गणपती बाप्पाला स्वच्छतेची साथ; अमळनेर नगरपरिषदेची विशेष स्वच्छता मोहीम** **स्वच्छ, सुंदर आणि निर्मल अमळनेरसाठी नागरिकांना सहभागाचे आवाहन**
अमळनेर : गणेशोत्सवाच्या पावन पर्वानिमित्त अमळनेर नगरपरिषद स्वच्छता विभागाच्या वतीने “गणपती बाप्पाला स्वच्छतेची साथ” हा संदेश घेऊन शहरात विशेष स्वच्छता मोहीम राबविण्यात येत आहे. गणेशोत्सवाच्या काळात शहर स्वच्छ, सुंदर व आरोग्यदायी राहावे यासाठी नगरपरिषद प्रशासनाने विशेष नियोजन केले आहे.
लोकनियुक्त नगराध्यक्ष **डॉ. परीक्षित बाविस्कर** यांच्या मार्गदर्शनाखाली तसेच मुख्याधिकारी **गणेश शिंदे** यांच्या सूचनेनुसार अमळनेर नगरपरिषद कार्यक्षेत्रातील विविध भागांमध्ये स्वच्छता मोहीम प्रभावीपणे राबविण्यात येत आहे.
गणेश मंडळ परिसर, मुख्य रस्ते, सार्वजनिक ठिकाणे तसेच गणेश विसर्जन मार्गांची विशेष साफसफाई करण्यात येत असून नियमित झाडू काम, कचरा संकलन व विल्हेवाट, परिसर स्वच्छता तसेच आवश्यकतेनुसार जंतुनाशक फवारणी आदी कामांना प्राधान्य देण्यात आले आहे.
या विशेष स्वच्छता मोहिमेचे नियोजन व अंमलबजावणी स्वच्छता निरीक्षक संतोष जाधव, स्वच्छता निरीक्षक किरण कंडारे व संतोष माणिक यांच्या मार्गदर्शनाखाली करण्यात येत आहे. स्वच्छता कर्मचारी व संबंधित मुकादम यांच्या माध्यमातून शहरातील विविध भागांत स्वच्छता व्यवस्था अधिक सक्षम करण्यात आली आहे.
गणेशोत्सव हा श्रद्धा, भक्ती आणि उत्साहाचा सण असून, या उत्सवाला स्वच्छतेची जोड मिळणे तितकेच महत्त्वाचे आहे. त्यामुळे नागरिकांनी सार्वजनिक ठिकाणी कचरा टाकू नये, निर्माल्य योग्य ठिकाणी जमा करावे, प्लास्टिकचा अनावश्यक वापर टाळावा व आपल्या परिसराची स्वच्छता राखण्यासाठी नगरपरिषदेला सहकार्य करावे, असे आवाहन करण्यात आले आहे.
“गणपती बाप्पाला स्वच्छतेची साथ, स्वच्छ आणि सुंदर अमळनेर हीच आपली जबाबदारी” या संदेशातून नागरिकांनी स्वच्छता मोहिमेत सक्रिय सहभाग नोंदवावा, असे आवाहन अमळनेर नगरपरिषद स्वच्छता विभागाच्या वतीने करण्यात आले आहे.
*स्वच्छ अमळनेर – सुंदर अमळनेर, गणपती बाप्पाच्या चरणी स्वच्छतेचा संकल्प!*