मंगरूळ येथे जायन्ट्स ग्रुपचा स्तुत्य उपक्रम १०५ विद्यार्थ्यांची मोफत रक्तगट तपासणी; विद्यार्थ्यांना ओळखपत्रांचे वाटप

अमळनेर : जायन्ट्स ग्रुपतर्फे सुरू असलेल्या जायन्ट्स सप्ताहानिमित्त तालुक्यात विविध सामाजिक, शैक्षणिक व आरोग्यविषयक उपक्रम राबविण्यात येत असून, याच उपक्रमांतर्गत मंगरूळ येथील स्व आबासो अनिल अंबर पाटील माध्यमिक विद्यालयातील तब्बल १०५ विद्यार्थ्यांची मोफत रक्तगट तपासणी करण्यात आली. तपासणीनंतर विद्यार्थ्यांना त्यांच्या रक्तगटाची माहिती असलेली ओळखपत्रेही मोफत देण्यात आली.

जायन्ट्स ग्रुपतर्फे १७ ते २३ सप्टेंबर या कालावधीत अमळनेर तालुक्यात जायन्ट्स सप्ताहाचे आयोजन करण्यात आले आहे. या सप्ताहादरम्यान वृक्षारोपण, पुस्तक वाटप, रांगोळी स्पर्धा, वक्तृत्व स्पर्धा, आरोग्य तपासणी, रक्तगट तपासणी तसेच एआय तंत्रज्ञानावर प्रशिक्षण असे विविध उपक्रम मोफत राबविण्यात येत आहेत. सामाजिक बांधिलकी जपत विविध क्षेत्रांमध्ये जनजागृती व सेवा देण्याचा प्रयत्न जायन्ट्स ग्रुपच्या माध्यमातून करण्यात येत आहे.

मंगरूळ येथील विद्यालयात इयत्ता ५ वी ते १० वी मधील १०५ विद्यार्थ्यांची रक्तगट तपासणी करण्यात आली. विद्यार्थ्यांना त्यांच्या रक्तगटाची अचूक माहिती मिळावी आणि भविष्यात आपत्कालीन परिस्थितीत त्याचा उपयोग व्हावा, या उद्देशाने हा उपक्रम राबविण्यात आला. रक्तगट तपासणीनंतर विद्यार्थ्यांना रक्तगट नमूद असलेली ओळखपत्रे मोफत देण्यात आली.

या उपक्रमासाठी जायन्ट्स चे अध्यक्ष डॉ महेश पाटील, उपाध्यक्ष ऍड राजेंद्र चौधरी, संस्थापक अध्यक्ष सुनील पाटील, खजिनदार राजेंद्र पाटील यांनी पुढाकार घेतला. तसेच जीवनश्री ब्लड बँकेचे संतोष वाघ, महेश पाटील, संजय मुंडके यांनी रक्तगट तपासणीसाठी विशेष सहकार्य केले.

यावेळी विद्यालयाचे मुख्याध्यापक प्रकाश पाटील, अशोक सूर्यवंशी, प्रभूदास पाटील, संजय पाटील, सुषमा सोनवणे, शीतल चव्हाण, सीमा मोरे, सीमा पाटील, प्रवीण पाटील, मनोज पाटील, सुदर्शन पवार, राहुल पाटील, प्रदीप पाटील, खुशाल पाटील यांच्यासह शिक्षक व संबंधित उपस्थित होते.

विद्यार्थ्यांच्या आरोग्याच्या दृष्टीने अत्यंत उपयुक्त ठरणाऱ्या या उपक्रमाचे पालक, शिक्षक आणि ग्रामस्थांकडून कौतुक करण्यात आले. जायन्ट्स सप्ताहाच्या माध्यमातून सामाजिक सेवा, आरोग्य जागृती आणि विद्यार्थ्यांच्या सर्वांगीण विकासाला चालना देणारे विविध उपक्रम राबविले जात असल्याने जायन्ट्स ग्रुपच्या या सामाजिक कार्याचे सर्वत्र स्वागत होत आहे.

गणेशोत्सवाच्या पार्श्वभूमीवर अमळनेर पोलिसांचा दमदार रूट मार्च शहरातील संवेदनशील भागांत पोलिसांचा संचलन; कायदा-सुव्यवस्था अबाधित ठेवण्याचा संदेश

अमळनेर, दि. २३ सप्टेंबर : गणेशोत्सव तसेच अनंत चतुर्दशीच्या पार्श्वभूमीवर अमळनेर शहरातील कायदा व सुव्यवस्था अबाधित राहावी, नागरिकांमध्ये सुरक्षिततेची भावना निर्माण व्हावी आणि आगामी गणेश विसर्जन मिरवणुकीच्या पार्श्वभूमीवर पोलिसांची सज्जता दाखवून देण्यासाठी अमळनेर पोलिसांतर्फे बुधवारी शहरातील विविध संवेदनशील भागांत रूट मार्च काढण्यात आला.

बुधवार, दि. २३ सप्टेंबर २०२६ रोजी सकाळी ११.३० ते दुपारी १२.३० या वेळेत हा रूट मार्च पार पडला. अपर पोलीस अधीक्षक, चाळीसगाव परिमंडळ श्री. अशोक नखाते तसेच उपविभागीय पोलीस अधिकारी, अमळनेर विभाग श्री. विनायक कोते यांच्या उपस्थितीत पोलिसांनी शहरातील विविध भागांत संचलन केले.

रूट मार्चदरम्यान डॉ. बाबासाहेब आंबेडकर चौक, सुभाष चौक, मुख्य बाजारपेठ, तिरंगा चौक, पवन चौक, मंगलादेवी चौक, झामी चौक, आखाडा मकान, कसाली डी.पी., वाडी चौक, पानखिडकी, सराफ बाजार, दगडी दरवाजा, पाचकंदील चौक तसेच गांधलीपुरा पोलीस चौकी या भागांत पोलिसांचे संचलन करण्यात आले.

गणेशोत्सव आणि अनंत चतुर्दशीच्या काळात मोठ्या प्रमाणावर नागरिकांची गर्दी होत असल्याने शहरातील संवेदनशील भागांमध्ये पोलिस बंदोबस्त आणि गस्त वाढविण्यात आली आहे. रूट मार्चच्या माध्यमातून कायदा-सुव्यवस्था राखण्यासाठी पोलीस यंत्रणा पूर्णपणे सज्ज असल्याचा स्पष्ट संदेश देण्यात आला.

या रूट मार्चमध्ये ९ पोलीस अधिकारी, ९५ पोलीस अंमलदार, १ आर.सी.पी. पथक, १ स्ट्रायकिंग फोर्स आणि ११८ होमगार्ड अशा मोठ्या पोलीस फौजफाट्याने सहभाग घेतला.

गणेश विसर्जन मिरवणुका शांततेत आणि उत्साहपूर्ण वातावरणात पार पडाव्यात, यासाठी अमळनेर पोलिसांकडून विशेष नियोजन करण्यात आले असून नागरिकांनीही उत्सव काळात प्रशासनास सहकार्य करून शांतता, सलोखा आणि सामाजिक सौहार्द कायम ठेवावे, असे आवाहन पोलिसांकडून करण्यात आले आहे.

संविधानिक हक्कांसाठी उपवर्गीकरणाच्या विरोधातील जनआक्रोश महामोर्चा यशस्वी करा मुकुंद सपकाळे यांचे आवाहन; बैठकीत मोर्चाच्या नियोजनावर सविस्तर चर्चा

अमळनेर : अनुसूचित जाती आरक्षणातील उपवर्गीकरण हे न्याय्य हक्कांच्या विरोधात असून, संविधानिक हक्कांच्या रक्षणासाठी दिनांक ४ ऑक्टोबर रोजी आयोजित करण्यात आलेला उपवर्गीकरण विरोधी जनआक्रोश महामोर्चा मोठ्या संख्येने उपस्थित राहून यशस्वी करण्याचे आवाहन मुकुंद सपकाळे यांनी केले.

महामोर्चाच्या नियोजनासंदर्भात आयोजित बैठकीत उपस्थित कार्यकर्ते व पदाधिकाऱ्यांनी विविध सूचना मांडत मोर्चाच्या व्यापक आयोजनाबाबत चर्चा केली. समाजाच्या संविधानिक हक्कांच्या संरक्षणासाठी एकजुटीने सहभागी होण्याचे आवाहन यावेळी करण्यात आले.

बैठकीत प्रमोद इंगळे, सतिश गायकवाड, भारती रंधे, संध्या तायडे, प्रतिभा शिरसाठ, मनोहर लोखंडे, जगदीश सपकाळे, रतन जोहरे, राजेंद्र सोनवणे, युवराज नरवाडे, भीमराव अडकमोल यांनी मोर्चाच्या नियोजनासंदर्भात महत्त्वपूर्ण सूचना केल्या.

तसेच भैय्या सपकाळे, नारायण सोनवणे, यशवंत घोडेस्वार, आनंदा तायडे, राजू सपकाळे, अरुण वाघ, नीलू इंगळे, अजय इंगळे, राजुभाऊ साळुंके, रोशन महाले, संजय सोनवणे, जयपाल धुरंधर यांनी आपली मनोगते व्यक्त केली.

संविधानिक हक्कांच्या संरक्षणासाठी आयोजित या जनआक्रोश महामोर्चात समाजबांधवांनी मोठ्या संख्येने सहभागी होऊन आपली एकजूट दाखवावी, असे आवाहन बैठकीत करण्यात आले.

महिला व विद्यार्थ्यांसाठी मोफत संगणक प्रशिक्षण अभियानाचा दणदणीत शुभारंभ डीएल सोशल फाउंडेशनच्या ‘संगणक प्रशिक्षण अभियान–२०२६’ला उत्स्फूर्त प्रतिसाद; पहिल्या बॅचला सुरुवात

अमळनेर, दि. २१ सप्टेंबर २०२६ :

डिजिटल युगात ज्ञानासोबतच संगणक व तंत्रज्ञानाचे कौशल्य आत्मसात करणे ही काळाची गरज बनली आहे. विशेषतः महिला व विद्यार्थ्यांना डिजिटलदृष्ट्या सक्षम करून त्यांच्यासाठी शिक्षण, रोजगार व स्वयंरोजगाराच्या नव्या संधींची दारे खुली करण्याच्या उद्देशाने डीएल सोशल फाउंडेशनच्या वतीने सुरू करण्यात आलेल्या ‘संगणक प्रशिक्षण अभियान–२०२६’ अंतर्गत पहिल्या बॅचचा शुभारंभ उत्साहपूर्ण वातावरणात करण्यात आला.

या प्रशिक्षण अभियानाचा शुभारंभ संस्थेच्या संचालक सौ. भावना समाधान मैराळे यांच्या हस्ते फीत कापून करण्यात आला. यावेळी प्रशिक्षणार्थी महिला, संस्थेचे पदाधिकारी, सहकारी तसेच प्रशिक्षणाशी संबंधित मान्यवर उपस्थित होते.

या अभियानाच्या पहिल्या बॅचमध्ये १० प्रशिक्षणार्थी सहभागी झाले असून, त्यांना संगणकाचे मूलभूत ज्ञान तसेच आधुनिक डिजिटल तंत्रज्ञानाशी संबंधित विविध बाबींचे प्रात्यक्षिक प्रशिक्षण दिले जाणार आहे. यामध्ये एमएस वर्ड, एक्सेल, पॉवरपॉईंट, मराठी व इंग्रजी टायपिंग, इंटरनेट व ऑनलाइन सेवा, ई-मेल, डिजिटल व्यवहार तसेच सायबर सुरक्षा यांसारख्या महत्त्वपूर्ण विषयांचा समावेश आहे.

डिजिटल कौशल्यातून स्वावलंबनाकडे वाटचाल

आजच्या स्पर्धात्मक युगात संगणकाचे ज्ञान हे केवळ शिक्षणापुरते मर्यादित राहिलेले नसून रोजगार, व्यवसाय, ऑनलाइन सेवा आणि दैनंदिन व्यवहारांसाठी अत्यावश्यक कौशल्य बनले आहे. विशेषतः महिलांनी डिजिटल कौशल्य आत्मसात केल्यास त्यांना घरबसल्या विविध कामांच्या तसेच रोजगार व स्वयंरोजगाराच्या संधींचा लाभ घेता येऊ शकतो. हीच गरज लक्षात घेऊन डीएल सोशल फाउंडेशनने महिला व विद्यार्थ्यांसाठी मोफत संगणक प्रशिक्षणाचा उपक्रम सुरू केला आहे.

‘डिजिटल कौशल्याचा नियमित सराव करा’ – भावना समाधान मैराळे

यावेळी मार्गदर्शन करताना संस्थेच्या संचालक सौ. भावना समाधान मैराळे यांनी सर्व प्रशिक्षणार्थींना शुभेच्छा देत संगणक प्रशिक्षणाचा नियमित सराव करण्याचे आवाहन केले. डिजिटल कौशल्याचा उपयोग केवळ प्रमाणपत्र मिळविण्यासाठी न करता शिक्षण, रोजगार, व्यवसाय आणि स्वावलंबनासाठी प्रत्यक्ष जीवनात करण्याचे त्यांनी सांगितले.

“ज्ञान, कौशल्य आणि डिजिटल सक्षमीकरणाच्या माध्यमातून महिला व विद्यार्थ्यांना अधिक सक्षम बनवणे” हा या अभियानाचा प्रमुख उद्देश असल्याचे संस्थेच्या वतीने सांगण्यात आले.

येथे होणार प्रशिक्षण

या मोफत संगणक प्रशिक्षण अभियानाचे आयोजन मा. गायत्री कॉम्प्युटर, मराठा मंगल कार्यालयाजवळ, अमळनेर येथे करण्यात आले आहे. महिला व विद्यार्थ्यांना डिजिटल युगातील आवश्यक कौशल्ये मोफत उपलब्ध करून देणाऱ्या या उपक्रमामुळे अमळनेर परिसरातील युवक-युवती व महिलांना निश्चितच नवे व्यासपीठ मिळणार आहे.

राणी लक्ष्मीबाई महाविद्यालयात सामाजिक न्याय विभागाची कार्यशाळा विद्यार्थ्यांना स्वाधार योजना व विविध शिष्यवृत्ती योजनांची सविस्तर माहिती

अमळनेर | पारोळा : महाराष्ट्र शासनाच्या सामाजिक न्याय व विशेष सहाय्य विभाग, समाजकल्याण कार्यालय जळगाव यांच्या वतीने राणी लक्ष्मीबाई महाविद्यालयात विद्यार्थ्यांसाठी सामाजिक न्याय विभागाच्या विविध योजना व शिष्यवृत्ती योजनांबाबत जनजागृतीपर कार्यशाळेचे आयोजन करण्यात आले. या कार्यशाळेत विद्यार्थ्यांना शिक्षणासाठी शासनामार्फत राबविण्यात येणाऱ्या विविध योजनांची सविस्तर माहिती देण्यात आली.

कार्यशाळेदरम्यान विभागाच्या अधिकाऱ्यांनी अनुसूचित जाती व नवबौद्ध प्रवर्गातील विद्यार्थ्यांसाठी भारतरत्न डॉ. बाबासाहेब आंबेडकर स्वाधार योजनेची सविस्तर माहिती दिली. शिक्षण घेत असताना विद्यार्थ्यांना भोजन, निवास, शैक्षणिक साहित्य, निर्वाह भत्ता तसेच इतर आवश्यक सोयी-सुविधांसाठी या योजनेअंतर्गत रुपये ३८,०००/- ते ६०,०००/- पर्यंत आर्थिक सहाय्य उपलब्ध करून दिले जाते, अशी माहिती देण्यात आली.

यासोबतच विद्यार्थ्यांना शासनाच्या विविध शिष्यवृत्ती योजना, विशेष शिष्यवृत्ती योजना तसेच विद्यार्थ्यांच्या शैक्षणिक प्रगतीसाठी उपलब्ध असलेल्या इतर योजनांबाबत सविस्तर मार्गदर्शन करण्यात आले. विद्यार्थ्यांनी या योजनांचा लाभ घेण्यासाठी आवश्यक कागदपत्रे, अर्ज प्रक्रिया, पात्रता निकष आणि योजनेचा उद्देश याबाबतही कार्यशाळेत विस्तृत माहिती देण्यात आली.

कार्यक्रमाच्या अध्यक्षस्थानी महाविद्यालयाचे प्राचार्य डॉ. व्ही. आर. पाटील होते. यावेळी कनिष्ठ महाविद्यालयाच्या उपप्राचार्य डॉ. वंदना पाटील मॅडम, कनिष्ठ महाविद्यालयाचे शिष्यवृत्ती नोडल ऑफिसर डॉ. ईश्वर पाटील, वरिष्ठ महाविद्यालयाचे शिष्यवृत्ती नोडल ऑफिसर प्रा. डॉ. संभाजी सावंत, तसेच श्री. पी. पी. पाटील, प्रा. आर. बी. पाटील यांची प्रमुख उपस्थिती होती.

सामाजिक न्याय विभाग जळगाव यांच्या वतीने पारोळा तालुका समन्वयक श्री आक्रम मुजावर, अमळनेर तालुका समन्वयक श्री नितीन भोई आणि एरंडोल तालुका समन्वयक श्री शांताराम हटकर यांनी विद्यार्थ्यांना मार्गदर्शन केले. यावेळी त्यांनी स्वाधार योजना, विशेष शिष्यवृत्ती योजना तसेच विद्यार्थ्यांसाठी शासनामार्फत राबविण्यात येणाऱ्या विविध योजनांची अत्यंत सविस्तर व सोप्या पद्धतीने माहिती दिली. विद्यार्थ्यांच्या मनातील विविध प्रश्न व शंकांचे निरसनही यावेळी करण्यात आले.

कार्यक्रमाचे सूत्रसंचालन व प्रास्ताविक शिष्यवृत्ती वरिष्ठ विभागाचे कामकाज करणारे श्री प्रसाद पाटील यांनी केले. तर कनिष्ठ विभागाचे शिष्यवृत्ती कामकाज करणारे श्री गणेश खैरनार यांनी उपस्थितांचे आभार मानले.

कार्यक्रमाच्या यशस्वी आयोजनासाठी वरिष्ठ व कनिष्ठ महाविद्यालयातील प्राध्यापक वर्ग तसेच शिक्षकेतर कर्मचारी श्री चंद्रकांत निकम व सुधाकर गजरे यांच्यासह सर्व शिक्षकेतर बंधू-भगिनींचे अनमोल सहकार्य लाभले.

विद्यार्थ्यांना शासनाच्या विविध शैक्षणिक योजनांची थेट आणि सविस्तर माहिती मिळाल्याने ही कार्यशाळा विद्यार्थ्यांसाठी अत्यंत उपयुक्त व मार्गदर्शक ठरली.

साने गुरुजी कन्या हायस्कूलमध्ये विविध स्पर्धांनी हिंदी सप्ताह उत्साहात साजरा

अमळनेर : साने गुरुजी कन्या हायस्कूलमध्ये हिंदी दिवसाचे औचित्य साधून संपूर्ण सप्ताह विविध शैक्षणिक उपक्रम व स्पर्धांनी उत्साहपूर्ण वातावरणात साजरा करण्यात आला. हिंदी भाषेचा प्रचार, प्रसार तसेच विद्यार्थिनींमध्ये हिंदी भाषेविषयी आवड निर्माण व्हावी, या उद्देशाने हिंदी निबंध स्पर्धा, वक्तृत्व स्पर्धा आणि हिंदी सामान्य ज्ञान स्पर्धा अशा विविध स्पर्धांचे आयोजन करण्यात आले.

हिंदी सप्ताहाच्या समारोपप्रसंगी दिनांक २१ सप्टेंबर २०२६, सोमवार रोजी वक्तृत्व स्पर्धेचे आयोजन करण्यात आले. कार्यक्रमाच्या अध्यक्षस्थानी संस्थेचे सचिव माननीय श्री. दादासाहेब संदीप घोरपडे होते. कार्यक्रमाच्या प्रारंभी व्यासपीठावरील मान्यवरांच्या हस्ते प्रतिमापूजन करण्यात आले.

कार्यक्रमाचे प्रास्ताविक माननीय श्रीमती अनिता बोरसे मॅडम यांनी केले. आपल्या प्रास्ताविकपर भाषणात त्यांनी स्पर्धेत उत्स्फूर्तपणे सहभागी झालेल्या विद्यार्थिनींचे कौतुक केले. “तुम्ही या स्पर्धांमध्ये सहभागी होऊन खऱ्या अर्थाने हिंदी भाषेचा प्रचार व प्रसार करत आहात आणि हिंदी भाषेचा गौरव वाढवत आहात,” असे त्यांनी सांगितले.

वक्तृत्व स्पर्धेत विद्यार्थिनींनी हिंदी भाषेतील आपले प्रभावी वक्तृत्व सादर करत उपस्थितांची दाद मिळवली. स्पर्धेत प्रथम क्रमांक – कल्याणी पाटील (१० वी-अ), द्वितीय क्रमांक – दिव्यानी पाटील (१० वी-अ), तृतीय क्रमांक – पूजा पाटील (१० वी-अ) तर उत्तेजनार्थ – अक्षरा साळुंखे (८ वी-अ) यांनी यश संपादन केले. विजेत्या विद्यार्थिनींचा मान्यवरांच्या हस्ते सत्कार करून त्यांचे अभिनंदन करण्यात आले.

याच कार्यक्रमात तालुकास्तरीय बुद्धिबळ स्पर्धेत तालुक्यातून प्रथम क्रमांक मिळविल्याबद्दल दृष्टी चौधरी हिचाही अध्यक्षांच्या हस्ते सत्कार करण्यात आला. दृष्टी चौधरी हिला श्री. मुकेश पाटील सर व श्री. आर. एम. देशमुख सर यांचे मार्गदर्शन लाभले.

अध्यक्षीय भाषणात संस्थेचे सचिव दादासाहेब श्री. संदीप घोरपडे यांनी विद्यार्थिनींना मार्गदर्शन करताना, “तुम्ही प्रत्येक भाषा शिका आणि ती समजून घ्या. भाषा शिकल्याने ज्ञानामध्ये वृद्धी होत असते,” असे प्रतिपादन केले. हिंदी सप्ताहादरम्यान संपूर्ण आठवडाभर विविध उपक्रम व स्पर्धांचे आयोजन केल्याबद्दल त्यांनी विद्यार्थिनी तसेच हिंदी शिक्षकांचे मनापासून कौतुक केले. “खऱ्या अर्थाने तुम्ही हिंदी भाषेचा प्रचार आणि प्रसार करण्याचे कार्य करत आहात,” असेही त्यांनी नमूद केले.

या उपक्रमास संस्थेचे अध्यक्ष आबासाहेब श्री. हेमकांत पाटील तसेच संचालक मंडळाने शुभेच्छा दिल्या.

संपूर्ण हिंदी सप्ताहाचे आयोजन हिंदी शिक्षक श्री. दिलीप पाटील सर यांनी केले. कार्यक्रमाचे सूत्रसंचालन श्री. दिलीप पाटील सर यांनी केले, तर श्री. मुकेश पाटील सर यांनी उपस्थितांचे आभार मानले.

विद्यार्थिनींचा उत्स्फूर्त सहभाग, विविध स्पर्धांमधून दिसून आलेले त्यांचे भाषिक कौशल्य आणि हिंदी भाषेविषयी निर्माण झालेली आस्था यामुळे साने गुरुजी कन्या हायस्कूलमध्ये साजरा झालेला हिंदी सप्ताह संस्मरणीय ठरला.

अमळनेर तालुकास्तरीय शालेय कुस्ती स्पर्धेत १२० मल्लांचा सहभाग कुस्तीच्या आखाड्यात रंगला चुरशीचा थरार; विजयी मल्लांना पुढील स्पर्धेसाठी शुभेच्छा

अमळनेर : महाराष्ट्र क्रीडा व युवक सेवा संचालनालय, पुणे, जिल्हा क्रीडा अधिकारी कार्यालय, जळगाव तसेच पंचायत समिती शिक्षण विभाग, अमळनेर यांच्या संयुक्त विद्यमाने आयोजित शासकीय अमळनेर तालुकास्तरीय शालेय कुस्ती स्पर्धा तालुका क्रीडा संकुल येथे मोठ्या उत्साहात आणि जल्लोषपूर्ण वातावरणात संपन्न झाली. कुस्तीच्या आखाड्यात विविध शाळा व ज्युनिअर कॉलेजमधील मल्लांनी आपले डावपेच आणि ताकद पणाला लावत चुरशीची लढत दिल्याने स्पर्धेत कुस्त्यांचा थरार अनुभवायला मिळाला.

अमळनेर तालुक्यातील विविध शाळा तसेच ज्युनिअर कॉलेजमधील १४, १७ व १९ वर्षे वयोगटातील मुले व मुली अशा एकूण १२० मल्लांनी या स्पर्धेत उत्स्फूर्त सहभाग नोंदविला. प्रत्येक कुस्तीमध्ये मल्लांनी उत्कृष्ट कौशल्याचे प्रदर्शन करत विजयासाठी जोरदार झुंज दिली.

स्पर्धेच्या उद्घाटनप्रसंगी अमळनेर पोलीस विभागाच्या पीएसआय कविता ठाणगे मॅडम प्रमुख उद्घाटक म्हणून उपस्थित होत्या. तर प्रमुख पाहुणे म्हणून अमळनेर कुस्ती महासंघाचे श्री. बाळू भाऊ पाटील, माजी नगरसेवक श्री. प्रताप आबा पाटील, दामिनी पोलीस विभाग प्रमुख नम्रता जरे मॅडम, श्री. संजय पाटील भुतबापु, श्री. संजय भिला पाटील पैलवान, क्रीडा अध्यक्ष श्री. एस. पी. वाघ यांची उपस्थिती लाभली.

मान्यवरांच्या हस्ते प्रतिमापूजन करून तसेच श्रीफळ फोडून स्पर्धेचा शुभारंभ करण्यात आला. यावेळी उपस्थित मान्यवरांनी मल्लांना शुभेच्छा देत खेळाडूंनी शिस्त, मेहनत, जिद्द आणि खिलाडूवृत्ती जोपासण्याचे आवाहन केले.

स्पर्धेतील कुस्त्यांचे पंच म्हणून श्री. महेश माळी यांनी जबाबदारी सांभाळली. तसेच समितीचे सदस्य श्री. के. आर. बाविस्कर, प्रा. प्रितेश तुरणकर, श्री. बापूराव सांगोरे, आर. ए. घुगे, श्री. स्वप्नील पाटील, श्री. गोकुळ बोरसे यांनी स्पर्धेचे नियोजन व आयोजन सुरळीत पार पाडण्यासाठी सहकार्य केले.

या प्रसंगी श्री. एच. आर. बाविस्कर सर, श्री. अरविंद मोरे सर, श्री. रविंद्र भोई, श्री. योगराज चौधरी, श्री. पवन शिंपी, श्री. भावेश कोळी यांचीही उपस्थिती होती.

तालुकास्तरीय स्पर्धेत उत्कृष्ट कामगिरी करून विजयी ठरलेल्या अमळनेर तालुक्यातील सर्व पहेलवानांचे उपस्थित मान्यवरांनी अभिनंदन केले. तसेच आगामी स्पर्धांसाठी त्यांना मनःपूर्वक शुभेच्छा देण्यात आल्या.

एकूण १२० मल्लांचा सहभाग, आखाड्यातील चुरशीच्या लढती आणि खेळाडूंच्या दमदार कामगिरीमुळे अमळनेर तालुकास्तरीय शालेय कुस्ती स्पर्धेला कुस्तीप्रेमींचा उत्स्फूर्त प्रतिसाद मिळाला.

पर्यावरण संवर्धनाचा संदेश देत जी. एस. हायस्कूलमध्ये वृक्षारोपण

अमळनेर : नवलभाऊ प्रतिष्ठान संचलित शिक्षणशास्त्र महाविद्यालय, अमळनेर येथील आंतरवासिता अंतर्गत प्रशिक्षणार्थी शिक्षक विद्यार्थ्यांनी प्राध्यापक डॉ. सुनंदा तायडे यांच्या मार्गदर्शनाखाली अमळनेर शहरातील जी. एस. हायस्कूलमध्ये पर्यावरण संवर्धनाबाबत जनजागृती केली. यावेळी विद्यार्थ्यांना वृक्षांचे महत्त्व, पर्यावरणाचे संरक्षण तसेच वाढत्या प्रदूषणाचे दुष्परिणाम याबाबत मार्गदर्शन करण्यात आले.

यानंतर प्रशिक्षणार्थी शिक्षक विद्याथी प्रतीक्षा पाटील,निकिता पाटील,रुचिका पाटील,नेहा पाटील,नूतन पाटील,सोनल पाटील,प्रज्ञा पाटील यांच्या पुढाकाराने वृक्षारोपणाचा उपक्रम राबविण्यात आला. विद्यार्थ्यांनी उत्स्फूर्त सहभाग घेत पर्यावरण संवर्धनाचा संदेश दिला.

या प्रसंगी जी. एस. हायस्कूलचे मुख्याध्यापक श्री. विनोद कदम तसेच शिक्षक आर जे पाटील उपस्थित होते. पर्यावरणाचे संतुलन राखण्यासाठी प्रत्येकाने वृक्षलागवड व वृक्षसंवर्धनाची जबाबदारी स्वीकारावी, असा संदेश या उपक्रमातून देण्यात आला.

‌‘मंगल‌’ महाजागरातून श्री मंगळ जन्मोत्सव सोहळा साजरा श्री मंगळग्रह मंदिरात जमला भक्तीचा सागर; धार्मिक विधींमुळे दिवसभर चैतन्य

‌

अमळनेर : येथील श्री मंगळग्रह मंदिरात भाद्रपद शुद्ध दशमी अर्थात सोमवार, दि. २१ सप्टेंबर रोजी पहाटेपासून सुरू झालेला ‌‘मंगल‌’ महाजागर भाविकांनी दिवसभर अनुभवल्याचे पाहावयास मिळाले. निमित्त होते मंगळग्रह सेवा संस्थेतर्फे आयोजित परम पवित्र श्री मंगळ जन्मोत्सव सोहळ्याचे. श्री मंगळग्रह देवांची विश्वातील एकमात्र स्वयंभू मूर्ती असलेल्या श्री मंगळग्रह मंदिरात दरवर्षीप्रमाणे यंदाही अलौकिक श्री मंगळ जन्मोत्सव सोहळा अत्यंत चैतन्यमय वातावरणात भक्तिभावाने विधीवत साजरा झाला. 

पहाटे ४ वाजता श्री मंगळ सोहळ्याचे विशेष मानकरी जिल्हाधिकारी मा. श्री. रोहनजी घुगे यांच्या शुभ हस्ते श्री मंगळग्रह देवांच्या मूर्तीवर वैशिष्ट्यपूर्ण पंचामृत अभिषेकाने या सोहळ्याची सुरूवात झाली. सकाळी ६ वाजता दरवर्षीच्या प्रथेप्रमाणे ध्वजाचे मानकरी योगेश पांडव यांनी परिवारासह वाद्यवृंदाच्या गजरात नवे ध्वज मंदिरात आणले. जिल्हाधिकारी श्री. घुगे व मंगळग्रह सेवा संस्थेचे अध्यक्ष डॉ. डिगंबर महाले, उपाध्यक्ष एस. एन. पाटील, सचिव सुरेश बाविस्कर, सहसचिव दिलीप बहिरम, विश्वस्त अनिल अहिरराव, डी. ए. सोनवणे, आनंद महाले, फुलराणी ग्रुपच्या महिला भगिनी, व्हॉईस ऑफ मीडियाचे पदाधिकारी, मंगल सेवेकरी सौ. आशाताई महाले, प्रकाश मेखा, व्ही. व्ही. कुलकर्णी, ए. डी. भदाणे, पुषंद ढाके, आशिष चौधरी यांच्यासह सेवेकऱ्यांनी त्यांचे मंदिराच्या मुख्य प्रवेशद्वाराजवळ स्वागत केले. श्री. घुगे यांनी ध्वजाचे व ध्वजाचे मानकरी असलेल्या पांडव दाम्पत्याचे औक्षण केले. याप्रसंगी संबळ वादन आणि भेरच्या आवाजाने परिसरात मंगलमय वातावरण निर्मिती झाली. साडेसहाच्या सुमारास फुलांनी सजवलेल्या पाळण्यात श्री मंगळग्रह देवांचा प्रतिकात्मक जन्मोत्सव साजरा झाला. त्यानंतर सामूहिकरित्या देवांचा पाळणा म्हटला गेला. ७ वाजता ध्वजपूजन होऊन विधीवतरित्या कळसावरील व मुख्य प्रवेशद्वारावरील जुने ध्वज उतरवून नवे ध्वज तेथे लावण्यात आले. माजी सैनिक असलेल्या मंदिराच्या सुरक्षारक्षकांनी ध्वजाला मानवंदना दिली. ८ वाजता श्री मंगळग्रह देवांची महाआरती होऊन ८.३० वाजता संभाजीनगर येथील किशोर व श्रीकांत या उपाध्याय बंधूंनी देवांना ५६ भोगांचा महाप्रसाद अर्पण केला. यावेळी प्रांताधिकारी मयूर भंगाळे उपस्थित होते. उपस्थित सर्वच भाविकांनी दिवसभर श्री मंगळग्रह देवांचा पाळणा हलवत दर्शनाचा पुण्यलाभ घेतला. त्यानंतर पुण्यातील वेंकीज कंपनीतर्फे भाविकांना मोतीचूर लाडूंचा प्रसाद वाटप सुरू झाले, ते रात्री उशिरापर्यंत सुरू राहिले. 

५६ फळांचा भोग

अमळनेर येथील निर्गुण फूल भांडारचे संचालक वाल्मीक पाटील यांनी श्री मंगळ जन्मोत्सवानिमित्त श्री मंगळग्रह देवांना देशी-विदेशी ५६ फळांचा भोग अर्पण केला. यामध्ये आंबा, पपई, जांभूळ, केळी, कलिंगड, बोर, सफरचंद, खरबूज, चक्री लिंबू (ग्रेपफ्रूट), संत्री, चिकू, म्हाळुंग, मोसंबी, अननस, कागदी लिंबू, द्राक्ष, नारळ, लिंबू , पेरू, सीताफळ, फणस, डाळिंब, रामफळ, हनुमानफळ (ग्रॅव्हिओला), आवळा, पिस्ता, आटकी (शहतूत, तुती), करवंद, अंजीर (ड्राय), अळूचाळू (प्लम), चिंच, खजूर, आडू (पीच), अंजीर, स्ट्रॉबेरी, जर्दाळू (ॲप्रिकॉट), अळू, ब्ल्यूबेरी, चेरी, काजू (काजूबोफ्लड), रॅस्पबेरी, किवी, आक्रोड, ब्लॅकबेरी, ड्रॅगनफ्रूट, बदाम, क्रेनबेरी, पॅशनफ्रूट, एवोकॅडो, लिची, बेल (बेलफळ), स्टारफ्रूट (करमळ), मंगोस्टीन, कवळ, उंबर, शेवगा (रायआवळा) या देशी-विदेशी फळांचा समावेश होता. दरवर्षी विविध खाद्यपदार्थांचा देवाला ५६ भोगाचा नैवेद्य दिला जातो. मात्र, यावर्षी यासोबतच ५६ विविध फळांचाही नैवेद्य देण्याची सुप्रथा सुरू झाली.

देशी-विदेशी फुलांची मयूरपंखी मनमोहक सजावट

श्री मंगळ जन्मोत्सवानिमित्त श्री मंगळग्रह मंदिराच्या ओट्यावर सजविण्यात आलेल्या पाळण्याच्या अवतीभोवती देशी-विदेशी फुलांची मनमोहक सजावट करण्यात आली होती. यात ऑर्किड, सन्स फ्लॉवर्स, जर्बिरा, गुलाब पिचकलर, टचगुलाब, चायनीज गुलाब, गॅलडो काडी सात प्रकारची, ३ प्रकारची शेवंती, निषिगंधा, जिप्सी, निलियम, लिली, कॅला लिली, झेंडू शेवंती, आस्टर, कामिनी, डिशनरी, सोफ्लगाफूल, कटपत्ता, सूर्यपत्ता, पामपत्ता, ट्यूलीप, नंदनवन पक्षी, डॅफोडिल्स, अंथरियम, चॉकलेट कॉसमॉस आदी फुलांच्या माध्यमातून करण्यात आलेली मयूरपंखी सजावट भाविकांचे आकर्षण बनली होती.

श्री मंगळ जन्मोत्सव लाइव्ह

मंगळग्रह सेवा संस्थेतर्फे श्री मंगळ जन्मोत्सवानिमित्त श्री मंगळग्रह मंदिरात आयोजित सर्व धार्मिक विधींचे दिवसभर जगभरात थेट प्रक्षेपण करण्यात आले. मंगल तंत्रज्ञ आशिष चौधरी यांनी या धार्मिक विधींचे सोशल मीडियाच्या माध्यमातून जगभरातील भाविकांना घरी बसून थेट प्रक्षेपण घडविले.  

आधार आरोग्य प्रकल्पांतर्गत आरोग्य मित्र प्रशिक्षण संपन्न 

अमळनेर : व्होल्कर्ट फाउंडेशन मुंबई यांच्या सहाय्याने आधार संस्था अमळनेर शहरालगच्या वस्त्यांमध्ये आधार आरोग्य प्रकल्प ची नुकती सुरुवात झाली असून प्रकल्पांतर्गत कार्यरत आरोग्य मित्र व ज्यांच्या सहभागातून प्रकल्प कार्यान्वित होणार आहे त्या आशा वर्कर आणि अंगणवाडी सेविका, ए एन एम यांच्याकरिता प्रशिक्षण कार्यक्रम आयोजित करण्यात आले होते. माता बाल आरोग्य विषयी सविस्तर माहिती देण्यात आली ज्यात गरोदरपणात घ्यावयाची काळजी, 

गरोदरपणात करावयाचा तपासण्या , बाळंतपणानंतरची चाळीस दिवस, जोखमीच्या गरोदर माता लक्षणे आणि व्यवस्थापन, यावर महिलांना प्रशिक्षण देण्यात आले. 

कार्यक्रमाचे प्रशिक्षक, साधन व्यक्ती डॉ. आम्रपाली मुरार व ज्ञानेश्वर सोनवणे जपाईगो त्यांनी घेतले. 

याप्रसंगी संस्थेचे अध्यक्ष डॉ. भारती पाटील, यांनी प्रास्ताविक आणि प्रशिक्षणाची उपयुक्तता सांगितले,कार्यकारी संचालक रेणू प्रसाद यांची उपस्थिती होती.

 पूर्वी चौधरी, मुरलीधर बिरारी, दीपक संदानशिव, आनंद पगारे उपस्थित होते. कार्यक्रमाचे सूत्रसंचालन प्रकल्प समन्वयक दीप्ती गायकवाड यांनी केले तर आभार ज्योती कोळी यांनी व्यक्त केले.

दीप्ती गायकवाड 

प्रकल्प समन्वयक