भाऊराव श्रीपत चव्हाण यांची सामाजिक न्याय विभागाच्या अमळनेर शहराध्यक्षपदी निवड

अमळनेर प्रतिनिधी :

राष्ट्रवादी काँग्रेस पार्टी शरदचंद्र पवार पक्षाच्या सामाजिक न्याय विभागाच्या अमळनेर शहराध्यक्षपदी भाऊराव श्रीपत चव्हाण यांची नियुक्ती करण्यात आली आहे. पक्षाच्या संघटनात्मक कार्यातील योगदानाची दखल घेत त्यांच्यावर ही महत्त्वाची जबाबदारी सोपविण्यात आली.

दिनांक 31 ऑगस्ट 2026 रोजी झालेल्या कार्यक्रमात राष्ट्रवादी काँग्रेस शरदचंद्र पवार पक्षाचे प्रदेशाध्यक्ष पंडितजी कांबळे (मुंबई), सामाजिक न्याय विभागाचे प्रदेश उपाध्यक्ष अरुण धर्माळे, प्रदेश उपाध्यक्ष प्रतिभाताई शिरसाठ, उत्तर महाराष्ट्र अध्यक्ष रमेश बहारे, जळगाव जिल्हाध्यक्ष सुरेश पगारे तसेच जिल्हा सरचिटणीस चंद्रमणी सांगवीकर यांच्या उपस्थितीत ही नियुक्ती करण्यात आली.

यावेळी मान्यवरांनी भाऊराव चव्हाण यांचे अभिनंदन करून पुढील सामाजिक व संघटनात्मक वाटचालीस शुभेच्छा दिल्या. सामाजिक न्याय विभागाच्या माध्यमातून समाजातील वंचित, दुर्बल व उपेक्षित घटकांच्या प्रश्नांसाठी प्रभावीपणे कार्य करत पक्षाची विचारधारा तळागाळापर्यंत पोहोचवावी, अशी अपेक्षा व्यक्त करण्यात आली.

चव्हाण यांच्या निवडीबद्दल अमळनेर तालुकाध्यक्ष डी. एम. पाटील तसेच पक्षाचे ज्येष्ठ नेते व माजी आमदार डॉ. बी.एस.पाटील यांनीही अभिनंदन करून शुभेच्छा दिल्या. त्यांच्या नियुक्तीचे पक्ष पदाधिकारी व कार्यकर्त्यांकडून स्वागत करण्यात येत आहे.

प्रशांत निकम यांच्या वाढदिवसानिमित्त राष्ट्रवादी काँग्रेसमध्ये उत्साहाचे वातावरण! डॉ. बी. एस. पाटील यांच्या हस्ते सत्कार; केक कापून व पुस्तक भेट देत पदाधिकारी-कार्यकर्त्यांनी दिल्या मनःपूर्वक शुभेच्छा

अमळनेर : राष्ट्रवादी काँग्रेस पक्ष (शरद पवार गट)चे अमळनेर शहराध्यक्ष तथा अमळनेर नगर परिषदेचे उपनगराध्यक्ष प्रशांत निकम यांच्या वाढदिवसानिमित्त पक्षाच्या वतीने नाविन्य हॉस्पिटल येथे उत्साहपूर्ण वातावरणात विशेष कार्यक्रमाचे आयोजन करण्यात आले. यावेळी पक्षाचे पदाधिकारी, कार्यकर्ते व हितचिंतक मोठ्या संख्येने उपस्थित राहून प्रशांत निकम यांच्यावर शुभेच्छांचा वर्षाव केला.

राष्ट्रवादी काँग्रेस पक्षाचे प्रदेश उपाध्यक्ष तथा माजी आमदार डॉ. बी. एस. पाटील यांच्या हस्ते प्रशांत निकम यांचा शाल, पुष्पगुच्छ व पुस्तक भेट देऊन सत्कार करण्यात आला. यावेळी उपस्थित पदाधिकारी व कार्यकर्त्यांनी एकत्रितपणे केक कापून वाढदिवसाचा आनंद द्विगुणित केला. पुस्तक भेट देत सामाजिक व वैचारिक बांधिलकीचा संदेश देत वाढदिवस साजरा करण्यात आला, ही या कार्यक्रमाची विशेष बाब ठरली.

दरम्यान, पक्षाचे सक्रिय कार्यकर्ते रेहान शेख व मारुती पवार यांचाही वाढदिवस असल्याने त्यांचाही यावेळी डॉ. बी. एस. पाटील यांच्या हस्ते सत्कार करण्यात आला. तिघांनाही उपस्थित मान्यवरांनी पुढील सामाजिक व राजकीय वाटचालीसाठी शुभेच्छा दिल्या.

यावेळी मार्गदर्शन करताना उपस्थित मान्यवरांनी पक्ष संघटन मजबूत करण्यासाठी कार्यकर्त्यांची एकजूट, जनसामान्यांशी असलेला सातत्यपूर्ण संपर्क आणि सामाजिक बांधिलकी यांचे महत्त्व अधोरेखित केले. प्रशांत निकम यांच्या नेतृत्वाखाली अमळनेर शहरात पक्ष संघटना अधिक बळकट करण्यासाठी कार्यकर्त्यांनी एकदिलाने काम करण्याचा निर्धार व्यक्त केला.

या प्रसंगी डॉ. चंद्रकांत पाटील, तालुकाध्यक्ष डी. एम. पाटील, शहर सरचिटणीस चिंधु आप्पा वानखेडे, जाकीर शेख, संदीप सोनवणे, विवेक पाटील, जितेंद्र पाटील, खालील पठाण, नाशिक गणेश, धोंडू पाटील, श्यामकांत भावसार यांच्यासह राष्ट्रवादी काँग्रेसचे पदाधिकारी, कार्यकर्ते व हितचिंतक मोठ्या संख्येने उपस्थित होते.

कार्यकर्त्यांच्या उत्स्फूर्त सहभागामुळे कार्यक्रमाला राजकीय उत्साहासोबतच आपुलकी आणि जिव्हाळ्याचे स्वरूप प्राप्त झाले होते.

डीजे मुक्त गणेशोत्सव’ साजरा करा; पारंपरिक वाद्यांना प्राधान्य द्या! शांतता समितीच्या बैठकीत पोलीस अधीक्षक श्रीकांत ढिवरे यांचे आवाहन; रस्ते, वीज व सार्वजनिक समस्यांवरही उपस्थितांच्या सूचना

अमळनेर : आगामी गणेशोत्सवाच्या पार्श्वभूमीवर कायदा व सुव्यवस्था, सामाजिक सलोखा आणि शांतता अबाधित राखण्यासाठी अमळनेर शहरातील वाणी मंगल कार्यालयात दिनांक १ रोजी शांतता समितीची बैठक घेण्यात आली. यावेळी पोलीस अधीक्षक श्रीकांत ढिवरे यांनी गणेशोत्सव भक्तिभावाने, उत्साहात आणि सामाजिक बांधिलकी जपत साजरा करण्याचे आवाहन करताना ‘डीजे मुक्त गणेशोत्सव’ साजरा करून पारंपरिक वाद्यांना प्राधान्य द्यावे, असे स्पष्ट आवाहन केले.

गणेशोत्सव हा श्रद्धा, संस्कृती आणि सामाजिक एकोप्याचा उत्सव असून ध्वनिप्रदूषणाला आळा घालण्यासाठी मंडळांनी प्रशासनाला सहकार्य करावे. पारंपरिक वाद्यांच्या माध्यमातून उत्सवाचा सांस्कृतिक वारसा जपतानाच नागरिकांना त्रास होणार नाही, याची काळजी घ्यावी, असे पोलीस अधीक्षक श्रीकांत ढिवरे यांनी सांगितले.

बैठकीला उपअधीक्षक अशोक नखाते, डीवायएसपी विनायक कोते, प्रांताधिकारी मयूर भंगाळे, नगराध्यक्ष परीक्षित बाविस्कर, मुख्याधिकारी गणेश शिंदे, पोलीस निरीक्षक दत्तात्रय निकम यांच्यासह शांतता समितीचे सदस्य, विविध गणेश मंडळांचे पदाधिकारी व नागरिक उपस्थित होते.

रस्त्यांची दुर्दशा, वीज समस्येवरही आवाज

गणेशोत्सवाच्या काळात मिरवणुका व धार्मिक कार्यक्रम सुरळीत पार पाडण्यासाठी रस्त्यांची दुरुस्ती, वीजपुरवठा, वाहतूक व्यवस्था आणि सार्वजनिक सुरक्षितता याबाबत उपस्थितांनी प्रशासनासमोर विविध सूचना मांडल्या. उत्सवाच्या काळात नागरिकांना कोणत्याही प्रकारचा त्रास होऊ नये तसेच संभाव्य समस्या वेळीच दूर कराव्यात, अशी मागणीही करण्यात आली.

बैठकीत चेतन राजपूत, प्रवीण पाटील, दिनेश शेलकर, विक्रांत पाटील, शकील काजी, रणजीत शिंदे, नितीन भदाणे यांनी विविध महत्त्वपूर्ण सूचना मांडत शहरातील प्रश्नांकडे प्रशासनाचे लक्ष वेधले.

‘उत्सव आपला, जबाबदारीही आपली’

गणेशोत्सव शांततेत आणि उत्साहात पार पाडण्यासाठी पोलीस प्रशासन, नगरपरिषद, गणेश मंडळे आणि नागरिकांनी समन्वयाने काम करण्याची गरज व्यक्त करण्यात आली. ध्वनिप्रदूषण टाळणे, वाहतुकीला अडथळा होणार नाही याची काळजी घेणे आणि कायदा-सुव्यवस्था अबाधित ठेवणे, यासाठी सर्वांनी सहकार्य करण्याचे आवाहन करण्यात आले.

बैठकीचे सूत्रसंचालन संजय पाटील यांनी केले, तर आभार पोलीस निरीक्षक दत्तात्रय निकम यांनी मानले. गणेशोत्सवाच्या पार्श्वभूमीवर झालेल्या या बैठकीत प्रशासनाचा ‘शांतता, सुरक्षितता आणि संस्कृतीचा सन्मान’ हा स्पष्ट संदेश अधोरेखित झाला.

मंगरूळ येथे जुनी पेन्शन योजनेसाठी शिक्षकांचे काळ्या फिती लावून आंदोलन १ ते ४ सप्टेंबरदरम्यान काळ्या फिती लावून निषेध; जुनी पेन्शन योजना लागू करण्याची जोरदार मागणी

मंगरूळ, ता. अमळनेर | दि. १ सप्टेंबर २०२६ :

जुनी पेन्शन योजना लागू करण्याच्या प्रमुख मागणीसाठी मंगरूळ येथे शिक्षक व शिक्षकेतर कर्मचाऱ्यांनी काळ्या फिती लावून आंदोलनास सुरुवात केली. स्व. आबासो अनिल अंबर पाटील माध्यमिक व डॉ. अस्मिता प्रतापराव दिघावकर उच्च माध्यमिक विद्यालय, मंगरूळ येथे आज या आंदोलनाच्या पहिल्या दिवशी शिक्षक व शिक्षकेतर कर्मचाऱ्यांनी काळ्या फिती लावून शासनाच्या धोरणाचा निषेध नोंदविला.

दि. १ नोव्हेंबर २००५ पूर्वी नियुक्त झालेल्या तसेच त्यानंतर १०० टक्के अनुदानावर आलेल्या सर्व शिक्षक व शिक्षकेतर कर्मचाऱ्यांना जुनी पेन्शन योजना लागू करावी, अशी प्रमुख मागणी आंदोलनकर्त्यांनी केली आहे. या मागणीसाठी दि. १ ते ४ सप्टेंबर २०२६ या कालावधीत सर्व शिक्षक व शिक्षकेतर कर्मचारी काळ्या फिती लावून आपले नियमित कामकाज करीत आंदोलनाच्या माध्यमातून शासनाचे लक्ष वेधणार आहेत.

जुनी पेन्शनसाठी एकजुटीचा निर्धार

शिक्षक व शिक्षकेतर कर्मचाऱ्यांच्या निवृत्तीनंतरच्या आर्थिक सुरक्षिततेशी निगडित असलेल्या जुनी पेन्शन योजनेच्या मागणीसाठी हे आंदोलन करण्यात येत आहे. काळ्या फिती लावून कामकाज करत कर्मचाऱ्यांनी आपल्या मागणीबाबतची एकजूट, नाराजी आणि ठाम भूमिका व्यक्त केली.

आंदोलनाच्या पहिल्या दिवशी विद्यालयाचे मुख्याध्यापक श्री. प्रकाश पाटील, श्री. अशोक सूर्यवंशी, श्री. प्रभुदास पाटील (अध्यक्ष जुनी पेन्शन संघटना अमळनेर), संजय पाटील, श्री. राजेंद्र पाटील, सौ. सुषमा सोनवणे, सौ. शितल चव्हाण, सौ. सिमा मोरे, सौ. श्रुती पाटील, सौ. सिमा पाटील, वस्ती शाळेचे मुख्याध्यापक श्री. भटू पाटील, तसेच श्री. प्रविण पाटील, श्री. मनोज पाटील, श्री. सुदर्शन पवार, श्री. प्रदीप पाटील, श्री. खुशाल पाटील आदी मान्यवर शिक्षक व शिक्षकेतर कर्मचारी मोठ्या संख्येने उपस्थित होते.

शासनाने शिक्षक व शिक्षकेतर कर्मचाऱ्यांच्या मागणीचा गांभीर्याने विचार करून जुनी पेन्शन योजना लागू करण्याबाबत सकारात्मक निर्णय घ्यावा, अशी अपेक्षा यावेळी आंदोलनकर्त्यांनी व्यक्त केली.

काळ्या फितीच्या माध्यमातून सुरू झालेले हे आंदोलन शिक्षक व शिक्षकेतर कर्मचाऱ्यांच्या जुनी पेन्शनच्या मागणीसाठीच्या संघर्षाला अधिक बळ देणारे ठरत आहे.

अमळनेरात २० डिसेंबरला ऑल मुस्लिम समाजाचा सामूहिक विवाह सोहळा हसनैन करीमैन वेल्फेअर संस्थेतर्फे ११ जोडप्यांचे निकाह; नावनोंदणीसाठी १० नोव्हेंबरपर्यंत मुदत

अमळनेर : शहरातील हसनैन करीमैन वेल्फेअर संस्था यांच्या वतीने दरवर्षीप्रमाणे यंदाही ऑल मुस्लिम समाजातील वधू-वरांसाठी सामूहिक विवाह सोहळ्याचे आयोजन करण्यात आले आहे. हा सामूहिक विवाह सोहळा रविवार, दि. २० डिसेंबर २०२६ रोजी इंदिरा गांधी भवन, अमळनेर येथे आयोजित करण्यात आला असून, संस्थेचे अध्यक्ष हाजी मोना शेख यांच्या अध्यक्षतेखाली ११ जोडप्यांचे सामूहिक निकाह पार पडणार आहेत.

या उपक्रमाच्या माध्यमातून आर्थिकदृष्ट्या गरजू कुटुंबांना मोठा आधार मिळत असून, विवाहाचा अनावश्यक खर्च कमी करून समाजातील गरजू वधू-वरांना सन्मानाने संसाराची सुरुवात करून देण्याचा संस्थेचा प्रयत्न आहे.

संस्थेच्या वतीने प्रत्येक वधू-वरास पलंग सेट, कपाट तसेच संसारोपयोगी वस्तू देण्यात येणार आहेत. तसेच प्रत्येक वधू-वराच्या कुटुंबातील शंभर-शंभर व्यक्तींच्या भोजनाची व्यवस्था संस्थेच्या वतीने करण्यात येते 

या सामूहिक विवाह सोहळ्यात आपल्या मुला-मुलींची नावनोंदणी करू इच्छिणाऱ्या पालकांनी दि. १० नोव्हेंबर २०२६ पर्यंत संस्थेच्या पदाधिकाऱ्यांशी संपर्क साधावा, असे आवाहन करण्यात आले आहे.

संपर्क : ७५०७१५७७८६ / ९०४९९४९९४१

या उपक्रमासाठी हसनैन करीमैन वेल्फेअर संस्थेचे अध्यक्ष हाजी मोना शेख, उपाध्यक्ष सैय्यद नबी व जुबेर पठाण, सचिव सैय्यद अजहर अली, सहसचिव अशफाक शेख, खजिनदार आरिफ मेमन तसेच सदस्य जाकिर शेख, हाजी मट्या खाटीक व इम्रान शेख परिश्रम घेत आहेत.

सिद्धांत राहुल निकम याची सुवर्णझेप! 🌹 एम. फार्मसी परीक्षेत विद्यापीठात प्रथम; सुवर्णपदकाने सन्मानित

अमळनेर:

चोपडा येथील प्रा. डॉ. राहुल निकम यांचे सुपुत्र चि. सिद्धांत राहुल निकम यांनी आपल्या गुणवत्तेच्या आणि अथक परिश्रमाच्या जोरावर शैक्षणिक क्षेत्रात उल्लेखनीय यश संपादन केले आहे. डॉ. बाबासाहेब भीमराव आंबेडकर केंद्रीय विश्वविद्यालय, लखनऊ (उत्तर प्रदेश) येथे झालेल्या एम. फार्मसी (फार्माकॉलॉजी) परीक्षेत विशेष प्राविण्यासह प्रथम क्रमांक पटकावत सिद्धांत निकम यांनी मानाचा सुवर्णपदकाचा बहुमान मिळविला.

विद्यापीठाच्या पदवीदान समारंभात मान्यवरांच्या हस्ते सिद्धांत निकम यांना सुवर्णपदक प्रदान करून त्यांच्या उज्ज्वल शैक्षणिक कामगिरीचा गौरव करण्यात आला. त्यांच्या या यशामुळे कुटुंबीय, मित्रपरिवार, शिक्षकवर्ग तसेच चोपडा व अमळनेर परिसरातून त्यांच्यावर अभिनंदनाचा वर्षाव होत आहे.

परीक्षांमध्येही सातत्यपूर्ण दमदार कामगिरी

सिद्धांत निकम यांच्या यशाची ही पहिलीच झेप नसून, त्यांनी यापूर्वीही विविध राष्ट्रीय स्तरावरील स्पर्धात्मक परीक्षांमध्ये उल्लेखनीय कामगिरी केली आहे. त्यांनी जी-पॅट (ग्रॅज्युएट फार्मसी अॅप्टिट्यूड टेस्ट) परीक्षा तब्बल तीन वेळा उत्तीर्ण केली आहे. तसेच नेट (एनईटी) परीक्षा तीन वेळा उत्तीर्ण होण्याचा मान त्यांनी मिळविला असून, गेट (जीएटीई) परीक्षा देखील एकदा उत्तीर्ण केली आहे.

पीएच.डी.च्या दिशेनेही यशस्वी वाटचाल

सुवर्णपदकाने सन्मानित झाल्यानंतरही सिद्धांत निकम यांची ज्ञानाची आणि संशोधनाची वाटचाल सुरूच आहे. ते सध्या डॉ. बाबासाहेब भीमराव आंबेडकर केंद्रीय विश्वविद्यालय, लखनऊ येथे एम. फार्मसी क्षेत्रात पीएच.डी.चे संशोधनकार्य करीत आहेत.

अभ्यासातील सातत्य, कठोर परिश्रम, संशोधनाची आवड आणि ध्येयाप्रती असलेली निष्ठा यामुळे सिद्धांत निकम यांनी अल्पावधीतच शैक्षणिक क्षेत्रात आपली स्वतंत्र ओळख निर्माण केली आहे.

सिद्धांत निकम हे समाजकार्य महाविद्यालय, चोपडा येथे कार्यरत असलेले प्रा. डॉ. राहुल निकम यांचे सुपुत्र आहेत. त्यांच्या या उल्लेखनीय यशाबद्दल त्यांचे सर्व स्तरांतून मनःपूर्वक अभिनंदन होत असून, आगामी शैक्षणिक व संशोधन क्षेत्रातील वाटचालीसाठी त्यांना हार्दिक शुभेच्छा देण्यात येत आहेत.

 सिद्धांत राहुल निकम यांच्या या सुवर्णयशाबद्दल मनःपूर्वक हार्दिक अभिनंदन व पुढील उज्ज्वल वाटचालीसाठी हार्दिक शुभेच्छा! 

 हार्दिक अभिनंदन! 

🌱 अमळनेर मुस्लिम कब्रस्तानात अल खिदमत ट्रस्टतर्फे २५ वृक्षांची लागवड

अमळनेर : पर्यावरण संवर्धनाचा संदेश देत अल खिदमत ट्रस्ट, अमळनेर यांच्या तर्फे अमळनेर मुस्लिम कब्रस्तान परिसरात २५ वृक्षांची लागवड करण्यात आली.

या वृक्षारोपण उपक्रमास अमळनेर मुस्लिम कब्रस्तान व ईदगाह ट्रस्टचे हाजी सत्तार भाया साहब तसेच अल खिदमत ट्रस्ट अमळनेरचे सदस्य उपस्थित होते. यावेळी उपस्थितांनी वृक्षारोपण करून पर्यावरण संवर्धनाचा संदेश दिला.

विशेष म्हणजे या उपक्रमात लहान मुलांनीही उत्स्फूर्त सहभाग घेतला. मुलांच्या हातून वृक्षारोपण करून घेत त्यांना झाडांचे आपल्या जीवनातील महत्त्व, पर्यावरणाचे संरक्षण आणि भविष्यातील पिढीसाठी हिरवाई जपण्याची गरज याबाबत मार्गदर्शन करण्यात आले.

“आज लावलेले एक झाड म्हणजे उद्याच्या पिढीसाठी दिलेली जीवनाची भेट आहे,” या भावनेतून हा उपक्रम राबविण्यात आला. कब्रस्तान परिसर अधिक हिरवागार आणि सुंदर करण्यासोबतच पर्यावरण संवर्धनाचा संदेश समाजापर्यंत पोहोचविण्याचा प्रयत्न यावेळी करण्यात आला.

श्रीमंत शिवाजीराव होळकर महाराज अमळनेर ला येणार.

अमळनेर   :  राजमाता अहिल्याबाई होळकर महेश्वर (मध्य प्रदेश) संस्थांचे प्रमुख व 17 वे वंशज श्रीमंत शिवाजीराव होळकर महाराज( रिचर्ड महाराज) यांची महेश्वर येथे जाऊन भेट घेऊन चर्चा केली व त्यांना अमळनेर येथील कार्यक्रमासाठी आमंत्रित केले व सदरचे आमंत्रण त्यांनी स्वीकारले लवकरच त्यांच्या कार्यक्रमाची तारीख जाहीर करण्यात येईल. . बन्सीलाल भागवत,अध्यक्ष, उत्तर महाराष्ट्र, ऑल इंडिया धनगर समाज महासंघ दिल्ली यांच्या नेतृत्वाखाली एक शिष्टमंडळ महेश्वर येथे गेले होते त्यात प्रा अशोक पवार, डी ए पाटील, अचलबाई भागवत, एडवोकेट तिलोत्तमा पाटील, सौ. मीनाक्षी पवार,एस सी तेले, संजय पाटील, चिंधू वानखेडे, सुनंदा तेले, प्रतिभा पाटील, सीमा पाटील, प्रमिला वाघ, एडवोकेट क्रांती ठाकरे आदींचा समावेश होता.

        राजमाता अहिल्याबाई होळकर घराण्याचे महेश्वर संस्थान प्रेरणादायी ठिकाण म्हणून नावारूपाला आणणाऱ्या श्रीमंत शिवाजीराव होळकरांचे शिष्टमंडळाने अभिनंदन केले याप्रसंगी (रिचर्ड होळकर )महाराजांनी राजमाता अहिल्याबाई होळकर यांच्या कर्तृत्वाविषयी माहिती सांगितली. ही भेट घडवून आणण्यासाठी राजे अमरजीत बारगळ जहांगीरदार,,तळोदा यांनी खूप मोलाची मदत केली. महेश्वर गादीचे 17 वे वंशज श्रीमंत शिवाजीराव होळकर महाराज यांची साधी राहणी व उच्च विचार विचारसरणी असल्याने खऱ्या अर्थाने देवी अहिल्याबाई होळकर यांचे ते सामाजिक,वैचारिक वारसदार आहेत याची खात्री पटली.

राखी पौर्णिमेनिमित्त   कष्टकरी सफाई कामगारांचा सन्मान

अमळनेर :  राखी त्या हातांना जे रोज आपल्या शहराचे रोगराई पासून रक्षण करतात.कष्टकरी सफाई कर्मचारी हे समाजाचे रक्षक आहेत. अमळनेर नगर परिषदेच्या कष्टकरी सफाई कामगारांचा सन्मान करण्यासाठी राखी पौर्णिमेच्या निमित्ताने कामगारांना राखी बांधण्याचा कार्यक्रम, संविधान जागर अभियान व युवा कल्याण प्रतिष्ठान, अमळनेर तर्फे छत्रपती शिवाजी गार्डन अमळनेर येथे करण्यात आला. कार्यक्रमापूर्वी समतेवर आधारित गीते सुनीता मोरे, दिशा संदानशिव, उषा देवरे, माधुरी पाटील, योगिता पांडे, निवेदिता कापडणे कर यांनी सादर केले व कामगारांना राखी बांधली याप्रसंगी प्रा अशोक पवार यांनी कामगारांच्या कामाविषयी व त्यांच्या त्यागाविषयी मनोगत व्यक्त केले.

            सफाई कामगार महिलांनी सामाजिक कार्यकर्त्यांना राखी बांधली तर सफाई कामगारांना सामाजिक कार्य करणाऱ्या महिलांनी राखी बांधून कामगारांचा सन्मान केला. याप्रसंगी कामगारांना मिठाई वाढण्यात आली . अमळनेरच्या सांस्कृतिक इतिहासात प्रथमच अशा प्रकारचा कार्यक्रम आयोजित करण्यात आला होता . याप्रसंगी अमळनेर परिषदेचे स्वच्छता निरीक्षक किरण खंडारे, हृदयनाथ मोरे, अनिल बाविस्कर, अनिल बेंडवाल, भैय्या मोरे, नितीन बिऱ्हाडे, डि ए पाटील, संजय पाटील व सफाई कामगार बंधू-भगिनी मोठ्या संख्येने उपस्थित होते.

*“स्मृती राहतात, विचार पुढे जातात…”* विनायक आप्पा बैसाणे यांच्या प्रथम पुण्यस्मरणानिमित्त शिरूडमध्ये भावपूर्ण अभिवादन

शिरूड | दि. ३१ ऑगस्ट २०२६

आपल्या माणसाच्या आठवणी मनात जपताना त्याच्या स्मृतींना विधायक विचारांची जोड देण्याचा आदर्श शिरूड येथे पाहायला मिळाला. स्मृतीशेष *विनायक आप्पा अमृत बैसाणे यांच्या प्रथम पुण्यस्मरणानिमित्त सोमवारी आयोजित कार्यक्रमात बुद्ध-आंबेडकरी विचारांचा जागर करण्यात आला.*

विनायक आप्पा बैसाणे हे रिपब्लिकन पक्षाचे युवा नेते यशवंत आबा बैसाणे यांचे बंधू होते. त्यांच्या प्रथम पुण्यस्मरणानिमित्त सकाळी ११ वाजता कार्यक्रमाचे आयोजन करण्यात आले.

भगवान गौतम बुद्ध आणि भारतरत्न डॉ. बाबासाहेब आंबेडकर यांच्या प्रतिमांचे पूजन रवींद्र बैसाणे (मुंबई) यांच्या हस्ते करण्यात आले. भंते संघरक्षित आणि बौद्धाचार्य दरू दादा सैंदाणे यांनी धम्मविधी पार पाडला.

यावेळी गौतम दादा मोरे, बापूराव संदानशिव, घोलप सर, अशोक बिऱ्हाडे, मोहिते बापू (साक्री), अशोक भिसन बैसाणे (सुरत) यांनी मार्गदर्शन केले.

आपल्या मनोगतात वक्त्यांनी *बुद्धांच्या समतावादी, विवेकशील आणि विज्ञाननिष्ठ विचारांचे महत्त्व अधोरेखित केले.* स्वातंत्र्य, समता, बंधुता आणि न्याय या मूल्यांवर आधारित समाजनिर्मिती हीच महापुरुषांना खरी आदरांजली ठरेल, असा संदेश यावेळी देण्यात आला.

पुण्यस्मरणानिमित्त अशोक बिऱ्हाडे लिखित डॉ. बाबासाहेब आंबेडकर यांच्या जीवनचरित्रावरील सुमारे ५० पुस्तकांचे वाटप करण्यात आले. यशवंत आबा बैसाणे यांनी पुस्तकांसाठी योगदान दिले.

कार्यक्रमास प्रवीण बैसाणे (जळगाव), भीमराव बैसाणे (नंदुरबार), एम. एस. बैसाणे,(PSI), प्रा यशवंत बैसाणे (मुंबई),

 भिकाजी बिऱ्हाडे, ग्रामसेवक आप्पा पाटील, डी. सी. पाटील, पत्रकार व्ही. ए. पाटील, अॅड. योगेश गजरे, अॅड. अभिजित बिऱ्हाडे,किरण नवल बैसाणे,पत्रकार मिलिंद पाटील,रविंद्र मखा बैसाणे, जितेंद्र करणकाळ,भाऊसाहेब मोरे यांच्यासह पंचक्रोशीतील ज्येष्ठ नागरिक, आप्तेष्ट, मित्रमंडळी व कार्यकर्ते उपस्थित होते.

भावपूर्ण स्मरण, बुद्ध-आंबेडकरी विचारांचे चिंतन आणि पुस्तकवाटपातून प्रबोधन या त्रिसूत्रीमुळे विनायक आप्पा बैसाणे यांचे प्रथम पुण्यस्मरण सामाजिक संदेश देणारे ठरले.