अमळनेरात बनावट दूध निर्मितीचा कारखाना उध्वस्त जानवे–इंदा पिंपरी रस्त्यावरील पत्री शेडमध्ये सुरू होता भेसळीचा गोरखधंदा; FDA व पोलिसांची संयुक्त कारवाई, २७ वर्षीय आरोपी रंगेहात अटक
अमळनेर : शहरासह परिसरात बनावट व भेसळयुक्त दूध विक्रीचा संशयास्पद प्रकार सुरू असल्याची गुप्त
माहिती मिळाल्यानंतर अन्न व औषध प्रशासन विभाग आणि अमळनेर पोलिसांनी संयुक्तपणे धडक कारवाई करत बनावट दूध निर्मितीचा प्रकार उघडकीस आणला. जानवे–इंदा पिंपरी रस्त्यावर एका पत्री शेडमध्ये सुरू असलेल्या या कथित बनावट दूध निर्मितीच्या ठिकाणावर छापा टाकून पोलिसांनी महेश दिलीप पाटील (वय २७) याला रंगेहात ताब्यात घेतले.
ही कारवाई ३० ऑगस्ट रोजी दुपारी सुमारे ३ वाजता करण्यात आली. या कारवाईमुळे परिसरात भेसळयुक्त दूध तयार करून नागरिकांच्या आरोग्याशी खेळणाऱ्यांमध्ये खळबळ उडाली आहे.
गुप्त माहितीवरून कारवाईला वेग
जानवे–इंदा पिंपरी रस्त्यावर पत्री शेडमध्ये दूध तयार करण्याच्या नावाखाली भेसळीचा प्रकार सुरू असल्याची गुप्त माहिती अमळनेर पोलिसांना मिळाली होती. त्यानंतर पोलीस निरीक्षक दत्तात्रय निकम यांनी तत्काळ अन्न व औषध प्रशासन विभागाचे अधिकारी आकाश बोराडे यांच्याशी संपर्क साधून संयुक्त कारवाईचे नियोजन केले.
मिळालेल्या माहितीची खातरजमा करून अन्न व औषध प्रशासन विभागाच्या अधिकाऱ्यांसह अमळनेर पोलिसांच्या पथकाने संबंधित ठिकाणी छापा टाकला. यावेळी पत्री शेडमध्ये दूध तयार करण्यासाठी व भेसळ करण्यासाठी वापरले जाणारे साहित्य आढळून आले.
मिक्सर, सोयाबीन तेल, लोखंडी कॅनसह साहित्य जप्त
कारवाईदरम्यान घटनास्थळावरून मिक्सर, सोयाबीन तेल, लोखंडी कॅन, गाईचे दूध तसेच भेसळ करण्यासाठी वापरले जाणारे इतर साहित्य जप्त करण्यात आले. या साहित्याच्या आधारे संबंधित ठिकाणी दूध निर्मिती व त्यामध्ये भेसळ केली जात असल्याचा संशय व्यक्त करण्यात आला आहे.
अन्न व औषध प्रशासन विभागाने घटनास्थळावरील साहित्याची तपासणी करून आवश्यक ती कार्यवाही केली आहे. नागरिकांच्या आरोग्याशी संबंधित असलेल्या दूध पदार्थात भेसळ होत असल्याचा प्रकार समोर आल्याने या कारवाईकडे गांभीर्याने पाहिले जात आहे.
आरोपी रंगेहात ताब्यात
या कारवाईत महेश दिलीप पाटील (वय २७) याला पोलिसांनी रंगेहात ताब्यात घेतले. अन्न व औषध प्रशासन विभागाचे अधिकारी आकाश बोराडे यांच्या फिर्यादीवरून संबंधित आरोपीविरुद्ध अन्नसुरक्षा व मानके कायद्यांतर्गत गुन्हा दाखल करण्यात आला असून त्याला अटक करण्यात आली आहे.
या कारवाईमुळे अमळनेर परिसरात दूध व दुग्धजन्य पदार्थांची विक्री करणाऱ्या व्यावसायिकांमध्येही खळबळ उडाली आहे. नागरिकांच्या आरोग्याशी खेळणाऱ्या भेसळखोरांवर कठोर कारवाई करण्याची गरज असल्याची मागणीही नागरिकांकडून होत आहे.
भेसळखोरांवर पोलिस-प्रशासनाचा वॉच
दूध हा नागरिकांच्या दैनंदिन आहारातील महत्त्वाचा घटक असल्याने त्यामध्ये भेसळ करून नागरिकांच्या आरोग्याला धोका निर्माण करणाऱ्यांविरोधात अन्न व औषध प्रशासनाने कठोर पावले उचलण्याची आवश्यकता आहे. अमळनेर पोलिसांनी मिळालेल्या गुप्त माहितीची दखल घेत FDA विभागाशी समन्वय साधून केलेल्या या कारवाईमुळे भेसळखोरांवर प्रशासनाचा वॉच असल्याचे स्पष्ट झाले आहे.
दरम्यान, या प्रकरणाचा पुढील तपास हेड कॉन्स्टेबल सुनील जाधव करीत आहेत. तपासादरम्यान या कथित बनावट दूध निर्मितीमागे आणखी कोणी सहभागी आहे का, तसेच तयार केलेले दूध कुठे व कशा पद्धतीने विक्री केले जात होते, याबाबत माहिती समोर येण्याची शक्यता आहे.
