गणेश विसर्जन मिरवणुकीवर पोलिसांची ‘थर्ड आय’! ड्रोन अन् अतिरिक्त सीसीटीव्हीचा वॉच; रात्री १२ नंतर मिरवणूक ‘जैसे थे’ ठिकाणी थांबविणार
अमळनेर : गणरायाला निरोप देताना उत्साहाला शिस्तीची जोड देण्यासाठी अमळनेर पोलीस प्रशासनाने कंबर कसली आहे. गणेश विसर्जन मिरवणुकीच्या पार्श्वभूमीवर नगरपालिकेत पोलीस प्रशासन व लोकप्रतिनिधींची संयुक्त बैठक झाली. रात्री १२ वाजेपर्यंतच मिरवणूक व ध्वनिक्षेपकाची परवानगी राहणार असून, त्यानंतर मिरवणूक ज्या ठिकाणी असेल, त्याच ठिकाणी थांबविण्यात येणार आहे, अशी स्पष्ट भूमिका पोलिसांनी बैठकीत मांडली.
मिरवणुकीदरम्यान प्रत्येक हालचालीवर नजर ठेवण्यासाठी मिरवणूक मार्गावर अतिरिक्त सीसीटीव्ही कॅमेरे बसविण्यात येणार असून, ड्रोनच्या माध्यमातूनही संपूर्ण मिरवणुकीवर बारकाईने लक्ष ठेवले जाणार आहे. कायदा व सुव्यवस्था अबाधित राहावी यासाठी पोलीस बंदोबस्ताचे नियोजन करण्यात आले आहे.
गणेशोत्सवाचा उत्साह कायम ठेवतानाच नागरिकांच्या सुरक्षिततेला प्राधान्य देण्यात आले असून, हानिकारक गुलालाचा वापर टाळावा, तसेच प्रशासनाने दिलेल्या सूचनांचे पालन करून सहकार्य करावे, असे आवाहन करण्यात आले. मिरवणूक शांततेत आणि शिस्तबद्ध पद्धतीने पार पडण्यासाठी गणेश मंडळे व नागरिकांनी प्रशासनास सहकार्य करण्याचे आवाहन बैठकीत करण्यात आले.
यावेळी नगराध्यक्ष डॉ. परीक्षित बाविस्कर, मुख्याधिकारी गणेश शिंदे, उपनगराध्यक्ष प्रशांत निकम, डीवायएसपी विनायक कोते, पोलीस निरीक्षक दत्तात्रय निकम यांच्यासह नगरसेवक उपस्थित होते.