महापुराच्या संकटात रोटरीचा मदतीचा हात; पूरग्रस्तांना फूड पॅकेट व कपड्यांचे वाटप
नदीकाठ व गांधलीपुरा परिसरातील सुमारे ६० गरजू नागरिकांना तातडीची मदत; “संकटाच्या काळात समाजाच्या पाठीशी उभे राहणे हीच रोटरीची खरी ओळख” – रोटे. महेश पाटील
अमळनेर | प्रतिनिधी
दि. ३१ जुलै रोजी झालेल्या मुसळधार पावसामुळे अमळनेर शहरासह परिसरातील अनेक भाग जलमय झाले. अनेकांच्या घरांमध्ये पाणी शिरल्याने नागरिकांचे मोठ्या प्रमाणावर हाल झाले. या नैसर्गिक आपत्तीच्या पार्श्वभूमीवर गरजू व संकटग्रस्त कुटुंबांना तातडीने दिलासा देण्यासाठी रोटरी क्लब अमळनेरने सामाजिक बांधिलकी जपत मदतीचा हात पुढे केला.
दि. २ व ३ ऑगस्ट २०२६ रोजी रोटरी क्लबच्या वतीने नदीकाठ व गांधलीपुरा परिसरातील सुमारे ६० गरजू नागरिकांना फूड पॅकेटचे वितरण करण्यात आले. याशिवाय लहान बालकांपासून ते वयोवृद्धांपर्यंत गरजूंसाठी कपड्यांचेही वाटप करण्यात आले. संकटाच्या काळात तातडीने मदत पोहोचविल्याने अनेक कुटुंबांना मोठा दिलासा मिळाला.
या सेवाभावी उपक्रमावेळी क्लबचे अध्यक्ष रोटे. महेश पाटील, चेलाराम सैनानी, विजय माहेश्वरी, अभिजीत भांडारकर, डॉ. राहुल मुठे, प्रीतपाल सिंग बग्गा, रोहित सिंघवी, राजेश बेदमुथा, कीर्ती कुमार कोठारी, पूनम कोचर, सौरभ जैन, प्रतिक जैन, देवेंद्र कोठारी, प्रतीक खंडेरिया, विनोद थोरात, सचिन चोपडा, किरण कुंभार तसेच अन्य रोटरी सभासद उपस्थित होते.
या मदतकार्याचे नियोजन अभिजीत भांडारकर, देवेंद्र कोठारी व रोनक संकलेचा यांच्या मार्गदर्शनाखाली करण्यात आले. त्यांच्या नेतृत्वाखाली अत्यंत शिस्तबद्ध व नियोजनबद्ध पद्धतीने फूड पॅकेट व कपड्यांचे वितरण करण्यात आले.
यावेळी बोलताना रोटे. महेश पाटील म्हणाले, “संकटाच्या काळात समाजाच्या पाठीशी ठामपणे उभे राहणे हीच रोटरीची खरी ओळख आहे. गरजूंच्या मदतीसाठी रोटरी क्लब भविष्यातही अशाच प्रकारे सदैव तत्पर राहील.”
वरील वृत्त पी.आर.ओ. मकसूद बोहरी यांनी कळविले आहे.
