जिजामाता माध्यमिक विद्यालयात विद्यार्थ्यांना सायबर क्राईमविषयी मार्गदर्शन
एरंडोल, जि. जळगाव : डिजिटल तंत्रज्ञानाचा वाढता वापर आणि ऑनलाइन व्यवहारांच्या वाढत्या प्रमाणात विद्यार्थ्यांनी सायबर सुरक्षेबाबत सजग राहणे गरजेचे आहे. याच पार्श्वभूमीवर जिजामाता माध्यमिक विद्यालय, एरंडोल येथे विद्यार्थ्यांसाठी सायबर क्राईम आणि सायबर सुरक्षेविषयी जनजागृतीपर मार्गदर्शन कार्यक्रमाचे आयोजन करण्यात आले.
कार्यक्रमात बहिणाबाई चौधरी उत्तर महाराष्ट्र विद्यापीठातील विद्यार्थिनी कुमारी स्नेहल पाटील व कुमारी वैष्णवी पाटील यांनी विद्यार्थ्यांना सायबर गुन्ह्यांचे विविध प्रकार, त्यापासून बचावाच्या उपाययोजना तसेच डिजिटल माध्यमांचा सुरक्षित वापर याबाबत सविस्तर मार्गदर्शन केले.
मोबाईल, सोशल मीडिया आणि ऑनलाइन व्यवहारांचा वापर करताना कोणती काळजी घ्यावी, याबाबत विद्यार्थ्यांना महत्त्वपूर्ण सूचना देण्यात आल्या. अनोळखी लिंकवर क्लिक करू नये, ओटीपी व पासवर्ड कोणालाही सांगू नये, सोशल मीडिया अकाउंट सुरक्षित ठेवावे, तसेच क्यूआर कोडच्या माध्यमातून होणाऱ्या फसवणुकीपासून सावध राहावे, असे आवाहन करण्यात आले. ऑनलाइन फसवणुकीची घटना घडल्यास घाबरून न जाता तातडीने योग्य ती कार्यवाही करण्याचेही सांगण्यात आले.
यावेळी विद्यार्थ्यांना सायबर सुरक्षा व ऑनलाइन फसवणुकीपासून बचाव करण्यासाठी मार्गदर्शक बुकलेटचे वाटप करण्यात आले. या बुकलेटमधील माहिती विद्यार्थ्यांना दैनंदिन डिजिटल व्यवहार करताना अधिक सजग आणि सुरक्षित राहण्यासाठी उपयुक्त ठरणार आहे. विद्यार्थ्यांनी बुकलेटमधील मार्गदर्शक सूचनांचा नियमित वापर करावा, असे आवाहन करण्यात आले.
कार्यक्रमास विद्यालयाचे मुख्याध्यापक श्री. प्रविण शंभू केदार सर तसेच ज्युनिअर क्लर्क श्री. आर. आर. वाघ सर यांची उपस्थिती होती. कार्यक्रमादरम्यान विद्यार्थ्यांनी उत्स्फूर्त सहभाग नोंदवत सायबर सुरक्षा, ऑनलाइन फसवणूक आणि सोशल मीडिया वापराबाबत विविध प्रश्न विचारले. उपस्थित मार्गदर्शकांनी विद्यार्थ्यांच्या प्रश्नांना समर्पक उत्तरे देत त्यांच्या शंकांचे निरसन केले.
डिजिटल युगात तंत्रज्ञानाचा सुरक्षित आणि जबाबदारीने वापर करण्यासाठी विद्यार्थ्यांमध्ये सायबर सुरक्षेविषयी जागरूकता निर्माण करणारा हा उपक्रम अत्यंत उपयुक्त ठरला.
