माहिती अधिकार दिनी विद्यार्थ्यांना कायद्याची ओळख; विविध स्पर्धांतून जनजागृती सौ. सु. गि. पाटील माध्यमिक विद्यालय व सौ. जयश्री गणेश पूर्णपात्री कनिष्ठ महाविद्यालयात उपक्रम

भडगाव प्रतिनिधी :

सौ. सु. गि. पाटील माध्यमिक विद्यालय व सौ. जयश्री गणेश पूर्णपात्री कनिष्ठ महाविद्यालय येथे २८ सप्टेंबर रोजी ‘माहिती अधिकार दिन’ उत्साहात साजरा करण्यात आला. महाराष्ट्र शासनाच्या प्राथमिक शिक्षण संचालनालय तसेच सामान्य प्रशासन विभाग, मंत्रालय, मुंबई यांच्या निर्देशानुसार नागरिकांमध्ये माहितीचा अधिकार अधिनियम २००५ बाबत व्यापक जनजागृती करण्याच्या उद्देशाने हा उपक्रम आयोजित करण्यात आला.

मुख्याध्यापक तथा प्राचार्य श्री. ए. बी. अहिरे यांच्या मार्गदर्शनाखाली झालेल्या कार्यक्रमाच्या सुरुवातीला विद्यार्थ्यांनी भारतीय संविधानाच्या उद्देशिकेचे सामूहिक वाचन केले. यावेळी माहितीचा अधिकार अधिनियम २००५ मधील कलम ४(१), कलम २(ब), कलम ६, कलम ७, कलम ८(१), कलम ८(२) व कलम २३ याबाबत विद्यार्थ्यांना सविस्तर माहिती देण्यात आली.

कार्यक्रमात विद्यालयाच्या मुख्याध्यापिका श्रीमती सी. व्ही. बिऱ्हाडे, पर्यवेक्षक श्री. ए. बी. तायडे, ज्येष्ठ शिक्षक श्री. एन. के. सोनजे तसेच इतिहासाचे अभ्यासक श्री. बी. ए. पाटील यांनी मार्गदर्शन केले. माहितीचा अधिकार हा नागरिकांना शासनाच्या कामकाजात पारदर्शकता व उत्तरदायित्व निर्माण करण्यासाठी मिळालेला महत्त्वपूर्ण अधिकार असल्याचे यावेळी स्पष्ट करण्यात आले.

या उपक्रमामुळे विद्यार्थ्यांना नागरिकशास्त्र विषयातील संकल्पनांची उजळणी होऊन लोकशाही, संविधान आणि नागरिकांचे अधिकार याबाबत अधिक सखोल माहिती मिळाली.

माहिती अधिकार दिनानिमित्त विद्यालयात प्रश्नमंजुषा, निबंध, वक्तृत्व, चित्रकला आदी विविध स्पर्धांचेही आयोजन करण्यात आले. विद्यार्थ्यांनी उत्स्फूर्त सहभाग नोंदवत माहिती अधिकाराबाबत जनजागृतीचा संदेश दिला.

सौ.  रना देशमुख महाविद्यालयात अग्निवीर भरती पूर्व प्रशिक्षण कार्यशाळेला उत्साहात सुरवात

भडगाव ( प्रतिनिधी) : येथील सौ र ना देशमुख महाविद्यालयात विद्यार्थी विकास विभाग कवयित्री बहिणाबाई चौधरी उत्तर महाराष्ट्र विद्यापीठ व देशमुख महाविद्यालयातील विद्यार्थी विकास विभाग आणि जिमखाना विभाग यांच्या संयुक्त विद्यमाने केंद्र सरकार पुरस्कृत सहा दिवसाच्या अग्निवीर भरती पूर्व प्रशिक्षण कार्यशाळेचे उद्घाटन भडगाव पोलिस स्टेशनचे पोलिस निरीक्षक मा. श्री महेशजी टाक यांच्या हस्ते सुभाषचंद्र बोस यांच्या प्रतिमेचे पूजन करून करण्यात आले. या प्रसंगी त्यांनी प्रत्येक मुलाने अग्निवीर सैनिक बनावे म्हणजे शिस्त बद्ध समाज तयार होईल असे विचार मांडले. आजच्या पहिल्या दिवशी प्रशिक्षक म्हणून जळगाव येथील पोलिस कॉन्स्टेबल व खेळाडू मा. स्वप्नील परदेशी यांनी अग्निवीर, पोलिस, व सैन्यदलात भरती होण्यासाठी काय तयारी करावी व शारीरिक आणि मानसिक आरोग्य कसे नीट ठेवावे म्हणजे यश नक्की मिळते या विषयी माहिती दिली. या प्रसंगी प्रमुख पाहुणे म्हणून बोलताना कवयित्री बहिणाबाई चौधरी उत्तर महाराष्ट्र विद्यापीठचे स्थानिक व्यवस्थापन परिषद सदस्य मा अमोलदादा पाटील यांनी विद्यापीठाच्या विद्यार्थ्यांसाठी असलेल्या विविध योजनांची अतिशय सखोल माहिती दिली. पी टी सी संस्थेचे संचालक मा बाबासाहेब विनय जकातदार यांनी विविध खेळ व खेळाडू यांचा संबंध विषद केला त्यासोबतच त्यांनी अग्निवीर सैनिक हे कशी राष्ट्र सेवा करू शकतात यावर आपले विचार मांडले. या कार्यक्रमाचे अध्यक्ष महाविद्यालयाचे प्राचार्य डॉ एन एन गायकवाड यांनी कार्यशाळेच्या महत्व बद्दल आपले विचार मांडले. या कार्यशाळेचे प्रास्ताविक क्रीडा संचालक डॉ दिनेश तांदळे यांनी केले. सुरेख असे सूत्र संचालन डॉ देवेंद्र मस्की यांनी तर आभार प्रदर्शन प्रा. शिवाजी पाटील यांनी केले. राष्ट्रगीताने आजच्या दिवसाच्या प्रशिक्षणाचा समारोप करण्यात आला. या कार्यशाळेचे सुरेख असे नियोजन विद्यार्थी विकास अधिकारी प्रोफेसर डॉ संजय भैसे व सहा महिला अधिकारी प्रा श्रीमती अर्चना टेमकर यांनी केले.

SIRच्या मुद्द्यावर अमळनेर काँग्रेस आक्रमक; मुख्य निवडणूक आयुक्त ज्ञानेश कुमार यांच्या राजीनाम्याची मागणी

अमळनेर प्रतिनिधी : मतदार यादीच्या विशेष सखोल पुनर्निरीक्षणाच्या (S.I.R.) मुद्द्यावरून अमळनेर तालुका काँग्रेस कमिटी आक्रमक झाली असून, मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यात आली आहे. यासंदर्भात सोमवारी (दि. २८ सप्टेंबर) सकाळी ११ वाजता काँग्रेस पदाधिकाऱ्यांनी अमळनेर विभागाचे उपविभागीय अधिकारी मयूर भंगाळे यांच्या कार्यालयात घोषणाबाजी करत निवेदन सादर केले.

निवेदनाचे स्पष्टीकरण तालुका काँग्रेस अध्यक्ष बी. के. सूर्यवंशी, मनोज पाटील, संदीप घोरपडे, सुलोचना वाघ आणि गजेंद्र साळुंखे यांनी केले. मुख्य निवडणूक आयुक्त ज्ञानेश कुमार हे मतदार यादीच्या विशेष सखोल पुनर्निरीक्षणाच्या (SIR) प्रक्रियेत पक्षपाती व मनमानी पद्धतीने काम करीत असल्याचा आरोप यावेळी काँग्रेस पदाधिकाऱ्यांनी केला.

निवडणूक आयोगातील आयुक्त सुखबीर सिंह संधू आणि विवेक जोशी यांनी गेल्या दहा महिन्यांत आयोगाच्या काही निर्णयांवर किमान १४ वेळा आक्षेप नोंदवल्याचा दावा निवेदनात करण्यात आला. या संदर्भातील वृत्तांतही दोन्ही आयुक्तांनी मतदार नोंदणी, मतदारांची नावे वगळणे, फॉर्म-६ आणि मतदार यादीच्या डेटाबेसशी संबंधित निर्णयांवर आक्षेप घेतल्याचे समोर आले आहे.

गोव्यातील ९७ पात्र मतदारांच्या नावांबाबतही निवेदनात प्रश्न उपस्थित करण्यात आला. संबंधित मतदारांच्या नावांचा समावेश करण्यासाठी गोवा प्रशासनाकडून वारंवार पत्रव्यवहार करण्यात आल्याचे वृत्त आहे. त्यानंतर निवडणूक आयोगाने ९७ मतदारांपैकी ८१ जणांनी फॉर्म-६ सादर केल्याची माहिती दिली आहे.

देशभरातील SIR प्रक्रियेदरम्यान मोठ्या प्रमाणावर नावे मसुदा मतदार याद्यांमधून वगळण्यात आल्याचा मुद्दाही काँग्रेसने उपस्थित केला. या प्रक्रियेत सुमारे १३ कोटी नावे मसुदा मतदार याद्यांमधून वगळल्याचे द इंडियन एक्स्प्रेसच्या वृत्तात नमूद करण्यात आले आहे.

मतदार यादी ही लोकशाही व्यवस्थेचा अत्यंत महत्त्वाचा आधार असून, पात्र मतदारांचे मतदानाचे अधिकार कोणत्याही परिस्थितीत बाधित होऊ नयेत, अशी मागणी काँग्रेस पदाधिकाऱ्यांनी केली. SIR प्रक्रियेबाबत निर्माण झालेल्या प्रश्नांमुळे निवडणूक आयोगाच्या विश्वासार्हतेबाबत चिंता निर्माण झाल्याचेही त्यांनी सांगितले.

मुख्य निवडणूक आयुक्त ज्ञानेश कुमार यांच्या राजीनाम्याची मागणी करणारे निवेदन सरकारदरबारी पाठवावे, अशी विनंती यावेळी उपविभागीय अधिकाऱ्यांकडे करण्यात आली.

निवेदन देताना शरद पाटील, बन्सीलाल भागवत, कन्हैयालाल कापडे, हर्षल जाधव, रामकृष्ण पाटील, डॉ. रवींद्र पाटील, लोटन चौधरी, पार्थराज पाटील, पी. वाय. पाटील, सुधाकर भैसे, डॉ. प्रकाश सोनवणे, पितांबर पाटील, ताराचंद सूर्यवंशी, भास्कर बोरसे, राकेश पवार, राजेंद्र भिकन पाटील, शालिग्राम पाटील, भिकाजी पाटील, सुभाष शिंदे, दिलीप पाटील, प्रशांत पाटील, ज्ञानेश्वर पाटील आदी काँग्रेस पदाधिकारी व कार्यकर्ते उपस्थित होते.