एन.एम.एम.एस. परीक्षेत डी.आर. कन्या शाळेचा झळाळता यशस्वी ठसा

अमळनेर : येथील खा. शि. मं. संचलित द्रौ. रा. कन्या शाळेच्या विद्यार्थिनींनी राष्ट्रीय स्तरावरील मानाच्या एन.एम.एम.एस. (National Means-cum-Merit Scholarship) परीक्षेत उल्लेखनीय यश संपादन करत शाळेचा लौकिक उंचावला आहे. या परीक्षेत तब्बल सहा विद्यार्थिनींनी विशेष प्राविण्यासह गुणवत्ता (मेरिट) यादीत स्थान मिळवले असून त्यांच्या या घवघवीत यशामुळे संपूर्ण परिसरात आनंदाचे वातावरण निर्माण झाले आहे.

मोक्षदा भूषण पाटील, मयुरी संदीप पाटील, ऐश्वर्या अजय पाटील, रोहिनी बाळू शिरसाठ, वैष्णवी महारू पाटील व केतकी पंकज देशपांडे या विद्यार्थिनींनी आपल्या मेहनत, चिकाटी आणि जिद्दीच्या बळावर हे यश संपादन केले आहे.

या गुणवंत विद्यार्थिनींचा शाळेत विशेष सत्कार सोहळा आयोजित करण्यात आला. यावेळी शालेय समितीचे चेअरमन भाऊसाहेब जितेंद्रजी जैन यांच्या हस्ते विद्यार्थिनींना बक्षिसे देऊन गौरविण्यात आले. कार्यक्रमास मुख्याध्यापिका सौ. एस. एस. सूर्यवंशी, उपमुख्याध्यापिका श्रीमती एस. पी. बाविस्कर, पर्यवेक्षक श्री एस. पी. वाघ, ज्येष्ठ शिक्षक श्री एस. एस. माळी, श्री एस. एस. वाघ, ज्येष्ठ लिपिक श्री शाम पवार, श्री के. आर. बाविस्कर तसेच परीक्षेच्या प्रमुख श्रीमती तरन्नुम शेख यांची प्रमुख उपस्थिती होती.

यावेळी सर्व शिक्षक-शिक्षिका व शिक्षकेतर कर्मचारी यांनी विद्यार्थिनींच्या यशाबद्दल कौतुक व्यक्त करत त्यांच्या पुढील शैक्षणिक वाटचालीसाठी शुभेच्छा दिल्या.

शाळेच्या या यशस्वी परंपरेमुळे इतर विद्यार्थ्यांनाही प्रेरणा मिळत असून भविष्यातही अशीच उज्ज्वल कामगिरी घडत राहील, असा विश्वास उपस्थितांनी व्यक्त केला.