*मृत्यूच्या दाढेतून चिमुकल्याला खेचून आणले; डॉ. शरद बाविस्कर यांच्या शर्थीच्या प्रयत्नांना यश!* पाण्याच्या हौदात पडलेल्या दोन वर्षीय शिवला मिळाले नवजीवन; ऊसतोड कामगार कुटुंबासाठी मोफत उपचारांसह नव्या कपड्यांचीही भेट
अमळनेर : खेळता खेळता जनावरांसाठी असलेल्या पाण्याच्या हौदात पडलेल्या अवघ्या दोन वर्षांच्या चिमुकल्याला डॉ. शरद बाविस्कर यांच्या अथक प्रयत्नांमुळे नवजीवन मिळाले. गंभीर अवस्थेत असलेल्या शिव विश्वास भिक (वय २ वर्षे, रा. ढेकू ) या बालकावर अमळनेर येथील डॉ. शरद बाविस्कर कस्तुरबा बालरुग्णालयात तातडीने उपचार करण्यात आले. विशेष म्हणजे, बालकाच्या कुटुंबाची आर्थिक परिस्थिती अत्यंत हलाखीची असल्याने डॉ. बाविस्कर यांनी बालकावर मोफत उपचार करून सामाजिक बांधिलकी जपली.
शिव हा घराजवळ खेळत असताना अचानक जनावरांसाठी असलेल्या पाण्याच्या हौदात पडला. काही वेळाने घरात बालक दिसत नसल्याचे लक्षात आल्यानंतर त्याच्या आईने घाबरून परिसरात शोध सुरू केला. शोध घेत असताना शिव हौदात पडल्याचे तिच्या निदर्शनास आले. आईने तातडीने त्याला हौदातून बाहेर काढले.
बालकाची गंभीर अवस्था लक्षात घेऊन त्याला तात्काळ वाहनाने डॉ. अनिल शिंदे व डॉ. संदीप जोशी यांच्याकडे नेण्यात आले. त्यांनी डॉक्टर शरद बाविस्कर सोबत वेळेच तात्काळ जीवनावशक ते उपचार केले तसेच डॉ शरद बाविस्कर पुढील उपचारासाठी डॉ. शरद बाविस्कर किंवा धुळे येथे जाण्यास सुचवले सदर कुटुंबाची परिस्थिती बघता ते अत्यंत खर्चाचे होते अशा वेळेस डॉ बाविस्कर यांनी बालकाला कस्तुरबा बालरुग्णालयात दाखल करून घेत शर्तीचे पर्यंत करत जीवदान दिले
बालकाची अवस्था गंभीर असल्याने परिस्थिती अत्यंत आव्हानात्मक होती. मात्र, “बालकाचा जीव वाचवायचा” या उद्देशाने डॉ. शरद बाविस्कर यांनी तातडीने बालकाला रुग्णालयात दाखल करून घेतले. वैद्यकीय पथकासह त्यांनी शर्थीचे प्रयत्न करत आवश्यक उपचार सुरू केले. डॉक्टरांच्या प्रयत्नांना अखेर यश आले आणि काही काळाच्या उपचारानंतर शिवची प्रकृती सुधारू लागली. उपचारानंतर बालक पूर्णपणे बरा झाल्याने कुटुंबीयांनी सुटकेचा निःश्वास सोडला.
हलाखीच्या परिस्थितीतही उपचारांचा खर्च घेतला नाही
शिवच्या कुटुंबाची आर्थिक परिस्थिती अत्यंत हलाखीची असून त्याचे वडील ऊसतोड कामगार आहेत. अशा परिस्थितीत महागडे वैद्यकीय उपचार करणे कुटुंबासाठी मोठे आर्थिक संकट ठरू शकले असते. मात्र, डॉ. शरद बाविस्कर यांनी कुटुंबाची परिस्थिती लक्षात घेत बालकावर मोफत उपचार केले.
डॉक्टरांनी दिली मायेची भेट
शिवला नवजीवन मिळाल्यानंतर डॉ. शरद बाविस्कर यांनी केवळ उपचार करून आपली जबाबदारी संपवली नाही. बालकाच्या आनंदासाठी त्यांनी त्याला नवीन कपडे घेऊन दिले. डॉक्टरांच्या या माणुसकीच्या कृतीने कुटुंबीय भावूक झाले.
“डॉक्टरांनी आमच्या मुलाला नवजीवन दिले. आमची परिस्थिती अत्यंत बिकट असताना त्यांनी मोफत उपचार केले आणि मुलासाठी नवीन कपडेही दिले. त्यांचे उपकार आम्ही कधीही विसरणार नाही,” अशी भावना शिवच्या आई-वडिलांनी व्यक्त केली.
या घटनेतून वैद्यकीय सेवेसोबतच माणुसकी, सामाजिक बांधिलकी आणि सेवाभाव यांचे दर्शन घडले आहे. एका गरीब ऊसतोड कामगाराच्या कुटुंबातील चिमुकल्याला मृत्यूच्या दाढेतून बाहेर काढून त्याला नवजीवन देण्यात डॉ. शरद बाविस्कर व त्यांच्या वैद्यकीय पथकाची भूमिका महत्त्वपूर्ण ठरली. त्यांच्या या सेवाभावी कार्याचे परिसरातून कौतुक होत आहे.