अमळनेर अर्बन बँकेच्या चेअरमन पदी अभिषेक पाटील, व्हॉ. चेअरमन वसुंधरा लांडगे यांची निवड

अमळनेर ( प्रतिनिधी) येथील दि. अमळनेर को-ऑपरेटिव्ह अर्बन बँकेच्या चेअरमन पदी अभिषेक विनोद पाटील ( मोना) यांची तर व्हॉइस चेअरमन पदी वसुंधरा दशरथ लांडगे यांची सोमवारी बिनविरोध निवड करण्यात आली. निवडणुका अधिकारी व्ही एम जगताप आणि त्यांचे सहाय्यक म्हणून सुनील महाजन यांनी निवड प्रक्रिया पूर्ण केली.

             मावळते चेअरमन भरतकुमार सुरेश ललवाणी आणि लक्ष्मण पांडुरंग महाजन यांचा एक वर्षाचा कार्यकाळ पूर्ण झाल्याने त्यांनी राजीनामा दिल्यामुळे नवीन पदाधिकाऱ्यांची निवड करण्यात आली.

               बँकेच्या सभागृहात पार पडलेल्या या निवडी प्रसंगी बँकेचे सर्व संचालक, कार्यकारी अधिकारी, कर्मचारी, विविध राजकीय पक्षांचे पदाधिकारी, व्यापारी, प्रतिष्ठित नागरिक यांनी नवनियुक्त पदाधिकाऱ्यांचा सत्कार करून त्यांना शुभेच्छा दिल्या.

अमळनेरात एक कोटींच्या नमो गार्डनचे भूमिपूजन  नागरिकांच्या विश्वासाला तडा जाऊ देणार नाही- माजी आमदार शिरीष चौधरी

अमळनेर : चांगल्या कामांना वेळ लागतो विरोधकांनी आमच्यावर टीका केल्या मात्र आम्ही संयम ठेवून पाणी पुरवठा देखील तीन दिवसाआड नियमित सुरू केला आणि पहिलेच काम प्रभाग ८ मध्ये लहान मुलांपासून , तरुण , महिला व वृद्धांसाठी तब्बल एक कोटींचे तिरुपती बालाजी नमो गार्डन पासून विकास कामांना सुरुवात झाली आहे असे प्रतिपादन माजी आमदार शिरीष चौधरी यांनी नमो गार्डन च्या भूमिपूजन प्रसंगी केले.

      प्रभाग आठ मध्ये अत्याधुनिक , योगा हॉल , सुरक्षारक्षक खोली , वृद्धांना बसण्यासाठी शेड , बाक , ओपन जिम , कार्यक्रम घेण्यासाठी स्टेज , फिरण्यासाठी पाथ वे , लाईट व्यवस्था ,मुलांसाठी खेळणे , मध्यभागी तिरुपती बालाजीचा पुतळा अशा सुविधांसह तिरुपती बालाजी नमो गार्डन होत आहे.

     माजी आमदार शिरीष चौधरी म्हणाले की , या प्रभागातील लोकांनी मोठ्या फरकाने अपूर्वा चौधरी व नगराध्यक्ष डॉ परीक्षित बाविस्कर याना निवडून दिल्याने तुमच्या विश्वासाला तडा जाऊ देणार नाही. विरोधक म्हणतात गार्डन ची गरज काय पण राजकीय क्षेत्रात मैदान अपूर्ण पडू लागल्याने नेत्यांना शांत करण्यासाठी नमो गार्डन होत आहे. विरोधकांना कामाने उत्तर दिले जाईल. 

     यावेळी लोकनियुक्त डॉ परीक्षित बाविस्कर म्हणाले की तिरुपती सोन्याचा देव आहे त्या नावाचे गार्डन इथे होत आहे म्हणजे सोन्यासारखा विकास होत आहे. घरात काम करणाऱ्या महिला , वृद्ध , नागरिक आणि मुलांना चांगल्या आरोग्यासाठी नैसर्गिक वातावरण आणि खेळती हवा पाहिजे या गार्डन साठी ५ कोटींचे बक्षीस आहे तेही आपल्याला जिंकायचे आहे. यावेळी उपनगराध्यक्ष प्रशांत निकम , पी डी साळुंखे यांनी आपले मनोगत व्यक्त केले. कार्यक्रमाचे सूत्रसंचालन संजय पाटील यांनी तर आभार प्रदर्शन नगरसेविका अपूर्वा चौधरी यांनी केले.

      कार्यक्रमास माजी आमदार शिरीष चौधरी , नगराध्यक्ष डॉ परीक्षित बाविस्कर , उपनगराध्यक्ष प्रशांत निकम , बांधकाम सभापती साहेबराव पवार , शिक्षण सभापती नावेद शेख , पाणी पुरवठा सभापती कैलास पाटील , आरोग्य सभापती रामकृष्ण पाटील , शिवसेना तालुका प्रमुख गुलाब पाटील , गटनेते पंकज चौधरी , अपक्ष गटनेते महेश देशमुख , अनिल महाजन , श्रीराम चौधरी, मोहन सातपुते, प्रा भरतसिंग परदेशी, दिपक चौगुले , बाळासाहेब संदांनशीव , सुरज परदेशी, मुन्ना शर्मा, पंकज भोई, मंगलाताई देसले, शहर प्रमुख भरत पवार, विलास कंखरे, युवासेनेचे राहुल कंजर हजर होते.

मुलाबाळांचा संसार सांभाळत सुवर्णा धनगर यांची उल्लेखनीय यशोगाथा A.N.M. Promotional (L.H.V.) परीक्षेत प्रथम क्रमांक मिळवत मिळविला ‘डिस्टिंक्शन’चा मान

अमळनेर: घर-संसार, मुलाबाळांची जबाबदारी आणि कौटुंबिक कर्तव्ये समर्थपणे सांभाळत शिक्षणाची जिद्द कायम ठेवणाऱ्या सौ. सुवर्णा कौतिक धनगर यांनी आपल्या मेहनतीचे आणि चिकाटीचे शानदार उदाहरण निर्माण केले आहे. महाराष्ट्र स्टेट बोर्ड ऑफ नर्सिंग अँड पॅरामेडिकल एज्युकेशन, मुंबई अंतर्गत A.N.M. Promotional (L.H.V.) 2026-27 परीक्षेत त्यांनी प्रथम क्रमांक (First Number) मिळवत Distinction प्राप्त केले आहे.

कौटुंबिक जबाबदाऱ्या सांभाळून अभ्यासासाठी वेळ काढणे हे निश्चितच आव्हानात्मक होते. मात्र, “परिस्थिती कितीही कठीण असली तरी मेहनत, जिद्द आणि आत्मविश्वासाच्या जोरावर यश मिळवता येते,” हे त्यांनी आपल्या यशातून सिद्ध केले आहे.

संसाराची जबाबदारी, मुलाबाळांचे संगोपन आणि अभ्यास यांचा समतोल साधत त्यांनी मिळविलेले हे यश विशेष कौतुकास्पद आहे. त्यांच्या या उल्लेखनीय कामगिरीबद्दल कुटुंबीय, नातेवाईक, मित्रपरिवार, सहकारी तसेच विविध स्तरांतून त्यांच्यावर अभिनंदनाचा वर्षाव होत आहे.

सुवर्णा धनगर यांचे हे यश अनेक महिलांसाठी प्रेरणादायी असून, “जबाबदाऱ्या असल्या तरी स्वप्नांना मर्यादा नसतात” हा संदेश त्यांच्या यशातून मिळतो.

मनःपूर्वक अभिनंदन! 💐🏆

आपल्या या ‘Big Achievement’चा आम्हाला मनापासून अभिमान आहे.