महाराष्ट्राच्या वैचारिक जडणघडणीत छत्रपती शिवाजी महाराजांचे योगदान मोलाचे! प्रताप महाविद्यालयात ‘महाराष्ट्रातील वैचारिक परंपरा’ विषयावर प्रा. बालाजी चिरडे यांचे व्याख्यान

अमळनेर प्रतिनिधी : महाराष्ट्र ही विचारांची समृद्ध भूमी असून, छत्रपती शिवाजी महाराजांच्या कर्तृत्वाने महाराष्ट्राच्या जडणघडणीला भक्कम आधार मिळाला आहे. संत, समाजसुधारक, विविध सामाजिक चळवळी आणि वैचारिक संघर्षांनी महाराष्ट्राची वैचारिक परंपरा समृद्ध केली आहे. या परंपरेचा अभ्यास करून विविध विचारप्रवाह तटस्थपणे समजून घेणे आवश्यक आहे, असे प्रतिपादन महात्मा गांधी आंतरराष्ट्रीय हिंदी विद्यापीठ, वर्धा येथील प्रा. बालाजी चिरडे यांनी केले.

खानदेश शिक्षण मंडळ संचलित प्रताप महाविद्यालय, अमळनेर येथे बुधवार, १४ ऑक्टोबर रोजी पूज्य साने गुरुजी सभागृहात ‘महाराष्ट्रातील वैचारिक परंपरा’ या विषयावर त्यांचे अभ्यासपूर्ण व्याख्यान झाले. राज्यशास्त्र, अर्थशास्त्र, इतिहास, मराठी, तत्त्वज्ञान विभाग आणि अंतर्गत गुणवत्ता अभिवचन कक्ष यांच्या संयुक्त विद्यमाने या कार्यक्रमाचे आयोजन करण्यात आले होते. कार्यक्रमाच्या अध्यक्षस्थानी महाविद्यालयाचे प्राचार्य डॉ. हर्षवर्धन जाधव होते.

व्याख्यानात प्रा. चिरडे यांनी महाराष्ट्रातील वैचारिक प्रवासाचा विविध अंगांनी आढावा घेतला. एकोणिसाव्या शतकात आधुनिक महाराष्ट्राची जडणघडण कशी झाली, उदारमतवादी विचारांपासून राष्ट्रवादी विचारांपर्यंत विविध विचारप्रवाहांचा विकास कसा झाला, याचे त्यांनी विवेचन केले. बाळशास्त्री जांभेकर, महात्मा फुले, गोपाळ गणेश आगरकर, लोकमान्य टिळक, महात्मा गांधी, जवाहरलाल नेहरू, सरदार वल्लभभाई पटेल, डॉ. बाबासाहेब आंबेडकर, डॉ. हेडगेवार, प्रबोधनकार ठाकरे, राम मनोहर लोहिया आणि श्रीपाद अमृत डांगे यांच्या विचारांचा संदर्भ देत विविध वैचारिक प्रवाह समजून घेण्याचे महत्त्व त्यांनी स्पष्ट केले.

राष्ट्रीय स्वयंसेवक संघ, मुस्लिम लीग आणि हिंदू महासभा यांसारख्या संघटनांच्या विचारधारांचा अभ्यास तसेच नरहर कुरुंदकर आणि शेषराव मोरे यांच्या विचारांची समकालीन प्रासंगिकता जाणून घेणेही आवश्यक असल्याचे त्यांनी नमूद केले. विविध विचारसरणींचा अभ्यास करताना चिकित्सक दृष्टिकोन ठेवून अंतर्मुख होण्याचे आवाहनही त्यांनी केले.

यावेळी व्यवस्थापन व तंत्रज्ञान संस्थेच्या प्राचार्या डॉ. वर्षा पाठक यांनी संत ज्ञानेश्वरांपासून नरहर कुरुंदकरांपर्यंतच्या वैचारिक प्रवासाचे महत्त्व अधोरेखित केले. समाजाच्या जडणघडणीत समाजसुधारकांचे योगदान महत्त्वाचे असून, पूज्य साने गुरुजी आणि स. ना. भालेराव यांचे योगदानही स्थानिक ते राष्ट्रीय स्तरावर महत्त्वपूर्ण असल्याचे त्यांनी सांगितले.

प्रा. शिला पाटील यांनी विद्यार्थ्यांच्या वैचारिक विकासासाठी पुस्तकवाचन आणि बौद्धिक सहभाग आवश्यक असल्याचे मत व्यक्त केले. अध्यक्षीय भाषणात प्राचार्य डॉ. हर्षवर्धन जाधव यांनी विद्यार्थ्यांना भावी वाटचालीसाठी शुभेच्छा दिल्या.

कार्यक्रमाच्या प्रारंभी राज्यशास्त्र विभागप्रमुख डॉ. विजय तुंटे यांनी प्रास्ताविक केले, तर प्रा. संदीप नेरकर यांनी प्रमुख वक्त्यांचा परिचय करून दिला. सूत्रसंचालन डॉ. सुनील राजपूत यांनी केले आणि आभार डॉ. राखी घरटे यांनी मानले.

प्रा. धनराज ढगे यांना समाजकार्य विषयात पीएच.डी. पदवी प्रदान

अमळनेर :
श्रम साफल्य एज्युकेशन सोसायटी, अमळनेर संचलित समाजकार्य महाविद्यालय, अमळनेर येथील प्रा. धनराज ढगे यांनी समाजकार्य विषयात पीएच.डी. पदवी प्राप्त केली आहे.
कवयित्री बहिणाबाई चौधरी उत्तर महाराष्ट्र विद्यापीठ, जळगाव यांच्याकडून त्यांना ही पदवी प्रदान करण्यात आली. प्रा डॉ सुनीता चौधरी यांच्या मार्गदर्शनाखाली संशोधन कार्य पूर्ण केले.

प्रा. धनराज ढगे यांच्या या शैक्षणिक यशामुळे महाविद्यालयाच्या शैक्षणिक क्षेत्रातील नावलौकिकात भर पडली आहे. त्यांच्या संशोधनामुळे समाजकार्य विषयातील ज्ञान आणि संशोधनाला चालना मिळेल, अशी अपेक्षा व्यक्त करण्यात येत आहे.
त्यांच्या या यशाबद्दल श्रम साफल्य एज्युकेशन सोसायटीचे चेअरमन अभिजीत भांडारकर, पदाधिकारी, समाजकार्य महाविद्यालयाचे प्राचार्य डॉ पी एस पाटील, प्राध्यापक, शिक्षकेतर कर्मचारी तसेच मित्रपरिवार यांनी त्यांचे अभिनंदन केले असून, पुढील शैक्षणिक व सामाजिक वाटचालीस शुभेच्छा दिल्या आहेत.

प्रा. धनराज ढगे यांच्या या उल्लेखनीय यशाबद्दल त्यांचे हार्दिक अभिनंदन! 💐

पत्रकाराला अडवून शिवीगाळ, जीवे मारण्याची धमकी; अमळनेर पोलिसांकडे कारवाईची मागणी मोटारसायकलची चावी काढून घेतल्याचा आणि ‘खंडणीखोर पत्रकार’ म्हणत बदनामी केल्याचा तक्रारीत आरोप

अमळनेर प्रतिनिधी : अमळनेर शहरात पत्रकाराला रस्त्यात अडवून शिवीगाळ केल्याची, जीवे मारण्याची धमकी दिल्याची आणि सार्वजनिक ठिकाणी बदनामी केल्याची तक्रार अमळनेर पोलीस ठाण्यात दाखल करण्यात आली आहे. ‘द लोक न्यूज’ या वेब पोर्टलचे मुख्य संपादक संभाजी सुकलाल देवरे यांनी महेंद्र शालीग्राम बोरसे यांच्याविरुद्ध लेखी तक्रार देत संबंधितांवर कायदेशीर कारवाई करण्याची मागणी केली आहे. या घटनेमुळे शहरात चर्चेला उधाण आले आहे.
न्यू प्लॉट परिसरात रस्ता अडविल्याचा आरोप
संभाजी देवरे यांनी दिलेल्या तक्रारीनुसार, १३ ऑक्टोबर २०२६ रोजी सायंकाळी सुमारे ६ ते ६.३० वाजेच्या दरम्यान ते मोटारसायकलने जात असताना अमळनेर शहरातील न्यू प्लॉट परिसरात बजरंग बन्सीलाल अग्रवाल यांच्या घरासमोर संबंधित व्यक्तीने मोटारसायकलने त्यांचा रस्ता अडविला. त्यानंतर मोटारसायकलची चावी काढून घेतल्याचा आरोप तक्रारीत करण्यात आला आहे.
यावेळी संबंधित व्यक्तीने शिवीगाळ केली, जीवे मारण्याची धमकी दिली तसेच अंगावर धावून येत जबरदस्ती करण्याचा प्रयत्न केल्याचे देवरे यांनी तक्रारीत म्हटले आहे.
‘खंडणीखोर पत्रकार’ संबोधल्याचा दावा
या घटनेदरम्यान सार्वजनिक ठिकाणी आपल्याला ‘खंडणीखोर पत्रकार’ असे संबोधण्यात आले. तसेच सोबत असलेल्या एका व्यक्तीला संभाषणाचे चित्रीकरण करण्यास सांगण्यात आल्याचा आरोपही तक्रारदाराने केला आहे. घटनास्थळी सुमारे ३० ते ४० लोकांची गर्दी जमली होती, असेही तक्रारीत नमूद करण्यात आले आहे. या प्रकारामुळे आपली सार्वजनिक प्रतिमा मलिन करण्याचा प्रयत्न झाल्याचा दावा संभाजी देवरे यांनी केला आहे.
विविध कायदेशीर तरतुदींनुसार कारवाईची मागणी
या प्रकरणी भारतीय न्याय संहितेच्या कलम १२७(२), ३५१(२), १५२ व ३५६(२) तसेच महाराष्ट्र प्रसार माध्यमातील व्यक्ती आणि प्रसार माध्यम संस्था (हिंसक कृत्य व मालमत्तेचे नुकसान किंवा हानी प्रतिबंध) अधिनियम, २०१७ मधील कलम ३ व ४ अंतर्गत कारवाई करण्याची मागणी तक्रारदाराने केली आहे.
संबंधित व्यक्तीविरुद्ध गुन्हा नोंदवून कायद्यानुसार कारवाई करावी, अशी विनंती देवरे यांनी पोलिसांकडे केली आहे. या तक्रारीची प्रत जळगावचे पोलीस अधीक्षक आणि अमळनेर विभागाचे उपविभागीय पोलीस अधिकारी यांनाही पाठविण्यात आल्याचे तक्रारीत नमूद आहे.
दरम्यान, तक्रारीतील आरोपांची स्वतंत्र पडताळणी होणे आवश्यक असून, पोलिसांच्या अधिकृत भूमिकेनंतरच प्रकरणातील पुढील तपशील स्पष्ट होऊ शकतील.

अमळनेर नगर परिषदेची प्लास्टिक बंदीविरोधात धडक कारवाई; १७५ किलो प्रतिबंधित प्लास्टिक जप्त दोन व्यावसायिकांना १० हजारांचा दंड; आरोग्य विभागाची विशेष तपासणी मोहीम

अमळनेर प्रतिनिधी : प्लास्टिक बंदीच्या नियमांचे उल्लंघन करणाऱ्या व्यावसायिकांविरुद्ध अमळनेर नगर परिषदेच्या आरोग्य विभागाने मंगळवार, दि. १३ ऑक्टोबर रोजी विशेष तपासणी मोहीम राबविली. या मोहिमेत तब्बल १७५ किलो प्रतिबंधित प्लास्टिक जप्त करण्यात आले. तसेच नियमांचे उल्लंघन केल्याप्रकरणी दोन व्यावसायिकांना एकूण १० हजार रुपयांचा दंड ठोठावण्यात आला.

नगर परिषदेच्या पथकाने शहरातील गुरुकृपा प्लास्टिक, कोमल हॉटेल, संजय प्लास्टिक, बाबा प्लास्टिक आणि अनिल एजन्सी या आस्थापनांची तपासणी केली. या तपासणीदरम्यान प्रतिबंधित प्लास्टिकचा साठा आढळून आल्याने संबंधित प्लास्टिक जप्त करण्यात आले. प्लास्टिक बंदीच्या नियमांचे पालन न करणाऱ्या दोन व्यावसायिकांवर दंडात्मक कारवाई करण्यात आली.

ही मोहीम मुख्याधिकारी गणेश शिंदे यांच्या मार्गदर्शनाखाली राबविण्यात आली. कारवाईत आरोग्य निरीक्षक किरण कंडारे, संतोष जाधव, योगेश पवार, वाहनचालक बालकृष्ण जाधव, जया सरदार, गणेश गडरी तसेच आरोग्य विभागातील कर्मचारी सहभागी झाले होते.

दुष्काळाचे संकट गडद; अमळनेरच्या पाणीपुरवठ्यासाठी युद्धपातळीवर नियोजन! सार्वजनिक विहिरी-बोअरवेल पुनर्जीवित करणार; २४ बाय ७ योजनेत ऑटो व्हॉल्व्हचा प्रस्ताव, नव्या जलकुंभांचीही तयारी

अमळनेर प्रतिनिधी : यंदा संभाव्य भीषण दुष्काळाचे संकट लक्षात घेता अमळनेर शहरातील नागरिकांना पाणीटंचाईचा सामना करावा लागू नये, यासाठी आतापासूनच उपाययोजनांना गती देण्यात येत आहे. शहरातील सर्व सार्वजनिक विहिरी आणि बोअरवेल पुनर्जीवित करून त्यांचा पाणीपुरवठ्यासाठी उपयोग करण्यात येणार असून, पाण्याची गळती रोखण्यासाठी २४ बाय ७ पाणीपुरवठा योजनेत ऑटो व्हॉल्व्ह बसविण्याचा प्रस्ताव शासनाकडे पाठविण्यात येणार असल्याची माहिती माजी आमदार शिरीष चौधरी यांनी दिली. यासंदर्भात त्यांनी नगराध्यक्ष, उपनगराध्यक्ष, सभापती, मुख्याधिकारी, अधिकारी, कर्मचारी, पाणीपुरवठा ठेकेदार आणि नगरसेवकांची आढावा बैठक घेऊन संभाव्य पाणीटंचाईचा सामना करण्यासाठी नियोजनाचा आढावा घेतला.

सध्या भूजल पातळी खालावत असून नदीपात्रातील उपलब्ध पाणीही पुढील दीड ते दोन महिनेच पुरेल की काय, अशी चिंता व्यक्त होत आहे. या पार्श्वभूमीवर नागरिकांना पाण्याच्या संकटापासून दिलासा देण्यासाठी माजी आमदार शिरीष चौधरी यांनी पुढाकार घेतला आहे. बैठकीत २४ बाय ७ पाणीपुरवठा योजनेच्या कामाची सद्यस्थिती, पाणीगळती, व्हॉल्व्हमधील बिघाड आणि पाणी वितरणातील असमानता यावर सविस्तर चर्चा करण्यात आली.

पाणीगळती रोखण्यासाठी ऑटो व्हॉल्व्हचा प्रस्ताव

२४ बाय ७ योजनेचे काम प्रगतिपथावर असून एप्रिलअखेरपर्यंत ते पूर्ण करण्याचे नियोजन असल्याचे ठेकेदाराने बैठकीत सांगितले. मात्र, निधी वेळेवर उपलब्ध न झाल्यास कामाला दीड महिन्यापर्यंत विलंब होण्याची शक्यता असल्याचेही स्पष्ट करण्यात आले. सध्या व्हॉल्व्हमधील गळती आणि पाणी सोडण्याच्या वेळेतील तफावतीमुळे काही भागांत कमी, तर काही भागांत जास्त पाणीपुरवठा होत असल्याची बाब समोर आली.

ही समस्या दूर करण्यासाठी योजनेत ऑटो व्हॉल्व्हचा समावेश करण्याचा प्रस्ताव पाठविण्यात येणार आहे. या यंत्रणेमुळे आवश्यकतेनुसार दूरस्थ पद्धतीने व्हॉल्व्ह सुरू-बंद करता येतील. तसेच खराब व्हॉल्व्हची दुरुस्ती अथवा नवीन व्हॉल्व्ह बसवून पाण्याची गळती रोखण्यावर भर दिला जाणार आहे.

विहिरी-बोअरवेल पुनर्जीवित करून पर्यायी पाणीपुरवठा

संभाव्य पाणीटंचाईवर मात करण्यासाठी शहरातील सार्वजनिक विहिरी आणि बोअरवेल पुनर्जीवित करून त्यांच्या पाण्याची गुणवत्ता तपासण्यात येणार आहे. पाणी पिण्यायोग्य असल्यास संबंधित ठिकाणी एक हजार लिटर क्षमतेच्या टाक्या बसवून नागरिकांना पाणी उपलब्ध करून दिले जाईल. विहिरीतील पाणी वापरण्यायोग्य नसल्यास टँकरद्वारे पाणी आणून या टाक्या भरल्या जातील, अशी माहिती माजी आमदार शिरीष चौधरी यांनी दिली.

हतनूरचे आवर्तन राखणार; कलालीतूनही पाणीपुरवठ्याचे नियोजन

लोकनियुक्त नगराध्यक्ष डॉ. परीक्षित बाविस्कर यांनीही संभाव्य पाणीटंचाईबाबत नगर परिषदेच्या नियोजनाची माहिती दिली. शासनाने ३१ ऑगस्ट २०२७ पर्यंत पाणीपुरवठा करण्याच्या दृष्टीने नियोजन करण्यास सांगितले असल्याचे त्यांनी नमूद केले. हतनूर धरणातून दोन आवर्तने राखून ठेवण्याची व्यवस्था करण्याचा प्रयत्न सुरू असल्याचेही त्यांनी सांगितले.

कलाली डोहात सध्या बसविण्यात आलेल्या ६५ अश्वशक्तीच्या मोटारी काढून त्याऐवजी १०० अश्वशक्तीच्या मोटारी बसविण्याचे नियोजन आहे. त्यामुळे पाण्याचा प्रवाह वाढण्यास मदत होईल आणि कलाली येथूनही पाणीपुरवठा सुरू करता येईल. याशिवाय धुळे रस्त्यावर २५ लाख लिटर क्षमतेचा, तर गांधलीपुरा परिसरात १० लाख लिटर क्षमतेचा नवीन जलकुंभ उभारण्यासाठी प्रयत्न सुरू असल्याचे डॉ. बाविस्कर यांनी स्पष्ट केले.

नागरिकांनीही पाणी जपून वापरण्याचे आवाहन

संभाव्य पाणीटंचाईचे संकट गंभीर असले, तरी नागरिकांना पुरेसे पाणी उपलब्ध करून देण्यासाठी नगर परिषदेकडून पूर्वनियोजन करण्यात येत आहे. उपलब्ध पाण्याचा काटकसरीने वापर करणे ही नागरिकांचीही जबाबदारी असून, प्रत्येकाने पाणी जपून वापरावे, असे आवाहन नगराध्यक्ष डॉ. परीक्षित बाविस्कर यांनी केले.

बैठकीला लोकप्रतिनिधी व अधिकारी उपस्थित

या आढावा बैठकीला माजी आमदार शिरीष चौधरी, लोकनियुक्त नगराध्यक्ष डॉ. परीक्षित बाविस्कर, उपनगराध्यक्ष प्रशांत निकम, गटनेते पंकज चौधरी, गटनेते महेश देशमुख, माजी उपनगराध्यक्ष अनिल महाजन, सभापती कैलास पाटील, सभापती साहेबराव पवार, सभापती नावेद शेख, दीपक चौगुले, मुख्याधिकारी गणेश शिंदे, पाणीपुरवठा अभियंता सत्येम पाटील यांच्यासह नगरसेवक, अधिकारी आणि कर्मचारी उपस्थित होते.

शेतकरी मदत, SIR रद्द आणि मुख्य निवडणूक आयुक्तांच्या राजीनाम्याच्या मागणीसाठी अमळनेरमध्ये १५ रोजी जनआंदोलन महाविकास आघाडीसह विविध राजकीय पक्ष, सामाजिक संघटना आंदोलनात सहभागी होणार; जिल्हा परिषद विश्रामगृहासमोर सकाळी १० वाजता आयोजन

अमळनेर | प्रतिनिधी

शेतकऱ्यांना हेक्टरी एक लाख रुपयांची आर्थिक मदत द्यावी, देशभरातील SIR प्रक्रिया रद्द करावी आणि मुख्य निवडणूक आयुक्त ज्ञानेश कुमार यांनी राजीनामा द्यावा, या प्रमुख मागण्यांसाठी अमळनेर येथे गुरुवार, दि. १५ ऑक्टोबर रोजी जनआंदोलनाचे आयोजन करण्यात आले आहे. अमळनेर तालुका महाविकास आघाडीच्या वतीने जिल्हा परिषद विश्रामगृहासमोर सकाळी १० वाजता हे आंदोलन होणार असून, यामध्ये विविध राजकीय पक्ष, सामाजिक संघटना आणि कार्यकर्ते सहभागी होणार असल्याचे आयोजकांनी कळविले आहे.

शेतकऱ्यांचे आर्थिक प्रश्न, तरुणांचे भविष्य, महिला सक्षमीकरण आणि लोकशाही मूल्यांचे संरक्षण या मुद्द्यांवर जनतेने एकत्र येऊन आवाज उठवावा, असे आवाहन आयोजकांनी केले आहे. शेतकऱ्यांना आर्थिक मदत मिळावी, निवडणूक प्रक्रियेबाबत उपस्थित केलेल्या आक्षेपांच्या पार्श्वभूमीवर SIR प्रक्रिया रद्द करावी आणि मुख्य निवडणूक आयुक्तांच्या राजीनाम्याची मागणी मान्य करावी, या मुद्द्यांवर आंदोलनात भर दिला जाणार आहे.

विविध संघटनांचा सहभाग

या जनआंदोलनात काँग्रेस, राष्ट्रवादी काँग्रेस (शरदचंद्र पवार गट), शिवसेना (उद्धव बाळासाहेब ठाकरे गट), अल्पसंख्याक युवा संघटना, मराठा सेवा संघ, अखिल भारतीय विद्यार्थी सेना, पुरोगामी क्रांती सेना, शेतकरी संघटना, प्रहार संघटना, संभाजी ब्रिगेड, महिला वकील संघटना, भारतीय मुक्ती मोर्चा आणि साने गुरुजी कर्मभूमी प्रतिष्ठान यांसह विविध संघटना सहभागी होणार असल्याचे आवाहनपत्रात नमूद करण्यात आले आहे.

नागरिकांना सहभागी होण्याचे आवाहन

शेतकरी, तरुण, महिला आणि लोकशाहीप्रेमी नागरिकांनी या आंदोलनात मोठ्या संख्येने सहभागी व्हावे, असे आवाहन अमळनेर तालुका महाविकास आघाडीच्या वतीने करण्यात आले आहे. विविध प्रश्नांवर लोकशाही मार्गाने एकजूट दाखवून जनतेचा आवाज संबंधित यंत्रणांपर्यंत पोहोचविण्याचा या आंदोलनाचा उद्देश असल्याचे आयोजकांनी म्हटले आहे.

अमळनेरमध्ये आपत्ती व्यवस्थापनाचे प्रात्यक्षिक; विद्यार्थ्यांना अग्निशमन व बचावकार्याचे धडे! अग्निशमन विभागाकडून आग विझविण्याच्या पद्धतींचे प्रात्यक्षिक; पूरमदत कार्यातील युवकांसह अग्निशमन पथकाचा सन्मान

अमळनेर | प्रतिनिधी

आग, पूर आणि अन्य आपत्कालीन परिस्थितींमध्ये योग्य खबरदारी, प्रसंगावधान आणि तातडीने बचावकार्य करण्याचे महत्त्व विद्यार्थ्यांना प्रत्यक्ष प्रात्यक्षिकातून समजावून सांगण्यात आले. आंतरराष्ट्रीय आपत्ती जोखीम न्यूनीकरण दिनानिमित्त मेरा युवा भारत, जळगाव यांच्या मार्गदर्शनाखाली समाजकार्य महाविद्यालय, अमळनेर येथे मंगळवार, दि. १३ ऑक्टोबर रोजी आपत्ती व्यवस्थापन जनजागृती कार्यक्रमाचे आयोजन करण्यात आले. यावेळी अमळनेर अग्निशमन विभागाच्या पथकाने आग प्रतिबंधक उपाययोजना, अग्निशामक यंत्रांचा वापर आणि आपत्कालीन परिस्थितीत करावयाच्या बचावकार्याची प्रात्यक्षिके सादर केली.

अग्निशमन अधिकारी गणेश गोसावी यांच्या मार्गदर्शनाखाली वाहनचालक फारुख शेख, फायरमन दिनेश बिन्हाडे आणि फायरमन आकाश संदानशिव यांनी विद्यार्थ्यांना आगीचे विविध प्रकार, आग विझविण्याच्या पद्धती, अग्निशामक यंत्रांचा योग्य वापर तसेच आपत्तीच्या वेळी घ्यावयाची खबरदारी याबाबत सविस्तर माहिती दिली. केवळ आपत्ती आल्यानंतर मदत करणेच नव्हे, तर आपत्तीपूर्व तयारी आणि संभाव्य धोके ओळखून वेळीच उपाययोजना करणेही तितकेच महत्त्वाचे असल्याचे यावेळी अधोरेखित करण्यात आले.

सायर देवी बोहरा सेंट्रल स्कूलमध्ये १६ ऑक्टोबरला ‘आर्ट अँड क्राफ्ट एक्झिबिशन’; खासदार स्मिताताई वाघ यांच्या हस्ते उद्घाटन विद्यार्थ्यांच्या कलागुणांना मिळणार हक्काचे व्यासपीठ; सर्जनशीलता आणि कल्पकतेचा होणार कलाविष्कार

अमळनेर प्रतिनिधी : विद्यार्थ्यांच्या सुप्त कलागुणांना वाव देण्यासाठी आणि त्यांच्यातील सर्जनशीलता, कल्पकता व कलात्मक कौशल्यांना प्रोत्साहन देण्याच्या उद्देशाने सायर देवी बोहरा सेंट्रल स्कूलमध्ये शुक्रवार, दिनांक १६ ऑक्टोबर २०२६ रोजी ‘आर्ट अँड क्राफ्ट एक्झिबिशन’चे आयोजन करण्यात आले आहे. सकाळी १० वाजता शाळेच्या परिसरात या प्रदर्शनाचे उद्घाटन खासदार स्मिताताई वाघ यांच्या हस्ते होणार आहे.
या कार्यक्रमाला शाळेचे चेअरमन सुरेंद्र कुमार बोहरा, प्रिन्सिपल जितेंद्र सिंग यांची प्रमुख उपस्थिती राहणार असून, शाळेच्या आर्ट डिपार्टमेंटच्या पुढाकारातून या प्रदर्शनाचे आयोजन करण्यात आले आहे.
विद्यार्थ्यांच्या कल्पनाशक्तीला सर्जनशीलतेची जोड मिळाल्यास त्यांच्यातील कलागुण अधिक प्रभावीपणे विकसित होतात. चित्रकला, हस्तकला आणि विविध कलात्मक निर्मितीच्या माध्यमातून विद्यार्थ्यांना आपल्या कल्पना प्रत्यक्ष साकारण्याची संधी अशा प्रदर्शनांमधून मिळते. विद्यार्थ्यांनी स्वतःच्या मेहनतीतून आणि कल्पकतेतून तयार केलेल्या कलाकृती त्यांच्या कलात्मक दृष्टिकोनाची, निरीक्षणशक्तीची आणि कौशल्याची ओळख करून देतात.
शालेय शिक्षणासोबतच कला, सर्जनशीलता आणि व्यक्तिमत्त्व विकासाला महत्त्व देण्याच्या दृष्टीने या प्रदर्शनाचे आयोजन करण्यात आले आहे. विद्यार्थ्यांच्या कलागुणांना प्रोत्साहन मिळावे, त्यांच्या आत्मविश्वासात भर पडावी आणि त्यांच्या कलात्मक प्रयत्नांना योग्य व्यासपीठ मिळावे, हा या उपक्रमामागील उद्देश आहे.
या प्रदर्शनामुळे विद्यार्थ्यांना आपल्या कलाकृती सादर करण्याची संधी मिळणार असून, शाळेतील कलाशिक्षणाच्या उपक्रमांना प्रोत्साहन मिळेल. या उपक्रमात विद्यार्थी, पालक आणि कलाप्रेमींनी सहभागी होऊन विद्यार्थ्यांच्या सर्जनशील प्रयत्नांना दाद द्यावी, असे आवाहन शाळेच्या वतीने करण्यात येत आहे.

चांदणी कुऱ्हे येथे सती माता दर्शनासाठी बुधवारी भव्य महिला पायी दिंडी सती माता महिला समितीतर्फे सलग चौथ्या वर्षी आयोजन; पहाटे साडेचार वाजता पाचपावली देवी मंदिरापासून होणार प्रारंभ

अमळनेर प्रतिनिधी : नवरात्रोत्सवानिमित्त चांदणी कुऱ्हे येथील ग्रामदैवत सती माता यांच्या दर्शनासाठी बुधवार, दि. १४ ऑक्टोबर रोजी भव्य महिला पायी दिंडीचे आयोजन करण्यात आले आहे. सती माता महिला समितीतर्फे सलग चौथ्या वर्षी या दिंडीचे आयोजन करण्यात आले असून, परिसरातील महिलांमध्ये या धार्मिक सोहळ्याबाबत उत्साहाचे वातावरण आहे.

दिंडीला पहाटे ४.३० वाजता पाचपावली देवी मंदिरापासून प्रारंभ होणार असून, राधे डीजेच्या तालावर भक्तिमय वातावरणात ही दिंडी सती माता मंदिरापर्यंत मार्गक्रमण करणार आहे. देवीच्या जयघोषात आणि भक्तिभावात निघणाऱ्या या दिंडीच्या माध्यमातून महिलांना सामूहिक भक्ती, श्रद्धा आणि एकोप्याचा अनुभव घेता येणार आहे.

खाशी मंडळाच्या उपाध्यक्ष माधुरी पाटील व योगिता पांडे यांच्या मार्गदर्शनाखाली या उपक्रमाचे नियोजन करण्यात येत आहे. महिला समितीच्या पदाधिकारी शीतल सावंत, कोमल बाफना, दिशा संधनशिव, मोहिनी सोनार, भारती कोळी, प्रिया रजाळे, निवेदिता कापडणेकर, सुनिता मोरे रोहिणी शिरसाट, अश्विनी सावंत, प्रतिभा पाटील, अर्चना शाह, अनिता जाधव आणि अनिता चौधरी यांच्यासह समितीच्या सदस्यांकडून दिंडीच्या यशस्वी आयोजनासाठी परिश्रम घेतले जात आहेत.

दिंडीत सहभागी होणाऱ्या महिलांसाठी फराळाची व्यवस्था करण्यात आली आहे. या धार्मिक सोहळ्यात जास्तीत जास्त महिलांनी सहभागी होऊन सती मातेचे दर्शन घ्यावे, असे आवाहन सती माता महिला समितीतर्फे करण्यात आले आहे.

आंतरराष्ट्रीय आयटी कंपनीत सॉफ्टवेअर इंजिनिअरपदी निवड; मोहित पाटील यांचा मराठा समाजातर्फे गुणगौरव

अमळनेर प्रतिनिधी : अमळनेर तालुका मराठा समाजाच्या वतीने आयोजित वार्षिक सर्वसाधारण सभेत आंतरराष्ट्रीय ख्यातीच्या अॅक्सेंचर (Accenture) कंपनीत सॉफ्टवेअर इंजिनिअर म्हणून उच्च पदावर नोकरी मिळविल्याबद्दल चि. मोहित पंडित पाटील यांचा ट्रॉफी व प्रमाणपत्र देऊन जाहीर सत्कार करण्यात आला.
मोहित पाटील यांनी आपल्या शैक्षणिक गुणवत्तेच्या आणि मेहनतीच्या जोरावर मुंबई येथील नामांकित अॅक्सेंचर या आंतरराष्ट्रीय आयटी कंपनीत सॉफ्टवेअर इंजिनिअर म्हणून नोकरी मिळवली आहे. त्यांचे बी.टेक.चे शिक्षण पुणे येथे, तर सी-डॅकचे शिक्षण हैदराबाद येथे झाले आहे. त्यांच्या या यशामुळे पाटील कुटुंबीयांसह अमळनेर तालुका मराठा समाजाची मान उंचावली आहे.
मोहित पाटील हे प्रा. पी. के. पाटील, प्राचार्य तथा अखिल भारतीय मराठा महासंघाचे माजी तालुकाध्यक्ष, अमळनेर आणि सौ. सीमा पी. पाटील, भिलाली येथील प्रथम महिला उपसरपंच यांचे सुपुत्र आहेत.
या सत्कारप्रसंगी मराठा समाजाचे अध्यक्ष जयवंत मन्साराम पाटील, उपाध्यक्ष राजेंद्र देशमुख, खजिनदार महेंद्र बोरसे, सेक्रेटरी विक्रांत पाटील, एस. के. पाटील, जे. पी. पाटील, प्रा. पी. के. पाटील, चंद्रकांत काटे, संजय पुनाजी पाटील, गौरव उदय पाटील, महावितरणचे पी. एस. पाटील, निवृत्त न्यायाधीश गुलाबराव पाटील, सुनील आहिरराव, प्रा. अशोक पवार आणि के. पी. पाटील यांच्यासह समाजातील मान्यवर उपस्थित होते.