कर्तृत्ववान महिलांचा होणार ‘नारी शक्ती ग्राम गौरव’ सन्मान नवरात्रोत्सवानिमित्त DL SOCIAL FOUNDATIONचा विशेष उपक्रम; सन्मानासाठी प्रस्ताव मागविणे सुरू
जळगाव : नवरात्रोत्सवाचे औचित्य साधून DL SOCIAL FOUNDATION तर्फे जळगाव जिल्ह्यातील विविध क्षेत्रांत उल्लेखनीय कार्य करणाऱ्या कर्तृत्ववान महिलांचा “नारी शक्ती ग्राम गौरव सन्मान सोहळा – २०२६” आयोजित करण्यात येणार आहे.
“गावच्या लेकींचा सन्मान, गावाच्या प्रगतीचा अभिमान” या संकल्पनेतून आयोजित करण्यात येणाऱ्या या उपक्रमाचा उद्देश ग्रामीण व शहरी भागातील महिलांच्या कर्तृत्वाची दखल घेऊन त्यांच्या कार्याचा गौरव करणे तसेच इतर महिलांना प्रेरणा देणे हा आहे.
शिक्षण, आरोग्य, शेती, व्यवसाय, स्वयंरोजगार, सामाजिक कार्य, क्रीडा, कला-संस्कृती, ग्रामविकास, पर्यावरण तसेच प्रतिकूल परिस्थितीवर मात करून उल्लेखनीय यश मिळविणाऱ्या कर्तृत्ववान महिलांचा या सन्मानासाठी विचार करण्यात येणार आहे.
*कर्तृत्ववान महिलांसाठी प्रस्ताव मागविणे सुरू*
जळगाव जिल्ह्यातील कर्तृत्ववान महिलांच्या नामनिर्देशनासाठी प्रस्ताव मागविणे सुरू करण्यात आले आहे. नागरिकांना आपल्या परिसरातील उल्लेखनीय कार्य करणाऱ्या महिलेचे नामनिर्देशन करता येणार आहे.
प्राप्त प्रस्तावांमधील माहिती व संबंधित महिलेच्या कार्याची पडताळणी करून संस्थेच्या निर्धारित निकषांनुसार सन्मानार्थी महिलांची निवड करण्यात येईल.
समाजासाठी, कुटुंबासाठी तसेच आपल्या गावाच्या व परिसराच्या विकासासाठी उल्लेखनीय योगदान देणाऱ्या महिलांनी आणि त्यांच्या कार्याची माहिती असलेल्या नागरिकांनी या उपक्रमात सहभागी व्हावे, असे आवाहन DL SOCIAL FOUNDATION तर्फे संचालिका सौ भावना मैराळे व डॉ. समाधान मैराळे यांनी केले आहे.
