महिलांना स्वावलंबी करण्यासाठी DL Social Foundationचा पुढाकार* *‘महिला स्वावलंबन अभियान – २०२६’ची सुरुवात; कौशल्यातून स्वयंरोजगाराला प्रोत्साहन*

अमळनेर : महिलांना आर्थिकदृष्ट्या सक्षम करून त्यांना स्वयंरोजगाराच्या माध्यमातून स्वावलंबी बनविण्याच्या उद्देशाने DL Social Foundation तर्फे ‘महिला स्वावलंबन अभियान – २०२६’ हा सामाजिक उपक्रम राबविण्यात येणार आहे. ‘कौशल्यातून स्वावलंबनाकडे’ या संकल्पनेवर आधारित या अभियानाच्या माध्यमातून महिलांना व्यवसायासाठी आवश्यक साधनसामग्री, कौशल्य प्रशिक्षण आणि मार्गदर्शन उपलब्ध करून देण्याचा संस्थेचा प्रयत्न आहे.

या अभियानांतर्गत महिलांसाठी शिलाई मशीन किट, ब्युटी किट, खाद्यपदार्थ व्यवसाय किट आणि डिजिटल सेवा किट असे चार व्यवसायाधारित पर्याय उपलब्ध करून देण्यात येणार आहेत. निवड झालेल्या लाभार्थींना त्यांच्या आवडीनुसार व व्यवसायाच्या गरजेनुसार एका व्यवसायासाठी किट उपलब्ध करून देण्यात येईल.

अभियानासाठी ऑफलाईन पद्धतीने अर्ज स्वीकारण्यात येणार असून अर्ज वितरण 18 सप्टेंबर 2026 पासून सुरू होणार आहे. अर्जदारांची निवड संस्थेने निश्चित केलेल्या पात्रता व गुणांकन निकषांनुसार करण्यात येणार आहे. आर्थिक गरज, संबंधित कौशल्य किंवा अनुभव, व्यवसाय सुरू करण्याची तयारी, कौटुंबिक परिस्थिती तसेच प्रशिक्षण व मार्गदर्शनासाठीची तयारी या बाबींचा विचार करण्यात येणार आहे.

संस्थेच्या वतीने या उपक्रमाबाबत माहिती देताना सांगण्यात आले की, महिलांना केवळ आर्थिक मदत देण्याऐवजी त्यांच्या हाताला कौशल्य आणि व्यवसायाला साधनसामग्री देऊन दीर्घकालीन स्वावलंबनाची संधी निर्माण करणे, हा अभियानाचा मुख्य उद्देश आहे.

या उपक्रमासाठी महिलांनी DL Social Foundation, समर्थ नगर, धुळे रोड, अमळनेर येथे संपर्क साधावा, असे आवाहन संस्थेच्या वतीने करण्यात आले आहे.