अमळनेर : अमळनेर एसटी आगाराच्या ताफ्यात अत्याधुनिक सुविधांनी सज्ज अशा ५ नव्या बसेसची भर पडली असून, माजी मंत्री तथा आमदार अनिल भाईदास पाटील यांच्या हस्ते विधिवत पूजन करून या बसेसचे लोकार्पण करण्यात आले. नव्या बसेसमुळे प्रवाशांचा प्रवास अधिक सुरक्षित, आरामदायी आणि आधुनिक होणार असल्याने प्रवाशांमध्ये समाधान व्यक्त केले जात आहे.

अशोक लेलंड कंपनीच्या या नवीन बसेस ३ बाय २ आसनरचनेच्या असून प्रत्येक बसमध्ये ५२ आसने उपलब्ध आहेत. प्रवाशांच्या सुविधांचा विचार करून बसमध्ये मोबाईल चार्जिंग पॉइंट, बसच्या आत व बाहेर सीसीटीव्ही कॅमेरे, माईक प्रणाली, बॅक कॅमेरा, एअर सस्पेन्शन तसेच बीएस-६ मॉडेलचे अत्याधुनिक इंजिन देण्यात आले आहे. त्यामुळे सुरक्षिततेसोबतच अधिक आरामदायी प्रवासाचा अनुभव मिळणार आहे.

अमळनेर आगाराने आणखी ५ नवीन बसेसची मागणी केली असून, त्या मंजूर व्हाव्यात यासाठी आमदार अनिल भाईदास पाटील प्रयत्नशील असल्याची माहिती देण्यात आली. यापूर्वीही त्यांच्या प्रयत्नांतून अमळनेर आगाराला ५ नवीन बसेस मिळाल्या होत्या. या नव्या बसेसच्या समावेशामुळे अमळनेर आगारातील एकूण बसेसची संख्या आता ७५ वर पोहोचली आहे.

लोकार्पणानंतर आमदारांनी केली बस सवारी

लोकार्पणानंतर आमदार अनिल भाईदास पाटील यांनी अधिकारी, कर्मचारी आणि कार्यकर्त्यांसह नव्या बसमध्ये प्रवास करून बसेसची पाहणी केली. यावेळी उपस्थितांनी नव्या बसेसचे स्वागत करत आनंद व्यक्त केला.

पंढरपूर यात्रेसाठी एसटीला मोठी पसंती

सध्या पंढरपूर येथील विठ्ठल-रुख्मिणी आषाढी महोत्सवानिमित्त एसटी सेवेला मोठा प्रतिसाद मिळत आहे. दररोज ३ ते ४ बसेस पंढरपूरकडे रवाना होत असून, ग्रामीण भागातून ४० ते ४२ प्रवासी उपलब्ध झाल्यास त्यांच्यासाठी स्वतंत्र बसची व्यवस्था करण्यात येत आहे. या प्रवाशांना शासनाच्या सर्व प्रकारच्या प्रवासी सवलतींचाही लाभ दिला जात आहे.

याशिवाय पंढरपूर यात्रेसाठी अमळनेर आगारातून १२ बसेस इतर आगारांकडे उपलब्ध करून देण्यात आल्या असल्याची माहिती आगार व्यवस्थापक राकेश शिवदे यांनी दिली.

लोकार्पण सोहळ्यास कामगार नेते एल. टी. पाटील, राष्ट्रवादी तालुकाध्यक्ष भागवत पाटील, शहराध्यक्ष चेतन राजपूत, शेतकी संघ संचालक विक्रांत पाटील, पत्रकार किरण पाटील, एस. टी. मोरे, गौरव पाटील, आगार व्यवस्थापक राकेश शिवदे, कार्यशाळा अधीक्षक प्रमोद बाविस्कर, वाहतूक निरीक्षक मुकेश सैदाने, वरिष्ठ लिपिक तुषार पाटील, अकाऊंटंट अमोल पाटील तसेच एसटी अधिकारी, कर्मचारी आणि कार्यकर्ते मोठ्या संख्येने उपस्थित होते.