सहा महिन्यात अमळनेर बसस्थानकाचा चेहरामोहरा बदलेल-आ.अनिल पाटील बसस्थानकात विकास कामाचा भूमिपूजन सोहळा उत्साहात

अमळनेर:-सुरवातीला एस टी डेपोतील वर्कशॉप व इतर विकासकामांसाठी आठ कोटी निधी मिळाल्याने ती कामे जवळपास पूर्णत्वास आली आहे,आता पुन्हा अडीच कोटी निधीतून संपूर्ण आगारत पेव्हर ब्लॉक आणि रंगरंगोटीची कामे होणार असल्याने येत्या
सहा महिन्यात अमळनेर बसस्थानकाचा चेहरामोहरा बदलेला दिसेल अशी भावना माजी मंत्री तथा आ.अनिल भाईदास पाटील यांनी भूमिपूजन सोहळ्याप्रसंगी व्यक्त केली.
आमदार अनिल पाटील यांच्या शुभहस्ते अमळनेर बसस्थानकातील विविध विकासकामांच्या द्वितीय टप्प्याचा भव्य भूमिपूजन सोहळा दिनांक 12 ऑक्टोबर रोजी सकाळी आयोजित करण्यात आला होता.याप्रसंगी ते बोलत होते.
प्रवाशांच्या सोयी-सुविधांना नवी दिशा देणाऱ्या या कार्यक्रमात असंख्य मान्यवर व महायुतीचे पदाधिकारी उपस्थित होते.अमळनेर मतदारसंघात दुष्काळ असल्याने आमदार पाटील यांनी सत्कार स्वीकारणे टाळून शेतकरी बांधवाप्रती सदभावना व्यक्त केली.पुढे बोलताना ते म्हणाले की ग्रामिण जनतेसाठी एस टी चे महत्व किती याची कल्पना मला आहे कारण माझी स्वतःची आई दररोज याच एस टी ने आपल्या गावी शेतात जात असते.याआधी बस डेपोची बरीच दुरावस्था असताना राज्य शासनाकडे पाठपुरावा करून आठ कोटी निधी मिळविला.त्यातून पार्किंग परिसर दुरुस्ती वर्कशॉप नूतनीकरण, मॅनेजर ऑफिस,मॅनेजर निवासस्थान नूतनीकरण आदी कामे मार्गी लागून जवळपास पूर्णत्वासही आलीत.त्यानंतर बस आगाराकडे लक्ष वेधून याठिकाणी संपुर्ण परिसरात काँक्रीटीकरण व पेव्हर ब्लॉक व रंगरंगोटी साठी अडीच कोटी निधी मिळविला त्याचेही प्रत्यक्ष काम आज सुरू झाले आहे.
याशिवाय अमळनेर बस आगारात 100 बसेस ची आवश्यकता असताना केवळ 90 बसेस उपलब्ध होत्या त्यातील बहुतांश दुरावस्था झालेल्या होत्या.त्यामुळे शासनाकडे पाठपुरावा करून 20 ते 22 नवीन बसेस उपलब्ध झाल्या असून अजून किमान 50 नवीन बसेस उपलब्ध करण्याचा प्रयत्न सुरू आहे.
यासोबतच बस स्थानकावरून अगदी हाकेच्या अंतरावर नवीन प्रशासकीय इमारत व पंचायत समिती इमारतीचे काम पूर्णत्वास येत असल्याने ग्रामीण भागातील नागरिक बस ने आल्यानंतर पायीच सर्व शासकीय कार्यालयात जाऊन तेथील काम आटोपून सोबतच बाजारही जवळ असल्याने तेथून खरेदी करून बसने लवकर घरी पोहोचू शकेल हेच माझ्यासाठी समाधान असेल असे त्यांनी आवर्जून सांगितले.
यावेळी मंचावर माजी जि प सदस्या सौ जयश्री अनिल पाटील,जेष्ठ नेत्या सौ तिलोत्तमा पाटील,मार्केट सभापती अशोक पाटील,मंगळग्रह संस्थेचे अध्यक्ष डॉ.डिगंबर महाले,राष्ट्रवादी तालुकाध्यक्ष भागवत पाटील,शहराध्यक्ष चेतन राजपूत,सौ रिता बाविस्कर,कामगार नेते एल टी पाटील,युवक जिल्हाध्यक्ष भूषण भदाणे,भाजपचे ऍड व्ही आर पाटील, शीतल देशमुख, उमेश वाल्हे, शहराध्यक्ष योगेश महाजन,शिवसेनेचे विधानसभा क्षेत्रप्रमुख सुरेश अर्जुन पाटील,माजी शहर प्रमुख संजय पाटील,आगार व्यवस्थापक राकेश शिवदे,वाहतूक निरीक्षक मुकेश सैदाने,वरिष्ठ लिपिक तुषार साळुंखे, अमोल पाटील यासह राष्ट्रवादी व महायुतीचे पदाधिकारी, कार्यकर्ते,आजी माजी नगरसेवक,शेतकी संघ व मार्केटचे पदाधिकारी, पत्रकार बांधव तसेच सर्व रापम कर्मचारी व युनियन पदाधिकारी व प्रवासी उपस्थित होते. सूत्रसंचालन कार्यशाळा अधीक्षक प्रमोद बाविस्कर यांनी केले.

विद्यार्थ्यांना दिला भूमीपूजनाचा मान

यावेळी बस स्थानकात मोठ्या संख्येने ग्रामिण भागातील शालेय विद्यार्थी व विद्यार्थिनी उपस्थित असल्याने आमदारांनी त्यांना सन्मानाने बोलावून त्यांच्या हस्ते भूमीपूजनाचे नारळ वाढविण्यात येऊन कामाचा शुभारंभ करण्यात आला.

कृषी संस्कृतीच्या आदर्श मातांच्या कृतज्ञतेचा महोत्सव म्हणजे नवरात्री महोत्सव

शेतीचा शोध लावणाऱ्या महान कर्तबगार मातांचा महोत्सव घटस्थापना..

     ‌‌ आपली प्राचीन संस्कृती आर्या भारतामध्ये येण्याच्या अगोदर फार प्रगत होती. भारतातील पहिली गण माता निऋती मानली जाते. शेतीचा शोध निऋतीने लावला.सिंधू संस्कृतीच्या खोऱ्यात आपली संस्कृती बहरली. तिचे अवशेष शोधले गेले त्यावेळी अप्रतिम नगर रचना, उत्तम शेती, प्रभावी कला असलेली मानवतावादी संस्कृती दिसून आली. निऋत्तीची कन्या दुर्गा नावाने ओळखली जाते. मातृसत्ताक पद्धती असलेले महान राज्य होते. निऋत्ती ही फार मोठा विस्तार असलेल्या प्रदेशाची राणी होती. ती कृषी कन्या होती.तिने सर्वप्रथम तांदुळाची शेती केली. भारतामध्ये अशा अनेक पराक्रमी महिला झाल्या. त्यामध्ये ‌ रेणुका, तुळजा, भवानी, दुर्गा, अंबा, सप्तशृंगी, कालिका, यल्लमा याप्रमाणे विविध नावे आहेत. 

      भारतातील प्रत्येक भागात विविध गुणसंपन्न अशा माता होऊन गेल्या. त्यात काही कृषी संस्कृतीच्या विविध धान्यांचा शोध त्यांनी लावला. काहींनी विविध औषधींचा शोध लावून लोकांची सेवा केली. काही मातांनी दीन, दुबळ्या, वंचित ,गरीब, नादार लोकांची सेवा केली. त्यांच्यावर होणाऱ्या अन्यायाचा प्रखर प्रतिकार केला. काहींनी समाजातील दुष्ट प्रवृत्तीचा नायनाट केला. या महामातांना कृतज्ञता व्यक्त करण्याचा महोत्सव म्हणजे नवरात्र महोत्सव होय. पहिल्या दिवसाला मातीचा घट बसवून त्याच्या आजूबाजूला परडीमध्ये माती टाकून विविध धान्य टाकून पुढील हंगाम कोणता का घेता येईल याची चाचपणी घेण्याचा हा महोत्सव होय. पहिला हंगाम आलेला असतो. त्या हंगामाचा आनंद नवरात्र महोत्सवामध्ये घेतला जातो. विविध पक्वान्न बनवून देवीची पूजा केली जाते.हा महोत्सव फार प्राचीन मानला जातो. पश्चिम बंगाल मध्ये फार मोठ्या प्रमाणात देवीचा महोत्सव साजरा होतो. या महान मातांना मनोभावे अभिवादन करण्याचा हा महोत्सव होय. आपले शरीर म्हणजे घट होय. या विश्वामध्ये खूप चांगले असे निर्मिकाने भरुन ठेवलेले आहे.हया उत्तम गुणांची वाटप घट फोडून केली जाते. अशा चांगल्या गुणांची पेरणी आपल्या महान मातांनी करून ठेवलेली आहे. संत कबीराने मानवी रुपी देहाला घट म्हटलेले आहे. ते म्हणतात “सब घट बसै मेरा साइया,सुनी सेज ना कोय”. प्रत्येक घटात ईश्वर बसलेला आहे. घटातील पाणी म्हणजे आत्मा व घटाबाहेरील विशाल पाणी म्हणजे परमात्मा होय.मरणानंतर आतील पाणी बाहेरच्या पाण्याची मिळते .याचाच अर्थ आत्म्याचे परमात्म्याशी मिलन होणे म्हणजे घट फुटणे होय. घटस्थापना ज्या दिवशी केली जायची त्यादिवशी मातीच्या घटामध्ये पाणी वाढलेले असायचे. या घटातील पाणी पाझरल्याने मातीमधील बी नऊ दिवसांमध्ये उमलून मोठे होत होते. याचप्रमाणे सद विचाराची पेरणी करायची असेल तर चांगला विचाराचा घट वाढलेला असला पाहिजे. नवरात्र म्हणजे नवमातांच्या वैचारिक जागरणाचे दिवस होय. आज या महान मातांचा जागत होण्याऐवजी मोठमोठे मंडळ स्थापन करून नवरात्र महोत्सव साजरा केला जातो. आजच्या महिला हा महोत्सव प्रत्येक दिवसाला विविध रंगाच्या साड्या घालून साजरा करीत असतात. खरा महोत्सव चांगला विचाराची रुजवन करण्याचा आहे. महिलांवरील घडत असलेल्या अन्यायाविरुद्ध आजच्या महिलेने आवाज उठवण्याची गरज आहे. महिलेने दुर्गाप्रमाने स्वाभिमानाने जगले पाहिजे. प्रत्येक महिलेत कोणताही भेद न मानता एकत्रित येऊन समतेने वैचारिक जागरण केले पाहिजे. छत्रपती शिवबाची आई माँसाहेब जिजाऊ यांनी आपल्या मुलाच्या मनामध्ये स्वराज्याची ठिणगी पेटवली होती. आजच्या महिला कर्मकांड करण्यामध्ये धन्यता मानत असतात. पूजा पाठा करण्यापेक्षा आपल्या महापुरुषांनी केलेल्या कार्याची उजळणी केली पाहिजे. सावित्रीबाई फुले यांनी सांगितलेला सत्यशोधक समाजाची कास धरली पाहिजे. सावित्रीबाईंनी महिलांसाठी जीवन समर्पित केले. अशा सावित्रीबाई च्या कार्याचे पारायण झाले पाहिजे.आज आमच्या महिला मनुवाद्यांनी रचलेल्या ग्रंथांचे पारायण करत बसतात. त्यामध्ये वैज्ञानिक दृष्टिकोन नाही, विवेक नाही, समता नाही अशा विचाराला त्या चिटकून बसलेल्या आहे. सावित्रीबाई फुले यांची मालिका बंद होते त्याबाबत कोणत्याही महिलांनी आवाज उठवल्याचे दिसून येत नाही. ज्यांनी आपल्या स्वातंत्र्यासाठी स्वतःच्या आयुष्य बलिदान केले त्या थोर ज्योती सावित्रीचा विचार तेवत ठेवण्याची गरज आहे. घरामध्ये नऊ दिवस तेलाचा दिवा लावण्यापेक्षा माझ्या परीने महिलांमध्ये वैचारिक जागृती करण्याचा वसा त्यांनी घेतला पाहिजे. आमच्या महिला पूजा पाठ करण्याच्या पलीकडे वैज्ञानिक दृष्टिकोनाकडे पोचल्याच नाहीत. आमच्या पूर्वज असलेल्या महिलांनी आपला वेगळा ठसा उमटवला होता. त्यामुळेच आज त्यांच्या कर्तृत्वाचे आम्ही करीत आहोत. काही महिलांनी ज्योती सावित्री चे विचार आपल्या जीवनात आणून इतरांच्या जीवनामध्ये आणण्याचा प्रयत्न त्या करीत आहेत. खऱ्या अर्थाने त्या अभिमानास पात्र आहेत. आपणही आपल्या महान मातांचा आदर्श घेऊया..

अमळनेरमध्ये कचऱ्याचे ढीग; दुर्गंधीने नागरिक त्रस्त! कचराकुंड्या बसवा, नियमित स्वच्छता करा; खासदार स्मिताताई वाघ यांच्याकडे निवेदनाद्वारे मागणी

अमळनेर प्रतिनिधी : अमळनेर शहरातील विविध चौक आणि रस्त्यांवर उघड्यावर टाकला जाणारा कचरा, तो उचलण्यास होणारा विलंब आणि कचराकुंड्यांचा अभाव यामुळे स्वच्छतेचा प्रश्न गंभीर बनला आहे. अनेक ठिकाणी साचलेला कचरा तब्बल सात ते आठ दिवसांपर्यंत उचलला जात नसल्याने परिसरात दुर्गंधी पसरत असून, डास व माश्यांचा प्रादुर्भाव वाढण्याची भीती व्यक्त होत आहे. या समस्येवर तातडीने उपाययोजना करण्यासाठी खासदार स्मिताताई वाघ यांच्याकडे निवेदनाद्वारे मागणी करण्यात आली आहे.

आम आदमी पार्टीचे तालुकाध्यक्ष श्री. महेंद्र (नाना) साळुंके यांच्या माध्यमातून १२ ऑक्टोबर रोजी हे निवेदन सादर करण्यात आले. शहरातील कचऱ्याच्या समस्येबाबत यापूर्वी छायाचित्रांसह नगरपालिका प्रशासनाचे लक्ष वेधण्यात आले होते. तसेच अधिकृत निवेदन देऊनही ठोस कार्यवाही झालेली नसल्याची बाब निवेदनात नमूद करण्यात आली आहे.

शहरातील अनेक प्रमुख चौकांमध्ये कचरा टाकण्यासाठी पुरेशा कचराकुंड्या उपलब्ध नसल्याने नागरिकांकडून उघड्यावर कचरा टाकला जात असल्याचे चित्र आहे. साचलेला कचरा वेळेत उचलला जात नसल्यामुळे परिसरातील स्वच्छतेचा प्रश्न अधिकच गंभीर होत आहे. यामुळे नागरिकांच्या आरोग्याला धोका निर्माण होण्याची शक्यता असून, नगरपालिका प्रशासनाने या समस्येकडे गांभीर्याने लक्ष देण्याची गरज व्यक्त होत आहे.

कचराकुंड्या आणि नियमित स्वच्छतेची मागणी

शहरात ज्या ठिकाणी वारंवार कचरा साचतो, त्या चौकांमध्ये तातडीने कचराकुंड्या बसवाव्यात, कचरा दररोज उचलण्याची प्रभावी व्यवस्था करावी आणि उघड्यावर कचरा टाकण्याच्या समस्येवर योग्य उपाययोजना कराव्यात, अशा प्रमुख मागण्या निवेदनातून करण्यात आल्या आहेत. नागरिकांमध्ये स्वच्छतेबाबत जनजागृती करून शहरातील सार्वजनिक ठिकाणे स्वच्छ ठेवण्यासाठीही प्रयत्न करण्याची आवश्यकता व्यक्त करण्यात आली आहे.

अमळनेर शहर स्वच्छ, सुंदर आणि निरोगी ठेवण्यासाठी केवळ स्वच्छता मोहिमा राबविणे पुरेसे नसून, कचरा संकलन आणि विल्हेवाटीची नियमित व्यवस्था प्रभावीपणे राबविणे आवश्यक आहे. खासदार स्मिताताई वाघ यांनी या समस्येची दखल घेऊन नगरपालिका प्रशासनाला आवश्यक त्या सूचना द्याव्यात आणि नागरिकांना दिलासा मिळवून द्यावा, अशी अपेक्षा निवेदनातून व्यक्त करण्यात आली आहे.

अमळनेरच्या शारदीय व्याख्यानमालेत आशुतोष रारावीकर यांचे ‘नवरंग : अर्थपूर्ण जीवनाचे सूत्र’ या विषयावर व्याख्यान मराठी वाङ्मय मंडळाच्या व्याख्यानमालेत मान्यवरांची उपस्थिती; साहित्यप्रेमींना वैचारिक मेजवानी

अमळनेर प्रतिनिधी : साहित्य क्षेत्रात आपली स्वतंत्र ओळख निर्माण केलेल्या मराठी वाङ्मय मंडळ, अमळनेर यांच्या वतीने आयोजित शारदीय व्याख्यानमालेत रविवार, ११ ऑक्टोबर २०२६ रोजी मुंबई येथील सुप्रसिद्ध अर्थतज्ज्ञ, साहित्यलेखक आणि बहुआयामी व्यक्तिमत्त्व असलेले श्री. आशुतोष रारावीकर यांचे ‘नवरंग : अर्थपूर्ण जीवनाचे सूत्र’ या विषयावर व्याख्यान आयोजित करण्यात आले होते. या व्याख्यानमालेच्या माध्यमातून साहित्य, अर्थविचार आणि जीवनदृष्टी यांचा सुरेख संगम अनुभवण्याची संधी साहित्यप्रेमींना मिळाली.

मराठी वाङ्मय मंडळाच्या वतीने दरवर्षी आयोजित करण्यात येणाऱ्या शारदीय व्याख्यानमालेतून साहित्यिक, सामाजिक, सांस्कृतिक आणि वैचारिक विषयांवर मान्यवर वक्त्यांच्या विचारांना व्यासपीठ उपलब्ध करून दिले जाते. याच परंपरेला पुढे नेत यंदाच्या व्याख्यानमालेत आशुतोष रारावीकर यांच्या व्याख्यानाचे आयोजन करण्यात आले होते. ‘नवरंग : अर्थपूर्ण जीवनाचे सूत्र’ हा विषय जीवनातील विविध पैलू समजून घेण्यासाठी आणि जीवनाकडे व्यापक दृष्टिकोनातून पाहण्यासाठी महत्त्वपूर्ण ठरला.

या सोहळ्यास अमळनेरचे आमदार मा. श्री. अनिल भाईदास पाटील, अमळनेर नगरपरिषदेचे नगराध्यक्ष डॉ. परीक्षित बाविस्कर, उपनगराध्यक्ष मा. श्री. प्रशांत निकम तसेच अमळनेर कृषी उत्पन्न बाजार समितीच्या संचालिका सौ. सुषमा देसले यांची प्रमुख मान्यवर म्हणून उपस्थिती होती.

कार्यक्रमाच्या व्यासपीठावर मराठी वाङ्मय मंडळाच्या वतीने डॉ. अविनाश जोशी, डॉ. रवींद्र कुलकर्णी आणि प्रा. डॉ. यू. जी. देशपांडे उपस्थित होते. व्याख्यानमालेच्या सूत्रसंचालनाची जबाबदारी प्रा. श्याम पवार आणि श्री. भैयासाहेब मगर सर यांनी सांभाळली.

अमळनेरच्या समृद्ध साहित्यिक आणि सांस्कृतिक परंपरेला उजाळा देणाऱ्या या व्याख्यानमालेमुळे शहरातील साहित्यप्रेमींना दर्जेदार वैचारिक कार्यक्रमाचा लाभ घेण्याची संधी मिळाली. साहित्याची आवड जोपासण्याबरोबरच समाजात विचारसंस्कृती रुजविण्याच्या दृष्टीने मराठी वाङ्मय मंडळाचे असे उपक्रम महत्त्वपूर्ण ठरत आहेत.

श्री मंगळग्रह मंदिरात विधिवत घटस्थापना आजपासून श्रीयंत्र व भौमयंत्रावर अर्चन; १९ ऑक्टोबरला नवचंडी यज्ञ

अमळनेर : आश्विन शुद्ध प्रतिपदा अर्थात मंगळ होरा या शुभ मुहूर्तावर रविवार, दि. ११ ऑक्टोबर रोजी श्री मंगळग्रह मंदिरात नवरात्रोत्सवानिमित्त त्रिशुलात्मक भगवान श्री कालभैरव व माता श्री भैरवी यांच्या मंदिरासमोर विधिवत पूजाअर्चा करून घटस्थापना करण्यात आली. यावेळी अतिजागृत भूमिमातेच्या मूर्तीवर सहस्र पुष्पार्चनही करण्यात आले.
घटस्थापनेचे यजमान शुभम वैष्णव गुरुजी सपत्नीक उपस्थित होते. मंदिराचे पुरोहित प्रसाद भंडारी, यश जोशी व तुषार दीक्षित यांनी पौरोहित्य केले. चंद्रकांत जोशी यांनी ढोलकीवर साथ दिली, तर उमेश पाठक यांनी सहकार्य केले. भूमिमातेच्या मूर्तीवर पुरोहित जयेंद्र वैद्य यांनी सहस्र पुष्पार्चन केले. नवरात्रोत्सवानिमित्त मंदिरात विविध फुलांची आकर्षक सजावट करण्यात आली असून, परिसरात भक्तिमय वातावरण निर्माण झाले आहे.

दररोज अर्चन व सामूहिक आरती

सोमवार, दि. १२ ते रविवार, दि. १८ ऑक्टोबरदरम्यान दररोज सकाळी १० ते दुपारी १२.३० या वेळेत विशेष यजमानांच्या हस्ते श्रीयंत्र व भौमयंत्रावर अर्चन करण्यात येणार आहे. तसेच सायंकाळी ६.३० वाजता शहरातील महिला मंडळांच्या वतीने सामूहिक आरती होईल.

१९ ऑक्टोबरला नवचंडी यज्ञ

सोमवार, दि. १९ ऑक्टोबर रोजी नवचंडी यज्ञाचे दोन सत्रांत आयोजन करण्यात आले आहे. पहिले सत्र सकाळी ९ ते दुपारी १२, तर दुसरे सत्र दुपारी २ ते सायंकाळी ५ या वेळेत होईल. सायंकाळी यज्ञाची पूर्णाहुती होणार आहे. या धार्मिक कार्यक्रमांना भाविकांनी मोठ्या संख्येने उपस्थित राहावे, असे आवाहन मंगळग्रह सेवा संस्थेतर्फे करण्यात आले आहे.

अमळनेरचे संपादक श्री. सुरेश हिरामण कांबळे यांना ‘युवा पत्रकार पुरस्कार’ प्रदान! पाचोरा येथे दिमाखात पार पडले महाराष्ट्र राज्य पत्रकार संघाचे ‘उत्तर महाराष्ट्र स्तरीय अधिवेशन – २०२६’

अमळनेर : महाराष्ट्र राज्य पत्रकार संघाच्या वतीने नुकतेच पाचोरा येथे ‘उत्तर महाराष्ट्र स्तरीय अधिवेशन – २०२६’ मोठ्या उत्साहात दि 10 रोजी पार पडले. या अधिवेशनात पत्रकारितेतील निष्ठावान, समर्पित आणि समाजोपयोगी कार्याची दखल घेऊन अमळनेर येथील ‘दिव्य खान्देश’ वृत्तपत्राचे संपादक मा. श्री. सुरेश हिरामण कांबळे यांना प्रतिष्ठित ‘युवा पत्रकार पुरस्कार’ प्रदान करण्यात आला.
पाचोरा विधानसभेचे आमदार किशोर पाटील, संघटनेचे प्रदेशाध्यक्ष निलेश सोमाणी, सरचिटणीस डॉ. विश्वासराव आरोटे, प्रदेश उपाध्यक्ष किशोर रायसाकडा, विभागीय अध्यक्ष डॉ. समाधान मैराळे आणि खान्देश सरचिटणीस डॉ. विजय गाढे यांच्या प्रमुख उपस्थितीत व मान्यवरांच्या हस्ते हा गौरवशाली पुरस्कार श्री. कांबळे यांना सन्मानपूर्वक प्रदान करण्यात आला.
श्री. सुरेश कांबळे यांनी पत्रकारिता क्षेत्रात दीर्घकाळ दाखवलेली निष्ठा, त्यांची उत्तम कार्यशैली आणि समाजाच्या विकासात व हितात दिलेले योगदान अत्यंत प्रेरणादायी आहे. त्यांच्या या उल्लेखनीय कर्तृत्वाची आणि समाजकार्याची दखल घेत महाराष्ट्र राज्य पत्रकार संघाच्या वतीने त्यांना या पुरस्काराने सन्मानित करण्यात आले.
त्यांच्या या यशाबद्दल आणि गौरवशाली कामगिरीबद्दल पत्रकार जगतातून, अमळनेरसह उत्तर महाराष्ट्रातून तसेच विविध क्षेत्रातील मान्यवरांकडून त्यांचे मनःपूर्वक अभिनंदन होत असून, त्यांच्या पुढील यशस्वी वाटचालीस हार्दिक शुभेच्छा देण्यात येत आहेत.

मंगरूळच्या संदीप नेरकर यांची पीएच.डी. पदवीला गवसणी; खान्देश शिक्षण मंडळाच्या शिरपेचात मानाचा तुरा! भौतिकशास्त्रातील संशोधनाला यश; स्व. आबासो अनिल अंबर पाटील माध्यमिक विद्यालयाच्या माजी विद्यार्थ्याचा गौरव

अमळनेर प्रतिनिधी : तालुक्यातील मंगरूळ येथील स्व. आबासो अनिल अंबर पाटील माध्यमिक विद्यालयाचे माजी विद्यार्थी संदीप काशीनाथ नेरकर यांनी कवयित्री बहिणाबाई चौधरी उत्तर महाराष्ट्र विद्यापीठातून भौतिकशास्त्र विषयात पीएच.डी. पदवी प्राप्त करून आपल्या शैक्षणिक यशाचा मान उंचावला आहे. त्यांच्या या यशामुळे मंगरूळ गावासह शैक्षणिक क्षेत्रातून त्यांच्यावर अभिनंदनाचा वर्षाव होत आहे.

संदीप नेरकर यांनी भौतिकशास्त्र विषयात ‘स्टडी ऑफ आयोडाईड, आयोडेट, ऑक्झालेट अँड टार्टारेट क्रिस्टल्स ऑफ द लेड ग्रोन बाय जेल मेथड’ या विषयावर संशोधन प्रबंध सादर केला होता. या संशोधनासाठी त्यांना डॉ. अमित पाटील यांचे मार्गदर्शन लाभले. त्यांच्या संशोधनाची दखल घेत विद्यापीठाचे कुलगुरू डॉ. व्ही. एल. माहेश्वरी यांनी नुकतेच त्यांना पीएच.डी. पदवीचे अधिसूचनापत्र प्रदान केले. या वेळी डॉ. अमित पाटील, प्रा. आकाश चौधरी आणि प्रा. उन्मेष जाधव उपस्थित होते.

मंगरूळमध्ये विशेष सत्कार

संदीप नेरकर यांच्या या उल्लेखनीय यशाबद्दल त्यांच्या मंगरूळ येथील स्व. आबासो अनिल अंबर पाटील माध्यमिक विद्यालयातर्फे त्यांचा विशेष सत्कार करण्यात आला. शालेय जीवनापासून सुरू झालेल्या शैक्षणिक प्रवासात संशोधनाच्या क्षेत्रात पीएच.डी. पदवीपर्यंत मजल मारल्याने त्यांच्या यशाचे सर्वत्र कौतुक होत आहे.

त्यांच्या या यशाबद्दल खान्देश शिक्षण मंडळाचे चेअरमन नीरज अग्रवाल, संचालक मंडळ, प्रताप महाविद्यालयाच्या प्राचार्या, प्राध्यापकवृंद आणि शिक्षकेतर कर्मचाऱ्यांनी अभिनंदन करून पुढील शैक्षणिक व संशोधन क्षेत्रातील वाटचालीस शुभेच्छा दिल्या.

संदीप नेरकर यांच्या या यशामुळे मंगरूळच्या शैक्षणिक क्षेत्राच्या शिरपेचात मानाचा तुरा रोवला गेला असून, त्यांच्या यशाचे विद्यार्थी आणि नवोदित संशोधकांसाठी प्रेरणादायी उदाहरण म्हणून स्वागत होत आहे.

जय मातादी नगर, पारधी वाडा, ताडेपुरा येथील पाणीटंचाईने नागरिक त्रस्त; महिलांचा हंडा मोर्चाचा इशारा… परिसरात आठ-आठ दिवसांआड कमी दाबाने फक्त एक तास पाणीपुरवठा; दोन ते तीन दिवसांत प्रश्न न सुटल्यास मुख्याधिकाऱ्यांच्या दालनात आंदोलन करणार…

प्रतिनिधी | अमळनेर : शहरातील जय मातादी नगर, पारधी वाडा आणि ताडेपुरा परिसरात गेल्या अनेक महिन्यांपासून पाणीपुरवठ्याची समस्या कायम असल्याने नागरिक त्रस्त झाले आहेत. आठ-आठ दिवसांआड होणारा पाणीपुरवठा, त्यातही केवळ एक तास पाणी सोडले जात असल्याने आणि पाण्याचा दाब कमी असल्याने रहिवाशांना पुरेसे पाणी मिळत नसल्याची तक्रार आहे. 

पाण्यासाठी नागरिकांना रात्रीच्या वेळी इतर ठिकाणांहून पाणी भरावे लागत असून, काहींना टँकरद्वारे पाणी मागवावे लागत आहे. वारंवार तक्रारी करूनही समस्येचे निराकरण होत नसल्याने संतप्त झालेल्या महिलांनी नगरपरिषद प्रशासनाला दोन ते तीन दिवसांची मुदत दिली आहे. या कालावधीत पाणीपुरवठा सुरळीत न झाल्यास मुख्याधिकाऱ्यांच्या दालनात हंडा मोर्चा काढण्यात येईल, असा इशारा महिलांनी दिला आहे.

परिसरातील पाणीटंचाईबाबत नागरिकांनी वेळोवेळी नगरपरिषद प्रशासनाकडे तसेच संबंधित व्हॉल्वमनकडे तक्रारी केल्याचे सांगितले. मात्र, त्यानंतरही परिस्थितीत सुधारणा झालेली नसल्याचा आरोप रहिवाशांनी केला आहे. पाणीपुरवठा अनियमित असल्याने घरगुती कामांसाठी आवश्यक पाणी साठवून ठेवताना नागरिकांची दमछाक होत आहे. नियमित पाणी मिळत नसल्यामुळे पर्यायी व्यवस्था करावी लागत असून, त्याचा आर्थिक भारही सहन करावा लागत आहे.

पाणी मिळत नसल्याची तक्रार व्हॉल्वमन विकी महाजन यांच्याकडे केल्यानंतर त्यांनी अरेरावीची भाषा वापरून ‘तुम्हाला जे करायचे ते करा’ असे उत्तर दिल्याचा आरोप स्थानिक रहिवाशांनी केला आहे. तसेच, या समस्येकडे स्थानिक नगरसेवकही लक्ष देत नसल्याची नाराजी नागरिकांनी व्यक्त केली आहे. पाणीपुरवठ्यासारख्या मूलभूत सुविधेचा प्रश्न अनेक महिन्यांपासून प्रलंबित असल्याने संबंधित अधिकारी आणि लोकप्रतिनिधींनी तातडीने लक्ष घालावे, अशी मागणी होत आहे.

पाणीटंचाईच्या समस्येमुळे त्रस्त झालेल्या परिसरातील महिलांनी नगरपरिषद प्रशासनाला दोन ते तीन दिवसांची मुदत दिली आहे. या कालावधीत पाणीपुरवठा नियमित करून पुरेशा दाबाने पाणी उपलब्ध करून न दिल्यास सर्व महिला मुख्याधिकाऱ्यांच्या दालनात हंडा मोर्चा घेऊन येतील, असे त्यांनी स्पष्ट केले आहे.

दरम्यान, नगरपरिषद प्रशासनाने संबंधित पाणीपुरवठा यंत्रणेची तपासणी करून कमी दाबाची कारणे शोधावीत आणि पाणीपुरवठा सुरळीत करण्यासाठी तातडीने उपाययोजना कराव्यात, अशी मागणी नागरिकांकडून होत आहे. महिलांनी दिलेल्या इशाऱ्याच्या पार्श्वभूमीवर प्रशासन या समस्येची कशी दखल घेते, याकडे परिसरातील रहिवाशांचे लक्ष लागले आहे.

डॉ. विवेक बोरसे यांचा स्टॅनफोर्डच्या ‘जगातील टॉप २% शास्त्रज्ञ’ यादीत सलग दुसऱ्या वर्षी समावेश ​विश्लेषणात्मक रसायनशास्त्र आणि वैद्यकीय तंत्रज्ञानातील संशोधनाचा जागतिक गौरव; IIT मुंबईचे माजी विद्यार्थी

​प्रतिनिधी / विशेष वृत्त

वैज्ञानिक संशोधन क्षेत्रात उल्लेखनीय कामगिरी करणारे प्रख्यात संशोधक डॉ. विवेक बोरसे यांनी आंतरराष्ट्रीय स्तरावर पुन्हा एकदा अमळनेरसह भारताचा गौरव वाढवला आहे. जगातील नामांकित स्टॅनफोर्ड विद्यापीठ आणि एल्सेव्हियर (Stanford University–Elsevier) यांच्या संयुक्त विद्यमाने जाहीर करण्यात आलेल्या ‘जगातील अव्वल २% वैज्ञानिकांच्या’ (Top 2% Scientists) प्रतिष्ठित यादीत डॉ. बोरसे यांनी २०२५ आणि २०२६ या सलग दोन वर्षांसाठी आपले स्थान पटकावले आहे.

​विश्लेषणात्मक रसायनशास्त्र (Analytical Chemistry) या विषयातील त्यांच्या बहुमूल्य संशोधन कार्याची दखल घेत ही आंतरराष्ट्रीय मान्यता प्रदान करण्यात आली आहे. या जागतिक यादीत त्यांची संस्थात्मक संलग्नता ‘नॅशनल इन्स्टिट्यूट ऑफ फार्मास्युटिकल एज्युकेशन अँड रिसर्च’ (NIPER), हैदराबाद अशी नोंदवण्यात आली आहे.

​IIT मुंबई ते वैद्यकीय उपकरण उद्योग असा व्यापक प्रवास

​डॉ. विवेक बोरसे यांनी देशातील सर्वोच्च तंत्रशिक्षण संस्था असलेल्या भारतीय तंत्रज्ञान संस्था, मुंबई (IIT Bombay) येथून पीएच.डी. (Ph.D.) पदवी पूर्ण केली आहे. त्यांनी वैद्यकीय तंत्रज्ञान (Medical Technology) या विषयात विशेष प्रावीण्य संपादन केले असून, शैक्षणिक संशोधन आणि वैद्यकीय उपकरण निर्मिती उद्योग (MedTech Industry) या दोन्ही क्षेत्रांत त्यांचा प्रदीर्घ अनुभव आहे. नाविन्यपूर्ण तंत्रज्ञानाचा विकास, अत्याधुनिक वैद्यकीय उपकरणांची रचना आणि प्रयोगशाळेतील संशोधनाची औद्योगिक पातळीवर प्रत्यक्ष अंमलबजावणी या क्षेत्रांत त्यांनी भरीव योगदान दिले आहे.

​संशोधनाचा आंतरराष्ट्रीय प्रभाव अधोरेखित

​स्टॅनफोर्ड विद्यापीठ आणि एल्सेव्हियर यांच्या वतीने दरवर्षी जगभरातील शास्त्रज्ञांच्या संशोधन कार्याचा, शोधनिबंधांचा आणि त्यांच्या जागतिक प्रभावाचा कठोर वैज्ञानिक निकषांवर सखोल अभ्यास करून ही यादी तयार केली जाते. जगभरातील लाखो शास्त्रज्ञांमधून सलग दोन वर्षे अव्वल २ टक्क्यांमध्ये स्थान मिळवणे ही डॉ. बोरसे यांच्या संशोधन प्रवासातील अत्यंत महत्त्वपूर्ण आणि अभिमानास्पद उपलब्धी मानली जात आहे.

​”संशोधनातील प्रगती ही केवळ एका व्यक्तीची नसून सामूहिक प्रयत्न, सहकार्य आणि विचारांची देवाणघेवाण यांतून घडत असते. या टप्प्यापर्यंत पोहोचण्यात मार्गदर्शन करणारे माझे सर्व गुरुजन, सहकारी संशोधक आणि सहकाऱ्यांचा वाटा मोलाचा आहे.”

— डॉ. विवेक बोरसे

​समाजोपयोगी संशोधनाचा मानस

​आपल्या यशाबद्दल समाधान व्यक्त करताना डॉ. बोरसे यांनी आगामी काळातही वैज्ञानिक संशोधनाला अधिक गती देणे, नवनवीन तंत्रज्ञान विकसित करणे आणि संशोधनाचा प्रत्यक्ष लाभ सामान्य समाजाला होईल अशा आरोग्यविषयक तंत्रज्ञानावर भर देण्याचा मानस व्यक्त केला आहे.

​डॉ. बोरसे यांच्या या जागतिक यशामुळे देशातील शैक्षणिक आणि वैज्ञानिक वर्तुळातून त्यांचे कौतुक होत असून, हे यश संशोधन क्षेत्रात नव्याने पदार्पण करणाऱ्या तरुण पिढीसाठी अत्यंत प्रेरणादायी ठरत आहे. डॉ.विवेक बोरसे हे अमळनेर येथील बीएसएनएलचे निवृत्त अधिक्षक श्री. भास्कर बोरसे यांचे सुपुत्र आहेत.

यशवंत आश्रमशाळेला मुंबईत ‘बेस्ट स्कूल – स्टेट बोर्ड’ पुरस्कार ‘स्टार एज्युकेशन अवॉर्ड्स २०२६’मध्ये सन्मान; संस्थेच्या मार्गदर्शनासह शिक्षकांच्या परिश्रमांचा गौरव

अमळनेर प्रतिनिधी : पिंपळे बु. येथील सु. अ. पाटील प्राथमिक व यशवंत माध्यमिक व उच्च माध्यमिक आदिवासी आश्रमशाळेला ‘स्टार एज्युकेशन अवॉर्ड्स २०२६’ अंतर्गत ‘बेस्ट स्कूल – स्टेट बोर्ड’ हा प्रतिष्ठेचा पुरस्कार प्रदान करण्यात आला. मुंबईतील नेस्को, बॉम्बे एक्झिबिशन सेंटर येथे ८ ऑक्टोबर रोजी झालेल्या सोहळ्यात शाळेच्या शैक्षणिक कार्याचा गौरव करण्यात आला. ESFE (Education Supply and Franchise Expo) आणि द टाइम्स ऑफ इंडिया यांच्या संयुक्त विद्यमाने या पुरस्काराचे आयोजन करण्यात आले होते.

शैक्षणिक गुणवत्ता, विद्यार्थ्यांमधील शिस्त, स्वच्छता, संस्कार आणि सर्वांगीण व्यक्तिमत्त्व विकासासाठी राबविण्यात येणाऱ्या उपक्रमांची दखल या पुरस्काराच्या माध्यमातून घेण्यात आली. आदिवासी विद्यार्थ्यांना गुणवत्तापूर्ण शिक्षण देण्यासाठी शाळेने केलेल्या सामूहिक प्रयत्नांना मिळालेली ही महत्त्वपूर्ण पावती मानली जात आहे.

शैक्षणिक वर्ष २०२४-२५ मध्ये महाराष्ट्र शासनाच्या ‘मुख्यमंत्री माझी शाळा, सुंदर शाळा’ उपक्रमात शाळेने अमळनेर तालुक्यात प्रथम क्रमांक मिळविला होता. तसेच एकात्मिक आदिवासी विकास प्रकल्प कार्यालय, यावल अंतर्गत राबविण्यात आलेल्या ‘सुंदर माझी शाळा’ उपक्रमातही प्रथम पुरस्कार प्राप्त केला होता.

शाळेच्या प्रगतीत माध्यमिक मुख्याध्यापक उदय आत्माराम पाटील आणि प्राथमिक मुख्याध्यापक अविनाश अहिरे यांचे नेतृत्व महत्त्वपूर्ण ठरले आहे. संस्थेच्या अध्यक्षा विद्याताई युवराज पाटील, सचिव व शैक्षणिक मार्गदर्शक युवराज पाटील आणि संचालक ॲड. अभिजीतदादा पाटील यांचे मार्गदर्शन लाभत आहे. शिक्षक व शिक्षकेतर कर्मचाऱ्यांच्या परिश्रमांमुळे शाळेने शैक्षणिक, सांस्कृतिक आणि सामाजिक क्षेत्रांत आपली वेगळी ओळख निर्माण केली आहे.

या यशाबद्दल संस्थेचे पदाधिकारी, मुख्याध्यापक, शिक्षक व शिक्षकेतर कर्मचाऱ्यांचे सर्व स्तरांतून अभिनंदन होत आहे. हा पुरस्कार शाळेच्या पुढील शैक्षणिक वाटचालीसाठी प्रेरणादायी ठरणार आहे.