शिक्षण, समाजकार्य व महिला सक्षमीकरणातील उल्लेखनीय कार्याचा राष्ट्रीय पातळीवर गौरव डॉ. अर्चना सूर्यवंशी यांना ‘इंडिया प्राइड अवॉर्ड’ प्रदान

अमळनेर | प्रतिनिधी

अमळनेर येथील सूर्या फाउंडेशन तसेच पोदार इंटरनॅशनल स्कूल आणि पाळधी येथील नोबेल इंटरनॅशनल स्कूलच्या संचालिका डॉ. सौ. अर्चना सूर्यवंशी (प्रशांत सूर्यवंशी) यांना शिक्षण, समाजकार्य आणि महिला सक्षमीकरण क्षेत्रातील उल्लेखनीय योगदानाबद्दल प्रतिष्ठेचा *‘इंडिया प्राइड अवॉर्ड’* प्रदान करून सन्मानित करण्यात आले.

जळगाव येथे आयोजित भव्य *‘सुपर मॉम सुपर वुमन 2026 – सीझन 4’* या पुरस्कार सोहळ्यात प्रसिद्ध अभिनेत्री Mahima Chaudhry यांच्या हस्ते हा पुरस्कार प्रदान करण्यात आला. यावेळी जळगावचे आमदार Raju Mama Bhole प्रमुख उपस्थित होते.

दि. ८ मे रोजी जळगाव येथील Hotel President Cottage येथे संपन्न झालेल्या या दिमाखदार सोहळ्याचे आयोजन *आर व्ही एंटरटेनमेंट* यांच्या वतीने करण्यात आले होते. संस्थापक सौ. रूपा शास्त्री आणि मुख्य कार्यकारी अधिकारी डॉ. विजय शास्त्री यांच्या मार्गदर्शनाखाली कार्यक्रम यशस्वीरीत्या पार पडला.

देशभरातील विविध क्षेत्रांत उल्लेखनीय कार्य करणाऱ्या ३९ महिलांचा यावेळी गौरव करण्यात आला. प्रतिकूल परिस्थितीवर मात करत ग्रामीण भागातील विद्यार्थ्यांना आधुनिक, दर्जेदार आणि संस्कारक्षम शिक्षण मिळावे या ध्येयाने डॉ. अर्चना सूर्यवंशी यांनी उभे केलेले कार्य विशेष प्रेरणादायी ठरले आहे.

शैक्षणिक क्षेत्रातील त्यांचे योगदान, समाजहितासाठी केलेले सातत्यपूर्ण कार्य तसेच विद्यार्थ्यांच्या उज्ज्वल भविष्यासाठी असलेली त्यांची तळमळ याची दखल घेत त्यांना हा राष्ट्रीय स्तरावरील सन्मान प्रदान करण्यात आला.

त्यांच्या या यशाबद्दल शाळा परिवार, विद्यार्थी, पालक आणि विविध सामाजिक स्तरांतून अभिनंदनाचा वर्षाव होत आहे.