अमळनेर शहरात डास प्रतिबंधक फवारणी व मलेरिया ऑइल टाकण्याची प्रभावी मोहीम
अमळनेर : अमळनेर नगरपरिषदेच्या स्वच्छता विभागामार्फत माननीय लोकनियुक्त नगराध्यक्ष व मुख्याधिकारी यांच्या मार्गदर्शनाखाली अमळनेर शहरातील नागरिकांचे आरोग्य सुरक्षित राहावे आणि डासांमुळे होणाऱ्या आजारांना प्रतिबंध व्हावा, यासाठी विशेष स्वच्छता व डास प्रतिबंधक मोहीम राबविण्यात येत आहे.
शहरातील प्रभाग क्रमांक १ ते १८ मधील विविध भागांमध्ये डास प्रतिबंधक औषधांची फवारणी करण्यात येत असून, ज्या ठिकाणी पाणी साचलेले आहे अशा ठिकाणी मलेरिया ऑइलचा वापर करण्यात येत आहे. पावसाळ्याच्या पार्श्वभूमीवर डासांची उत्पत्ती होऊ नये, तसेच मलेरिया, डेंग्यू यांसारख्या डासांपासून होणाऱ्या आजारांचा प्रादुर्भाव रोखण्यासाठी नगरपरिषदेच्या वतीने ही प्रतिबंधात्मक कार्यवाही सातत्याने करण्यात येत आहे.
या मोहिमेसाठी भरत आगळे, प्रविण बिऱ्हाडे, योगेश पवार, सतीश बिऱ्हाडे, विजय पाटील व मनोज गरुड यांच्या कर्मचारी पथकासह प्रभाग क्रमांक १ ते १८ मधील सर्व मुकादम व स्वच्छता कर्मचारी यांची नियुक्ती करण्यात आली आहे. संबंधित पथकांकडून विविध भागांची पाहणी करून आवश्यक त्या ठिकाणी फवारणी तसेच साचलेल्या पाण्यावर मलेरिया ऑइल टाकण्याची कार्यवाही केली जात आहे.
“स्वच्छ व निरोगी अमळनेर – डासमुक्त अमळनेर” या उद्देशाने नगरपरिषद प्रशासनाकडून आवश्यक त्या उपाययोजना करण्यात येत असून, नागरिकांनीही आपल्या घराच्या परिसरात पाणी साचणार नाही याची काळजी घ्यावी. घराभोवतीची भांडी, टायर, डबे, कुंड्या, गटारी किंवा इतर ठिकाणी पाणी साचले असल्यास ते तात्काळ काढून टाकावे आणि नगरपरिषद स्वच्छता विभागास सहकार्य करावे, असे आवाहन करण्यात आले आहे.
नगरपरिषद प्रशासनाच्या वतीने नागरिकांना आवाहन करण्यात येते की, स्वच्छता ही केवळ नगरपरिषदेची जबाबदारी नसून प्रत्येक नागरिकाची सामूहिक जबाबदारी आहे. नागरिकांच्या सहकार्याने अमळनेर शहर स्वच्छ, सुंदर व आरोग्यदायी ठेवण्यासाठी स्वच्छता विभाग सदैव तत्पर राहील.
