दिल्लीतील विद्यार्थ्यांवरील लाठीहल्ल्याविरोधात अमळनेरमध्ये संताप; एन.मुक्टो.कडून काळ्या फिती लावून तीव्र निषेध
अमळनेर | प्रतिनिधी : दिल्लीतील जंतर-मंतर परिसरात विविध मागण्यांसाठी शांततापूर्ण आंदोलन करणाऱ्या विद्यार्थ्यांवर पोलिसांकडून करण्यात आलेल्या कथित लाठीहल्ल्याच्या निषेधार्थ महाराष्ट्र राज्य प्राध्यापक महासंघ (एन.मुक्टो.) स्थानिक शाखेच्या वतीने धनदाई कला व विज्ञान महाविद्यालय, अमळनेर येथे तीव्र निषेध आंदोलन करण्यात आले. यावेळी प्राध्यापकांनी काळ्या फिती लावून निषेध नोंदवित विद्यार्थ्यांच्या लोकशाही हक्कांच्या संरक्षणाची मागणी केली.
महाविद्यालय परिसरात झालेल्या या आंदोलनात प्राध्यापकांनी सरकारच्या भूमिकेबाबत नाराजी व्यक्त करत विद्यार्थ्यांवरील बलप्रयोगाचा निषेध केला. स्थानिक शाखेचे अध्यक्ष डॉ. भगवान भालेराव यांनी, “शांततापूर्ण आंदोलन करणे हा विद्यार्थ्यांचा घटनात्मक आणि लोकशाही अधिकार असून, त्यावर अशा प्रकारे निर्बंध आणणे किंवा दडपशाही करणे लोकशाही मूल्यांना बाधा पोहोचविणारे आहे,” असे स्पष्ट मत व्यक्त केले.
तर एन.मुक्टो.चे जिल्हा सचिव डॉ. लीलाधर पाटील यांनी, “विद्यार्थ्यांच्या मागण्यांवर संवाद साधण्याऐवजी त्यांच्यावर हिंसात्मक कारवाई करणे ही अत्यंत निषेधार्ह बाब असून सरकारने विद्यार्थ्यांच्या भावना समजून घेऊन सकारात्मक भूमिका घ्यावी,” असे सांगितले.
यानंतर प्राध्यापक व विद्यार्थ्यांच्या शिष्टमंडळाने महाविद्यालयाचे प्राचार्य डॉ. एच. एम. पाटील यांना निषेधाचे निवेदन सादर करून विद्यार्थ्यांवरील कारवाईचा निषेध नोंदविला.
या आंदोलनात एन.मुक्टो. स्थानिक शाखेचे अध्यक्ष प्रा. डॉ. भगवान भालेराव, सचिव डॉ. महादेव तोंडे, जिल्हा सचिव डॉ. लीलाधर पाटील, उपप्राचार्य डॉ. जयवंतराव पाटील, डॉ. किशोर पाटील, डॉ. प्रशांत पाटील, डॉ. रमेश पावरा, प्रा. डॉ. संगीता चंद्राकर, डॉ. प्रवीण पवार यांच्यासह महाविद्यालयातील अनेक प्राध्यापक, कर्मचारी आणि विद्यार्थी मोठ्या संख्येने उपस्थित होते.
विद्यार्थ्यांवरील कारवाईविरोधात अमळनेरमध्ये झालेल्या या निषेध आंदोलनातून लोकशाही हक्कांचे संरक्षण आणि संवादाच्या माध्यमातून प्रश्न सोडविण्याची मागणी जोरदारपणे करण्यात आली.
