पाणीटंचाईच्या संकटात नगरसेवक दीपक चौगुले यांची धावपळ; प्रभाग ६ मध्ये टँकरद्वारे पाणीपुरवठा सुरू

अमळनेर | प्रतिनिधी

अतिवृष्टीमुळे अमळनेर शहरातील पाणीपुरवठा व्यवस्था गेल्या काही दिवसांपासून विस्कळीत झाली असून, अनेक भागांतील नागरिकांना पाणीटंचाईच्या गंभीर समस्येला सामोरे जावे लागत आहे. या बिकट परिस्थितीत प्रभाग क्रमांक ६ चे नगरसेवक दीपक भाऊ चौगुले यांनी नागरिकांच्या मदतीसाठी पुढाकार घेत टँकरद्वारे पाणीपुरवठा सुरू केला आहे.

गेल्या पंधरा दिवसांपासून प्रभाग क्रमांक ६ मधील विविध कॉलनी तसेच परिसरात गरजेनुसार टँकरद्वारे पाणीपुरवठा केला जात आहे. नागरिकांना पाण्यासाठी दूरवर भटकंती करावी लागू नये आणि त्यांच्या दैनंदिन गरजा सुरळीतपणे पूर्ण व्हाव्यात, यासाठी दीपक भाऊ चौगुले हे आपल्या भाऊ मित्र मंडळाच्या सहकाऱ्यांसह सातत्याने प्रयत्नशील आहेत.

दिवस असो वा रात्र, नागरिकांकडून पाण्याची मागणी होताच परिस्थितीचा आढावा घेऊन आवश्यक त्या ठिकाणी टँकर उपलब्ध करून देण्याचे काम सुरू आहे. अतिवृष्टीमुळे निर्माण झालेल्या या पाणीटंचाईच्या संकटात नागरिकांच्या मदतीला प्रत्यक्ष धावून जात मदतकार्य सुरू ठेवल्याने दीपक भाऊ चौगुले यांच्या कार्याचे परिसरातील नागरिकांकडून कौतुक होत आहे.

प्रभागातील नागरिकांना तातडीने पाणी उपलब्ध करून देण्यासाठी टँकरची व्यवस्था सातत्याने सुरू ठेवण्यात आली असून, शहरातील पाणीपुरवठा पूर्ववत होईपर्यंत नागरिकांना शक्य ती सर्व मदत करण्याचा प्रयत्न सुरूच राहील, असे नगरसेवक दीपक भाऊ चौगुले यांनी सांगितले.

अतिवृष्टीच्या काळात निर्माण झालेल्या पाणीटंचाईच्या संकटात प्रशासनाच्या पाणीपुरवठा व्यवस्थेला पूरक ठरत नागरिकांच्या दारापर्यंत पाणी पोहोचविण्याचा उपक्रम सुरू असल्याने प्रभाग क्रमांक ६ मधील नागरिकांना मोठा दिलासा मिळत आहे.

अमळनेरात अतिवृष्टी बाधितांना आमदार अनिल पाटील यांच्या हस्ते किराणा किटचे वाटप

बाधित कुटुंबांना पुढील आठवड्यात मिळणार दहा हजारांची मदत-आमदारांची माहिती

अमळनेर:- तालुक्यात ३१ जुलै २०२६ रोजी झालेल्या अतिवृष्टीमुळे आणि पुरामुळे नुकसान झालेल्या नगरपरिषद हद्दीतील बाधित नागरिकांना जीवनावश्यक वस्तू आणि किराणा किटचे वाटप काल शुक्रवार, दिनांक १४ ऑगस्ट रोजी माजी मंत्री तथा आमदार अनिल पाटील यांच्या हस्ते प्राथमिक स्वरूपात वाटप करून वाटपाचा शुभारंभ करण्यात आला.

      यावेळी आमदारांनी बांधीत भागातील प्रत्येक केंद्रावर जाऊन किटचे वाटप केल्यानंतर बाधित नागरिकांशी संवाद साधत पुढील आठवड्यात प्रत्येक बाधित कुटुंबास शासनाकडून दहा हजारांची मदत दिलेल्या बँक खात्यावर जमा होईल असे संकेत दिले.दरम्यान बाधित कुटुंबाचे पंचनामे झाल्यानंतर तहसिलदार तथा तालुका दंडाधिकारी, अमळनेर यांच्या कार्यालयाकडून किराणा किट वाटपाचे आदेश पारित करण्यात आले होते.सदर किट वाटप करताना आमदार पाटील यांच्या सोबत प्रांताधिकारी मयूर भंगाळे,न प चे मुख्याधिकारी गणेश शिंदे यासह प्रशासनातील प्रमुख अधिकारी उपस्थित होते.

       बाधित नागरिकांना मदत मिळण्यास सोयीचे व्हावे, यासाठी शहरातील ८ विविध ठिकाणी केंद्र करण्यात आले होते.

भोई समाज मंगल कार्यालय, पैलाड,शहरी आरोग्यवर्धिनी केंद्र,ताडेपुरा,डॉ. बाबासाहेब आंबेडकर सभागृह, गांधलीपुरा,संत सखाराम महाराज वाडी,शिवाजी विद्या मंदिर, तांबेपुरा,क्षत्रिय कांचमाळी पंचमढी, बहादरपूर नाका रोड,शिवम कुटी बोर्डाजवळ, झामी चौक,विद्या विहार कॉलनी गेटजवळ आदी केंद्रांवर हे वाटप करण्यात आले.सुमारे 1700 पेक्षा अधिक कुटुंबाना ही मदत मिळाली असून या वाटप प्रक्रियेत प्रति बाधित कुटुंबास एक किराणा किट देण्यात आले आणि मदत देताना लाभार्थ्यांचा फोटो आणि वाटप केल्याबाबतची स्वाक्षरी घेण्यात आली.

      यावेळी नगरसेवक भरतकुमार ललवाणी,शोभाबाई गढरे,नरेंद संदानशिव,विजय कहारु पाटील,सचिन पाटील,देवेंद्र कांबळे,मुक्तार खाटीक,संजय कौतीक पाटील,विजय पाटील,दुर्गेश पाटील,विनोद लांबोळे,देविदास महाजन,दिनेश शेलकर,शांताराम महाजन,प्रविण महाजन,गंगाराम महाजन,भुषण भदाणे,वेद पाटील तसेच राष्ट्रवादी शहराध्यक्ष चेतन राजपूत,जितेंद्र ठाकुर यासह पदाधिकारी व कार्यकर्ते उपस्थित होते.

वंचित कुटुंबांनाही मिळणार मदत

     सदर प्रक्रियेत बाधित झालेल्या काही बाधित कुटुंबांची नावे मदतीच्या यादीत नसल्याचे निदर्शनास आल्यानंतर आमदारांनी प्रांताधिकारी तसेच जिल्हाधिकारी यांचेशी मोबाईलवरून संवाद साधत लवकरच या कुटुंबाना देखील किराणा किट उपलब्ध करून घ्यावेत अश्या सूचना केल्या.

स्वातंत्र्य दिनानिमित्त उद्या अंधजन कल्याण मंडळाचा भव्य चॅरिटी संगीत मैफिलीचा कार्यक्रम

अंध बंधवांच्या मदतीसाठी अंध कलाकार देणार अमळनेरकराना संगीत मेजवानी…” 

अमळनेर:- स्वातंत्र्य दिनानिमित्त दृष्टिदिव्यांग कलाकारांना प्रोत्साहन देण्यासाठी अंधजन कल्याण मंडळाच्या वतीने भव्य चॅरिटी संगीत मैफिलीचे आयोजन आज दिनांक 15 ऑगस्ट रोजी करण्यात आले आहे.

         या मौफिलीचे वैशिट्य म्हणजे सर्व कलाकार दृष्टिहीन व शासकीय सेवेतील असून केवळ आपल्या अंध बांधवांच्या मदतीसाठी त्यांनी हे पाऊल टाकले आहे.हा कार्यक्रम शनिवार, दि. 15 ऑगस्ट रोजी सायंकाळी 6.00 वाजता छत्रपती शिवाजी नाट्यगृह, स्टेशन रोड, अमळनेर येथे होणार आहे. सप्तस्वरांजली म्युझिकल ग्रुप यांच्या वतीने देशभक्तीपर, मराठी, हिंदी तसेच अहिराणी सदाबहार गीतांचा कार्यक्रम सादर करण्यात येणार आहे.

        दृष्टिदिव्यांग कलाकारांच्या कला, कौशल्य आणि स्वयोरोजगार करणाऱ्या अंध व्यक्तींच्या स्वावलंबनाला चालना देणे हा यामागील मुख्य उद्देश आहे. कार्यक्रमातून प्राप्त होणारा निधी दृष्टिदिव्यांग बांधवांच्या शिक्षण, आरोग्य, स्वयोरोजगार, कौशल्य विकास तसेच विविध सामाजिक कल्याणकारी उपक्रमांसाठी वापरण्यात येणार आहे.तरी या सामाजिक उपक्रमात सर्व नागरिक, उद्योजक, व्यापारी, संस्था आणि दानशूर व्यक्तींनी सहभाग नोंदवावा. चॅरिटी शोचे तिकीट शुल्क फक्त ₹100/- ठेवण्यात आले आहे.तरी नागरिकांनी कुटुंबासह उपस्थित राहून दृष्टिदिव्यांग कलाकारांच्या कलागुणांना प्रोत्साहन द्यावे, असे आवाहन करण्यात आले आहे.