विविध कार्यकारी सेवा सहकारी संस्था मर्या. गांधलीच्या चेअरमन पदी सौ. प्रतिभा पाटील; उपाध्यक्षपदी सौ. नलिनी देशमुख यांची बिनविरोध निवड; संस्थेच्या इतिहासात पहिल्यांदा महिलाराज
अमळनेर (प्रतिनिधी):
विविध कार्यकारी सेवा सहकारी संस्था मर्या. गांधली (ता. जि. जळगाव) येथील चेअरमन व व्हॉईस चेअरमन पदाची निवडणूक नुकतीच उत्साहात पार पडली. या निवडणुकीत संस्थेच्या इतिहासात पहिल्यांदाच महिलांची चेअरमन व व्हॉईस चेअरमन पदी निवड झाली असून गांधलीच्या सहकार क्षेत्रात एका नव्या व सुवर्ण अध्यायाची सुरुवात झाली आहे.
संस्थेच्या चेअरमन पदी सौ. प्रतिभा कैलास पाटील यांची, तर व्हॉईस चेअरमन पदी सौ. नलिनी अजय देशमुख यांची बिनविरोध निवड करण्यात आली. मावळते चेअरमन श्री. दिनेश पवार व मावळते व्हॉईस चेअरमन श्री. शांताराम माळी यांच्या कार्यकाळानंतर आता संस्थेची धुरा महिला नेतृत्वाकडे सोपवण्यात आली आहे.
महिला सक्षमीकरणाचा नवा पायंडा
गांधली विविध कार्यकारी सोसायटीच्या आजपर्यंतच्या इतिहासात पहिल्यांदाच दोन्ही वरिष्ठ पदांवर महिलांची बिनविरोध निवड झाल्याने संपूर्ण गावात व सहकार वर्तुळातून आनंदाचे व कौतुकाचे वातावरण पसरले आहे. शेतकरी, सभासद आणि ग्रामस्थांच्या विश्वासाला सार्थ ठरवत संस्थेचा कारभार अधिक पारदर्शक, प्रगतीशील आणि शेतकरीहितैषी चालवण्याचा संकल्प नवनिर्वाचित पदाधिकाऱ्यांनी व्यक्त केला.
नेतेमंडळी व सहकाऱ्यांचे मोलाचे योगदान
ही निवडणूक बिनविरोध पार पाडण्यासाठी व संस्थेच्या यशस्वी वाटचालीसाठी श्री. सुनील पाटील, श्री. प्रवीण पाटील, श्री. महेश देशमुख, श्री. गजेंद्र साळुंखे, श्री. हिम्मत पाटील, श्री. बापुराव चव्हाण, श्री. अशोक महाजन, श्री. सीताराम भाऊ व श्री. आधार महाजन यांचे विशेष सहकार्य व मार्गदर्शन लाभले.
कौतुकाचा वर्षाव
नवनिर्वाचित चेअरमन सौ. प्रतिभा पाटील व व्हॉईस चेअरमन सौ. नलिनी देशमुख यांचे निवड जाहीर होताच पेढे वाटून आणि फटाक्यांची आतषबाजी करत अभिनंदन करण्यात आले. या प्रसंगी संस्थेचे सर्व संचालक, सभासद, ग्रामस्थ आणि विविध क्षेत्रांतील मान्यवरांनी नवनिर्वाचित पदाधिकाऱ्यांचे पुष्पगुच्छ देऊन अभिनंदन केले व पुढील वाटचालीस शुभेच्छा दिल्या.
