सायबर सुरक्षेचा संकल्प; सारा मल्टी स्पेशालिस्ट हॉस्पिटलमध्ये विशेष जनजागृती
जळगाव | प्रतिनिधी
डिजिटल युगात वाढत्या सायबर गुन्ह्यांना आळा घालण्यासाठी नागरिकांमध्ये जागरूकता निर्माण करणे काळाची गरज बनली आहे. याच उद्देशाने नागरिकांना डिजिटलदृष्ट्या सक्षम, सतर्क आणि सुरक्षित बनविण्याच्या संकल्पातून ८ सप्टेंबर रोजी जळगावातील सारा मल्टी स्पेशालिस्ट हॉस्पिटलमध्ये सायबर सिक्युरिटी अवेअरनेस कार्यक्रमाचे आयोजन करण्यात आले.
या विशेष जनजागृती उपक्रमादरम्यान हॉस्पिटलमधील स्टाफ तसेच पेशंटना सायबर फ्रॉडच्या विविध प्रकारांची सविस्तर माहिती देण्यात आली. सायबर गुन्हेगारांकडून नागरिकांना कोणकोणत्या पद्धतीने जाळ्यात ओढले जाते, ऑनलाइन व्यवहार करताना कोणती खबरदारी घ्यावी, तसेच मोबाईल, बँकिंग आणि वैयक्तिक माहिती सुरक्षित ठेवण्यासाठी कोणत्या उपाययोजना कराव्यात, याबाबत मार्गदर्शन करण्यात आले.
फसवणूक झाल्यानंतर घाबरून न जाता तातडीने योग्य मदत घेणे आणि संबंधित यंत्रणेकडे तक्रार नोंदविणे अत्यंत महत्त्वाचे असल्याचे यावेळी सांगण्यात आले. डिजिटल व्यवहारांमध्ये सतर्कता, अनोळखी लिंकपासून सावधगिरी आणि वैयक्तिक माहिती कोणाशीही शेअर न करण्याबाबत विशेष सूचना देण्यात आल्या.
यावेळी क्विक हील फाउंडेशनच्या अँटी-फ्रॉड ॲपचे अॅक्टिवेशन करून त्याचा उपयोग, कार्यपद्धती आणि सायबर फसवणुकीपासून बचावासाठी त्याचे महत्त्व याबाबतही उपस्थितांना माहिती देण्यात आली.
डॉ. पटेल सर यांच्या मार्गदर्शनाखाली आयोजित करण्यात आलेल्या या जनजागृती उपक्रमात सायबर वॉरियर विद्या सोनवणे आणि साक्षी तानाजी पाटील यांनी प्रभावी भूमिका बजावत उपस्थितांना सायबर सुरक्षेबाबत महत्त्वपूर्ण मार्गदर्शन केले.
या उपक्रमासाठी डॉ. आर. बी. आमले सरांचे मार्गदर्शन लाभले. डिजिटल व्यवहारांचा वाढता वापर लक्षात घेता अशा प्रकारचे सायबर सुरक्षा जनजागृती कार्यक्रम नागरिकांना अधिक सजग आणि सुरक्षित बनविण्यासाठी निश्चितच उपयुक्त ठरत असल्याचे यावेळी अधोरेखित करण्यात आले.