत आहेत.

अमळनेर रेल्वे स्थानकावर स्वच्छता जनजागृतीचे पथनाट्य

अमळनेर : मेरा युवा भारत, जळगाव आणि समाजकार्य महाविद्यालय, अमळनेर यांच्या संयुक्त विद्यमाने ‘सेवा संकल्प अभियान’ अंतर्गत ‘सेवा पंधरवडा’ निमित्त अमळनेर रेल्वे स्थानकावर स्वच्छता अभियान व जनजागृती कार्यक्रम घेण्यात आला. यावेळी समाजकार्य महाविद्यालयातील विद्यार्थ्यांनी ‘स्वच्छता हीच सेवा’ या विषयावर प्रभावी पथनाट्य सादर करून प्रवासी व नागरिकांमध्ये स्वच्छतेबाबत जनजागृती केली. पथनाट्यात सार्वजनिक ठिकाणी कचरा न टाकणे, कचरा कचरापेटीत टाकणे, प्लास्टिकचा वापर टाळणे तसेच रेल्वे स्थानक व परिसर स्वच्छ ठेवण्याचा संदेश देण्यात आला. ‘स्वच्छ रेल्वे स्थानक – स्वच्छ अमळनेर’ या घोषणेतून स्वच्छता ही प्रत्येक नागरिकाची सामूहिक जबाबदारी असल्याचे विद्यार्थ्यांनी अधोरेखित केले. पथनाट्यास प्रवासी व नागरिकांचा उत्स्फूर्त प्रतिसाद मिळाला.
कार्यक्रमास मेरा युवा भारत, जळगावचे जिल्हा युवा अधिकारी अभिषेक चवरे यांचे मार्गदर्शन लाभले व अमळनेर रेल्वे स्थानकाचे वाणिज्य निरीक्षक रवि पांडे व स्थानक व्यवस्थापक अनिल बी. शिंदे उपस्थित होते. महाविद्यालयाचे प्राचार्य डॉ. पी. एस. पाटील, प्रा. डॉ. जगदीश सोनवणे, प्रा. डॉ. विजयकुमार वाघमारे, प्रा. अनिता खेडकर व प्रा. डॉ. अस्मिता सरवैया यांचे मार्गदर्शन लाभले.
कार्यक्रमाच्या आयोजनात मेरा युवा भारत, अमळनेरचे तालुका समन्वयक सागर कोळी यांनी विद्यार्थ्यांना मार्गदर्शन केले. पथनाट्यात तेजस्विनी, कीर्ती, रत्ना, जान्हवी, भावना, जान्हवी, अनुजा, मयुरी व क्रिस केदार यांनी सहभाग घेतला.

महिला विद्यार्थिनींसाठी सायबर सुरक्षेचे मार्गदर्शन’; इंडस्ट्रियल ट्रेनिंग इन्स्टिट्यूटमध्ये जनजागृती उपक्रम

जळगाव | प्रतिनिधी

डिजिटल युगात ऑनलाइन व्यवहार करताना घ्यावयाची काळजी आणि सायबर फसवणुकीपासून सुरक्षित राहण्याबाबत महिलांमध्ये जागरूकता निर्माण करण्यासाठी संयुक्त विद्यमाने इंडस्ट्रियल ट्रेनिंग इन्स्टिट्यूट, जळगाव येथे महिलांसाठी सायबर सुरक्षा जनजागृती उपक्रम आयोजित करण्यात आला.

उपक्रमादरम्यान स्नेहल पाटील, वैष्णवी पाटील, अक्षय पाटील आणि लोकेश पाटील यांनी महिला विद्यार्थिनींशी संवाद साधत विविध प्रकारच्या सायबर फसवणुकीची माहिती दिली. ओटीपीद्वारे फसवणूक, क्यूआर कोडद्वारे फसवणूक, एआय व्हॉइस कॉलद्वारे फसवणूक, ऑनलाइन बँकिंगद्वारे फसवणूक, बनावट कस्टमर केअर कॉल, फिशिंग लिंक आणि सोशल मीडिया फसवणूक यांसारख्या फसवणुकीच्या पद्धती प्रत्यक्ष उदाहरणांसह समजावून सांगण्यात आल्या.

ऑनलाइन व्यवहार करताना OTP, PIN किंवा बँक खात्याची माहिती कोणाशीही शेअर करू नये, अनोळखी लिंकवर क्लिक करू नये आणि कोणतेही संशयास्पद अॅप डाउनलोड करण्यापूर्वी त्याची खातरजमा करावी, याबाबत महिला विद्यार्थिनींना मार्गदर्शन करण्यात आले. तसेच मजबूत पासवर्ड आणि 2FA वापरण्याचे महत्त्वही सांगण्यात आले.

यावेळी विकसित Anti-Fraud App चे अॅक्टिवेशन करण्यात आले. महिला विद्यार्थिनींना या अॅपच्या वापराबाबत आणि डिजिटल फसवणुकीपासून सुरक्षित राहण्यासाठी त्याचे महत्त्व समजावून सांगण्यात आले.

उपक्रमाच्या शेवटी महिला विद्यार्थिनींनी विविध प्रश्न विचारून सायबर सुरक्षेबाबत आपल्या शंकांचे निरसन करून घेतले. त्यांचा सक्रिय सहभाग आणि उत्स्फूर्त प्रतिसाद यामुळे उपक्रम प्रभावी ठरला. या उपक्रमासाठी डॉ. आर. बी. आमले सरांचे मार्गदर्शन लाभले.

सफाई कामगारांच्या प्रलंबित मागण्यांवर पारोळा नगर परिषदेत आढावा बैठक उपाध्यक्ष मा. मुकेशजी सारवान यांच्या उपस्थितीत कामगारांच्या अडी-अडचणींवर सकारात्मक चर्चा; निवेदनांवर योग्य निर्णय घेण्याचे आदेश

पारोळा : पारोळा नगर परिषद, पारोळा येथे दि. १७ सप्टेंबर २०२६ रोजी सफाई कामगारांच्या प्रलंबित मागण्या तसेच त्यांच्या विविध अडी-अडचणींचे निवारण करण्याच्या अनुषंगाने महत्त्वपूर्ण आढावा बैठक घेण्यात आली. या बैठकीस मा. मुकेशजी सारवान साहेब – उपाध्यक्ष, महाराष्ट्र राज्य सफाई कामगार आयोग, मुंबई तसेच त्यांचे विशेष कार्य अधिकारी मा. राजेश सोनवणे साहेब यांची प्रमुख उपस्थिती होती.

सफाई कामगारांच्या विविध प्रलंबित मागण्या, सेवा विषयक प्रश्न तसेच कामाच्या ठिकाणी येणाऱ्या अडी-अडचणी याबाबत बैठकीत सविस्तर चर्चा करण्यात आली. कामगारांच्या समस्या जाणून घेत त्यावर योग्य तोडगा काढण्यासाठी संबंधित विषयांचा आढावा घेण्यात आला.

यावेळी भारतीय सफाई कामगार संघटना, जळगाव यांच्या वतीने जिल्हा सरचिटणीस – संतोष संदानशिव यांच्यासह दिपक संदानशिव, राजेश कल्याणी, जगदीश संदानशिव, सुनिल गढरे, मिलींद संदानशिव, करण चव्हाण व इतर संघटना पदाधिकारी यांनी विविध मागण्यांसंदर्भात निवेदने सादर केली.

सदर निवेदनांमधील मागण्यांवर मा. आयोग साहेबांच्या आदेशान्वये कामगारांच्या हिताचा विचार करून योग्य ते निर्णय घेण्यात आले. त्यामुळे सफाई कामगारांच्या प्रलंबित प्रश्नांना गती मिळण्याची अपेक्षा व्यक्त करण्यात आली.

सफाई कामगारांच्या समस्या व मागण्यांकडे गांभीर्याने लक्ष देत त्यांचे प्रश्न मार्गी लावण्यासाठी घेण्यात आलेल्या या बैठकीमुळे कामगारांमध्ये समाधानाचे वातावरण निर्माण झाले असून, त्यांच्या विविध मागण्यांबाबत सकारात्मक कार्यवाही होण्याची अपेक्षा व्यक्त होत आहे.