सुरक्षित बालपण, सुरक्षित कार्यस्थळ! ‘पॉक्सो’ अन् ‘पॉश’ कायद्यांवर विद्यार्थ्यांना मार्गदर्शन

भडगाव प्रतिनिधी : बालकांचे संरक्षण आणि कार्यस्थळावरील महिलांच्या सुरक्षिततेविषयी कायदेशीर जाणीव निर्माण करण्याच्या उद्देशाने भडगाव येथील सौ. र. ना. देशमुख कला, वाणिज्य व विज्ञान महाविद्यालयात गुरुवार, दि. १६ ऑक्टोबर २०२६ रोजी ‘पॉक्सो’ आणि ‘पॉश’ या महत्त्वपूर्ण कायद्यांवर विशेष मार्गदर्शन शिबिराचे आयोजन करण्यात आले.

या शिबिरात भडगाव सत्र न्यायालयातील वकील ॲड. नीलेश तिवारी यांनी विद्यार्थ्यांना दोन्ही कायद्यांविषयी सविस्तर व अभ्यासपूर्ण मार्गदर्शन केले. त्यांनी बालकांचे लैंगिक अत्याचारांपासून संरक्षण करणारा पॉक्सो कायदा आणि कार्यस्थळावरील महिलांच्या लैंगिक छळास प्रतिबंध करणारा पॉश कायदा यांची माहिती सोप्या व प्रभावी भाषेत समजावून सांगितली. कायद्याच्या तरतुदींसोबतच त्यांचा सामाजिक संदर्भ स्पष्ट करत त्यांनी विद्यार्थ्यांमध्ये कायद्याविषयी जागरूकता निर्माण केली.

व्याख्यानादरम्यान विद्यार्थ्यांनी विचारलेल्या विविध प्रश्नांना ॲड. तिवारी यांनी समर्पक उत्तरे देत त्यांच्या शंकांचे निरसन केले. सुरक्षित वातावरण निर्माण करण्यासाठी कायद्याची माहिती असणे, अन्यायाविरुद्ध आवाज उठवणे आणि प्रत्येकाने आपल्या अधिकारांसोबत कर्तव्यांचीही जाणीव ठेवणे आवश्यक असल्याचा संदेश या मार्गदर्शनातून देण्यात आला.

कार्यक्रमाच्या अध्यक्षस्थानी महाविद्यालयाचे उपप्राचार्य डॉ. संजय भैसे होते. कार्यक्रमाचे प्रास्ताविक व प्रमुख पाहुण्यांचा परिचय डॉ. देवेंद्र मस्की यांनी करून दिला. सूत्रसंचालन डॉ. चित्रा पाटील यांनी केले, तर आभार प्रदर्शन डॉ. बी. एस. भालेराव यांनी मानले. राष्ट्रगीताने या मार्गदर्शन शिबिराची सांगता झाली.

कायद्याची माहिती, सुरक्षिततेची जाणीव आणि सामाजिक जबाबदारीचा संदेश देणारे हे शिबिर विद्यार्थ्यांसाठी मार्गदर्शक ठरले.

सेवा संकल्प अभियानातून गरजुना तात्काळ आणि सहज लाभ – माजी नगराध्यक्ष जयश्री पाटील अमळनेर तालुक्यात ९६० लाभार्थ्यांना लाभ वाटप

अमळनेर : सेवा संकल्प अभियानातून गरजू आणि पात्र लाभार्थ्यांना सहजपणे शासनाच्या विविध योजनांचे लाभ मिळत आहेत. खऱ्या अर्थाने जनतेपर्यंत शासकीय योजना पोहचत आहेत. काही योजना नोंदी न आढळल्याने वयाच्या दाखल्याबाबत अडचणी येतात या अभियानातून शासनाने मार्ग काढून ऑफ लाईन दाखल्याची सुविधा द्यावी अशी अपेक्षा माजी नगराध्यक्ष जयश्री पाटील यांनी इंदिरा भुवन मध्ये सेवा संकल्प अभियानात बोलताना व्यक्त केली.
पंतप्रधान नरेंद्र मोदी यांच्या संविधानिक पदास २५ वर्षे पूर्ण झाल्याबद्दल १६ सप्टेंबर ते १६ ऑक्टोबर दरम्यान सेवा संकल्प अभियान राबवण्यात येत आहे. अमळनेर तालुक्यातील सर्व विभागांचे सेवा संकल्प अभियान १६ रोजी इंदिरा भुवन येथे आयोजित करण्यात आले होते. यावेळी सुमारे ९६० लाभार्थ्यांना लाभ देण्यात आला. प्रमुख अतिथी म्हणून माजी नगराध्यक्ष जयश्री पाटील , उपविभागीय अधिकारी मयुर भंगाळे , तहसीलदार डॉ उमा ढेकळे , निवासी नायब तहसीलदार सी यु पाटील , तालुका कृषी अधिकारी सी आर ठाकरे , बालविकास प्रकल्प अधिकारी प्रेमलता पाटील ,भूमिअभिलेख उपअधिक्षक सीमा गावित , मुख्याधिकारी गणेश शिंदे , नायब तहसीलदार अजय कुलकर्णी,पुरवठा निरीक्षण अधिकारी रुकसाना शेख हजर होते.
जयश्री पाटील पुढे म्हणाल्या की प्रशासन जनसेवेसाठी तत्पर आहे गतिमान झाले आहे. काही तांत्रिक अडचणी आल्यास प्रशासन व आमच्याशी संपर्क साधावा असे आवाहन देखील जयश्री पाटील यांनी केले.
या अभियानात नवीन शिधापत्रिका २२ ,दुबार शिधापत्रिका ८ , नाव कमी करणे १८ ,धान्य लाभार्थी ५५० ,राष्ट्रीय कुटुंब अर्थसहाय्य धनादेश ६ ,३५ लोकांची डीबीटी प्रक्रिया पूर्ण करण्यात आली. हयात प्रमाणपत्रे ८० , संजय गांधी योजना ११० , इंदिरा गांधी योजना २२ , श्रावण बाळ योजना २४ , १३४ प्रकरणे फेरफार निकाली काढले , १४ प्रकरणे सात बारा दुरुस्ती , ८ अ ची आठ प्रकरणे , ८४ जणांना ७-१२ वाटप करण्यात आले , ४९ उत्पन्नचे दाखले वितरण करण्यात आले. राष्ट्रीय प्रमाणपत्र वितरण १९ , रहिवासी प्रमाणपत्र ४१ , जातीचे दाखले वितरण १६ , आधार नोंदणी ८ व आधार दुरुस्ती सहा , ५० लाभार्थ्यांना बेबी किट तर १२ विविध प्रकारचे खाद्य नमुने , ८ महिला बचत गट , ४ जणांना अवजार वाटप , ४९ महिलांना शेतकरी प्रमाणपत्र , १० जणांना नवीन वीज कनेक्शन देण्यात आले , २६ जणांना आयुष्यमान कार्ड वाटप करण्यात आले , ६० महिलांना मोफत पास , २६ जणांचे बचत खाती , ८ महिलांना सन्मान निधी , १ मुद्रांक शुल्क आणि १० के वाय सी असे एकूण ९६० लाभार्थ्यांना लाभ देण्यात आले.
यावेळी प्रास्ताविक प्रांताधिकारी मयुर भंगाळे यांनी तर सूत्रसंचालन आणि आभार संजय पाटील यांज मानले. शिबीर यशस्वीतेसाठी मंडळाधिकारी नरेंद्रकुमार धनराळे , ग्राम महसूल अधिकारी अशपाक पिंजारी , जगदीश पाटील , विद्या पाटील , दीपक बोरसे , सूर्यवंशी , सचिन निकम यांनी सहकार्य केले.

कल्पकतेला लाभले व्यासपीठ; विद्यार्थ्यांच्या कलाविष्काराने सायरदेवी बोहरा सेंट्रल स्कूलचे प्रदर्शन ठरले लक्षवेधी! आमदार अनिल पाटील यांच्या हस्ते आर्ट अँड क्राफ्ट एक्झिबिशनचे उद्घाटन; चिमुकल्यांच्या सृजनशीलतेचे मान्यवरांकडून कौतुक

अमळनेर प्रतिनिधी : विद्यार्थ्यांच्या कल्पनाशक्तीला सृजनशीलतेची जोड मिळाली, मेहनतीतून कलाकृती साकारल्या आणि विविध विषयांवरील नाविन्यपूर्ण प्रकल्पांतून बालप्रतिभेचा अनोखा आविष्कार घडला. अशा उत्साहपूर्ण वातावरणात अमळनेर येथील सायरदेवी बोहरा सेंट्रल स्कूलमध्ये आयोजित आर्ट अँड क्राफ्ट एक्झिबिशन लक्षवेधी ठरले. आमदार अनिल पाटील यांच्या हस्ते या प्रदर्शनाचे उद्घाटन करण्यात आले.

या प्रदर्शनात विद्यार्थ्यांनी विविध विषयांवर आधारित प्रकल्प, आकर्षक कलाकृती आणि कल्पकतेतून साकारलेल्या प्रतिकृतींचे सुंदर सादरीकरण केले. लहान वयातच विद्यार्थ्यांनी दाखवलेली कलात्मक दृष्टी, कल्पनाशक्ती, मेहनत आणि विषयांची मांडणी उपस्थितांचे लक्ष वेधून घेणारी ठरली. प्रत्येक कलाकृतीतून विद्यार्थ्यांची जिज्ञासा, निरीक्षणशक्ती आणि काहीतरी वेगळे निर्माण करण्याची धडपड दिसून आली.

आमदार अनिल पाटील यांनी प्रदर्शनाची पाहणी करून विद्यार्थ्यांनी साकारलेल्या विविध प्रकल्पांचे कौतुक केले. विद्यार्थ्यांच्या सुप्त कलागुणांना वाव देणारे आणि त्यांच्या सृजनशीलतेला हक्काचे व्यासपीठ उपलब्ध करून देणारे असे उपक्रम शैक्षणिक विकासाच्या दृष्टीने महत्त्वपूर्ण असल्याचे त्यांनी अधोरेखित केले. विद्यार्थ्यांनी इतक्या लहान वयात कल्पकतेने आणि मेहनतीने साकारलेल्या कलाकृती पाहून त्यांनी समाधान व्यक्त केले.

केवळ पाठ्यपुस्तकांपुरते शिक्षण मर्यादित न ठेवता विद्यार्थ्यांच्या कलागुणांना प्रोत्साहन देणे, त्यांच्यातील सर्जनशीलता विकसित करणे आणि स्वतःच्या कल्पना प्रत्यक्ष कृतीत उतरवण्याची संधी उपलब्ध करून देणे, हा या प्रदर्शनाचा महत्त्वपूर्ण पैलू ठरला. विद्यार्थ्यांच्या प्रयत्नांना व्यासपीठ मिळाल्याने त्यांचा आत्मविश्वास वाढण्यासही मदत झाली.

या प्रसंगी शाळेचे चेअरमन सुरेंद्रकुमार बोहरा, रोटरी क्लबचे अध्यक्ष महेश पाटील, शेतकी संघाचे संचालक विक्रांत पाटील, शाळेचे प्राचार्य जितेंद्र सिंग, पारोळा शाळेच्या प्राचार्या रियांका अरझरे, चित्रकार आधार बिऱ्हाडे, प्रवीण संदानशिव, हृदयनाथ मोरे, शरद पाटील आदी मान्यवर उपस्थित होते.

प्रदर्शनाच्या यशस्वितेसाठी शाळेच्या कला विभागाने महत्त्वपूर्ण सहभाग नोंदवला. विद्यार्थ्यांना मार्गदर्शन करून त्यांच्या कल्पनांना कलात्मक स्वरूप देण्यासाठी कला विभागाने घेतलेले प्रयत्न या प्रदर्शनातून ठळकपणे दिसून आले. विद्यार्थ्यांच्या कलागुणांना प्रोत्साहन देणारा आणि शिक्षणासोबतच सृजनशीलतेचे महत्त्व अधोरेखित करणारा हा उपक्रम उपस्थितांसाठी विशेष आकर्षण ठरला.

सक्षम तरुण, समृद्ध भारत! ‘नशामुक्त युवा’ अभियानांतर्गत व्याख्यान संपन्न

भडगाव प्रतिनिधी : येथील सौ. र. ना. देशमुख कला, वाणिज्य व विज्ञान महाविद्यालयात कवयित्री बहिणाबाई चौधरी उत्तर महाराष्ट्र विद्यापीठाच्या विद्यार्थी विकास विभाग आणि महाविद्यालय यांच्या संयुक्त विद्यमाने नशामुक्ती अभियानांतर्गत ‘नशेमुळे होणारे तोंडाचे आजार’ या विषयावर व्याख्यान आयोजित करण्यात आले. मुंबई येथील एमजीएम विद्यापीठाच्या रिसर्च फेलो डॉ. हितेशा भैसे यांनी विद्यार्थ्यांना मार्गदर्शन केले.
नशेच्या विविध प्रकारांमुळे शरीरावर होणारे दुष्परिणाम, तोंडाच्या आरोग्याला निर्माण होणारे धोके आणि त्यातून उद्भवणाऱ्या आजारांविषयी डॉ. भैसे यांनी सविस्तर माहिती दिली. तरुणांनी व्यसनांपासून दूर राहून आरोग्यपूर्ण जीवनशैलीचा स्वीकार करावा, असा संदेश या व्याख्यानातून देण्यात आला. यावेळी विद्यार्थ्यांनी विचारलेल्या प्रश्नांचेही त्यांनी निरसन केले.
कार्यक्रमाच्या अध्यक्षस्थानी महाविद्यालयाचे उपप्राचार्य डॉ. संजय भैसे होते. कार्यक्रमाचे प्रास्ताविक व वक्त्यांचा परिचय डॉ. देवेंद्र मस्की यांनी करून दिला. सूत्रसंचालन डॉ. चित्रा पाटील यांनी केले, तर आभार प्रदर्शन डॉ. बी. एस. भालेराव यांनी केले. राष्ट्रगीताने कार्यक्रमाची सांगता झाली.

पशुसंवर्धन व पशुधन विकास कार्यशाळेस उत्स्फूर्त प्रतिसाद सहाशेवर नागरिकांची उपस्थिती; अनुलोम, पशुसंवर्धन विभाग आणि मंगळग्रह सेवा संस्थेचा संयुक्त उपक्रम

अमळनेर : अनुगामी लोकराज्य महाअभियान (अनुलोम), पशुसंवर्धन विभाग, अमळनेर आणि मंगळग्रह सेवा संस्था यांच्या संयुक्त विद्यमाने गुरुवार, दि. 15 ऑक्टोबर रोजी श्री मंगळग्रह मंदिराते पशुसंवर्धन व पशुधन विकास कार्यशाळा झाली. या कार्यशाळेस अमळनेरसह तालुक्यातील ग्रामीण भागातील नागरिकांचा उत्स्फूर्त प्रतिसाद लाभला. कार्यशाळेत जवळपास सहाशेवर नागरिकांनी सहभाग नोंदविला. यावेळी पशुपालन, दुग्धव्यवसाय, शेळीपालन, कुक्कुटपालन, पशुधन आरोग्य व्यवस्थापन आणि शासनाच्या विविध योजनांची मान्यवरांनी माहिती दिली.
पशुपालकांना आधुनिक पशुपालन तंत्रज्ञानाची ओळख करून देणे, पशुधन विकासाच्या माध्यमातून उत्पन्नवाढीच्या संधी उपलब्ध करून देणे आणि शासनाच्या विविध योजनांचा लाभ घेण्यासाठी मार्गदर्शन करणे, हा कार्यशाळेचा मुख्य उद्देश होता. यावेळी मुख्यमंत्री ग्रामीण पशुधन योजनेसाठी अर्ज करताना आवश्यक असलेल्या प्रशिक्षण प्रमाणपत्रांचेही वाटप करण्यात आले.
जळगाव जिल्ह्यात सामाजिक संस्थांच्या माध्यमातून पशुसंवर्धनविषयक शासकीय योजनांची माहिती नागरिकांपर्यंत पोहोचविण्याच्या उपक्रमांतर्गत श्री मंगळग्रह मंदिरात कार्यशाळेचे आयोजन करण्यात आले. अनुलोम संस्थेमार्फत शासनाच्या विविध योजना सर्वसामान्य नागरिकांपर्यंत पोहोचविण्यासाठी प्रयत्न केले जात असून, त्याचाच एक भाग म्हणून हा उपक्रम राबविण्यात आला.
मंगळग्रह सेवा संस्थेचे अध्यक्ष डॉ. डिगंबर महाले कार्यक्रमाच्या अध्यक्षस्थानी होते. यावेळी डॉ. संजय कुवर, डॉ. समाधान पाटील, डॉ. संदेश वाटोळे, डॉ. दीपक पाटील, डॉ. कल्याण थोरात आणि निलेश राजपूत यांच्यासह मान्यवर उपस्थित होते. अनुलोमचे जळगाव उपविभाग जनसेवक प्रवीण दांडगे, विभाग कार्यकर्ते विनोद माळी, जळगाव उपविभाग संवादिनी सौ. नयनाताई पाटील, डॉ. मनोहर सोनवणे, राहुल पाटील, सौ. भाविकाताई पाठक, सौ. संगीताताई पाटील, घनश्याम पाटील, वीरभूषण, शैलेश पाटील, विजय पाटील, अमर सोनार आणि एकनाथ जाधव यांनीही सहभाग नोंदविला.
शासकीय योजनांची माहिती, आधुनिक पशुपालनाचे मार्गदर्शन आणि प्रशिक्षण प्रमाणपत्रांच्या वाटपामुळे पशुपालकांसाठी ही कार्यशाळा उपयुक्त ठरली. यावेळी राज्य व केंद्र शासनाच्या योजनांची माहिती देणारे पॉवर पॉइंट प्रेझेंटेशनही दाखविण्यात आले. शासनाच्या योजना थेट लाभार्थ्यांपर्यंत पोहोचविण्यासाठी अशा कार्यशाळा महत्त्वपूर्ण ठरत असल्याचे या उपक्रमातून अधोरेखित झाले.

जी. एस. हायस्कूलचा खो-खो संघ जिल्हास्तरीय स्पर्धेसाठी रवाना

अमळनेर प्रतिनिधी : खानदेश शिक्षण मंडळ संचलित जी. एस. हायस्कूल, अमळनेर येथील १७ वर्षांखालील गटातील विजयी खो-खो संघ जिल्हास्तरीय स्पर्धेत सहभागी होण्यासाठी सज्ज झाला आहे. गुरुवार, दि. १६ ऑक्टोबर रोजी जळगाव येथील व. वा. वाचनालयात या स्पर्धेचे आयोजन करण्यात आले आहे.

या संघात कर्णधार दुर्गेश सोनवणे याच्यासह कुणाल पवार, यश मिस्त्री, अनंत संदानशिव, लक्षराज पाटील, नाविण्य धनगर, वैभव गुरव, तेजस पाटील, मयूर पाटील आणि चेतन पाटील या खेळाडूंचा समावेश आहे.

संघाला शालेय समितीचे चेअरमन अण्णासाहेब हरी भिका वाणी, मुख्याध्यापक व्ही. एम. पाटील, उपमुख्याध्यापक सी. एस. सोनजे, के. पी. पाटील, क्रीडा विभागप्रमुख के. आर. बाविस्कर, शिक्षक प्रतिनिधी आर. जे. पाटील व पी. एस. काटकर यांनी शुभेच्छा दिल्या.

तसेच संघाला मार्गदर्शन करणारे जे. व्ही. बाविस्कर आणि के. डी. साळुंखे यांनी खेळाडूंना प्रोत्साहन दिले. जिल्हास्तरीय स्पर्धेत संघाने उत्कृष्ट कामगिरी करावी, अशा अपेक्षा यावेळी व्यक्त करण्यात आल्या.

डी. आर. कन्या शाळेत वाचन प्रेरणा दिन उत्साहात साजरा

अमळनेर प्रतिनिधी : खानदेश शिक्षण मंडळ संचलित डी. आर. कन्या शाळेत सकाळ व दुपार विभागात वाचन प्रेरणा दिन मोठ्या उत्साहात साजरा करण्यात आला. यावेळी विद्यार्थ्यांनी वाचनाचे महत्त्व जाणून घेत नियमित वाचन करण्याचा संकल्प केला.
कार्यक्रमाच्या अध्यक्षस्थानी शाळेच्या मुख्याध्यापिका सौ. एस. एस. सूर्यवंशी होत्या. उपमुख्याध्यापक श्री. एस. आर. शिंगणे, पर्यवेक्षक श्री. एस. पी. वाघ, शिक्षक प्रतिनिधी सौ. पी. पी. जोशी, श्रीमती आर. एस. सोनवणे, श्रीमती एस. एस. देवरे, श्री. एस. एस. माळी, ज्येष्ठ लिपिक श्री. शाम पवार तसेच सकाळ विभागाच्या प्रमुख वक्त्या श्रीमती वाय. एम. पाटील आणि दुपार विभागाचे प्रमुख वक्ते श्री. के. पी. सनेर यांची प्रमुख उपस्थिती होती.
कार्यक्रमाच्या प्रारंभी भारतरत्न व माजी राष्ट्रपती डॉ. ए. पी. जे. अब्दुल कलाम यांच्या प्रतिमेचे पूजन करून माल्यार्पण करण्यात आले. यावेळी उपस्थित मान्यवरांनी डॉ. कलाम यांच्या कार्याचा गौरव करत त्यांच्या प्रेरणादायी जीवनकार्याची माहिती दिली. प्रमुख वक्त्यांनी क्षेपणास्त्र विकासातील भारताचे योगदान तसेच देशाच्या वैज्ञानिक प्रगतीविषयी विद्यार्थ्यांना मार्गदर्शन केले.
वाचन प्रेरणा दिनानिमित्त विद्यार्थ्यांनी वाचनात सहभाग घेतला. नियमित वाचनाची सवय जोपासण्याची आणि ज्ञानवृद्धीसाठी दररोज वाचन करण्याची शपथही घेतली.
कार्यक्रमाच्या यशस्वितेसाठी शाळेतील सर्व शिक्षक, शिक्षिका व शिक्षकेतर कर्मचाऱ्यांनी सहकार्य केले.

अंतुर्ली-रंजाणे परिसरात धुमाकूळ घालणारा बिबट्या जेरबंद! वनविभागाच्या ‘मिशन बिबट्या’ला यश; तांबेपुरा-अंतुर्ली रस्त्यावरील पिंजऱ्यात बिबट्या अडकला, नागरिकांनी टाकला सुटकेचा निःश्वास

अमळनेर प्रतिनिधी : अंतुर्ली, रंजाणे आणि लगतच्या परिसरात गेल्या काही दिवसांपासून धुमाकूळ घालून शेतकरी, शेतमजूर आणि नागरिकांमध्ये दहशत निर्माण करणाऱ्या बिबट्याला अखेर जेरबंद करण्यात वनविभागाला यश आले आहे. गुरुवारी (दि. १६ ऑक्टोबर) पहाटेच्या सुमारास तांबेपुरा ते अंतुर्ली रस्त्यावरील पिंजारी मुस्लिम स्मशानभूमीजवळ लावलेल्या पिंजऱ्यात हा बिबट्या अडकला. बिबट्या पकडल्याची बातमी परिसरात पसरताच नागरिकांनी सुटकेचा निःश्वास टाकला असून, वनविभागाच्या अथक प्रयत्नांना अखेर यश मिळाले आहे.

चार ते पाच पाळीव प्राण्यांची शिकार; परिसरात दहशत

अंतुर्ली आणि रंजाणे शिवारात बिबट्याने चार ते पाच पाळीव प्राण्यांची शिकार केल्याने शेतकरी व शेतमजुरांमध्ये भीतीचे वातावरण निर्माण झाले होते. शेतात कामासाठी जाणे, रात्रीच्या वेळी घराबाहेर पडणे आणि शेतातील जनावरांची देखभाल करणेही नागरिकांसाठी चिंतेचा विषय बनला होता. बिबट्याचा वावर केवळ अंतुर्ली-रंजाणेपुरता मर्यादित न राहता शिरूड, मंगरूळ, पिंपळे, ढेकू, धार रस्ता, ताडेपुरा आणि टाकरखेडा परिसरातही दिसून येत होता. त्यामुळे संपूर्ण पट्ट्यात भीतीचे सावट पसरले होते.

वनविभागाची रात्रंदिवस गस्त; नियोजनबद्ध मोहिमेला यश

बिबट्या वारंवार ठिकाण बदलत असल्याने त्याला पकडणे वनविभागासमोर मोठे आव्हान उभे राहिले होते. मात्र, वनपरिक्षेत्र अधिकारी छत्रपती चव्हाण, उपवनसंरक्षक राम धोत्रे आणि सहाय्यक वनसंरक्षक अमोल पंडित यांच्या सूचनेनुसार वनविभागाच्या पथकाने विविध मोक्याच्या ठिकाणी पिंजरे लावून बिबट्याला जेरबंद करण्यासाठी नियोजनबद्ध मोहीम राबवली.

वनपाल गुलाब पिंजारी, वनरक्षक दुर्गादास वानखेडे, योगेश पाटील, मनीषा मोरे तसेच वनमजूर प्रवीण पाटील, समाधान पाटील आणि मयूर पाटील यांनी रात्रंदिवस परिसरात गस्त घालत बिबट्याच्या हालचालींवर लक्ष ठेवले. त्याच्या वावराचा मागोवा घेत पिंजऱ्यांची ठिकाणे बदलण्याचे नियोजन करण्यात आले. सातत्यपूर्ण निरीक्षण, योग्य नियोजन आणि अथक परिश्रमांमुळे अखेर बिबट्या पिंजऱ्यात अडकला आणि वनविभागाच्या मोहिमेला यश आले.

स्थानिक नागरिकांचीही मोलाची साथ

बिबट्याला पकडण्याच्या मोहिमेत स्थानिक नागरिक आणि लोकप्रतिनिधींनीही वनविभागाला सहकार्य केले. माजी नगरसेवक मुख्तार खाटीक यांनी पिंजऱ्यात आमिष म्हणून बकऱ्यांची व्यवस्था करून दिली, तर सरपंच सचिन पाटील यांनीही वनविभागाच्या पथकाला मोलाची मदत केली. वनविभागाचे कर्मचारी आणि स्थानिक नागरिक यांच्या समन्वयातून ही मोहीम यशस्वी ठरली.

बिबट्या जेरबंद झाल्याने अंतुर्ली, रंजाणे आणि परिसरातील नागरिकांना मोठा दिलासा मिळाला आहे. गेल्या काही दिवसांपासून भीतीच्या छायेत वावरणाऱ्या शेतकरी व ग्रामस्थांनीही समाधान व्यक्त केले. मात्र, परिसरातील नागरिकांनी वन्यप्राण्यांच्या हालचालींबाबत सतर्क राहावे आणि बिबट्या दिसल्यास स्वतःहून त्याच्या जवळ जाण्याऐवजी तातडीने वनविभागाला कळवावे, असे आवाहन करणे महत्त्वाचे आहे.

दुष्काळी मदतीसाठी हेक्टरी एक लाख रुपये द्या; एसआयआर प्रक्रिया रद्द करा! अमळनेरमध्ये महाविकास आघाडीचे जनआंदोलन; केंद्र व राज्य सरकारवर जोरदार टीका

अमळनेर प्रतिनिधी : महाराष्ट्रातील दुष्काळी परिस्थिती, शेतकऱ्यांना मदतीचा अभाव, वाढती महागाई, बेरोजगारी, पेपरफुटी आणि मतदार यादीच्या विशेष सखोल पुनरीक्षणाच्या (एसआयआर) प्रक्रियेच्या निषेधार्थ अमळनेर तालुका महाविकास आघाडीच्या वतीने गुरुवार, १५ ऑक्टोबर रोजी महाराणा प्रताप चौकात जनआंदोलन करण्यात आले. यावेळी दुष्काळग्रस्त शेतकऱ्यांना हेक्टरी एक लाख रुपयांचे अनुदान देण्यासह एसआयआर प्रक्रिया रद्द करण्याची आणि मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यात आली.

आंदोलनाचे प्रास्ताविक अमळनेर तालुका काँग्रेस कमिटीचे अध्यक्ष भागवत केशव सूर्यवंशी यांनी केले. त्यानंतर राष्ट्रवादी काँग्रेस (शरदचंद्र पवार) पक्षाचे तालुकाध्यक्ष डी. एम. पाटील, संदीप घोरपडे, अॅड. तिलोत्तमा पाटील, लोटन चौधरी, अॅड. शकील काझी, युवक काँग्रेसचे जिल्हाध्यक्ष महेश पाटील, प्रा. अशोक पवार, शिवसेनेचे निंबा पाटील, प्रशांत निकम आदींनी मनोगत व्यक्त केले.

दुष्काळ, महागाई आणि बेरोजगारीवरून सरकारला घेरले

महाराष्ट्रात दुष्काळसदृश परिस्थिती निर्माण झाल्याने अमळनेर तालुक्यातील शेतकरी आणि शेतमजूर संकटात सापडले आहेत. मात्र, शासनाकडून अद्याप अपेक्षित दुष्काळी मदत मिळालेली नसल्याची टीका आंदोलकांनी केली. महागाईने सर्वसामान्यांचे जगणे कठीण झाले असून बेरोजगारीमुळे तरुण वर्ग त्रस्त आहे. पेपरफुटीच्या घटनांमुळे विद्यार्थ्यांमध्ये चिंता निर्माण झाली आहे, असे मतही यावेळी व्यक्त करण्यात आले.

केंद्र व राज्य सरकारकडून सरकारी यंत्रणांचा राजकीय आणि वैयक्तिक लाभासाठी वापर होत असल्याचा आरोप करत, केंद्रीय निवडणूक आयोगाच्या निर्णयांवरही आंदोलकांनी आक्षेप नोंदविला. तसेच राज्यातील फोडाफोडीचे आणि सूडाचे राजकारण थांबविण्याची मागणी करण्यात आली.

माजी आमदार डॉ. बी. एस. पाटील यांची सरकारवर टीका

आंदोलकांनी महाराणा प्रताप चौकात ठिय्या मांडून निषेध नोंदविला. यावेळी माजी आमदार डॉ. बी. एस. पाटील यांनी अमळनेरचे स्थानिक आमदार, खासदार, पंतप्रधान नरेंद्र मोदी आणि भाजपच्या एसआयआर प्रक्रियेवर जोरदार टीका केली. दुष्काळग्रस्त शेतकऱ्यांना प्रति हेक्टरी एक लाख रुपये अनुदान देण्यात यावे, मुख्य निवडणूक आयुक्त ज्ञानेश कुमार यांनी त्वरित राजीनामा द्यावा आणि मतदार यादीच्या विशेष सखोल पुनरीक्षणाची (एसआयआर) प्रक्रिया रद्द करावी, अशा प्रमुख मागण्या त्यांनी मांडल्या.

आंदोलनानंतर महाविकास आघाडीच्या कार्यकर्त्यांनी प्रांताधिकारी मयूर भंगाळे यांना विविध मागण्यांचे निवेदन सादर केले. गजेंद्र साळुंखे यांनी आभार मानल्यानंतर आंदोलनाची सांगता झाली.

कार्यकर्त्यांची मोठ्या संख्येने उपस्थिती

या आंदोलनात मनोज पाटील, धनगर दला पाटील, मगन पाटील, प्रा. श्याम पवार, तुषार संधान, नेहरू पवार, अशोक पवार, चंद्रशेखर भावसार, अॅड. कौस्तुभ पाटील, राजेंद्र मराठे, मनीषा परब, पी. वाय. पाटील, राजेंद्र चौधरी, प्रताप पाटील, कन्हैया कापडे, विकास पाटील, रोहिदास कापडे, हर्षल जाधव, ताराचंद सूर्यवंशी, देवेंद्र देशमुख, सईद तेली, सुनिता माने, चंदू वानखेडे, अधिकार पाटील, जुबेर पठाण, अरुण देशमुख, पितांबर पाटील, राजेंद्र पाटील, कैलास पाटील, रोहिदास पाटील, गोकुळ पाटील, दिलीप पाटील, अॅड. क्रांती ठाकरे यांच्यासह महाविकास आघाडीचे पदाधिकारी व कार्यकर्ते मोठ्या संख्येने उपस्थित होते.

अमळनेरला जिल्ह्याचा दर्जा मिळवून देण्यासाठी उपनगराध्यक्ष प्रशांत निकम प्रयत्नशील! लवकरच शासनदरबारी करणार सविस्तर पाठपुरावा

अमळनेर : अमळनेरला जिल्ह्याचा दर्जा मिळावा, या मागणीसाठी अमळनेरचे उपनगराध्यक्ष प्रशांत निकम प्रयत्नशील असून, यासाठी लवकरच शासनदरबारी सविस्तर पाठपुरावा करण्यात येणार आहे. अमळनेरला स्वतंत्र जिल्ह्याचा दर्जा मिळाल्यास परिसरातील नागरिकांची प्रशासकीय कामांसाठी होणारी धावपळ कमी होईल आणि विकासाच्या दृष्टीनेही नव्या संधी उपलब्ध होतील, अशी भूमिका प्रशांत निकम यांनी मांडली आहे.

अमळनेर आणि जळगाव या दोन शहरांमधील अंतर सुमारे ५५ ते ५६ किलोमीटर आहे. जिल्ह्याच्या ठिकाणी विविध प्रशासकीय कामांसाठी जाणाऱ्या नागरिकांना प्रवासाचा वेळ, आर्थिक खर्च आणि अनेक अडचणींचा सामना करावा लागतो. शासकीय कार्यालयांतील कामे, विविध दाखले, प्रशासकीय मंजुरी, महसूलविषयक प्रश्न तसेच इतर महत्त्वाच्या कामांसाठी नागरिकांना वारंवार जळगाव येथे जावे लागते. त्यामुळे ग्रामीण भागातील नागरिकांसह सर्वसामान्यांना मोठी कसरत करावी लागत असल्याचे चित्र आहे.

स्वतंत्र जिल्हा झाल्यास प्रशासकीय कामांना मिळणार गती

अमळनेरला स्वतंत्र जिल्ह्याचा दर्जा मिळाल्यास नागरिकांना प्रशासकीय सुविधा स्थानिक पातळीवर उपलब्ध होण्यास मदत होऊ शकते. जिल्हास्तरीय कार्यालयांची निर्मिती झाल्यास विविध शासकीय कामांसाठी दूरचा प्रवास करण्याची गरज कमी होईल. त्याचबरोबर प्रशासकीय यंत्रणेवरील कामाचा ताण कमी होऊन स्थानिक प्रश्नांची सोडवणूक अधिक प्रभावीपणे होण्यास मदत होईल. जिल्हा निर्मितीमुळे रोजगार, पायाभूत सुविधा, शिक्षण, आरोग्य आणि व्यापार क्षेत्राच्या विकासालाही चालना मिळण्याची अपेक्षा व्यक्त केली जात आहे.

जळगाव लोकसभा मतदारसंघातील तालुक्यांचा समावेश करण्याची मागणी

अमळनेरला स्वतंत्र जिल्ह्याचा दर्जा देताना जळगाव लोकसभा मतदारसंघातील योग्य तालुक्यांचा अमळनेर जिल्ह्यात समावेश करण्यात यावा, अशी ठाम मागणी उपनगराध्यक्ष प्रशांत निकम यांनी केली आहे. जिल्ह्याची निर्मिती करताना भौगोलिक परिस्थिती, नागरिकांची सोय, प्रशासकीय सुलभता आणि विकासाच्या गरजा लक्षात घेणे आवश्यक असल्याचे या मागणीमागील प्रमुख मुद्दे आहेत.

अमळनेर शहराला ऐतिहासिक, सामाजिक आणि व्यापारी महत्त्व असून, परिसरातील अनेक गावांसाठी हे शहर महत्त्वाचे केंद्र आहे. त्यामुळे अमळनेरला जिल्ह्याचा दर्जा मिळाल्यास परिसरातील नागरिकांना स्थानिक पातळीवर अधिक सुविधा उपलब्ध करून देण्याच्या दृष्टीने महत्त्वाचे पाऊल ठरू शकते.

शासनदरबारी पाठपुरावा करणार

अमळनेर जिल्हा निर्मितीचा विषय केवळ मागणीपुरता मर्यादित न ठेवता त्यासाठी आवश्यक बाबी शासनाच्या निदर्शनास आणून देण्याचा प्रयत्न प्रशांत निकम करणार आहेत. यासाठी लवकरच सविस्तर पाठपुरावा करण्यात येणार असून, अमळनेरला जिल्ह्याचा दर्जा मिळावा यासाठी शासनस्तरावर मागणी मांडली जाणार आहे.

अमळनेर जिल्हा निर्मितीचा प्रश्न मार्गी लागल्यास नागरिकांची प्रशासकीय गैरसोय दूर होण्याबरोबरच संपूर्ण परिसराच्या विकासाला नवी दिशा मिळू शकते. त्यामुळे या मागणीला लोकप्रतिनिधी, सामाजिक संस्था, व्यापारी वर्ग आणि नागरिकांचा व्यापक पाठिंबा मिळणे महत्त्वाचे ठरणार आहे.

अमळनेरला स्वतंत्र जिल्ह्याचा दर्जा मिळावा, ही मागणी प्रत्यक्षात आणण्यासाठी उपनगराध्यक्ष प्रशांत निकम यांच्या पुढाकारातून होणाऱ्या आगामी पाठपुराव्याकडे आता नागरिकांचे लक्ष लागले आहे.