अमळनेरात दोन घरफोड्यांनी खळबळ! मुंदडा नगर परिसरात बंद घरांना चोरट्यांचे लक्ष्य; सोन्या-चांदीच्या दागिन्यांसह सुमारे ७० हजारांचा मुद्देमाल लंपास
अमळनेर : शहरातील मुंदडा नगर, सोहम नगर परिसरात अज्ञात चोरट्यांनी दोन बंद घरांना लक्ष्य करत घरफोडी केल्याची घटना समोर आली आहे. अथर्व बंगल्याजवळील गणेश रामभाऊ पाटील यांच्या घरातून सोन्याचे दागिने, तर त्याच परिसरात अवघ्या २०० मीटर अंतरावर राहणारे अनिल आत्माराम महाजन यांच्या घरातूनही सोन्या-चांदीचे दागिने चोरीस गेल्याने परिसरात खळबळ उडाली आहे.
गणेश रामभाऊ पाटील हे १२ सप्टेंबर रोजी गावी गेले होते. घराला कुलूप लावून ते बाहेर गेले होते. दुसऱ्या दिवशी, १३ सप्टेंबर रोजी ते घरी परतले असता घराच्या प्रवेशद्वाराचे गेट तोडलेल्या अवस्थेत आढळून आले. घरातील बेडरूममध्ये साहित्य अस्ताव्यस्त पडलेले दिसले. कपाटाचे लॉकर फोडून त्यातील पत्नीचे सोन्याचे दागिने अज्ञात चोरट्यांनी लंपास केल्याचे निदर्शनास आले.
दरम्यान, याच घरापासून सुमारे २०० मीटर अंतरावर राहणारे अनिल आत्माराम महाजन यांच्या घरातही चोरी झाल्याचे समोर आले. त्यांच्या घरातूनही सोन्या-चांदीचे दागिने चोरीस गेल्याची माहिती मिळाली आहे.
या दोन्ही घरफोड्यांमध्ये १३ ग्रॅम वजनाची सोन्याची चैन, १२ ग्रॅम वजनाची सोन्याची चैन, ८ ग्रॅम वजनाची सोन्याची चैन, तसेच चांदीचे शिक्के व जोडवे असा एकूण सुमारे ७० हजार २०० रुपयांचा मुद्देमाल अज्ञात चोरट्यांनी लंपास केला आहे.
घटनेची माहिती मिळताच पोलिसांनी घटनास्थळी पाहणी करून तपासाला सुरुवात केली. बंद घरांना लक्ष्य करून झालेल्या या सलग घरफोड्यांमुळे मुंदडा नगर व सोहम नगर परिसरातील नागरिकांमध्ये भीतीचे वातावरण निर्माण झाले असून, चोरट्यांचा तातडीने शोध घेण्याची मागणी होत आहे.
याप्रकरणी अज्ञात चोरट्यांविरुद्ध गुन्हा दाखल करण्यात आला असून, पुढील तपास पोलीस उपनिरीक्षक शरद काकडीज करीत आहेत.