स्मार्ट मीटरच्या वाढत्या तक्रारींवर अखिल भारतीय ग्राहक पंचायत आक्रमक; महावितरणला निवेदन देत पारदर्शकतेची जोरदार मागणी दुप्पट-तिप्पट वीज बिलांमुळे ग्राहकांमध्ये संताप; जनजागृतीसाठी कार्यशाळा घेण्याची अतिरिक्त कार्यकारी अभियंत्यांची ग्वाही
अमळनेर | प्रतिनिधी
स्मार्ट मीटर बसविल्यानंतर अनेक ग्राहकांना दुप्पट-तिप्पट वीज बिले येत असल्याच्या वाढत्या तक्रारींच्या पार्श्वभूमीवर अखिल भारतीय ग्राहक पंचायत अमळनेरच्या वतीने महावितरण वीज कंपनी लिमिटेड, अमळनेर उपविभाग-१ चे अतिरिक्त कार्यकारी अभियंता मान. धनंजय धांडे साहेब यांना मंगळवारी (४ ऑगस्ट २०२६) सविस्तर निवेदन सादर करण्यात आले.
निवेदनात नमूद करण्यात आले आहे की, महावितरणकडून सुरू असलेल्या स्मार्ट मीटर बसविण्याच्या प्रक्रियेबाबत नागरिकांमध्ये मोठ्या प्रमाणावर संभ्रम व भीतीचे वातावरण निर्माण झाले आहे. अनेक ठिकाणी जुने मीटर बदलून स्मार्ट मीटर बसविल्यानंतर ग्राहकांना पूर्वीच्या तुलनेत दुप्पट-तिप्पट वीज बिले येत असल्याच्या तक्रारी सातत्याने पुढे येत आहेत. त्यामुळे ग्राहकांमध्ये नाराजीचे वातावरण निर्माण झाले आहे.
ग्राहक संरक्षण कायदा २०१९ तसेच वीज कायदा २०२३ नुसार प्रत्येक ग्राहकाला योग्य माहिती, संपूर्ण पारदर्शकता आणि निवडीचा अधिकार मिळणे अपेक्षित आहे. मात्र स्मार्ट मीटर बसविण्याच्या प्रक्रियेत आवश्यक ती पारदर्शकता दिसून येत नसल्याचा मुद्दा निवेदनातून उपस्थित करण्यात आला.
यावेळी ग्राहक पंचायतने स्मार्ट मीटरबाबत संपूर्ण व वस्तुनिष्ठ माहिती ग्राहकांना देण्यात यावी, मीटरबाबत शंका उपस्थित झाल्यास त्याची तपासणी कोणत्या अधिकृत प्रयोगशाळेत केली जाते याची माहिती पारदर्शकपणे उपलब्ध करून द्यावी, तसेच मीटर अचूक असल्यास त्याचे तांत्रिक फायदे ग्राहकांना प्रत्यक्ष तपासणीद्वारे समजावून सांगावेत, अशी मागणी केली. याशिवाय ग्राहकांच्या संमतीशिवाय जुने मीटर बदलू नयेत आणि स्मार्ट मीटरची सक्ती करू नये, अशीही ठाम भूमिका निवेदनातून मांडण्यात आली.
यावेळी मान. धनंजय धांडे साहेब यांनी ग्राहकांच्या शंका व गैरसमज दूर करण्यासाठी स्मार्ट मीटर विषयावर विशेष कार्यशाळा आयोजित करण्यात येईल. या माध्यमातून ग्राहकांना तांत्रिक माहिती देऊन त्यांच्या सर्व संभ्रमाचे पूर्णपणे निरसन करण्यात येईल, अशी ग्वाही दिली.
याप्रसंगी विजय शुक्ला, मकसूद बोहरी, सुनील वाघ, सतीश देशमुख, नरेंद्र बाळू पाटील, भाऊसाहेब देशमुख, दिलीप सारजे, सुभाष पाटील घोडगावकर उपस्थित होते.
