शिस्त, संयम आणि नियोजनाचा आदर्श; गणेश विसर्जन मिरवणूक शांततेत पार पाडल्याबद्दल पोलिस प्रशासनाचे अभिनंदन

अमळनेर : गणेश विसर्जन मिरवणूक वेळेत, शिस्तबद्ध आणि अत्यंत शांततेच्या वातावरणात पार पाडण्यासाठी पोलिस प्रशासनाने केलेल्या उत्कृष्ट नियोजनाचे नागरिकांकडून कौतुक होत आहे. गणेशोत्सवाच्या काळात कायदा व सुव्यवस्था अबाधित ठेवत मिरवणूक सुरळीतपणे पार पाडण्यासाठी अपर पोलीस अधीक्षक, चाळीसगाव परिमंडळ मा. अशोक नखाते, पोलीस अधीक्षक मा. विनायक कोते, पोलीस निरीक्षक दत्तात्रय निकम यांच्यासह सर्व अधिकारी, पोलीस कर्मचारी, होमगार्ड आणि संपूर्ण पोलीस यंत्रणेने विशेष परिश्रम घेतले.

गणेश विसर्जन मिरवणुकीदरम्यान पोलिसांनी दाखविलेली कर्तव्यतत्परता, संयम आणि उत्तम नियोजन यामुळे मिरवणूक शांततेत आणि सुरळीतपणे पार पडली. गर्दीचे व्यवस्थापन, वाहतूक नियोजन तसेच कायदा व सुव्यवस्था राखण्यासाठी पोलिसांनी प्रत्यक्ष मैदानावर बजावलेली भूमिका उल्लेखनीय ठरली.

गणेशोत्सव हा अमळनेरच्या सामाजिक सलोखा आणि उत्सवी परंपरेचा महत्त्वाचा भाग आहे. हा उत्सव शांततेत पार पडण्यासाठी गणेश मंडळांचे कार्यकर्ते, पत्रकार बांधव, नागरिक आणि प्रशासन यांनीही सहकार्य केले.

गणेश विसर्जन मिरवणूक कोणताही अनुचित प्रकार न घडता शांततेत पार पाडल्याबद्दल संपूर्ण पोलिस प्रशासनाचे मनःपूर्वक अभिनंदन आणि सलाम! 🙏🏻

महात्मा फुले हायस्कूल मध्ये निबंध व चित्रकला स्पर्धा शाक्त शिवराज्याभिषेक दिन व सत्यशोधक समाज स्थापना दिन उत्साहात साजरा

धरणगाव प्रतिनिधी :

धरणगाव – शहरातील सुवर्ण महोत्सवी शाळा महात्मा फुले हायस्कूल धरणगाव येथे २४ सप्टेंबर ऐतिहासिक दिनाचे औचित्य साधत छत्रपती शिवरायांचा दुसरा “शाक्त राज्याभिषेक दिन ” व महात्मा ज्योतिराव फुले यांनी स्थापन केलेल्या “सत्यशोधक समाज स्थापना दिन ” मोठ्या उत्साहात साजरा करण्यात आला.कार्यक्रमाचे प्रास्ताविक पी डी पाटील यांनी केले.
कार्यक्रमाच्या अध्यक्षस्थानी शाळेचे मुख्याध्यापक जे एस पवार होते.मान्यवरांच्या हस्ते छत्रपती शिवाजी महाराज व महात्मा ज्योतिराव फुले यांच्या प्रतिमेचे पूजन करण्यात आले. व्ही टी माळी यांनी शाक्त राज्याभिषेक दिन व सत्यशोधक समाज स्थापना दिन याविषयी विस्तृत माहिती विद्यार्थ्यांना सांगितली.या दिनानिमित्त शाळेत चित्रकला व निबंध स्पर्धेचे आयोजन करण्यात आले होते. कार्यक्रमाचे सूत्रसंचलन पी डी पाटील तर आभार एस एन कोळी यांनी मानले.

निबंध स्पर्धा ( मोठा गट विजयी )
१. कु.जया मनोज सोनवणे – १० वी
२. कु.श्वेता संजय भोई – १० वी
३. कु. भावना उरमल बारेला – ९ वी

निबंध स्पर्धा ( लहान गट विजयी )

१. करण मनोज सोनवणे – ७ वी
२. कु.रितू तुळशीराम जाधव – ६ वी
३. रोहन सुनील भिल – ५ वी

चित्रकला स्पर्धा ( मोठा गट विजयी )

१. कु. मयुरी राजेंद्र भोई – १० वी
२. रोहन रवी करोसिया – ८ वी
३. हर्षाली रवी करोसिया – ९ वी

चित्रकला स्पर्धा ( लहान गट विजयी )

१. संदीप बापू सोनवणे – ७ वी
२. गुंजन संजय घिसाडी – ६ वी
३. कविता मंसाराम बारेला – ५ वी

धनदाई महाविद्यालयात राष्ट्रीय सेवा योजना दिवस उत्साहात साजरा

अमळनेर : धनदाई कला व विज्ञान महाविद्यालय, अमळनेर येथील राष्ट्रीय सेवा योजना विभागाच्या वतीने राष्ट्रीय सेवा योजना दिवस उत्साहात साजरा करण्यात आला. या कार्यक्रमाच्या अध्यक्षस्थानी महाविद्यालयाचे प्राचार्य डॉ. एच. एम. पाटील होते. यावेळी राष्ट्रीय सेवा योजना कार्यक्रमाधिकारी डॉ. लीलाधर पाटील, सहाय्यक कार्यक्रमाधिकारी डॉ. जयवंतराव पाटील, महिला कार्यक्रमाधिकारी प्रा. मीनाक्षी इंगोले आदी मान्यवर उपस्थित होते.

         कार्यक्रमाचे प्रास्ताविक महिला कार्यक्रमाधिकारी प्रा. मीनाक्षी इंगोले यांनी केले. २४ सप्टेंबर हा राष्ट्रीय सेवा योजना स्थापना दिवस असून देशभरात हा दिवस साजरा केला जातो, असे त्यांनी सांगितले.

         राष्ट्रीय सेवा योजना कार्यक्रमाधिकारी डॉ. लीलाधर पाटील यांनी आपल्या मार्गदर्शनातून राष्ट्रीय सेवा योजनेच्या वाटचालीचा आढावा घेतला. महात्मा गांधी यांच्या जन्मशताब्दी वर्षाच्या पार्श्वभूमीवर सुरू झालेल्या राष्ट्रीय सेवा योजनेचा मुख्य उद्देश विद्यार्थ्यांमध्ये संवेदनशीलता, सामाजिक भान आणि लोकशाही मूल्यांची जडणघडण करणे हा आहे, असे त्यांनी स्पष्ट केले. ‘नॉट मी बट यू’ या भावनेतून प्रत्यक्ष समाजसेवेच्या माध्यमातून राष्ट्रीय सेवा योजनेचे कार्य सुरू असल्याचे सांगत त्यांनी विद्यार्थ्यांनी विविध उपक्रमांमध्ये सक्रिय सहभाग घ्यावा, असे आवाहन केले.

         अध्यक्षीय भाषणात प्राचार्य डॉ. एच. एम. पाटील यांनी राष्ट्रीय सेवा योजना हा विद्यार्थ्यांच्या सर्वांगीण व्यक्तिमत्त्व विकासातील महत्त्वाचा घटक असल्याचे सांगितले. विद्यार्थ्यांनी राष्ट्रीय सेवा योजनेच्या विविध उपक्रमांमध्ये सहभागी होऊन त्याचा जास्तीत जास्त लाभ घ्यावा, असे आवाहन त्यांनी केले.

         कार्यक्रमाचे आभार प्रदर्शन प्रा. मीनाक्षी इंगोले यांनी केले. यावेळी महाविद्यालयातील प्राध्यापक, शिक्षकेतर कर्मचारी तसेच राष्ट्रीय सेवा योजनेचे विद्यार्थी स्वयंसेवक व स्वयंसेविका मोठ्या संख्येने उपस्थित होते.

सेवाभाव, श्रमदान अन् सामाजिक बांधिलकीचा जागर; चोपड्यात NSS स्थापना दिन साजरा

चोपडा प्रतिनिधी : भगिनी मंडळ संचलित समाजकार्य महाविद्यालय, चोपडा येथे राष्ट्रीय सेवा योजना (NSS) स्थापना दिनानिमित्त विविध उपक्रमांसह विशेष व्याख्यानाचे आयोजन दि. २४ सप्टेंबर २०२६ रोजी उत्साहात करण्यात आले. यावेळी ‘NOT ME, BUT YOU’ या NSSच्या ब्रीदवाक्याचा संदेश विद्यार्थ्यांपर्यंत पोहोचविण्यात आला.

कार्यक्रमाच्या सुरुवातीला महाविद्यालयातील विद्यार्थिनींनी NSS गीत सादर केले. कार्यक्रमाचे प्रास्ताविक प्रा. डॉ. संबोधी देशपांडे यांनी केले, तर विद्यार्थिनी दिव्या कोळी हिने सूत्रसंचालन केले. महाविद्यालयाचे प्राचार्य डॉ. ईश्वर सौंदाणकर आणि उपप्राचार्य प्रा. डॉ. आशिष गुजराथी यांनी विद्यार्थ्यांना NSS स्थापना दिनाच्या शुभेच्छा दिल्या.

यावेळी कला, शास्त्र व वाणिज्य महाविद्यालय, चोपडा येथील प्रा. डॉ. प्रकाश लभाणे यांनी ‘राष्ट्रीय सेवा योजनेमध्ये युवकांची भूमिका’ या विषयावर मार्गदर्शन केले. राष्ट्रीय सेवा योजनेचे ‘NOT ME, BUT YOU’ हे ब्रीदवाक्य विद्यार्थ्यांनी आचरणात आणण्याचे आवाहन त्यांनी केले.

राष्ट्रीय सेवा योजनेच्या माध्यमातून युवकांमध्ये सेवाभाव, सामाजिक बांधिलकी, नेतृत्वगुण आणि व्यक्तिमत्त्व विकास घडतो, असे सांगताना डॉ. लभाणे यांनी NSSच्या विविध समाजोपयोगी उपक्रमांवर प्रकाश टाकला. सात दिवसीय श्रमसंस्कार शिबिराच्या माध्यमातून श्रमदान, परिसर स्वच्छता, वृक्षारोपण यांसह विविध उपक्रम राबविले जातात. अशा उपक्रमांमधून युवकांमध्ये सामाजिक जाणीव निर्माण होऊन त्यांच्या सर्वांगीण व्यक्तिमत्त्व विकासाला चालना मिळते, असे त्यांनी स्पष्ट केले.

कार्यक्रमास प्राचार्य डॉ. ईश्वर सौंदाणकर, उपप्राचार्य प्रा. डॉ. आशिष गुजराथी, प्रा. डॉ. प्रकाश लभाणे, मा. अरुण संदनशिव (मुख्याध्यापक, महिला मंडळ, चोपडा), प्रा. डॉ. संबोधी देशपांडे, प्रा. डॉ. उत्तम सोनकांबळे, प्रा. डॉ. मोहिनी उपासनी, प्रा. डॉ. कल्पना सोनवणे यांच्यासह प्राध्यापकवृंद, शिक्षकेतर कर्मचारी व विद्यार्थी मोठ्या संख्येने उपस्थित होते.

कार्यक्रमाचे आभार प्रदर्शन विद्यार्थिनी नंदिनी पवार हिने केले. कार्यक्रमाच्या यशस्वीतेसाठी प्राचार्य, उपप्राचार्य, NSS कार्यक्रम अधिकारी, सहाय्यक कार्यक्रम अधिकारी, प्राध्यापकवृंद, शिक्षकेतर कर्मचारी आणि विद्यार्थ्यांनी सहकार्य केले.

गीतांमधून संविधानाचा जागर जनतेपर्यंत पोहोचविणे गरजेचे प्रा. डॉ. उत्तम सोनकांबळे यांचे प्रतिपादन; लासूर येथे समाजकार्य विद्यार्थ्यांचा प्रबोधनात्मक उपक्रम

चोपडा प्रतिनिधी : भारतीय संविधानाची ओळख सर्वसामान्य जनतेला करून देण्यासाठी संविधानाचा व्यापक प्रचार-प्रसार होणे आवश्यक आहे. संविधानाचे महत्त्व केवळ पुस्तकी ज्ञानापुरते मर्यादित न राहता ते सामान्य जनतेपर्यंत विविध माध्यमांतून पोहोचविणे गरजेचे आहे. यासाठी गीत, लोकगीते आणि प्रबोधनात्मक सादरीकरणाच्या माध्यमातून संविधानाचा जागर करणे प्रभावी ठरू शकते, असे प्रतिपादन समाजकार्य महाविद्यालय, चोपडा येथील प्रा. डॉ. उत्तम सोनकांबळे यांनी केले.
समाजकार्य महाविद्यालय, चोपडा येथील तृतीय वर्ष समाजकार्य स्नातकच्या विद्यार्थ्यांनी क्षेत्रकार्याच्या अनुषंगाने लासूर ग्रामपंचायतीसमोर संविधान जनजागृतीपर छोटेखानी कार्यक्रमाचे आयोजन केले होते. यावेळी उपस्थितांना मार्गदर्शन करताना प्रा. डॉ. सोनकांबळे बोलत होते.
कार्यक्रमादरम्यान तृतीय वर्षाच्या विद्यार्थ्यांनी संविधानातील मूल्ये, नागरिकांचे अधिकार व कर्तव्ये आणि संविधानाचे महत्त्व जनसामान्यांपर्यंत पोहोचविण्याच्या उद्देशाने विविध प्रबोधनात्मक गीते व लोकगीते सादर करून संविधानाचा जागर केला. विद्यार्थ्यांच्या सादरीकरणाला उपस्थित नागरिकांनी उत्स्फूर्त प्रतिसाद दिला.
यावेळी समाजकार्य महाविद्यालय, चोपडा येथील प्रा. डॉ. राहुल निकम यांच्यासह लासूर ग्रामपंचायतीचे पदाधिकारी अमोल महाजन, चेतन महाजन तसेच ग्रामस्थ व अन्य मान्यवर उपस्थित होते.
कार्यक्रमाच्या शेवटी प्रा. डॉ. राहुल निकम यांनी उपस्थितांचे आभार मानले. विद्यार्थ्यांनी क्षेत्रकार्याच्या माध्यमातून राबविलेल्या या संविधान जनजागृती उपक्रमाचे उपस्थितांकडून कौतुक करण्यात आले.

अमळनेर पोलीस ठाण्यात सदिच्छा भेटीदरम्यान अधिकाऱ्यांचा सत्कार

अमळनेर ( प्रतिनिधी) :  अमळनेर पोलीस ठाण्यात आढावा भेटीदरम्यान तत्कालीन जिल्हा समादेशक होमगार्ड तथा अप्पर पोलीस अधीक्षक, चाळीसगाव मा. श्री. अशोक नखाते यांनी सदिच्छा भेट दिली. यावेळी जळगाव जिल्ह्याचे प्रशासकीय अधिकारी सुरेश जाधव यांच्यासोबत विविध प्रशासकीय बाबींवर चर्चा झाली.

सदिच्छा भेटीदरम्यान अप्पर पोलीस अधीक्षक अशोक नखाते यांचा सत्कार प्रशासकीय अधिकारी सुरेश जाधव यांच्या हस्ते करण्यात आला. तसेच प्रशासकीय अधिकारी सुरेश जाधव यांचा सत्कार उपविभागीय पोलीस अधिकारी (DYSP) विनायक कोते यांच्या हस्ते करण्यात आला.

याप्रसंगी अमळनेरचे पोलीस निरीक्षक दत्तात्रेय निकम, होमगार्डचे अमळनेर तालुका समादेशक गोपाल वना पाटील, कंपनी नायक अरुण नेरकर, वरिष्ठ पलटण नायक रविंद्र ठाकूर तसेच जळगाव PTC येथील कैलास पाटील, कमलेश वानखेडे यांच्यासह पोलीस व होमगार्ड विभागातील अधिकारी उपस्थित होते.

या सदिच्छा भेटीमुळे पोलीस प्रशासन व होमगार्ड विभागातील समन्वय अधिक दृढ होण्यास मदत होणार असून, उपस्थित अधिकारी व कर्मचाऱ्यांनी या भेटीचे स्वागत केले.

संविधानाची उद्देशिका म्हणजे संविधानाचा आत्मा -प्रा. डॉ. राहुल निकम 

अमळनेर  ( प्रतिनिधी) : भारतीय संविधानाची उद्देशिका म्हणजे संविधानाचा आत्मा असून संपूर्ण संविधानाचा संपूर्ण सार त्या एक वाक्यीय उद्देशिकेत सामावलेला आहे. संविधानाचे संपूर्ण प्रतिबिंब संविधानाच्या उद्देशिकेत आपणास जाणवते त्यामुळे ते समजून घेणे आवश्यक असल्याचे असे प्रतिपादन समाजकार्य महाविद्यालय चोपडा येथील प्रा. डॉ. राहुल निकम यांनी महात्मा गांधी माध्यमिक व उच्च माध्यमिक विद्यालय, लासुर या ठिकाणी केले. माध्यमिक तथा उच्च माध्यमिक विद्यार्थ्यांना संविधानाची ओळख निर्माण होऊन संविधानिक मूल्यांचा परिचय व्हावा या उद्देशाने सदर कार्यक्रम आयोजित करण्यात आलेला होता. यावेळी त्यांनी उद्देशिकेतील सर्व शब्दांचा अर्थ अगदी सोप्या भाषेत विद्यार्थ्यांना समजावून सांगितला. संविधान समजावून घेऊन त्यानुसार वागण्याची जबाबदारी आपली सर्वांची असल्याचे मत त्यांनी नमूद केले.

        कार्यक्रमाच्या अध्यक्षस्थानी माध्यमिक शाळेचे पर्यवेक्षक एस जी पाटील हे होते. कार्यक्रमाच्या प्रारंभी संविधान निर्माते भारतरत्न डॉ. बाबासाहेब आंबेडकरांचे प्रतिमेचे पूजन मान्यवरांच्या हस्ते करण्यात आले. समाजकार्य महाविद्यालयातील तृतीय वर्ष स्नातकच्या विद्यार्थ्यांनी संविधान गीत सादर केले. एस जी पाटील यांनी संविधान निर्मिती डॉ. बाबासाहेब आंबेडकर आणि मान्यवरांचे योगदान विद्यार्थ्यांसमोरचा मांडले. पी डी शिंदे यांनी संविधानामुळे मिळालेले हक्क आणि अधिकार विद्यार्थ्यांना समजावून सांगितले. डॉ. उत्तम सोनकांबळे यांनी भारतीय संविधानाचे महत्त्व थोडक्यात सांगितले.

       याप्रसंगी विचारमंचावर समाजकार्य महाविद्यालय चोपडा येथील प्रा.डॉ. उत्तम सोनकांबळे, पी डी शिंदे, एस एस माळी, पी ए माळी, वाय बी बोरसे, वंदना पवार यांच्यासह सर्व शिक्षक व शिक्षकेतर कर्मचारी वृंद आणि विद्यार्थी मोठ्या संख्येने उपस्थित होते. भारतीय संविधानाची ओळख विद्यार्थ्यांना व्हावी हा उदात्त हेतू डोळ्यासमोर ठेवून माध्यमिक व उच्च माध्यमिक शाळेचे मुख्याध्यापक आर एस पाटील आणि समाजकार्य महाविद्यालय चोपडा येथील प्राचार्य डॉ ईश्वर सौंदाणकर यांच्या मार्गदर्शनानुसार सदरच्या कार्यक्रमाचे आयोजन करण्यात आले होते. कार्यक्रमाचे सूत्रसंचालन पी डी शिंदे यांनी केले.

कळमसऱ्यात ‘राम-रहीम गणपती’चा अनोखा उपक्रम; हिंदू-मुस्लिम ऐक्याचे घडविले आदर्श उदाहरण मुस्लिम बांधवांचा पुढाकार; गणपती स्थापनेपासून महाप्रसादापर्यंत उत्साहाने सहभाग

कळमसरे, प्रतिनिधी : अमळनेर तालुक्यातील कळमसरे गावाने हिंदू-मुस्लिम ऐक्य आणि सामाजिक सलोख्याची अनोखी परंपरा जपत एक आदर्श निर्माण केला आहे. गावातील मुस्लिम बांधवांनी पुढाकार घेत गणपतीची स्थापना केली असून, या गणपती मंडळाला ‘राम-रहीम गणपती’ असे नाव देण्यात आले आहे. गणपती स्थापनेपासून वर्गणी संकलन, आरती, धार्मिक कार्यक्रम तसेच महाप्रसादाच्या आयोजनापर्यंत मुस्लिम बांधव उत्स्फूर्तपणे सहभागी होत आहेत.

कळमसरे हे विविध जाती-धर्मांचे नागरिक गुण्यागोविंदाने नांदणारे गाव आहे. येथील मुस्लिम समाज हिंदूंच्या विविध सण-उत्सवांमध्ये उत्साहाने सहभागी होतो, तर मुस्लिम समाजाच्या धार्मिक व सामाजिक कार्यक्रमांमध्येही हिंदू बांधव मोठ्या आनंदाने सहभागी होतात. त्यामुळे गावात सामाजिक एकोपा आणि परस्पर बंधुभावाची भावना दृढ झाली आहे.

पाडळसरे फाट्यावर पठाण कुटुंबीयांचे गॅरेज असून मेहमूद खान, वसीम खान, सलीम खान आणि नईम खान या मुस्लिम बांधवांनी पुढाकार घेत गणपतीची स्थापना केली आहे. त्यांच्या या उपक्रमातून धार्मिक सलोखा आणि ‘सर्व धर्मांचा सन्मान’ हा संदेश समाजापर्यंत पोहोचत आहे.

पठाण कुटुंबीयांचे या परिसराशी जुने संबंध असून, त्यांच्या पूर्वजांपासून सामाजिक बांधिलकीची परंपरा जपली जात असल्याचे सांगितले जाते. हिंदू समाजाच्या विविध कार्यक्रमांमध्ये या कुटुंबाचा नेहमीच पुढाकार असतो. त्याचप्रमाणे मुस्लिम समाजाच्या कार्यक्रमांमध्येही संपूर्ण गावातील हिंदू बांधव सहभागी होत असल्याने कळमसरे गावातील सामाजिक एकतेचे दर्शन घडते.

या कुटुंबातील नव्या पिढीनेही शिक्षणाच्या क्षेत्रात उल्लेखनीय प्रगती केली आहे. कुटुंबातील मुले-मुली उच्च शिक्षण घेत असून, एका विद्यार्थिनीचे औरंगाबाद येथे वकिलीचे शिक्षण सुरू आहे. तर एका कुटुंबातील मुलगी विद्यापीठात एम.एस्सी.चे शिक्षण घेत आहे. कुटुंबातील एक युवक विदेशात नोकरी करीत आहे.

धर्म, जात आणि पंथाच्या भिंती ओलांडून ‘माणुसकी हाच सर्वात मोठा धर्म’ या विचाराला प्रत्यक्ष कृतीतून बळ देणाऱ्या पठाण कुटुंबाच्या या उपक्रमाचे अमळनेर तालुक्यात कौतुक होत आहे. ‘राम-रहीम गणपती’च्या माध्यमातून कळमसरे गावाने एकतेतून समाजाची शक्ती वाढते, असा सुंदर संदेश दिला आहे.

विषुवदिनानिमित्त पोस्टरमधून विद्यार्थ्यांनी मांडल्या ज्वलंत भौगोलिक समस्या सौ. र. ना. देशमुख महाविद्यालयात भूगोल विभागातर्फे पोस्टर स्पर्धेचे आयोजन; २५ विद्यार्थ्यांचा उत्स्फूर्त सहभाग

भडगाव ( प्रतिनिधी) : येथील सौ. र. ना. देशमुख महाविद्यालयाच्या भूगोल विभागातर्फे विषुवदिनानिमित्त दि. २३ सप्टेंबर रोजी विविध भौगोलिक व पर्यावरणीय समस्यांवर आधारित पोस्टर स्पर्धेचे आयोजन करण्यात आले. या स्पर्धेत महाविद्यालयातील तब्बल २५ विद्यार्थ्यांनी उत्स्फूर्त सहभाग नोंदवत आपल्या कल्पकतेतून विविध गंभीर समस्यांकडे लक्ष वेधले.

विद्यार्थ्यांनी साकारलेल्या पोस्टर्समधून हवामान बदल, ओझोन क्षय, पर्वत व जमीन खचणे, अतिवृष्टी, प्रदूषण, वाढती लोकसंख्या, रोगराई तसेच शेतकऱ्यांच्या विविध समस्या यांसारख्या ज्वलंत विषयांचे प्रभावीपणे चित्रण करण्यात आले. पर्यावरणातील बदल, त्याचे मानवी जीवनावर होणारे परिणाम आणि भविष्यातील आव्हाने यांची जाणीव करून देणारे हे पोस्टर विशेष आकर्षण ठरले.

स्पर्धेचे उद्घाटन धनाजी नाना महाविद्यालय, फैजपूर येथील प्रा. डॉ. ईश्वरसिंग ठाकूर यांच्या हस्ते झाले. यावेळी मार्गदर्शन करताना डॉ. ठाकूर यांनी, “भूगोल हा केवळ पृथ्वीच्या भौगोलिक रचनेचा अभ्यास करणारा विषय नसून त्यामध्ये विविध विज्ञान शाखांचा समन्वय आढळतो. निसर्ग हा सर्वश्रेष्ठ असून, अलीकडच्या काळात घडलेल्या विविध भौगोलिक घटनांमधून त्याची प्रचिती येते,” असे प्रतिपादन केले. विद्यार्थ्यांनी विविध सामाजिक व पर्यावरणीय प्रश्न पोस्टरच्या माध्यमातून मांडल्याबद्दल त्यांनी त्यांचे कौतुक केले.

कार्यक्रमाच्या अध्यक्षस्थानी महाविद्यालयाचे प्राचार्य डॉ. एन. एन. गायकवाड होते. कार्यक्रमाचे प्रास्ताविक उपप्राचार्य डॉ. संजय भैसे यांनी केले, तर सूत्रसंचालन डॉ. देवेंद्र मस्की यांनी केले.

स्पर्धेच्या यशस्वितेसाठी प्रा. मोहनदास महाजन व प्रा. कु. उज्वला पाटील यांनी विशेष परिश्रम घेतले. विद्यार्थ्यांच्या सर्जनशीलतेला व्यासपीठ देतानाच पर्यावरण व भूगोलविषयक प्रश्नांबाबत जागरूकता निर्माण करणारा हा उपक्रम महाविद्यालयात उत्साहात संपन्न झाला.

खदाणीत पडलेल्या पिता-पुत्राची पालिका पथकाकडून सुखरूप सुटका… चोपडा रोडवरील घटनेत आरोग्य विभाग व अग्निशमन दलाची तत्परता; कर्मचाऱ्यांनी जीवाची पर्वा न करता केले बचावकार्य…

प्रतिनिधि | अमळनेर : गणेशोत्सवाच्या नवव्या दिवशी चोपडा रोड येथील खदाणीजवळ गणपती विसर्जनासाठी आलेल्या अंदाजे १० ते ११ वर्षांच्या मुलासह त्याचे वडील खदाणीतील पाण्यात पडले. वडिलांचा पाय घसरल्याने त्यांच्या हाताला धरलेला मुलगाही पाण्यात ओढला गेला. घटना घडताच परिसरात उपस्थित नागरिकांमध्ये काही काळ गोंधळाचे वातावरण निर्माण झाले. काही नागरिकांनी नगरपरिषदेला त्याबाबतीत फोनवरून कळवले.

घटना लक्षात येताच सुरक्षेसाठी तैनात असलेल्या नगरपालिका आरोग्य विभागाच्या पथकाने व अग्निशमन दलाच्या जवानांनी तातडीने बचावकार्य सुरू केले.स्वच्छता निरीक्षक संतोष माणिक साहेब यांच्या नेतृत्वाखाली मुकादम नितीन भावलाल बिऱ्हाडे, स्वप्नील विजय बिऱ्हाडे, गौतम सुरेश मोरे, समाधान वसंत केदार, आदर्श सुधाकर सोनवने, प्रवीण आनंदा बिऱ्हाडे, दिनेश अशोक संदानशिव, संदीप भिवसन गढरे, मुकेश अशोक संदानशिव व दीपक निळकंठ संदानशिव व सत्यम संदानशिव यांनी बचावकार्यात सहभाग घेतला. अग्निशमन दलाचे भिका संदानशिव, फारुक शेख व दिनेश बिऱ्हाडे यांनीही तातडीने घटनास्थळी धाव घेत बचावकार्याला हातभार लावला.

या बचावकार्यात प्रामुख्याने स्वच्छता निरीक्षक संतोष माणिक साहेब व मुकादम गोल्डी बिऱ्हाडे यांनी दाखविलेल्या धाडसाचे व तत्परतेचे नागरिकांमधून कौतुक होत आहे. स्वतःच्या जीवाची पर्वा न करता संकटात सापडलेल्या पिता-पुत्राच्या मदतीसाठी त्यांनी घेतलेली धाव आणि बजावलेली भूमिका याबद्दल नागरिकांनी त्यांचे कौतुक व अभिनंदन केले आहे.

पथकातील कर्मचाऱ्यांनी सतर्कता, धाडस व समन्वयाने प्रयत्न करत पिता-पुत्राला पाण्यातून सुखरूप बाहेर काढले.

या बचावकार्यात सहभागी झालेल्या सर्व कर्मचाऱ्यांच्या तत्परतेचे व धाडसाचे नागरिकांमधून कौतुक होत आहे. संकटाच्या प्रसंगी स्वतःच्या जीवाची पर्वा न करता पिता-पुत्राच्या मदतीसाठी धाव घेतल्याबद्दल नागरिकांनी नगरपालिका आरोग्य विभाग व अग्निशमन दलाच्या पथकाचे अभिनंदन केले.