दिवाळीच्या पार्श्वभूमीवर नगरपालिका प्रशासन ॲक्शन मोडवर; शहरातील १८ प्रभागांत विशेष स्वच्छता मोहीम सुरू! नगराध्यक्ष डॉ. परीक्षित बाविस्कर, मुख्याधिकारी गणेश शिंदे यांच्या मार्गदर्शनाखाली स्वच्छतेसाठी यंत्रणा मैदानात
अमळनेर : दिवाळी सणाच्या पार्श्वभूमीवर शहर स्वच्छ, सुंदर आणि आरोग्यदायी राहावे, यासाठी नगरपालिका प्रशासन ॲक्शन मोडवर आले असून शहरातील प्रभाग क्रमांक १ ते १८ मध्ये विशेष स्वच्छता मोहीम राबविण्यात येत आहे. नगरपालिकेच्या दि. २६ ऑक्टोबर २०२६ रोजीच्या आदेशानुसार ही विशेष मोहीम सुरू करण्यात आली आहे.
दिवाळीच्या काळात शहरातील बाजारपेठा, प्रमुख रस्ते, अंतर्गत मार्ग तसेच सार्वजनिक ठिकाणी नागरिकांची वर्दळ वाढते. या पार्श्वभूमीवर शहरातील स्वच्छतेला प्राधान्य देत नगरपालिका प्रशासनाने सर्व १८ प्रभागांमध्ये स्वच्छता यंत्रणा कार्यान्वित केली आहे. परिसरातील स्वच्छता, कचरा संकलन आणि सार्वजनिक ठिकाणांची साफसफाई यावर विशेष लक्ष केंद्रित करण्यात येत आहे.
ही मोहीम लोकनियुक्त नगराध्यक्ष डॉ. परीक्षित बाविस्कर, मुख्याधिकारी गणेश शिंदे, उपनगराध्यक्ष प्रशांत निकम आणि आरोग्य सभापती रामकृष्ण पाटील यांच्या मार्गदर्शनाखाली राबविण्यात येत आहे. स्वच्छता निरीक्षक संतोष बिऱ्हाडे, किरण कंडारे व संतोष जाधव हे मोहिमेच्या अंमलबजावणीवर लक्ष ठेवून आहेत.
सणासुदीच्या काळात शहरातील स्वच्छता व्यवस्था अधिक सक्षम ठेवण्याच्या दृष्टीने नगरपालिका प्रशासनाने पुढाकार घेतला असून नागरिकांनाही आपल्या परिसरात स्वच्छता राखण्याचे आवाहन करण्यात येत आहे. दिवाळीच्या पार्श्वभूमीवर सुरू करण्यात आलेल्या या विशेष स्वच्छता मोहिमेमुळे शहरातील स्वच्छतेला अधिक गती मिळण्याची अपेक्षा व्यक्त होत आहे.
