“अजितदादांचे शेतकरी प्रेरणा स्मारक’ अमळनेर कृउबात लोकार्पित; शेतकऱ्यांना प्रेरणा व ऊर्जा देणारे स्मारक ठरेल – आमदार अनिल पाटील”
अमळनेर : अमळनेर कृषी उत्पन्न बाजार समितीच्या आवारात उभारण्यात आलेल्या स्व. अजितदादा पवार यांच्या शेतकरी रूपातील बैलगाडी हाकतानाच्या महाराष्ट्रातील पहिल्या प्रेरणा स्मारकाचे जयंतीनिमित्त लोकार्पण मोठ्या उत्साहात पार पडले. या स्मारकाचे पूजन माजी मंत्री तथा आमदार अनिल पाटील यांच्या हस्ते करण्यात आले.
यावेळी बोलताना आमदार अनिल पाटील म्हणाले की, “अजितदादांचे हे प्रेरणा स्मारक केवळ पुतळा नसून शेतकऱ्यांसाठी कष्ट, धैर्य, वक्तशीरपणा आणि विकासाची प्रेरणा देणारे केंद्र ठरेल. येणाऱ्या पिढ्यांनाही त्यांच्या कार्याची ओळख करून देणारे हे स्मारक कायम प्रेरणादायी राहील.”
आमदार अनिल पाटील यांच्या मार्गदर्शनाखाली बाजार समितीचे सभापती अशोक पाटील व संचालक मंडळाच्या पुढाकारातून हे स्मारक साकारण्यात आले आहे. शेतकरी रूपातील बैलगाडीवर स्वार असलेल्या अजितदादा पवार यांच्या प्रतिमेमुळे ग्रामीण जीवनाशी असलेली त्यांची नाळ अधोरेखित करण्यात आली आहे.
याच कार्यक्रमात शेतकऱ्यांना विविध शासकीय योजनांचा लाभ सुलभपणे मिळावा यासाठी बाजार समितीच्या वतीने ‘बळीराजा शेतकरी सेतू सुविधा केंद्र’ सुरू करण्यात आले. या केंद्रातून केवळ शासकीय शुल्कात विविध ऑनलाइन योजनांसाठी अर्ज करण्याची सुविधा उपलब्ध करून देण्यात आली असून त्याचे उद्घाटनही आमदार अनिल पाटील यांच्या हस्ते झाले.
कार्यक्रमात सभापती अशोक पाटील म्हणाले की, “अजित पवार हे महाराष्ट्राच्या विकासाला दिशा देणारे नेतृत्व होते. त्यांच्या विचारातून आणि आमदार अनिल पाटील यांच्या माध्यमातून अमळनेर तालुक्याच्या विकासाला नवी गती मिळत आहे. त्यांच्या कार्याप्रती कृतज्ञता व्यक्त करण्यासाठी हे प्रेरणा स्मारक उभारण्यात आले आहे. तसेच बाजार समितीच्या बांधकामाधीन व्यापारी संकुलाला स्व. अजित पवार यांचे नाव देण्याचाही मानस आहे.”
या सोहळ्यास सौ. जयश्री पाटील, अशोक पाटील, सुरेश पिरन पाटील, संभाजी पाटील, गणेश भामरे, सचिन पाटील, सुषमा देसले, भोजमल पाटील, समाधान धनगर, भाईदास भिल, डॉ. अनिल शिंदे, हिरालाल पाटील, शरद पाटील, प्रकाश अमृतकार, रणजित शिंदे, भागवत पाटील, चेतन राजपूत, प्रा. मंदाकिनी भामरे, रिता बाविस्कर, आशा चावरीया, अलका पवार, कविता पवार, शोभाताई गढरे, सुरेश विक्रम पाटील, एल. टी. पाटील, राजू फापोरेकर, जितू ठाकूर, विजय पाटील, मुख्तार खाटिक, हेमंत पवार, जितेंद्र झाबक, निलेश भांडारकर, अनिल अहिरराव, दिनेश शेलकर, अलीम मुजावर, गौरव पाटील तसेच सचिव डॉ. उन्मेष राठोड यांच्यासह अनेक पदाधिकारी, संचालक, कार्यकर्ते व शेतकरी मोठ्या संख्येने उपस्थित होते.
कार्यक्रमाचे सूत्रसंचालन व आभार रणजित शिंदे यांनी मानले. अमळनेर कृषी उत्पन्न बाजार समितीच्या इतिहासात प्रथमच उभारण्यात आलेल्या या शेतकरी प्रेरणा स्मारकामुळे परिसरात उत्साहाचे वातावरण निर्माण झाले असून शेतकरी वर्गातून या उपक्रमाचे स्वागत होत आहे.
