रात्री–पहाटे धडक कारवाई : ट्रॅव्हल बसेसची जळगाव पोलिसांकडून अचानक तपासणी
जळगाव | प्रतिनिधी
जिल्ह्यातून रात्री व पहाटेच्या सुमारास धावणाऱ्या खासगी ट्रॅव्हल बसेसचा वापर करून गुटखा, हवाला रक्कम, गांजा, देसी कट्टा तसेच चोरीचे सामान यांची बेकायदेशीर वाहतूक होत असल्याच्या पार्श्वभूमीवर जळगाव पोलिसांनी मोठी धडक कारवाई हाती घेतली आहे.
या गैरप्रकारांना आळा घालण्यासाठी पोलिसांकडून आज रात्री व पहाटे अचानक तपासणी मोहीम राबवण्यात येत आहे. यासाठी विशेष पथके तयार करण्यात आली असून, महत्त्वाच्या चौकांमध्ये नाकाबंदी करून प्रत्येक ट्रॅव्हल बसची सखोल तपासणी केली जात आहे.
मुक्ताईनगर–बोदवड चौफुला, आकाशवाणी चौफुला तसेच भुसावळ परिसरात ही कारवाई तीव्र करण्यात आली आहे. यावेळी आरसीपी (रोड चेकिंग पथक) चा देखील प्रभावी वापर केला जात असून संशयित हालचालींवर बारकाईने लक्ष ठेवले जात आहे.
तपासणीदरम्यान बसमधील प्रवाशांची चौकशी, संशयास्पद बॅगांची तपासणी तसेच बसेसच्या डिक्कीची झडती घेण्यात येत आहे. काही ठिकाणी खासगी बसचे कंडक्टर हे कुरियरप्रमाणे काम करून अवैध वस्तूंची देवाणघेवाण करत असल्याचेही पोलिसांच्या निदर्शनास आले आहे.
पोलिसांच्या या अचानक कारवाईमुळे बेकायदेशीर वाहतूक करणाऱ्यांमध्ये खळबळ उडाली असून, अशा प्रकारांवर कठोर कारवाई करण्याचा इशारा प्रशासनाने दिला आहे. पुढील काळातही अशा तपासण्या सुरूच राहणार असल्याचे पोलिसांकडून स्पष्ट करण्यात आले आहे.