“घाबरू नका… शासन तुमच्या पाठीशी!” – पूरग्रस्त अमळनेरला मंत्री गिरीष महाजन यांचा दिलासा महापुरानंतर शासनाची तातडीची हालचाल; पूरग्रस्तांना ₹१० हजारांची मदत, पंचनामे व पाणीपुरवठ्यासाठी विशेष निधीची घोषणा

 

अमळनेर (प्रतिनिधी): अमळनेर शहराला महापुराने दिलेल्या तडाख्यानंतर राज्य शासनाने तातडीने मदतीची भूमिका घेतली असून, राज्याचे जलसंपदा मंत्री गिरीष महाजन, पालकमंत्री गुलाबराव पाटील आणि आमदार अनिल पाटील यांनी जिल्हाधिकारी व वरिष्ठ अधिकाऱ्यांसह पूरग्रस्त भागांची प्रत्यक्ष पाहणी केली. यावेळी नागरिकांशी संवाद साधत “घाबरू नका… शासन तुमच्या पाठीशी आहे,” असा दिलासादायक संदेश देत सर्वतोपरी मदतीची ग्वाही दिली.

महापुरामुळे बाधित झालेल्या परिसराची पाहणी करताना नागरिकांच्या अडचणी जाणून घेण्यात आल्या. तसेच नुकसानग्रस्त कुटुंबांना तातडीने दिलासा देण्यासाठी विविध महत्त्वाचे निर्णय जाहीर करण्यात आले.

महत्त्वाचे निर्णय

प्रत्येक पात्र पूरग्रस्त कुटुंबाला तातडीची ₹१०,००० मदत देण्यात येणार.

घर, शेती, जनावरे व इतर झालेल्या नुकसानीचे त्वरित पंचनामे करण्याचे निर्देश.

शहराचा पाणीपुरवठा पूर्ववत करण्यासाठी डीपीडीसीमधून आवश्यक निधी उपलब्ध करून देण्याचे आश्वासन.

पिंपळे नाल्यावरील अतिक्रमणांवर त्वरित कारवाई करण्याचे स्पष्ट निर्देश.

यावेळी कृषी उत्पन्न बाजार समितीतील व्यापारी, पूरग्रस्त नागरिक तसेच अमळनेर तालुका फोटोग्राफर असोसिएशनच्या प्रतिनिधींनी आपल्या अडचणी व मागण्या मंत्र्यांसमोर मांडल्या. शासन त्यांच्या मागण्यांबाबत सकारात्मक भूमिका घेईल, असे आश्वासनही देण्यात आले.

जयनिल फाऊंडेशनच्या कार्याचा गौरव

महापुराच्या भीषण संकटात स्वतःचा जीव धोक्यात घालून अनेक नागरिकांना सुरक्षित स्थळी पोहोचविणे, तसेच लायन्स क्लब, रोटरी क्लब, जैन सोशल ग्रुप आणि पत्रकार संघ यांच्या सहकार्याने पूरग्रस्तांपर्यंत अन्न व पिण्याच्या पाण्याची मदत पोहोचविल्याबद्दल जयनिल फाऊंडेशनचे अध्यक्ष गौतम अनिल पाटील व त्यांच्या संपूर्ण टीमच्या कार्याचे मंत्री गिरीष महाजन यांनी विशेष कौतुक केले.

आमदार अनिल पाटील यांची ग्वाही

यावेळी आमदार अनिल पाटील म्हणाले, “महापुरामुळे अमळनेरकरांवर मोठे संकट आले आहे. शहराचा पाणीपुरवठा पूर्ववत करण्यासह पूरग्रस्तांना शासनाची प्रत्येक योजना आणि मदत वेळेत मिळावी, यासाठी सातत्याने पाठपुरावा सुरू आहे.”

महापुराच्या पार्श्वभूमीवर शासनाने दिलेला तातडीचा दिलासा, मदतीच्या घोषणा आणि पुनर्वसनासाठी सुरू झालेली यंत्रणा यामुळे पूरग्रस्त अमळनेरकरांना मोठा आधार मिळाल्याची भावना नागरिकांनी व्यक्त केली.