NSUI तर्फे आदर्श शिक्षक पुरस्कार वितरण सोहळा उत्साहात संपन्न

अमळनेर : समाजाच्या जडणघडणीत शिक्षकांची भूमिका अत्यंत महत्त्वाची असून, ज्ञानासोबतच विद्यार्थ्यांमध्ये संस्कार, मूल्ये आणि आत्मविश्वास निर्माण करणाऱ्या शिक्षकांचा सन्मान होणे ही अभिमानाची बाब आहे. याच उद्देशाने अखिल भारतीय विद्यार्थी काँग्रेस (NSUI), जळगाव जिल्हा यांच्या वतीने आदर्श शिक्षक पुरस्कार वितरण व स्वागत समारंभाचे आयोजन करण्यात आले.

या कार्यक्रमास जिल्हा काँग्रेस कमिटीचे अध्यक्ष (पूर्व) धनंजय शिरीष चौधरी प्रमुख पाहुणे म्हणून उपस्थित होते. सदर कार्यक्रमाचे आयोजन NSUI जळगाव जिल्हाध्यक्ष अॅड. कौस्तुभ पाटील यांच्या पुढाकाराने करण्यात आले.

यावेळी डी. ए. धनगर, भैय्यासाहेब मगर, पुष्पा भोजू पाटील, अनिता सौंदाणे, समाधान देविदास निकम आणि जावेद अख्तर शेख हबीब या कर्तृत्ववान शिक्षकांचा आदर्श शिक्षक पुरस्कार देऊन सन्मान करण्यात आला. जिल्हा काँग्रेस कमिटीचे अध्यक्ष (पूर्व) धनंजय शिरीष चौधरी यांच्या हस्ते सर्व पुरस्कारार्थी शिक्षकांना पुरस्कार प्रदान करून गौरविण्यात आले.

कार्यक्रमात रज्जाक शेख आणि संदीप घोरपडे यांनी मनोगत व्यक्त करत शिक्षकांच्या योगदानाचे महत्त्व अधोरेखित केले. शिक्षक हे केवळ विद्यार्थ्यांना शिक्षण देणारे नसून, भावी पिढी घडविण्याचे महत्त्वपूर्ण कार्य करणारे समाजाचे शिल्पकार आहेत, असे मत यावेळी व्यक्त करण्यात आले.

यावेळी NSUI जिल्हाध्यक्ष अॅड. कौस्तुभ पाटील यांनी पुरस्कारार्थी शिक्षकांच्या कार्याचा तसेच NSUIच्या माध्यमातून राबविण्यात आलेल्या विविध उपक्रम व संघटनात्मक कार्याचा अहवाल उपस्थितांसमोर मांडला.

कार्यक्रमास धनगर दला पाटील, गोकुळ बोरसे, पी. एस. बागुल, सत्तार तेली, प्रताप पाटील, गजेंद्र साळुंखे, एस. डी. देशमुख, उमेश संदानशिव, रोहिदास कपडे, रोहिदास दाजी, ताराचंद सूर्यवंशी, नरेश चव्हाण, भगवान संदानशिव, अजय भिल यांच्यासह विविध क्षेत्रातील मान्यवर, शिक्षक, विद्यार्थी व नागरिक मोठ्या संख्येने उपस्थित होते.

शिक्षकांचा सन्मान म्हणजे केवळ एका व्यक्तीचा सन्मान नसून, ज्ञान, संस्कार, शिक्षण आणि समाजनिर्मितीच्या कार्याचा सन्मान आहे, हा संदेश या कार्यक्रमातून देण्यात आला.

कार्यक्रम यशस्वी करण्यासाठी सहकार्य करणाऱ्या सर्व मान्यवर, शिक्षक, विद्यार्थी व उपस्थितांचे NSUIच्या वतीने मनःपूर्वक आभार व्यक्त करण्यात आले.

प्रा. डॉ. विजय शालिग्राम गाढे यांची महाराष्ट्र राज्य पत्रकार संघाच्या उत्तर महाराष्ट्र उपाध्यक्षपदी नियुक्ती जळगाव, धुळे, नंदुरबार, नाशिक व अहिल्यानगर जिल्ह्यांची जबाबदारी; संघटन विस्तारासाठी सक्रिय कार्य करण्याचे आवाहन

अमळनेर (प्रतिनिधी) : महाराष्ट्र राज्य पत्रकार संघ, मुंबईच्या उत्तर महाराष्ट्र उपाध्यक्षपदी प्रा. डॉ. विजय शालिग्राम गाढे यांची नियुक्ती करण्यात आली आहे. संघटनेच्या वरिष्ठ पदाधिकाऱ्यांच्या मान्यतेने राज्य संघटक श्री. किशोर रायसाकडा व उत्तर महाराष्ट्र अध्यक्ष भुवनेश विसपुते यांनी नियुक्तीपत्राद्वारे ही घोषणा केली.

प्रा. डॉ. गाढे यांनी खान्देश विभागात पत्रकारिता क्षेत्रासह महाराष्ट्र राज्य पत्रकार संघाच्या संघटनात्मक वाढीसाठी व विस्तारासाठी केलेल्या उल्लेखनीय कार्याची दखल घेत त्यांच्यावर ही महत्त्वाची जबाबदारी सोपविण्यात आली आहे. उत्तर महाराष्ट्रातील जळगाव, धुळे, नंदुरबार, नाशिक आणि अहिल्यानगर या जिल्ह्यांमध्ये संघटनेचे कार्य अधिक प्रभावीपणे वाढविण्याची जबाबदारी त्यांच्यावर राहणार आहे.

संघटनेची ध्येयधोरणे, उद्दिष्टे व नियमावलीचे पालन करून उत्तर महाराष्ट्रातील संघटनात्मक कार्य अधिक प्रभावीपणे वाढविणे, पत्रकार बांधवांना संघटनेच्या माध्यमातून एकत्रित करणे तसेच संघटनेचा विस्तार करण्यासाठी सक्रिय भूमिका बजावावी, असे नियुक्तीपत्रात नमूद करण्यात आले आहे.

प्रा. डॉ. विजय गाढे यांच्या अनुभवाचा, कार्यक्षमतेचा आणि संघटन कौशल्याचा संघटनेच्या भविष्यातील वाटचालीस निश्चितच लाभ होईल, असा विश्वास महाराष्ट्र राज्य पत्रकार संघाचे राज्य संघटक श्री. किशोर रायसाकडा यांनी व्यक्त केला आहे.

यावेळी राज्य समन्वयक संजय जी. भोकर, राज्य अध्यक्ष नितेश सोमाणी, राज्य सरचिटणीस डॉ. विश्वास आरोठे आणि राज्य संघटक किशोर रायसाकडा यांच्या मान्यतेने नियुक्ती करण्यात आल्याचे पत्रात नमूद आहे.

प्रा. डॉ. विजय शालिग्राम गाढे यांच्या नियुक्तीबद्दल पत्रकारिता व सामाजिक क्षेत्रातून अभिनंदन होत असून, त्यांच्या पुढील संघटनात्मक कार्यासाठी शुभेच्छा व्यक्त करण्यात येत आहेत.

डिजिटल व्यवहार करा, पण सतर्क राहा’; विद्यार्थ्यांना सायबर सुरक्षेचे धडे

जळगाव | प्रतिनिधी

डिजिटल युगात ऑनलाइन व्यवहार करताना घ्यावयाची काळजी आणि सायबर फसवणुकीपासून सुरक्षित राहण्याबाबत विद्यार्थ्यांमध्ये जागरूकता निर्माण करण्यासाठी कवयित्री बहिणाबाई चौधरी उत्तर महाराष्ट्र विद्यापीठ (KBCNMU), जळगाव आणि क्विक हील फाउंडेशन यांच्या संयुक्त विद्यमाने Institute of Management and Research College, Jalgaon येथे सायबर सुरक्षा जनजागृती सत्र आयोजित करण्यात आले.

सत्रादरम्यान स्नेहल पाटील आणि वैष्णवी पाटील यांनी विद्यार्थ्यांशी संवाद साधत विविध प्रकारच्या सायबर फसवणुकीची माहिती दिली. ओटीपीद्वारे फसवणूक, क्यूआर कोडद्वारे फसवणूक, एआय व्हॉइस कॉलद्वारे फसवणूक, ऑनलाइन बँकिंगद्वारे फसवणूक, बनावट कस्टमर केअर कॉल, फिशिंग लिंक आणि सोशल मीडिया फसवणूक यांसारख्या फसवणुकीच्या पद्धती प्रत्यक्ष उदाहरणांसह समजावून सांगण्यात आल्या.

ऑनलाइन व्यवहार करताना OTP, PIN किंवा बँक खात्याची माहिती कोणाशीही शेअर करू नये, अनोळखी लिंकवर क्लिक करू नये आणि कोणतेही संशयास्पद अॅप डाउनलोड करण्यापूर्वी त्याची खातरजमा करावी, याबाबत विद्यार्थ्यांना मार्गदर्शन करण्यात आले. तसेच मजबूत पासवर्ड आणि 2FA वापरण्याचे महत्त्वही सांगण्यात आले.

यावेळी क्विक हील फाउंडेशनतर्फे विकसित Anti-Fraud App चे अॅक्टिवेशन करण्यात आले. विद्यार्थ्यांना या अॅपच्या वापराबाबत आणि डिजिटल फसवणुकीपासून सुरक्षित राहण्यासाठी त्याचे महत्त्व समजावून सांगण्यात आले.

सत्राच्या शेवटी विद्यार्थ्यांनी विविध प्रश्न विचारून सायबर सुरक्षेबाबत आपल्या शंकांचे निरसन करून घेतले. विद्यार्थ्यांचा सक्रिय सहभाग आणि उत्स्फूर्त प्रतिसाद यामुळे सत्र प्रभावी ठरले. या उपक्रमासाठी डॉ. आर. बी. आमले सर यांचे मार्गदर्शन लाभले.

काँग्रेस पक्षाची विचारसरणीच देशाला प्रगतीच्या दिशेने नेऊ शकते : अविनाश उमरकर अमळनेर काँग्रेस सेवा दलाचे एकदिवसीय शिबिर उत्साहात संपन्न; संघटन बळकटीकरणाचा निर्धार

अमळनेर : जातीयवाद, धर्मांधता, भ्रष्टाचार, आर्थिक विषमता, बेरोजगारी आणि महागाईच्या प्रश्नांमुळे देशासमोर गंभीर आव्हाने उभी राहिली आहेत. अशा परिस्थितीत महात्मा गांधी, राजर्षी शाहू महाराज, महात्मा फुले आणि डॉ. बाबासाहेब आंबेडकर यांच्या विचारांवर आधारित कार्य करणारी काँग्रेसची संघटनात्मक ताकदच देशाला योग्य दिशेने नेऊ शकते, असे प्रतिपादन राजीव गांधी पंचायत राज प्रदेश अध्यक्ष श्री. अविनाश उमरकर यांनी केले.

दि. १७ सप्टेंबर २०२६ रोजी अमळनेर काँग्रेस सेवा दलाच्या वतीने प्रा. अशोक पवार यांच्या स्टडी रूममध्ये सकाळी ९.३० ते सायंकाळी ६ वाजेपर्यंत एकदिवसीय शिबिराचे आयोजन करण्यात आले होते. या शिबिराला काँग्रेस कार्यकर्त्यांचा उत्स्फूर्त प्रतिसाद मिळाला.

कार्यक्रमाच्या सुरुवातीला दिशा संधान शिव, बापूराव ठाकरे, डी. ए. पाटील आणि संजय पाटील यांनी महात्मा फुले यांच्या विचारांना साजेसे गीत सादर करून वातावरणात उत्साह निर्माण केला.

शिबिराच्या उद्घाटनप्रसंगी मार्गदर्शन करताना श्री. अविनाश उमरकर यांनी देशातील सामाजिक व आर्थिक परिस्थितीवर भाष्य केले. महात्मा गांधी, शाहू, फुले आणि आंबेडकर यांच्या विचारांचा आधार घेत लोकशाही, सामाजिक समता आणि सर्वसामान्यांच्या हितासाठी काँग्रेस कार्यकर्त्यांनी संघटितपणे काम करण्याचे आवाहन त्यांनी केले.

कार्यक्रमाच्या अध्यक्षस्थानी जागतिक बँकेचे माजी अधिकारी व शेतकरी नेते श्री. प्रशांत गावंडे होते. शिबिराचे प्रास्ताविक अमळनेर तालुका काँग्रेस सेवा दलाचे अध्यक्ष श्री. बन्सीलाल भागवत यांनी केले.

यावेळी जिल्हा वक्ता सेल अध्यक्ष संदीप घोरपडे यांनी शिबिरार्थींना संबोधित करताना काँग्रेस पक्षाची ध्येय-धोरणे आणि विविध लोककल्याणकारी भूमिका याबाबत मार्गदर्शन केले. तर अमळनेर तालुका काँग्रेस कमिटी अध्यक्ष बी. के. सूर्यवंशी यांनी काँग्रेस सेवा दलाची भूमिका, कार्यपद्धती आणि संघटनात्मक कार्य याबाबत सविस्तर माहिती दिली.

दुपारच्या सत्रात सर्व शिबिरार्थींनी घरून आणलेले डबे एकत्र करून सहभोजनाचा आनंद घेतला. या उपक्रमातून कार्यकर्त्यांमध्ये आपुलकी आणि एकजुटीचे वातावरण निर्माण झाले.

अध्यक्षीय भाषणात श्री. प्रशांत गावंडे यांनी काँग्रेसने स्वातंत्र्यपूर्व काळात केलेला संघर्ष तसेच स्वातंत्र्यानंतर देशाच्या विकासात दिलेले योगदान जनतेसमोर प्रभावीपणे मांडण्याची गरज व्यक्त केली. तसेच सत्ताधाऱ्यांना जनतेच्या प्रश्नांवर सातत्याने जाब विचारत राहण्याचे आवाहन त्यांनी केले.

प्रा. अशोक पवार यांनी ‘संघटन’ या विषयावर सखोल मार्गदर्शन केले. अमळनेर तालुक्यातील १०० गावांमध्ये काँग्रेस पक्षाचे संघटन अधिक मजबूत करण्यासाठी सक्षम कार्यकर्त्यांची फळी उभारण्याचे आवाहन त्यांनी केले.

या शिबिरात भिकाजी पाटील, मनोज पाटील, मनोहर सूर्यवंशी, कन्हैयाला कापडे, गजेंद्र साळुंखे, मोतीलाल जाधव, रोहिदास कापडे, पार्थराज पाटील, कल्पना महिरे, मगन पाटील, सुधाकर भैसे, प्रकाश सोनवणे, शालिग्राम पाटील, रामकृष्ण पाटील, विकास पाटील, महेश पाटील, पी. वाय. पाटील, दिनेश पवार, राकेश पवार, सदाशिव पवार, कौस्तुभ पाटील, भगवान संधान शिव, अमित पवार, खंडेराव न्हावी, बापूराव पाटील, गोविंदा पाटील यांच्यासह जवळपास ५० शिबिरार्थींनी उत्स्फूर्त सहभाग नोंदविला.

शिबिराच्या माध्यमातून काँग्रेस सेवा दलाच्या संघटनात्मक विस्तारासह अमळनेर तालुक्यात गावागावांत कार्यकर्त्यांची मजबूत फळी उभारण्याचा निर्धार करण्यात आला.

अमळनेरात बिबट्याचा तरुणावर झडप; आरोळ्यांमुळे थोडक्यात बचाव! बोरी नदीकाठच्या साने नगर परिसरातील घटना; वनविभागाकडून दोन पिंजरे व ट्रॅप कॅमेरे लावण्याची तयारी

अमळनेर : शहरातील साने नगर परिसरातील बोरी नदीकाठच्या झुडपांमध्ये बसलेल्या एका तरुणावर बिबट्याने हल्ला केल्याची धक्कादायक घटना समोर आली आहे. बिबट्याने अचानक झडप घातल्यानंतर तरुणाने प्रसंगावधान राखत जोरजोरात आरोळ्या मारल्याने बिबट्याने तेथून धूम ठोकली. त्यामुळे तरुणाचा थोडक्यात बचाव झाला.

मिळालेल्या माहितीनुसार, बोरी नदीकाठच्या परिसरात एक तरुण झुडपांमध्ये बसला असताना अचानक बिबट्याने त्याच्यावर हल्ला करण्याचा प्रयत्न केला. बिबट्याची चाहूल लागताच तरुणाने आरडाओरड केल्याने परिसरात खळबळ उडाली. त्याच्या आरोळ्यांमुळे बिबट्या तेथून निघून गेल्याने मोठा अनर्थ टळला.

घटनेची माहिती मिळताच वनपाल गुलाब पिंजारी, वनरक्षक योगेश पाटील आणि वनरक्षक मनीषा मोरे यांनी तातडीने घटनास्थळी धाव घेत पाहणी केली. या घटनेची माहिती परिसरात वाऱ्यासारखी पसरताच स्थानिक नगरसेवक मुख्तार खाटीक यांच्यासह नागरिकांनीही घटनास्थळी गर्दी केली.

दरम्यान, बिबट्याचा वावर लक्षात घेता वनविभागाने परिसरात दोन पिंजरे तसेच ट्रॅप कॅमेरे लावण्याची तयारी सुरू केली आहे. बिबट्याच्या हालचालींवर लक्ष ठेवण्यासाठी वनविभागाकडून आवश्यक ती खबरदारी घेतली जाणार असल्याची माहिती देण्यात आली.

बोरी नदीकाठच्या झुडपी भागात बिबट्याचा वावर आढळल्याने साने नगर परिसरातील नागरिकांमध्ये भीतीचे वातावरण निर्माण झाले आहे. नदीकाठ, झुडपे तसेच परिसरातील नागरिकांनी विशेषतः रात्रीच्या वेळी सतर्क राहावे, असे आवाहन करण्यात येत आहे.

दोन दिवसांपासून सारबेटे बुद्रुक अंधारात; महावितरणच्या कारभारावर प्रश्नचिन्ह…

सारबेटे बुद्रुक : गावातील संपूर्ण वीजपुरवठा मागील दोन दिवसांपासून बंद असल्याने सारबेटे बुद्रुक गाव अंधारात आहे. वारंवार खराब होणारी डीपी बदलण्याची मागणी गावातील तरुणांनी दहा दिवसांपूर्वीच महावितरणच्या ऑनलाइन तक्रार प्रणालीवर केली होती. मात्र, त्यानंतरही कोणतीही ठोस कार्यवाही न झाल्याने अखेर वीजपुरवठा ठप्प झाला आहे.

सारबेटे बुद्रुकचा वीजपुरवठा ढेकु बुद्रुक सबस्टेशनमधून होतो. गावातील डीपी वारंवार नादुरुस्त होत असून, त्यावर कायमस्वरूपी उपाययोजना करण्याऐवजी तात्पुरती दुरुस्ती केली जात असल्याची ग्रामस्थांची तक्रार आहे. सध्या संबंधित डीपी खुल्या अवस्थेत असल्याने नागरिकांच्या सुरक्षेचाही गंभीर प्रश्न निर्माण झाला आहे. विजेचा धक्का बसून जीवितहानी होण्याची शक्यता नाकारता येत नाही.

ग्रामीण वायरमन शुभम शिंपी यांच्याकडून स्थानिक पातळीवर कामकाज पाहिले जात असले, तरी आवश्यक कार्यवाहीसाठी वरिष्ठ अधिकाऱ्यांचे सहकार्य मिळत नसल्याची ग्रामस्थांची नाराजी आहे. ग्रामीण भागातील महावितरणचे वरिष्ठ अधिकारी या प्रश्नाकडे गांभीर्याने लक्ष देण्यास टाळाटाळ करीत असल्याचा आरोपही करण्यात येत आहे.

दहा दिवसांपूर्वी तक्रार करूनही डीपी बदलली नाही आणि आता सलग दोन दिवस संपूर्ण गावाचा वीजपुरवठा बंद आहे. त्यामुळे तातडीने वीजपुरवठा सुरू करून नवीन डीपी बसवावी आणि खुल्या डीपीला सुरक्षा कवच द्यावे, अशी मागणी ग्रामस्थांकडून होत आहे.

सफाई कामगारांच्या प्रश्नांवर आयोगाचा ‘ॲक्शन मोड’! जळगाव मनपात विविध समस्या व अडीअडचणींवर आढावा बैठक; संघटनांच्या निवेदनांवर सकारात्मक निर्णय

अमळनेर | जळगाव : जळगाव महानगरपालिकेत सफाई कामगारांच्या विविध प्रलंबित प्रश्नांना तसेच त्यांच्या अडीअडचणींना न्याय मिळवून देण्यासाठी महाराष्ट्र राज्य सफाई कर्मचारी आयोगाच्या वतीने दि. १५ सप्टेंबर २०२६ रोजी महत्त्वपूर्ण आढावा बैठक घेण्यात आली. महाराष्ट्र राज्य सफाई कर्मचारी आयोग, मुंबईचे उपाध्यक्ष मा. श्री. मुकशेजी सारवान तसेच त्यांचे विशेष कार्य अधिकारी मा. राजेश सोनवणे यांच्या प्रमुख उपस्थितीत ही बैठक पार पडली.

सफाई कामगारांच्या सेवेशी संबंधित विविध समस्या, प्रलंबित मागण्या तसेच कामगारांना भेडसावणाऱ्या अडचणी याबाबत बैठकीत सविस्तर चर्चा करण्यात आली. यावेळी जळगाव जिल्ह्यातील विविध सफाई कामगार संघटनांच्या पदाधिकाऱ्यांनी आपल्या मागण्यांची निवेदने आयोगासमोर सादर केली.

भारतीय सफाई कामगार संघटना, जळगाव यांच्या वतीने जिल्हा सरचिटणीस संतोष संदानशिव यांच्यासह दिपक संदानशिव, राजेश कल्याणी, सुनील गढरे, मिलिंद संदानशिव, करण चव्हाण तसेच इतर पदाधिकाऱ्यांनी उपस्थित राहून सफाई कामगारांच्या विविध प्रश्नांकडे आयोगाचे लक्ष वेधले.

यावेळी जळगाव जिल्ह्यातील इतर सफाई कामगार संघटनांच्या पदाधिकाऱ्यांनीही आपापल्या मागण्या व समस्या मांडत आयोगाकडे निवेदने सादर केली. कामगारांच्या प्रश्नांवर चर्चा करून संबंधित बाबींवर आयोगाच्या माध्यमातून योग्य ते निर्णय घेण्यात आले, त्यामुळे सफाई कामगारांच्या प्रलंबित प्रश्नांना आता गती मिळण्याची अपेक्षा व्यक्त करण्यात येत आहे.

सफाई कामगारांच्या हक्क, सेवा-सुविधा आणि विविध प्रशासकीय अडचणींच्या निवारणासाठी थेट आयोगाच्या उपस्थितीत झालेल्या या बैठकीमुळे कामगार संघटनांमध्येही सकारात्मक वातावरण निर्माण झाले आहे. कामगारांच्या प्रश्नांकडे प्रशासनाने गांभीर्याने पाहून त्यांची प्रभावीपणे अंमलबजावणी करावी, अशी अपेक्षा यावेळी व्यक्त करण्यात आली.

१ नोव्हेंबर २००५ पूर्वी नियुक्त कर्मचाऱ्यांना जुनी पेन्शन लागू करा! आमदार अनिल पाटील यांचे मुख्यमंत्री देवेंद्र फडणवीस, शिक्षणमंत्री दादा भुसे यांना पत्र

अमळनेर : १ नोव्हेंबर २००५ पूर्वी नियुक्त झालेल्या सर्व आस्थापनांतील सर्व कर्मचाऱ्यांना १९८२ ची जुनी पेन्शन योजना नियमित करण्यात यावी, अशी मागणी माजी मंत्री तथा अमळनेर विधानसभा मतदार संघाचे आमदार अनिल पाटील यांनी मुख्यमंत्री देवेंद्र फडणवीस आणि शिक्षणमंत्री दादा भुसे यांच्याकडे पत्राद्वारे केली आहे. संबंधित कर्मचाऱ्यांच्या प्रश्नाचा सहानुभूतीपूर्वक विचार करून त्यांना न्याय्य निर्णय देण्यात यावा, अशी भूमिका त्यांनी मांडली आहे.

१ नोव्हेंबर २००५ पूर्वी नियुक्त झालेल्या मात्र शासनाच्या टप्पा अनुदान धोरणामुळे २००५ नंतर १०० टक्के अनुदानावर आलेल्या कर्मचाऱ्यांना अद्याप जुनी पेन्शन योजना लागू झालेली नाही. दुसरीकडे, १ नोव्हेंबर २००५ पूर्वी केवळ जाहिरात प्रसिद्ध झालेली आणि २००५ नंतर सेवेत रुजू झालेली मंडळी, परीक्षा देऊन परीक्षेचा निकाल २००५ नंतर लागलेले कर्मचारी, तसेच २००५ पूर्वी शिक्षण सेवक म्हणून नियुक्त झालेले मात्र २००५ नंतर शिक्षक म्हणून मान्यता मिळालेल्या कर्मचाऱ्यांना जुनी पेन्शन योजना लागू करण्यात आली आहे.

मात्र, विनाअनुदानित आणि अंशतः अनुदानित शिक्षकांनाच जुनी पेन्शन नाकारण्यात आल्याने या कर्मचाऱ्यांमध्ये तीव्र नाराजी व्यक्त होत आहे. नैसर्गिक न्यायाच्या तत्त्वानुसार समान काम करणाऱ्या कर्मचाऱ्यांना समान न्याय मिळणे अपेक्षित असताना शासनाच्या अनुदान धोरणामुळे संबंधित कर्मचाऱ्यांवर अन्याय होत असल्याचा मुद्दा उपस्थित करण्यात आला आहे.

शासनाकडून अनुदान उशिराने देणे हा एक अन्याय आणि त्याच कारणाच्या आधारे कर्मचाऱ्यांना पेन्शन नाकारणे हा दुसरा अन्याय, अशी भूमिका महाराष्ट्र राज्य जुनी पेन्शन समन्वय संघाने घेतली आहे. या पार्श्वभूमीवर संघाने राज्यातील २८८ आमदारांना पत्र देऊन संबंधित कर्मचाऱ्यांना जुनी पेन्शन योजनेचा लाभ मिळवून देण्यासाठी पुढाकार घेण्याची तसेच हा प्रश्न विधानभवनात अधिवेशनकाळात लावून धरण्याची मागणी केली होती.

याच मागणीच्या अनुषंगाने महाराष्ट्र राज्य जुनी पेन्शन समन्वय संघाने माजी मंत्री तथा अमळनेर विधानसभा मतदार संघाचे आमदार अनिल पाटील यांच्याकडेही निवेदनाद्वारे मागणी केली होती. कर्मचाऱ्यांच्या या मागणीची दखल घेत आमदार अनिल पाटील यांनी मुख्यमंत्री देवेंद्र फडणवीस आणि शिक्षणमंत्री दादा भुसे यांना पत्र पाठवून १ नोव्हेंबर २००५ पूर्वी नियुक्त सर्व आस्थापनांतील कर्मचाऱ्यांना १९८२ ची जुनी पेन्शन योजना नियमित करण्याबाबत सहानुभूतीपूर्वक विचार करून न्याय्य निर्णय घेण्याची मागणी केली आहे.

आमदार अनिल पाटील यांच्या या पाठपुराव्यामुळे जुनी पेन्शन योजनेच्या प्रतीक्षेत असलेल्या संबंधित कर्मचाऱ्यांच्या प्रश्नाला पुन्हा एकदा अधोरेखित करण्यास मदत झाली असून, शासन या मागणीवर कोणता निर्णय घेते याकडे कर्मचाऱ्यांचे लक्ष लागले आहे.

नगराध्यक्षांच्या कन्येने पंतप्रधानांना पाठवली राखी  नरेंद्र मोदी यांच्याकडून पत्राद्वारे अरुश्री चे कौतुक 

अमळनेर : रक्षा बंधन म्हणजे रक्षण करण्यासाठी बांधलेला वचनाचा ,हमीचा प्रेमाचा धागा. अमळनेर येथील नगराध्यक्ष डॉ परीक्षित बाविस्कर यांची कन्या कु अरुश्री हिने देशाच्या नागरिकांचे आणि बालकांचे रक्षण करण्यासाठी पंतप्रधान नरेंद्र मोदी यांना राखी पाठवली आणि नरेंद्र मोदी यांनी देखील चिमुकलीच्या राखीला पत्राने उत्तर देत सुरक्षित ,सुखी जीवनाची हमी देत तिचे कौतुक केले आहे. 

     शुद्ध बीजा पोटी फळ रसाळ गोमटी,सामाजिक बांधिलकी जोपासत निरपेक्ष भावनेने अव्याहतपणे *वैद्यकीय क्षेत्रात सेवारत असलेले लोकनियुक्त नगराध्यक्ष प्रतिथयश हृदय रोग* तज्ञ डॉ.परिक्षीत श्रीराम बाविस्कर व डॉ.सौ.स्वाती परीक्षित बाविस्कर यांची कन्या *रुस्तमजी इंटरनॅशनल स्कूल* मधील *इयत्ता सहावी ची विद्यार्थिनी कु.अरुश्री परिक्षीत बाविस्कर* या

विद्यार्थिनीने राष्ट्रनेते, लाडके प्रधानमंत्री श्री. नरेंद्र मोदी यांना जनसेवा,राष्ट्र कल्याणार्थ उदंड, निरामय आयुष्य चांगले आरोग्य मिळो या करिता पवित्र सण रक्षा बंधनाच्या पावन पर्वावर रक्षा सूत्र (राखी, शुभपत्र)पाठवले होते , कु. अरुश्री हिचे पत्र व राखी नवी दिल्ली येथील प्रधानमंत्री कार्यालयाला प्राप्त झाल्याने नुकतेच राष्ट्रनेते लाडके प्रधानमंत्री नरेंद्र मोदी यांनी विशेष पत्र पाठवून कौतुक करत आभार मानले तसेच

आपल्या देशाच्या मुली,विद्यार्थिनी विकसित भारताच्या योगदानात सहभाग देत असून क्रीडा, कौशल्य,शिक्षण तसेच विज्ञान,तंत्रज्ञान मध्ये चमक दाखवत असून मुली महिला राष्ट्रकल्याणात योगदान स्वयंस्फूर्त करत आपल्या शक्तीचा परिचय देत असल्याचे सांगून कौतुक केले आहे. विकसित भारत निर्माणकरिता “शक्तीच्या सप्तधारा” माध्यमातून उत्पादन , कृषी , तंत्रज्ञान ,नवे विचार , गतिशक्ती , रक्षण , ग्रीन ब्ल्यू उत्पादन सांस्कृतिक शक्तीच्या नव्या उर्जेशी जोडण्याचा प्रयत्न होत आहे. मला विश्वास आहे की आपण आपल्या प्रयत्नाने आणि योगदानाने बदलत्या भारताच्या प्रवासात योगदान देईल आपल्या उत्तम स्वास्थ्य आणि भविष्यासाठी माझ्या शुभेच्छा असेही पत्रात म्हटले आहे.

अमळनेर पत्रकार संघ व तेरापंथ युवक परिषदेतर्फे आज भव्य रक्तदान शिबिर;  रक्तदात्याला प्रोत्साहनपर मिळणार ट्रॉली बॅग भेट

अमळनेर :-अमळनेर शहर व तालुका पत्रकार संघ आयोजित व अखिल भारतीय तेरापंथ युवक परिषद प्रस्तुत व आचार्य श्री महाश्रमण जी यांच्या प्रेरणेने अमळनेरात आज भव्य रक्तदान शिबिराचे आयोजन करण्यात आले आहे.

       “रक्तदान… जीवनदान… आपका एक कदम, किसी के लिए नई उम्मीद…”आणि “थेंब तुमचा जीवन त्यांचे – रक्तदान ही सर्वोत्तम सेवा… मानवतेचा खरा उत्सव” या संदेशासह हे शिबिर होणार आहे.सदर शिबीर दिनांक आज १७ सप्टेंबर २०२६ (गुरुवार) रोजी

१) तेरापंथ भवन,न्यू प्लॉट,अमळनेर व २) प्रताप कॉलेज,व इच्छादेवी चौक अमळनेर येथे सकाळी ९ ते सायंकाळी ५ या वेळेत होणार आहे.

      विशेष म्हणजे या शिबिरात रक्तदान करणाऱ्या प्रत्येक रक्तदात्याला प्रोत्साहनपर भेट म्हणून आकर्षक ट्रॉली बॅग भेट देण्यात येणार आहे.”रक्तदान करा… आयुष्य भेट घ्या… एक छोटी कृती मोठा फरक!” हा यामागचा उद्देश असून सुरक्षित रक्तदान, निरोगी समाज, उज्ज्वल भविष्य आणि नवीन जीवन हा संदेश देण्यात आला आहे.

     तरी जास्तीतजास्त रक्तदात्यांनी रक्तदान करावे असे आवाहन अमळनेर शहर व तालुका पत्रकार संघ,तेरापंथ युवक परिषद, अमळनेर व शिबिराचे सहयोगी असलेले रोटरी क्लब अमळनेर, रोट्रॅक्ट क्लब अमळनेर, लायन्स क्लब अमळनेर,न्यू प्लॉट परिसर विकास मंच आणि जैन सोशल ग्रुप,जय बजरंग व्यायाम शाळा अमळनेर आदींनी केले आहे.