पी. बी. ए. इंग्लिश मीडियम स्कूलमध्ये ‘विठू नामाचा गजर’; भक्तिरसात रंगली आषाढी एकादशीची दिंडी, रिंगण सोहळ्याने वेधले लक्ष
अमळनेर : महाराष्ट्राचे आराध्य दैवत श्री विठ्ठल-रुक्मिणीच्या भक्तीने भारावलेल्या वातावरणात पी. बी. ए. इंग्लिश मीडियम स्कूल येथे आषाढी एकादशीचा सोहळा मोठ्या उत्साहात, पारंपरिक पद्धतीने आणि भक्तिमय वातावरणात साजरा करण्यात आला. विठू नामाच्या अखंड गजराने संपूर्ण शाळा परिसर दुमदुमून गेला, तर दिंडी यात्रेने आणि रिंगण सोहळ्याने उपस्थितांना जणू पंढरपूरच्या वारीचाच आनंद अनुभवायला मिळाला.
सकाळच्या मंगलप्रहरी शाळेचा परिसर आकर्षक रांगोळ्या, पुष्पसजावट, कमानी आणि सुंदर मंचाने सजविण्यात आला होता. संपूर्ण परिसर भक्तिरसाने नटला होता. विद्यार्थ्यांनी संत ज्ञानेश्वर, संत तुकाराम, संत जनाबाई, संत मुक्ताबाई तसेच विठू माऊली यांच्या वेशभूषेत सहभागी होत वारकरी परंपरेचे जिवंत दर्शन घडविले.
“ज्ञानोबा-तुकाराम”, “पांडुरंग हरी” आणि “विठ्ठल… विठ्ठल…” या नामघोषांनी आसमंत दुमदुमून गेला. विद्यार्थ्यांच्या उत्स्फूर्त सहभागामुळे शाळेत जणू चंद्रभागेच्या तीरावरील पंढरपूरची वारी अवतरल्याची अनुभूती सर्वांना आली.
कार्यक्रमातील सर्वाधिक आकर्षण ठरलेल्या रिंगण सोहळ्याने उपस्थितांची मने जिंकली. टाळ-मृदुंगाच्या गजरात विद्यार्थ्यांनी पारंपरिक वारकरी संस्कृतीचे प्रभावी दर्शन घडविले. दिंडी यात्रेतही विद्यार्थ्यांनी मोठ्या उत्साहाने सहभाग नोंदवत विठ्ठलभक्तीचा संदेश दिला.
यावेळी पालखी पूजन मुख्याध्यापक जे. एस. देवरे, पर्यवेक्षक महेश माळी आणि पर्यवेक्षिका एम. एस. बारी यांच्या शुभहस्ते संपन्न झाले. तसेच दक्षा शर्मा हिने प्रतीकात्मक विठुरायाची भूमिका अत्यंत प्रभावीपणे साकारून उपस्थितांची वाहवा मिळविली.
या भक्तिमय उपक्रमासाठी मुख्याध्यापक जे. एस. देवरे, पर्यवेक्षक महेश माळी, पर्यवेक्षिका मीनाक्षी बारी, प्रशांत वंजारी, व्ही. जी. बोरोले, अशोक महाजन, व्ही. एस. अमृतकर, एस. पी. पाटील, सविता पारधी, योगिशा महाजन, अनंत बागल तसेच समस्त शिक्षक व शिक्षकेतर कर्मचारी यांनी विशेष परिश्रम घेतले.
आषाढी एकादशीच्या निमित्ताने आयोजित या भक्तिमय दिंडी सोहळ्यामुळे विद्यार्थ्यांमध्ये वारकरी संप्रदायाची परंपरा, संतांचे विचार आणि भारतीय संस्कृतीचे संस्कार रुजविण्याचा सुंदर प्रयत्न यशस्वी ठरला. संपूर्ण कार्यक्रम उत्साह, भक्ती आणि आनंदाच्या वातावरणात संपन्न झाला.
