ईद मिलादुन्नबी निमित्त मानवतेचा संदेश; अमळनेरमध्ये रुग्ण व गरजूंना फळवाटप

अमळनेर : ईद-ए-मिलादुन्नबीच्या पवित्र पर्वानिमित्त राष्ट्रवादी काँग्रेस पक्षाच्या अल्पसंख्याक विभागाच्या वतीने अमळनेर येथे सामाजिक उपक्रम राबविण्यात आला. प्रेषित हजरत मोहम्मद पैगंबर (स.अ.व.) यांनी दिलेल्या प्रेम, करुणा आणि मानवसेवेच्या संदेशातून प्रेरणा घेत ग्रामीण रुग्णालयातील रुग्ण तसेच रेल्वे स्टेशनवरील गरजू व प्रवाशांना फळांचे वाटप करण्यात आले.

या उपक्रमातून सर्वधर्मसमभाव, बंधुभाव आणि माणुसकी हाच ईद मिलादुन्नबीचा खरा संदेश असल्याचे आयोजकांनी सांगितले. सणाच्या आनंदासोबत समाजातील गरजू घटकांप्रती संवेदनशीलता जपण्याचा संदेश या उपक्रमातून देण्यात आला.

या कार्यक्रमाचे आयोजन राष्ट्रवादी काँग्रेस पक्षाच्या अल्पसंख्याक विभागाचे शहराध्यक्ष सैय्यद अजहर अली, सरचिटणीस जुनेद शेख आणि कार्याध्यक्ष बबलू शेख यांनी केले.

यावेळी राष्ट्रवादी काँग्रेस पक्षाचे शहराध्यक्ष चेतन राजपूत, जितेंद्र ठाकूर, माजी शहराध्यक्ष मुख्तार खाटीक, अल्पसंख्याक तालुकाध्यक्ष अलीम मुजावर, अल्पसंख्याक जिल्हा उपाध्यक्ष आरिफ भाया, वसीम पठाण, भूषण भदाणे, सैय्यद नबी, दर्शन पाटील, रिजवान मणियार, आसिफ सैय्यद, सलमान बागवान, जावेद शेख, शरूख खान, यांच्यासह पक्षाचे पदाधिकारी व कार्यकर्ते मोठ्या संख्येने उपस्थित होते.

अमळनेरचे सुप्रसिद्ध सर्जन डॉ. अनिल शिंदे यांना ‘आरोग्य रत्न २०२६’ पुरस्कार

अमळनेर : आरोग्य क्षेत्रात उल्लेखनीय, सेवाभावी आणि समाजहिताचे कार्य केल्याबद्दल अमळनेर येथील सुप्रसिद्ध सर्जन डॉ. अनिल शिंदे यांना ‘पुढारी आरोग्य रत्न २०२६’ या प्रतिष्ठेच्या पुरस्काराने सन्मानित करण्यात आले. महाराष्ट्राचे आरोग्यमंत्री प्रकाश आबिटकर यांच्या हस्ते नाशिक येथे झालेल्या विशेष समारंभात डॉ. शिंदे यांना स्मृतिचिन्ह व प्रमाणपत्र देऊन गौरविण्यात आले.

डॉ. शिंदे यांनी गेल्या अनेक वर्षांपासून अमळनेर परिसरातील तसेच विविध भागांतील रुग्णांना दर्जेदार वैद्यकीय सेवा देत अनेक गंभीर रुग्णांवर यशस्वी उपचार केले आहेत. विशेषतः अत्यंत गुंतागुंतीच्या आणि क्रिटिकल स्वरूपाच्या शस्त्रक्रिया करून अनेक रुग्णांना नवजीवन देण्यात त्यांचे मोठे योगदान आहे. त्यांच्या सेवाभावी वृत्तीमुळे आणि रुग्णांप्रती असलेल्या संवेदनशील दृष्टिकोनामुळे अनेक रुग्ण व त्यांच्या कुटुंबीयांसाठी ते ‘देवदूत’ ठरले आहेत.

आरोग्यसेवा ही केवळ व्यवसाय न मानता सामाजिक बांधिलकीच्या भावनेतून काम करणाऱ्या डॉ. शिंदे यांच्या कार्याची दखल ‘पुढारी’ वृत्तपत्र समूहाने घेतली. त्यातूनच त्यांची ‘आरोग्य रत्न २०२६’ या पुरस्कारासाठी निवड करण्यात आली.

नाशिक येथे झालेल्या या पुरस्कार सोहळ्यास जिल्हाधिकारी आयुष प्रसाद, विभागीय आयुक्त प्रवीण गेडाम, महापालिका आयुक्त मनीषा खत्री, शिवसेनेचे उपनेते अजय बोरस्ते, संपादक राहुल रनाळकर यांच्यासह आरोग्य व सामाजिक क्षेत्रातील मान्यवर उपस्थित होते.

उत्तर महाराष्ट्रातील ३६ डॉक्टरांचा गौरव

उत्तर महाराष्ट्रातील आरोग्य क्षेत्रात उल्लेखनीय कार्य करणाऱ्या ३६ डॉक्टरांचा या सोहळ्यात सन्मान करण्यात आला. त्यामध्ये अमळनेर तालुक्यातून सन्मान मिळविणारे डॉ. अनिल शिंदे हे एकमेव डॉक्टर ठरले. त्यामुळे अमळनेरसह संपूर्ण परिसरातून त्यांच्यावर अभिनंदनाचा वर्षाव होत आहे.

हजारो रुग्णांवर उपचार करताना अनेक गंभीर रुग्णांच्या जीवनासाठी निर्णायक भूमिका बजावणाऱ्या डॉ. शिंदे यांच्या कार्याला मिळालेला हा सन्मान त्यांच्या वैद्यकीय सेवेची आणि सामाजिक बांधिलकीची पावती मानली जात आहे. या पुरस्कारामुळे अमळनेरच्या शिरपेचात आणखी एक मानाचा तुरा खोवला गेला आहे.

सामाजिक कार्यकर्ते राजू बापू चौधरी यांचे परखड मत लालपरीचे विद्रुपीकरण थांबवा; सार्वजनिक मालमत्तेचा सन्मान करायला शिका!

अमळनेर : सरकार विद्यार्थ्यांच्या शिक्षणासाठी मोफत प्रवासाची सुविधा उपलब्ध करून देते; मात्र काही विद्यार्थ्यांकडून याच सुविधेचा गैरफायदा घेत एसटी बसच्या आसनांची तोडफोड, काचांवर व सीटच्या मागील बाजूस अश्लील मजकूर व चित्रे काढणे, तसेच बसचे विद्रुपीकरण करण्याचे प्रकार सुरू असल्याने संताप व्यक्त होत आहे. या गंभीर प्रकारावर सामाजिक कार्यकर्ते राजू बापू चौधरी यांनी परखड मत व्यक्त करत प्रशासन, शाळा, पालक आणि विद्यार्थ्यांना जागे होण्याचे आवाहन केले आहे.

“सरकारने शिक्षणासाठी मोफत पास दिला, पण काही विद्यार्थ्यांनी त्याचा अर्थच बदलून टाकला. काय चाललंय आमच्या लालपरीत?” असा थेट सवाल राजू बापू चौधरी यांनी उपस्थित केला आहे.

एसटी बसमधील सीटचे कव्हर ब्लेडने फाडून त्यातील कुशन (स्पॉन्ज) बाहेर काढून रस्त्यावर फेकणे, मार्कर पेन व करकटकने सीटच्या मागील बाजूस तसेच काचेवर स्वतःची नावे, घाणेरडे शब्द आणि अश्लील चित्रे लिहिणे, असे प्रकार काही बसमध्ये सर्रास होत असल्याचे त्यांनी निदर्शनास आणून दिले. कोट्यवधी रुपये खर्च करून नव्या कोऱ्या बस प्रवाशांच्या सेवेत दाखल केल्या जातात; मात्र काही महिन्यांतच त्यांची अवस्था अत्यंत विद्रुप होत असल्याबद्दल त्यांनी तीव्र नाराजी व्यक्त केली.

मूक प्रेक्षकही जबाबदार!

या प्रकारातील सर्वात गंभीर बाब म्हणजे काही विद्यार्थी आपल्या डोळ्यादेखत बसची तोडफोड होताना पाहतात; मात्र चुकीचे कृत्य करणाऱ्या मित्राला थांबविण्याचे किंवा वाहकाला माहिती देण्याचे धाडस करत नाहीत. या मूक संमतीमुळेच सार्वजनिक मालमत्तेच्या नुकसानीला प्रोत्साहन मिळत आहे, असे राजू बापू चौधरी यांनी म्हटले आहे.

“आज मागच्या सीटचे एकही कुशन शाबूत राहत नाही. एसटीचे विद्रुपीकरण सुरू आहे. हा केवळ बसच्या नुकसानीचा विषय नाही, तर विद्यार्थ्यांच्या संस्कारांचा आणि सामाजिक जबाबदारीचा प्रश्न आहे,” असे त्यांनी स्पष्ट केले.

“खरंच मुलांना योग्य शिक्षण मिळतंय का?”

विद्यार्थ्यांना शिक्षणासोबत सार्वजनिक मालमत्तेचा सन्मान, सामाजिक जबाबदारी आणि शिस्त यांचे संस्कार देणे गरजेचे आहे. एसटी ही कोणाची वैयक्तिक मालमत्ता नसून सर्वसामान्यांच्या पैशातून उभी राहिलेली सार्वजनिक सेवा आहे. तिचे नुकसान करणे म्हणजे अप्रत्यक्षपणे सर्वसामान्यांचेच नुकसान करणे होय.

“ज्यांना सार्वजनिक मालमत्ता जपायची असते, तिचा सन्मान करायचा असतो, हेच शिकवले जात नसेल तर भविष्यात देशाप्रती निष्ठा आणि जबाबदारीची भावना कशी निर्माण होणार?” असा सवालही त्यांनी उपस्थित केला.

“जो आज एसटीची सीट फाडतोय, तो उद्या त्याच एसटीवर दगड फेकणार नाही, याची मला १ टक्काही खात्री वाटत नाही.”

आजच्या पिढीने सार्वजनिक सुविधा सहज उपलब्ध होतात म्हणून त्यांची किंमत कमी समजू नये. एका बसची निर्मिती, देखभाल आणि दुरुस्ती यामागे शासनाचा मोठा खर्च तसेच अनेक कर्मचाऱ्यांचे श्रम असतात. त्यामुळे एसटीचे नुकसान करणे म्हणजे समाजाच्या पैशांचा अपव्यय करण्यास हातभार लावणे आहे.

🔴 आता बस्स झालं! प्रशासनाने जागे व्हा! 🔴

एसटी प्रशासनाला विनंती : प्रत्येक बसमध्ये “बस फाडताना कोणी दिसल्यास वाहकाला कळवा, तुमचे नाव गुप्त ठेवले जाईल” अशा आशयाचे स्टिकर लावण्यात यावेत. तसेच उपलब्ध असल्यास सीसीटीव्ही फुटेज तपासून तोडफोड करणाऱ्या विद्यार्थ्यांवर योग्य ती कारवाई करण्यात यावी.

शाळा प्रशासनानेही पुढाकार घ्यावा : महिन्यातून किमान एकदा एसटी कर्मचाऱ्यांना शाळेत बोलावून “एसटी ही आपलीच आहे” या विषयावर विद्यार्थ्यांचे प्रबोधन करण्यात यावे. सार्वजनिक मालमत्तेचे महत्त्व, शिस्त आणि जबाबदारी याबाबत विद्यार्थ्यांमध्ये जागृती निर्माण करणे गरजेचे आहे.

पालक आणि सुजाण विद्यार्थ्यांनीही जबाबदारी स्वीकारावी : आपल्या मित्राकडून बसची तोडफोड होत असल्याचे दिसल्यास त्याला थांबवावे आणि संबंधित प्रकाराची माहिती वाहक किंवा एसटी प्रशासनाला द्यावी. चुकीच्या कृत्याकडे दुर्लक्ष न करता त्याला वेळीच आळा घालणे ही प्रत्येकाची सामाजिक जबाबदारी आहे.

लालपरी ही महाराष्ट्राची जीवनवाहिनी!

“एसटी ही फक्त बस नाही, ती महाराष्ट्राची जीवनवाहिनी आहे. तिची तोडफोड करून तुम्ही दुसऱ्याचे नव्हे, तर तुमच्या स्वतःच्या सार्वजनिक सुविधांचे नुकसान करत आहात. लालपरीचे संरक्षण करणे ही प्रशासनाइतकीच समाजाची आणि विद्यार्थ्यांचीही जबाबदारी आहे,” असे सामाजिक कार्यकर्ते राजू बापू चौधरी यांनी स्पष्ट केले.

एसटीच्या बसचे विद्रुपीकरण करणाऱ्यांवर कठोर कारवाई करण्यासोबतच विद्यार्थ्यांमध्ये सार्वजनिक मालमत्तेबद्दल जाणीव आणि जबाबदारी निर्माण करण्यासाठी व्यापक जनजागृती मोहीम राबविण्याची गरज आहे.

पै. प्रताप अशोक शिंपी (आबा) यांची कुस्ती मल्लविद्या महासंघाच्या तालुकाध्यक्षपदी निवड

अमळनेर (जि. जळगाव) : कुस्ती मल्लविद्या महासंघाच्या अमळनेर तालुकाध्यक्षपदी पै. प्रताप अशोक शिंपी (आबा) यांची निवड करण्यात आली आहे. सामाजिक, क्रीडा तसेच संघटनात्मक क्षेत्रातील त्यांच्या उल्लेखनीय कार्याची दखल घेत महासंघाने त्यांच्यावर ही महत्त्वपूर्ण जबाबदारी सोपविली आहे. त्यांच्या निवडीमुळे अमळनेर तालुक्यातील कुस्तीप्रेमी, मल्ल, खेळाडू आणि क्रीडा क्षेत्रातील मान्यवरांमध्ये उत्साहाचे वातावरण असून, सर्व स्तरांतून त्यांच्यावर अभिनंदनाचा वर्षाव होत आहे.

पै. प्रताप आबा हे अमळनेर शहरातील सामाजिक व क्रीडा क्षेत्रातील सक्रिय आणि परिचित व्यक्तिमत्त्व म्हणून ओळखले जातात. नगरसेवक म्हणून त्यांनी आपल्या कार्यकाळात विविध सामाजिक प्रश्नांमध्ये सक्रिय सहभाग नोंदविला आहे. तसेच जय हिंद व्यायाम शाळा, अमळनेरचे अध्यक्ष म्हणून त्यांनी व्यायाम, क्रीडा आणि मल्लविद्येला प्रोत्साहन देण्यासाठी महत्त्वपूर्ण योगदान दिले आहे. राजे शिवाजी मित्र मंडळाचे अध्यक्ष म्हणूनही त्यांनी सामाजिक, सांस्कृतिक आणि सार्वजनिक उपक्रमांमध्ये सातत्याने पुढाकार घेतला आहे.

कुस्ती हा महाराष्ट्राच्या मातीत रुजलेला पारंपरिक आणि गौरवशाली क्रीडा प्रकार आहे. ग्रामीण भागातील अनेक होतकरू मल्लांमध्ये गुणवत्ता असूनही योग्य मार्गदर्शन, सरावाची सुविधा आणि स्पर्धेचे व्यासपीठ मिळत नसते. अशा नवोदित मल्लांना प्रोत्साहन देण्यासाठी आखाडे, व्यायामशाळा, कुस्ती स्पर्धा आणि प्रशिक्षणाच्या माध्यमातून सकारात्मक वातावरण निर्माण करण्याची मोठी जबाबदारी आता पै. प्रताप अशोक शिंपी (आबा) यांच्यावर असणार आहे.

अमळनेर तालुक्यातील कुस्ती क्षेत्राला नव्या उंचीवर नेण्यासाठी मल्लांना आवश्यक सुविधा उपलब्ध करून देणे, स्थानिक पातळीवर कुस्ती स्पर्धांचे आयोजन करणे, नवोदित खेळाडूंना प्रोत्साहन देणे तसेच पारंपरिक मल्लविद्येची परंपरा जपण्याच्या दृष्टीने त्यांच्या नेतृत्वाची भूमिका महत्त्वपूर्ण ठरणार आहे.

त्यांच्या निवडीबद्दल अमळनेर तालुक्यातील कुस्तीप्रेमी, मल्ल, क्रीडाप्रेमी आणि विविध सामाजिक संस्थांच्या पदाधिकाऱ्यांनी पै. प्रताप अशोक शिंपी (आबा) यांचे अभिनंदन करून त्यांच्या पुढील कार्यासाठी शुभेच्छा व्यक्त केल्या आहेत.

ईद-ए-मिलादुन्नबीच्या जुलूसाला पोलिस प्रशासनाचे उत्तम सहकार्य अमळनेरमध्ये शांतता, सुव्यवस्था व बंधुभावाचे दर्शन; डीवायएसपी विनायक कोते व पोलीस निरीक्षक दत्तात्रय निकम यांचा सत्कार

अमळनेर : मुस्लिम बांधवांच्या पवित्र ईद-ए-मिलादुन्नबी सणानिमित्त अमळनेर शहरात मोठ्या उत्साहात जुलूस काढण्यात आला. सणाच्या पार्श्वभूमीवर शहरात शांतता, सुव्यवस्था आणि सामाजिक सलोखा कायम राहावा, यासाठी पोलीस प्रशासनाने केलेल्या उत्कृष्ट सहकार्याबद्दल मुस्लिम समाजाच्या वतीने पोलीस प्रशासनाचे विशेष कौतुक करण्यात आले.

ईद-ए-मिलादुन्नबीच्या पवित्र पर्वानिमित्त मुस्लिम बांधवांनी मोठ्या उत्साहात व शिस्तबद्ध पद्धतीने जुलूस काढला. यावेळी शहरात सर्वधर्मीयांमध्ये बंधुभाव, एकोपा आणि शांततेचे वातावरण पाहायला मिळाले. जुलूसादरम्यान कायदा व सुव्यवस्था अबाधित राहावी यासाठी पोलीस प्रशासनाने योग्य नियोजन व सहकार्य केले.

याबद्दल डीवायएसपी विनायक कोते तसेच पोलीस निरीक्षक दत्तात्रय निकम यांचा मुस्लिम समाजाच्या वतीने सत्कार करण्यात आला. प्रशासनाने दिलेल्या सहकार्यामुळे सण उत्साहपूर्ण आणि शांततेच्या वातावरणात पार पडल्याबद्दल उपस्थितांनी समाधान व्यक्त केले.

यावेळी मुस्लिम समाजाचे अध्यक्ष जनाब नासिर हाजी साहेब, माजी नगरसेवक मुक्तार खाटीक, फिरोज मिस्तरी, नगरसेवक नावेद शेख, शकील काजी, वरुण पाटील, जितू ठाकूर, सय्यद अजहर, जुनेद शेख, मुव्हीज सय्यद, जाकीर शेख, बागवान अयाज, इमरान शेख आरिफ, भाया इमरान खाटीक, वसीम पठाण आदी उपस्थित होते.

अमळनेर शहरातील विविध सण-उत्सव शांतता, सामाजिक सलोखा आणि परस्पर बंधुभावाच्या वातावरणात साजरे करण्याची परंपरा असून, ईद-ए-मिलादुन्नबीच्या निमित्तानेही त्याचे दर्शन घडले. ‘शांतता, सुव्यवस्था आणि भाईचारा हीच अमळनेरची ओळख’ असा संदेश या उत्सवातून देण्यात आला.नासिर हाजी साहेब, माजी नगरसेवक मुक्तार खाटीक, फिरोज मिस्तरी, नगरसेवक नावेद शेख, शकील काजी, वरुण पाटील, जितू ठाकूर, सय्यद अजहर, जुनेद शेख, मुव्हीज सय्यद, जाकीर शेख, बागवान अयाज, इमरान शेख आरिफ, भाया इमरान खाटीक, वसीम पठाण आदी उपस्थित होते.

अमळनेर शहरातील विविध सण-उत्सव शांतता, सामाजिक सलोखा आणि परस्पर बंधुभावाच्या वातावरणात साजरे करण्याची परंपरा असून, ईद-ए-मिलादुन्नबीच्या निमित्तानेही त्याचे दर्शन घडले. ‘शांतता, सुव्यवस्था आणि भाईचारा हीच अमळनेरची ओळख’ असा संदेश या उत्सवातून देण्यात आला.

‘मूर्तिकार व्हा’ कार्यशाळेचे रविवारी आयोजन साने गुरुजी कर्मभूमी स्मारक येथे शाडू मातीपासून मूर्ती साकारण्याची संधी

अमळनेर : विद्यार्थ्यांसह कला व संस्कृतीची आवड असलेल्या नागरिकांमधील सर्जनशीलतेला चालना देण्यासाठी ‘मूर्तिकार व्हा’ या विशेष कार्यशाळेचे आयोजन रविवार, दि. ३० ऑगस्ट २०२६ रोजी दुपारी २ वाजता करण्यात आले आहे. ही कार्यशाळा साने गुरुजी कर्मभूमी स्मारक, गलवाडे रोड, अमळनेर येथे होणार आहे.

या कार्यशाळेत सहभागी होणाऱ्यांना शाडू मातीपासून मूर्ती साकारण्याचे प्राथमिक तंत्र, आकारनिर्मिती आणि कलाकुसरीची माहिती प्रत्यक्ष प्रात्यक्षिकाद्वारे देण्यात येणार आहे. पर्यावरणपूरक पद्धतीने मूर्तीकलेची ओळख करून देणाऱ्या या उपक्रमामुळे सहभागींच्या कलागुणांना वाव मिळणार असून, पारंपरिक मूर्तीकलेविषयी आकर्षण निर्माण होण्यासही मदत होणार आहे.

सहभागींसाठी आवश्यक साहित्य

कार्यशाळेत सहभागी होणाऱ्यांनी सोबत एक किलो शाडू माती, लाकडी फळी, वाटी, प्लास्टिकचा डबा, रिकामी रिफिल, रद्दी वर्तमानपत्र, पेन्सिल, पाण्याची बाटली आदी साहित्य आणावे.

कला, सर्जनशीलता आणि पर्यावरणपूरक विचार यांचा सुंदर संगम असलेल्या या उपक्रमात जास्तीत जास्त नागरिकांनी सहभागी होऊन ‘मूर्तिकार व्हा’ कार्यशाळेचा लाभ घ्यावा, असे आवाहन आयोजकांकडून करण्यात आले आहे.

साथी गुलाबराव पाटील स्मृती समारोहात सामाजिक व राजकीय पुरस्कारांचे थाटात वितरण

अमळनेर | प्रतिनिधी

अमळनेर येथील छत्रपती शिवाजी महाराज नाट्यगृहात आयोजित ‘साथी गुलाबराव पाटील स्मृती समारोहा’त राज्यस्तरीय सामाजिक व राजकीय पुरस्कारांचे थाटात वितरण करण्यात आले. अमळनेर शिक्षण प्रसारक मंडळ व साने गुरुजी विद्यालय यांच्या संयुक्त विद्यमाने दि. २१ व २२ ऑगस्ट रोजी आयोजित या समारोहाला सामाजिक, राजकीय, शैक्षणिक व साहित्य क्षेत्रातील मान्यवरांसह विद्यार्थी, पालक व नागरिकांची मोठी उपस्थिती लाभली.

यंदाचा ‘साथी गुलाबराव पाटील स्मृती राजकीय पुरस्कार’ जनता दलाचे नेते तथा मीरा-भाईंदर महापालिकेचे माजी नगरसेवक मिलन म्हात्रे यांना, तर ‘सामाजिक (पुरोगामी) पुरस्कार’ माजी आयआरएस अधिकारी व जलसंवर्धन तज्ज्ञ उज्वलकुमार चव्हाण यांना प्रदान करण्यात आला. संस्थेचे अध्यक्ष हेमकांत पाटील व सचिव संदीप घोरपडे यांच्या हस्ते पुरस्कारांचे वितरण करण्यात आले.

राज्यस्तरीय पुरस्काराचे स्वरूप लाल टोपी, बागायतदार रुमाल, २१ हजार रुपये रोख रक्कम आणि ‘शिंगाडेधारी गुलाबराव पाटील’ स्मृतीचिन्ह असे होते.

अध्यक्षीय भाषणातून विद्यार्थ्यांना वैचारिक दिशा

कार्यक्रमाच्या अध्यक्षस्थानी पारलिंगी समाजाच्या अभ्यासक शमिभा पाटील होत्या. विद्यार्थ्यांशी संवाद साधताना त्यांनी सोशल मीडियावरून येणाऱ्या माहितीची सत्यता पडताळून पाहण्याचे आवाहन केले.

“सोशल मीडिया किंवा इतर माध्यमातून येणारे सर्वच मेसेज खरे नसतात. मेसेजची खात्री करावी. प्रसंगी लायब्ररीत जाऊन संदर्भ शोधावा. त्यातून आपली वैचारिक बैठक तयार होईल. देशातील लोकशाही टिकवून ठेवण्याची जबाबदारी ‘जेन-झी’वर (Gen Z) आहे. विद्यार्थ्यांनी विवेकातून परिवर्तन घडवावे,” असे शमिभा पाटील यांनी सांगितले.

त्या पुढे म्हणाल्या, “द्वेषापेक्षा संवादाला महत्त्व द्या. अफवांपेक्षा सत्याची पडताळणी करा. व्यक्तीपूजेपेक्षा विचारांना आणि विभाजनापेक्षा बंधुत्वाला महत्त्व द्या. भारतीय संविधानाच्या प्रास्ताविकेतील मूल्ये आपल्या आचरणात रुजल्यास संविधानाला अभिप्रेत असा समाज निर्माण होईल.”

‘पाण्याच्या प्रश्नावर माणसे तयार करणे हेच योगदान’ — उज्वलकुमार चव्हाण

सत्कारमूर्ती उज्वलकुमार चव्हाण यांनी आपल्या मनोगतात जलसंवर्धनाच्या कार्याचा उल्लेख करताना सांगितले की, “छत्रपती शिवाजी महाराजांनी स्वराज्यासाठी बलिदान देणारी माणसे तयार केली, हे त्यांचे सर्वात मोठे योगदान होते. आम्ही देखील महाराष्ट्रातील १२ जिल्ह्यांतील २३८ गावांमध्ये जलक्रांती घडवून आणली आहे. गावात पाण्यासाठी झटणारी माणसे तयार करणे ही आमची प्रेरणा आहे.”

विद्यार्थ्यांनी नियमित अभ्यासाची सवय लावून घ्यावी, जीवनमूल्यांच्या जडणघडणीसाठी वारकरी संप्रदायातील हरिपाठ ऐकावा, तसेच शाळांनी विपश्यना केंद्र सुरू करावे, असा सल्लाही त्यांनी यावेळी दिला.

मिलन म्हात्रे यांनी जागविल्या साथी गुलाबराव पाटील यांच्या आठवणी

दुसरे सत्कारमूर्ती मिलन म्हात्रे यांनी आपल्या भाषणातून माजी आमदार साथी गुलाबराव पाटील यांच्या कार्याच्या व आठवणींना उजाळा दिला. त्यांच्या सामाजिक व राजकीय योगदानाचे स्मरण करत त्यांनी त्यांच्या विचारांचा वारसा पुढे नेण्याची गरज व्यक्त केली.

कार्यक्रमाचे प्रास्ताविक संस्थेचे सचिव संदीप घोरपडे यांनी केले. यावेळी संस्थेचे ज्येष्ठ संचालक गुणवंतराव पाटील, ॲड. अशोक बाविस्कर, किरण पाटील, डॉ. शकील जलालोद्दीन शेख, भास्कर बोरसे, किरण पाटील, मगन पाटील, मुख्याध्यापक संजीव पाटील, अनिता पाटील, सुनील पाटील, शिक्षक, पालक, विद्यार्थी व नागरिक मोठ्या संख्येने उपस्थित होते.

‘साथी संदेश’ वक्तृत्व स्पर्धेत प्रशांत बेले प्रथम

स्मृती समारोहाच्या निमित्ताने आयोजित ‘साथी संदेश वक्तृत्व स्पर्धेत’ राज्यभरातून विद्यार्थ्यांनी उत्स्फूर्त सहभाग नोंदविला. या स्पर्धेत प्रशांत चिंतामण बेले (संभाजीनगर) याने प्रथम क्रमांक पटकावला. समृद्धी संजय मोरणकार (मालेगाव) हिने द्वितीय, तर रुपेश जयंत पाटील (जळगाव) याने तृतीय क्रमांक मिळविला. कल्याणी संदीप पाटील (अमळनेर) हिने उत्तेजनार्थ पारितोषिक पटकावले.

स्पर्धेतील विजेत्या विद्यार्थ्यांना मान्यवरांच्या हस्ते पारितोषिके प्रदान करण्यात आली. राज्यस्तरीय ‘साथी संदेश वक्तृत्व करंडक’ स्पर्धेमुळे विद्यार्थ्यांना आपल्या विचारांना प्रभावीपणे मांडण्याची संधी मिळाली.

साहित्य व नाट्य क्षेत्रातील दिग्गज प्राध्यापक राजेंद्र देशमुख, कविवर्य बी. एन. चौधरी व संजय नेरकर यांनी परीक्षक म्हणून काम पाहिले.

कार्यक्रमाचे सूत्रसंचालन डी. ए. धनगर, जे. एस. पाटील, मोनिका पाटील आणि श्रीमती शारदा उंबरकर यांनी केले, तर आभार मुख्याध्यापिका अनिता पाटील यांनी मानले.

सामाजिक बांधिलकी, पुरोगामी विचार, जलसंवर्धन, विद्यार्थी प्रबोधन आणि प्रभावी वक्तृत्वाला व्यासपीठ देणारा हा स्मृती समारोह अमळनेरच्या सांस्कृतिक व शैक्षणिक क्षेत्रात प्रेरणादायी ठरला.

जळगाव शहर जिल्हा काँग्रेसच्या उपाध्यक्षपदी जगदीश गाढे प्रदेशाध्यक्ष हर्षवर्धन सपकाळ यांच्याकडून नियुक्ती; काँग्रेस पदाधिकाऱ्यांकडून अभिनंदनाचा वर्षाव

अमळनेर/जळगाव : काँग्रेस पक्षाच्या संघटनात्मक बांधणीला अधिक बळकटी देण्याच्या दृष्टीने जळगाव शहर जिल्हा काँग्रेस कमिटीच्या उपाध्यक्षपदी काँग्रेसचे निष्ठावंत कार्यकर्ते जगदीश गाढे यांची नियुक्ती करण्यात आली आहे. महाराष्ट्र प्रदेश काँग्रेस कमिटीचे प्रदेशाध्यक्ष हर्षवर्धन सपकाळ यांनी त्यांच्या नियुक्तीची घोषणा केली.

जगदीश गाढे यांनी काँग्रेस पक्षाच्या विचारधारेवर निष्ठा ठेवत सातत्याने पक्षाच्या विविध उपक्रमांमध्ये सक्रिय सहभाग घेतला आहे. पक्ष संघटन मजबूत करण्यासाठी तसेच सर्वसामान्य नागरिकांच्या प्रश्नांना वाचा फोडण्यासाठी त्यांनी केलेल्या कार्याची दखल घेत त्यांच्यावर जळगाव शहर जिल्हा काँग्रेसच्या उपाध्यक्षपदाची महत्त्वाची जबाबदारी सोपविण्यात आली आहे.

गाढे यांच्या नियुक्तीचे काँग्रेस कार्यकर्त्यांमध्ये उत्साहाचे वातावरण असून, त्यांच्या माध्यमातून जळगाव शहरात पक्ष संघटनेला आणखी बळ मिळेल, असा विश्वास काँग्रेस पदाधिकाऱ्यांनी व्यक्त केला.

त्यांच्या निवडीबद्दल महानगराध्यक्ष जमील शेख, प्रदेश उपाध्यक्ष संदीप पाटील, माजी आमदार शिरीष चौधरी, योगेंद्रसिंग पाटील, प्रदेश सरचिटणीस मुक्ती हरून नकवी, डॉ. ऐश्वर्या राठोड, प्रदेश सचिव प्रवीण सुरवाडे, जिल्हाध्यक्ष अविनाश भालेराव, धनंजय चौधरी, जिल्हा सरचिटणीस प्रदीप सोनवणे यांच्यासह काँग्रेस पक्षातील पदाधिकारी, कार्यकर्ते व विविध स्तरातील मान्यवरांनी अभिनंदन करून पुढील राजकीय वाटचालीस शुभेच्छा दिल्या.

पक्षाने सोपविलेली जबाबदारी प्रामाणिकपणे पार पाडून काँग्रेसची विचारधारा तळागाळापर्यंत पोहोचविण्यासाठी तसेच पक्ष संघटना अधिक मजबूत करण्यासाठी आपण सर्वांना सोबत घेऊन काम करू, असा निर्धार नवनियुक्त उपाध्यक्ष जगदीश गाढे यांनी व्यक्त केला.

वस्त्रकलेचे आद्य निर्माते भगवान श्री जिव्हेश्वर महाराज : साळी समाजाच्या आराध्यदैवताचा जन्मोत्सव आज उत्साहात

अमळनेर | प्रतिनिधी

साळी समाजाचे आराध्यदैवत, वस्त्रकलेचे आद्य निर्माते आणि समाजाचे प्रेरणास्थान असलेल्या भगवान श्री जिव्हेश्वर महाराज यांचा जन्मोत्सव मंगळवार, दि. २५ ऑगस्ट २०२६ रोजी श्रद्धा, भक्ती आणि उत्साहाच्या वातावरणात साजरा करण्यात येत आहे. भगवान श्री जिव्हेश्वर महाराज हे साळी समाजाचे आद्य पुरुष मानले जात असून, त्यांच्या जन्मकथेचा आणि वस्त्रनिर्मितीच्या परंपरेचा समाजाच्या धार्मिक, सांस्कृतिक आणि सामाजिक जीवनाशी अतूट संबंध आहे.

मानवाची लज्जा झाकण्यासाठी भगवान जिव्हेश्वरांची निर्मिती

साळी समाजाच्या श्रद्धेनुसार, सृष्टीच्या निर्मितीनंतर मानवाच्या अंगावर वस्त्र नसल्याने त्याची लज्जा झाकण्याची आवश्यकता निर्माण झाली. मानवाची लज्जा झाकण्यासाठी आणि त्याला वस्त्र उपलब्ध करून देण्यासाठी भगवान शंकरांनी आपल्या जिव्हेतून भगवान श्री जिव्हेश्वर महाराजांची निर्मिती केली, अशी आख्यायिका आहे.

भगवान शंकरांच्या जिव्हेतून निर्माण झालेले भगवान श्री जिव्हेश्वर महाराज हे वस्त्रकलेचे आद्य पुरुष मानले जातात. त्यांनी मानवासाठी वस्त्रनिर्मितीची कला विकसित केली आणि पुढे ही कला समाजाच्या जीवनाचा अविभाज्य भाग बनली. त्यामुळे भगवान जिव्हेश्वर महाराज हे केवळ साळी समाजाचे आराध्यदैवत नसून मानवाची लज्जा झाकण्यासाठी वस्त्रकलेचा पाया घालणारे आद्य पुरुष म्हणून श्रद्धेने स्मरण केले जातात.

वस्त्रकलेला मिळाले धार्मिक आणि सांस्कृतिक अधिष्ठान

वस्त्र ही मानवाची मूलभूत गरज आहे. शरीराचे संरक्षण करण्याबरोबरच मानवी प्रतिष्ठा आणि लज्जेचे रक्षण करण्याचे महत्त्वपूर्ण कार्य वस्त्र करते. त्यामुळे वस्त्रनिर्मितीची कला ही केवळ उपजीविकेचे साधन नसून मानवसेवेशी जोडलेली पवित्र कला असल्याचे भगवान श्री जिव्हेश्वर महाराजांच्या परंपरेतून दिसून येते.

विणकाम, हातमाग आणि वस्त्रनिर्मितीची कला पिढ्यान्पिढ्या पुढे चालत आली. आपल्या कष्ट, कौशल्य आणि मेहनतीच्या जोरावर समाजाच्या वस्त्रांच्या गरजा पूर्ण करणाऱ्या साळी समाजाने या गौरवशाली परंपरेचा वारसा आजवर जपला आहे.

जन्मोत्सवाला विशेष धार्मिक महत्त्व

भगवान श्री जिव्हेश्वर महाराजांच्या जन्मोत्सवानिमित्त समाजबांधवांमध्ये उत्साहाचे वातावरण आहे. विविध ठिकाणी पूजाविधी, अभिषेक, आरती, धार्मिक कार्यक्रम, मिरवणूक, प्रबोधनपर उपक्रम तसेच सामाजिक कार्यक्रमांचे आयोजन करून आराध्यदैवताला अभिवादन केले जाते.

हा जन्मोत्सव केवळ धार्मिक उत्सव नसून आपल्या पूर्वजांनी दिलेल्या कष्ट, कौशल्य, प्रामाणिकपणा आणि सेवाभावाच्या परंपरेचे स्मरण करण्याचा पवित्र दिवस आहे.

कष्ट, कौशल्य आणि सेवाभावाचा संदेश

भगवान श्री जिव्हेश्वर महाराजांशी जोडलेली वस्त्रनिर्मितीची परंपरा समाजाला कष्टाला प्रतिष्ठा आणि कौशल्याला सन्मान देण्याचा संदेश देते. हाताने कष्ट करून निर्माण केलेल्या वस्त्रातून मानवाची गरज पूर्ण करण्याचे कार्य साळी समाजाने केले आहे.

भगवान जिव्हेश्वर महाराजांच्या परंपरेचा खरा वारसा म्हणजे प्रामाणिकपणे कर्तव्य पार पाडणे, ज्ञानाचा सन्मान करणे, गुरुजन व माता-पित्यांचा आदर करणे, समाजबांधवांना सहकार्य करणे आणि मानवतेची सेवा करणे होय.

आधुनिक पिढीने परंपरेचा गौरवशाली वारसा जपावा

आज वस्त्रनिर्मितीच्या क्षेत्रात आधुनिक तंत्रज्ञानाचा मोठ्या प्रमाणावर वापर होत आहे. हातमाग आणि पारंपरिक विणकामाच्या पद्धतींमध्येही काळानुरूप बदल झाले आहेत. मात्र, या कलेमागील इतिहास, परंपरा आणि संस्कृतीचा वारसा विसरता कामा नये.

भगवान श्री जिव्हेश्वर महाराजांचा जन्मोत्सव हा नव्या पिढीला आपल्या समाजाच्या गौरवशाली इतिहासाची आणि परंपरेची ओळख करून देण्याची महत्त्वपूर्ण संधी आहे. आपल्या आद्य पुरुषाने मानवाची लज्जा झाकण्यासाठी दिलेल्या वस्त्रकलेच्या परंपरेचा अभिमान बाळगून हा वारसा पुढील पिढीपर्यंत पोहोचविणे ही प्रत्येक समाजबांधवाची जबाबदारी आहे.

मानवतेचा संदेश देणारे आराध्यदैवत

भगवान श्री जिव्हेश्वर महाराजांच्या जन्मकथेत मानवकल्याणाचा व्यापक विचार दडलेला आहे. मानवाची लज्जा झाकण्यासाठी वस्त्राची निर्मिती करण्याची संकल्पना ही मुळात मानवाच्या सन्मानाशी जोडलेली आहे. त्यामुळे त्यांच्या स्मरणातून समाजात प्रेम, बंधुभाव, समानता, परस्पर सहकार्य आणि मानवतेची भावना अधिक दृढ करण्याचा संदेश मिळतो.

भगवान श्री जिव्हेश्वर महाराजांच्या जन्मोत्सवानिमित्त त्यांच्या चरणी नतमस्तक होताना केवळ पूजा-अर्चना न करता त्यांच्या परंपरेतील कष्ट, कौशल्य, सेवा आणि मानवकल्याणाचा विचार आचरणात आणणे, हीच त्यांना खरी आदरांजली ठरेल.

मंगळवार, दि. २५ ऑगस्ट २०२६ रोजी साजरा होणारा भगवान श्री जिव्हेश्वर महाराजांचा जन्मोत्सव हा साळी समाजाच्या गौरवशाली परंपरेचा आणि मानवसेवेसाठी निर्माण झालेल्या वस्त्रकलेचा स्मृतिदिन ठरत आहे. भगवान शंकरांच्या जिव्हेतून निर्माण झालेले आद्य पुरुष भगवान श्री जिव्हेश्वर महाराज यांच्या विचारांचा वारसा जपत समाजात एकोपा, बंधुभाव, कष्टाची प्रतिष्ठा आणि मानवतेची भावना वृद्धिंगत करण्याचा संकल्प या पवित्र दिनी करूया.

|| भगवान श्री जिव्हेश्वर महाराज की जय ||

ईद-ए-मिलादच्या पार्श्वभूमीवर अमळनेर शहरात पोलिसांचा भव्य रूट मार्च संवेदनशील भागांत पोलिसांचे शक्तिप्रदर्शन; ११ अधिकारी, १२५ अंमलदारांसह दंगा नियंत्रण पथक व QRT तैनात

अमळनेर | प्रतिनिधी

आगामी ईद-ए-मिलाद सणाच्या पार्श्वभूमीवर अमळनेर शहरातील कायदा व सुव्यवस्था अबाधित ठेवण्यासाठी अमळनेर पोलिसांकडून आज दि. २४ ऑगस्ट २०२६ रोजी सकाळी १०.०० ते ११.२० वाजेच्या दरम्यान शहरातील संवेदनशील भागांत भव्य रूट मार्च काढण्यात आला. या रूट मार्चमुळे शहरात पोलिसांची दक्षता आणि सुरक्षा व्यवस्थेचे प्रभावी दर्शन घडले.

हा रूट मार्च मा. श्री. श्रीकांत धिवरे सो., पोलीस अधिक्षक, जळगाव, मा. श्री. अशोक नखाते सो., अपर पोलीस अधिक्षक, चाळीसगाव परिमंडळ तसेच मा. श्री. विनायक कोते सो., उपविभागीय पोलीस अमळनेर भाग, अमळनेर यांच्या उपस्थितीत घेण्यात आला.

शहरातील डॉ. बाबासाहेब आंबेडकर चौक, पाच कंदील चौक, दगडी दरवाजा, सराफ बाजार, पानखिडकी, वाडी चौक, कसाली डी.पी., आखाडा मकान, झामी चौक, पवन चौक, तिरंगा चौक आणि गांधलीपुरा चौकी आदी संवेदनशील भागांतून हा रूट मार्च काढण्यात आला.

रूट मार्चसाठी अमळनेर पोलीस स्टेशनचे ०६ अधिकारी व ४८ अंमलदार, मारवड पोलीस स्टेशनचे ०२ अधिकारी व १५ अंमलदार, एरंडोल पोलीस स्टेशनचे ०१ अधिकारी व १० अंमलदार, धरणगाव पोलीस स्टेशनचे ०१ अधिकारी व ०३ अंमलदार, चोपडा ग्रामीण पोलीस स्टेशनचे ०३ अंमलदार, चोपडा शहर पोलीस स्टेशनचे ०३ अंमलदार, तसेच पोलीस मुख्यालयाकडील ०३ दंगा नियंत्रण पथके आणि ०१ QRT पथक सहभागी झाले होते.

अशाप्रकारे एकूण ११ अधिकारी व १२५ अंमलदार रूट मार्चमध्ये सहभागी झाले. यासोबतच पोलीस मुख्यालय, जळगावकडील बँड पथक देखील उपस्थित होते.

ईद-ए-मिलाद सण शांततेत, उत्साहात आणि सलोख्याच्या वातावरणात पार पडावा, यासाठी पोलिस प्रशासनाकडून विशेष खबरदारी घेण्यात येत आहे. शहरातील संवेदनशील भागांतून काढण्यात आलेल्या या रूट मार्चमुळे कायदा व सुव्यवस्था राखण्यासाठी पोलीस प्रशासन पूर्णपणे सज्ज असल्याचा स्पष्ट संदेश नागरिकांना देण्यात आला.

रूट मार्चदरम्यान पोलिसांचा शिस्तबद्ध ताफा पाहून नागरिकांचेही लक्ष वेधले गेले. सणाच्या पार्श्वभूमीवर शहरात शांतता, सामाजिक सलोखा आणि बंधुभाव कायम राखण्यासाठी नागरिकांनीही प्रशासनास सहकार्य करावे, असे आवाहन करण्यात आले.