मातीतून आकारला बाप्पा, अमळनेरकर विद्यार्थ्यांनी दिला पर्यावरण रक्षणाचा संदेश – रोटरी क्लब अमळनेरचा स्तुत्य उपक्रम*
*अमळनेर, दि. १२ सप्टेंबर २०२६ :* रोटरी क्लब अमळनेर आणि सी. आर. पाटील इंटरनॅशनल स्कूल, तांबेपुरा, अमळनेर यांच्या संयुक्त विद्यमाने शनिवार, दि. १२ सप्टेंबर २०२६ रोजी सकाळी ९.०० वाजता शाळेच्या परिसरात पर्यावरणपूरक गणेशमूर्ती बनवण्याच्या कार्यशाळेचे आयोजन करण्यात आले.
गणेशोत्सवाच्या पार्श्वभूमीवर पर्यावरणाचे संरक्षण व संवर्धन करण्याच्या उद्देशाने विद्यार्थ्यांना शाडू मातीपासून पर्यावरणपूरक गणेशमूर्ती तयार करण्याचे प्रशिक्षण देण्यात आले. या उपक्रमातून विद्यार्थ्यांना पर्यावरणपूरक गणेशोत्सवाचे महत्त्व समजावून सांगतानाच त्यांच्या कलागुणांना व सर्जनशीलतेला वाव देण्यात आला.
विद्यार्थ्यांनी उत्स्फूर्त सहभाग नोंदवत शाडू मातीपासून आकर्षक गणेशमूर्ती तयार केल्या. स्वतःच्या हाताने मूर्ती तयार करण्याचा अनुभव विद्यार्थ्यांसाठी आनंददायी व प्रेरणादायी ठरला. ‘मातीची मूर्ती घडवूया, पर्यावरणाचे रक्षण करूया’ हा संदेश या उपक्रमातून देण्यात आला.
प्लास्टर ऑफ पॅरिसच्या मूर्तींमुळे होणारे जलप्रदूषण टाळण्यासाठी शाडू मातीच्या मूर्तींचा वापर करण्याचे आवाहन यावेळी करण्यात आले.
या सुंदर व विधायक उपक्रमासाठी रोटे. महेश पाटील (अध्यक्ष), रोटे. प्रशांत निकम (सचिव), रोटे. सुबोध पाटील (प्रकल्प प्रमुख) आणि रोटे. अजय रोडगे यांनी विशेष मार्गदर्शन केले. तसेच शाळेचे शिक्षक, विद्यार्थी आणि रोटरी क्लबचे सदस्य रोटे. किरण कुंभार, रोटे. मनोज पाटील यांनी उपक्रमाच्या यशस्वी आयोजनासाठी सहकार्य केले.
*अशी बातमी मकसूद बोहरी कळवितात.