तहसीलदारांच्या नावाने मागितली लाच रंगेहात दोघे जेरबंद

अमळनेर :- तालुक्यात तहसीलदारांच्या नावाने पन्नास हजार रुपये लाचेची मागणी करून 25 हजार रुपयांची रक्कम स्वीकारताना दोघांना लाचलुचपत प्रतिबंधक विभागाने दिनांक 28 एप्रिल रोजी दुपारी रंगेहात पकडले. याप्रकरणी भ्रष्टाचार प्रतिबंधक कायद्यान्वये गुन्हा दाखल करण्यात आला आहे. 

  मिळालेल्या माहितीनुसार, तक्रारदार यांचा गौण खनिज ( वाळू ) वाहतुकीचा व्यवसाय असून, मौजे मांडळ येथील पांझरा नदीतून दोन ट्रॅक्टर द्वारे वाळू वाहतूक करण्यासाठी आरोपी रामराव हरचंद पाटील( वय 64, रा. लोन पंचम, ता. अमळनेर) व जितेंद्र राजेंद्र पाटील( वय 26 रा. झाडी, पोस्ट शिरसाळे, ता. अमळनेर) यांनी अमळनेर तहसीलदारांच्या नावाने प्रत्येक ट्रॅक्टर मागे पंचवीस हजार रुपये अशी एकूण 50 हजार रुपयांच्या लाचेची मागणी केली होती.

   याबाबत तक्रारदाराने लाच लुचपत प्रतिबंधक विभाग, धुळे यांच्याशी संपर्क साधून तक्रार दाखल केली. तक्रारीची पडताळणी केल्यानंतर सापळा रचण्यात आला. सापळा कारवाईदरम्यान आरोपींनी लाचेची मागणी कायम ठेवली त्यापैकी 25 हजार जितेंद्र पाटील यांनी पंचा समक्ष स्वीकारले. त्यावेळी पथकाने त्यांना रंग हात पकडले. याप्रकरणी आरोपींविरुद्ध भ्रष्टाचार प्रतिबंधक कायदा, 1988 च्या कलम 7 अ अन्वये गुन्हा दाखल करण्यात आला आहे.

     ही कारवाई पोलीस उपअधीक्षक सचिन साळुंखे यांच्या पर्यवेक्षणाखाली पोलीस निरीक्षक पद्मावती कलाल यांच्या नेतृत्वात पार पडली. पुढील तपास पोलीस निरीक्षक यशवंत बोरसे करीत आहेत.