🚆 अमृत भारत एक्सप्रेसचा भुसावळ–जळगावमध्ये जल्लोषात शुभारंभ

जळगाव, दि. 29 एप्रिल (जिमाका): देशातील रेल्वे प्रवास अधिक सुलभ, जलद आणि आधुनिक करण्याच्या दिशेने एक महत्त्वपूर्ण पाऊल टाकत पंतप्रधान Narendra Modi यांनी 28 एप्रिल 2026 रोजी ‘अमृत भारत एक्सप्रेस’ गाड्यांना हिरवा झेंडा दाखवून शुभारंभ केला. बनारस–पुणे (हडपसर) आणि अयोध्या–मुंबई (लोकमान्य टिळक टर्मिनस) या दोन महत्त्वाच्या मार्गांवर धावणाऱ्या या गाड्यांचे भुसावळ विभागात 29 एप्रिल रोजी उत्साहात स्वागत करण्यात आले.

भुसावळ रेल्वे स्थानकावर केंद्रीय क्रीडा राज्यमंत्री रक्षा निखिल खडसे, विभागीय रेल्वे व्यवस्थापक पुनीत अग्रवाल यांच्यासह अनेक मान्यवर उपस्थित होते. तर जळगाव स्थानकावर खासदार स्मिता उदय वाघ, जिल्हाधिकारी रोहन घुगे, पोलिस अधीक्षक श्रीकांत धिवरे, जिल्हा परिषद मुख्य कार्यकारी अधिकारी करिश्मा नायर तसेच रेल्वे प्रशासनातील वरिष्ठ अधिकारी मोठ्या संख्येने उपस्थित राहिले.

या कार्यक्रमांना लोकप्रतिनिधी, शासकीय अधिकारी, रेल्वे उपभोक्ता सल्लागार समितीचे सदस्य, पत्रकार, स्थानिक नागरिक आणि शाळकरी विद्यार्थी यांचा उत्स्फूर्त प्रतिसाद लाभला. यानिमित्ताने स्थानिक शाळांमध्ये निबंध व चित्रकला स्पर्धांचे आयोजन करण्यात आले होते. विजेत्या विद्यार्थ्यांना मान्यवरांच्या हस्ते पारितोषिके देऊन गौरविण्यात आले.

नवीन ‘अमृत भारत एक्सप्रेस’ सेवा भुसावळ विभागातील प्रवाशांसाठी मोठी दिलासा देणारी ठरणार आहे. या गाड्या खंडवा, भुसावळ, जळगाव, मनमाड आणि नाशिक रोड यांसारख्या प्रमुख स्थानकांवर थांबणार आहेत. बनारस–हडपसर ही गाडी दररोज धावणार असून अयोध्या–लोकमान्य टिळक टर्मिनस गाडी आठवड्यातून एकदा सेवा देणार आहे.

मध्यप्रदेशमार्गे धावणाऱ्या या गाड्यांमुळे प्रवाशांना थेट, जलद आणि अधिक आरामदायी प्रवासाचा पर्याय उपलब्ध होणार आहे. विशेषतः धार्मिक पर्यटन, स्थलांतरित कामगार आणि महाराष्ट्र–उत्तरप्रदेश दरम्यान प्रवास करणाऱ्या नागरिकांना याचा मोठा लाभ होणार आहे.

थेट रेल्वे संपर्कामुळे गाड्या बदलण्याची गरज कमी होऊन वेळेची बचत होणार असून प्रवास अधिक सुरक्षित व सोयीस्कर होणार असल्याची माहिती रेल्वे विभागाने दिली आहे.