अमळनेर (दि. १५ ऑगस्ट) : स्वातंत्र्यदिनाचे औचित्य साधत राष्ट्र सेवा दल, अमळनेरच्या वतीने सालाबादप्रमाणे यंदाही १४ ऑगस्टच्या मध्यरात्री १२.०१ वाजता सुभाष चौक येथे झेंडावंदनाचा कार्यक्रम उत्साहपूर्ण वातावरणात संपन्न झाला. स्वातंत्र्यदिनाच्या पहिल्या क्षणीच राष्ट्रध्वजाला मानवंदना देण्याची ही आगळीवेगळी आणि प्रेरणादायी परंपरा अमळनेर शहरात गेल्या पंचेचाळीस वर्षांपासून राष्ट्र सेवा दलाच्या वतीने जपली जात आहे.
यंदाच्या कार्यक्रमात राष्ट्र सेवा दलाच्या ज्येष्ठ सैनिका कल्पना मोरे यांच्या हस्ते राष्ट्रध्वजाचे ध्वजारोहण करण्यात आले. मध्यरात्रीचा शांत परिसर राष्ट्रगीताच्या स्वरांनी भारावून गेला. उपस्थित नागरिकांनी राष्ट्रध्वजाला मानवंदना देत स्वातंत्र्य, लोकशाही, समता, बंधुता आणि सामाजिक न्यायाच्या मूल्यांप्रती आपली बांधिलकी व्यक्त केली.
स्वातंत्र्याच्या पहिल्या क्षणाचा साक्षीदार होण्यासाठी शहरातील अनेक राष्ट्रप्रेमी नागरिक मध्यरात्री सुभाष चौकात मोठ्या संख्येने उपस्थित होते. राष्ट्र सेवा दलाचे सैनिक, पुरोगामी विचारांच्या विविध संघटनांचे कार्यकर्ते, सामाजिक कार्यकर्ते, विद्यार्थी, ज्येष्ठ नागरिक तसेच अमळनेरकर नागरिकांनी उत्स्फूर्त सहभाग नोंदविला. त्यामुळे संपूर्ण परिसरात देशभक्ती आणि सामाजिक बांधिलकीचे वातावरण निर्माण झाले.
कार्यक्रमाच्या प्रारंभी राष्ट्र सेवा दलाची ऐतिहासिक पार्श्वभूमी, स्वातंत्र्य चळवळीतील योगदान आणि मध्यरात्री झेंडावंदनाच्या परंपरेचे महत्त्व याबाबत गौतम मोरे यांनी प्रास्ताविकात केले. स्वातंत्र्य केवळ राजकीय सत्तांतर नसून सामान्य माणसाला स्वाभिमान, समान संधी, न्याय आणि प्रतिष्ठेने जगण्याचा अधिकार मिळवून देणारी व्यापक संकल्पना आहे, असे त्यांनी स्पष्ट केले.
यानंतर प्रा. अशोक पवार यांनी आजच्या काळातील स्वातंत्र्य आणि देशातील सद्यस्थिती यावर सविस्तर भाष्य केले. संविधानाने दिलेली स्वातंत्र्याची मूल्ये, लोकशाहीची जबाबदारी, सामाजिक समता आणि नागरिकांची भूमिका यांचा संदर्भ देत त्यांनी उपस्थितांशी संवाद साधला. स्वातंत्र्यदिन हा केवळ उत्सवाचा दिवस न राहता आपल्या संविधानिक मूल्यांचे आणि सामाजिक जबाबदारीचे आत्मपरीक्षण करण्याचा दिवस व्हावा, असे त्यांनी सांगितले.स्वातंत्र्याच्या 80 वर्षानंतर शेतीमाला ला भाव,शिक्षण,रोजगार,आरोग्य, सामान संधी यासाठी सुद्धा राज्य आणि केंद्र सरकारे अजून काही करू शकली असती, मात्र अजून खूप पुढे जावे लागेल. प्रत्येकाला स्वातंत्र्याचं महत्व समजून सांगावे लागेल. आपल्या शहरातून देशासाठी सात देशभक्तांनी जीवाचे बलिदान दिले. त्यांना आज स्मरून त्यांना अभिवादन करून, स्वातंत्र दिनाच्या शुभेच्छा देतो.
कार्यक्रमानंतर डॉ. बाबासाहेब आंबेडकर, हुतात्मा चौक, नेताजी सुभाषचंद्र बोस आणि पू साने गुरुजी यांच्या प्रतिमांना पुष्प अर्पण करून अभिवादन करण्यात आले. स्वातंत्र्यलढा, सामाजिक परिवर्तन आणि मानवतावादी विचारांची प्रेरणा देणाऱ्या या महापुरुषांच्या कार्याचे स्मरण करण्यात आले.
त्यानंतर पूज्य साने गुरुजी यांच्या पुतळ्याजवळ ‘खरा तो एकाची धर्म’ हे गीत सामूहिकरित्या सादर करण्यात आले. “खरा तो एकचि धर्म, जगाला प्रेम अर्पावे” या मानवतावादी विचाराने उपस्थित वातावरण अधिक भावपूर्ण झाले. जात, धर्म, पंथ आणि भेदाभेदाच्या पलीकडे जाऊन माणुसकी, प्रेम आणि बंधुभाव जपण्याचा संदेश या गीतातून देण्यात आला.
राष्ट्र सेवा दलाच्या या मध्यरात्रीच्या झेंडावंदनाची परंपरा केवळ ध्वजारोहणापुरती मर्यादित नसून स्वातंत्र्यसैनिकांच्या त्यागाचे स्मरण, संविधानिक मूल्यांची जपणूक आणि लोकशाही-सामाजिक परिवर्तनाच्या चळवळीशी असलेली बांधिलकी व्यक्त करणारी परंपरा म्हणून अमळनेरच्या सार्वजनिक जीवनात महत्त्वाची ठरली आहे.
कार्यक्रमाच्या शेवटी उदय खैरनार यांनी उपस्थितांचे आभार मानले. कार्यक्रम यशस्वी करण्यासाठी भारती गाला, दिलीप सोनवने,डॉ. मिलिंद वैद्य,सुधाकर देशमुख,अमोल येवले, दीपक चव्हाण,शिवाजी महाजन,तुषार संदानशिव,भीमराव संदानशिव, भालचंद्र सनेर,संजय पाटील,अशोक पाटील,धर्मेश निकुंभ, प्रशांत बडगुजर,
आरीफ भाया, विजयेंद्र शिरसाळे, हरिश देशमुख.प्रशान्त चव्हाण आणि मित्र परिवार
आदींनी विशेष सहकार्य केले.
मध्यरात्रीच्या या झेंडावंदनामुळे अमळनेर शहरात स्वातंत्र्यदिनाची सुरुवातच देशभक्ती, सामाजिक समता, संविधानिक मूल्ये आणि मानवतेच्या विचारांनी झाली. गेल्या ४५ वर्षांपासून सुरू असलेली ही परंपरा आगामी पिढ्यांपर्यंत अधिक व्यापक स्वरूपात पोहोचवण्याचा निर्धार यावेळी व्यक्त करण्यात आला.
