अमळनेर शहरात मोकाट जनावरे आणि भटक्या कुत्र्यांचा सुळसुळाट वाहनधारकांची कसरत; बालके, विद्यार्थी व वृद्धांच्या सुरक्षिततेचा प्रश्न — नगरपालिका प्रशासनाने तातडीने उपाययोजना करण्याची मागणी
अमळनेर, जि. जळगाव : अमळनेर शहरातील प्रमुख रस्ते, चौक तसेच वर्दळीच्या परिसरात मोकाट जनावरांचा वावर मोठ्या प्रमाणावर वाढला असून, रस्त्याच्या मधोमध ठाण मांडून बसणाऱ्या जनावरांमुळे वाहनधारकांना मोठी कसरत करावी लागत आहे. अचानक जनावरे रस्त्यावर आल्याने अपघाताचा धोका निर्माण झाला असून, शहरातील वाहतूक व्यवस्थेवरही त्याचा परिणाम होत आहे.
यासोबतच शहरात भटक्या कुत्र्यांचाही सुळसुळाट वाढल्याने नागरिकांमध्ये भीतीचे वातावरण निर्माण झाले आहे. विशेषतः लहान बालके, शाळकरी विद्यार्थी, महिला आणि वृद्ध नागरिकांना कुत्र्यांच्या त्रासाला सामोरे जावे लागत आहे. अनेक ठिकाणी कुत्र्यांचे कळप फिरताना दिसत असून, नागरिकांच्या सुरक्षिततेचा प्रश्न गंभीर बनला आहे.
शाळा, बाजारपेठ, रुग्णालये तसेच रहिवासी भागात नागरिकांची मोठी वर्दळ असते. अशा ठिकाणी मोकाट जनावरे आणि भटक्या कुत्र्यांचा वावर धोकादायक ठरू शकतो. त्यामुळे एखादी गंभीर दुर्घटना घडण्यापूर्वी नगरपालिका प्रशासनाने याकडे गांभीर्याने लक्ष देणे गरजेचे आहे.
मोकाट जनावरांचा बंदोबस्त, भटक्या कुत्र्यांवर निर्बिजीकरणाची प्रभावी मोहीम, तसेच नागरिकांच्या तक्रारींसाठी तत्काळ प्रतिसाद देणारी यंत्रणा उभारावी, अशी मागणी शहरातील नागरिकांकडून होत आहे. प्रशासनाने केवळ तात्पुरती कारवाई न करता या समस्येवर कायमस्वरूपी उपाययोजना कराव्यात, अशी अपेक्षा व्यक्त होत आहे.
नागरिकांच्या जीविताची सुरक्षितता ही प्रशासनाची प्राथमिक जबाबदारी असून, अमळनेर नगरपालिका प्रशासन आता तरी जागे होणार का? असा सवाल संतप्त नागरिकांकडून उपस्थित केला जात आहे.
