अमळनेर नगरपरिषदेत सफाई कर्मचाऱ्यांच्या प्रलंबित मागण्यांवर आढावा बैठक संपन्न

अमळनेर (प्रतिनिधी):

स्थानिक नगरपरिषद अमळनेर, जिल्हा जळगाव येथे महाराष्ट्र राज्य सफाई कर्मचारी आयोगाचे उपाध्यक्ष मुकेश सारवान व त्यांचे स्वीय सहाय्यक राजेश सोनवणे यांच्या प्रमुख उपस्थितीत सफाई कर्मचाऱ्यांच्या समस्यांबाबत आढावा बैठक पार पडली. या बैठकीत अखिल महाराष्ट्र सफाईगार व चतुर्थश्रेणी कर्मचारी संघटनेचे राज्य अध्यक्ष नागेश कंडारे आणि नाशिक विभागीय अध्यक्ष अनिल बेंडवाल यांनी कर्मचाऱ्यांच्या विविध प्रलंबित मागण्यांबाबत आयोग व नगरपरिषदेचे मुख्याधिकारी गणेश शिंदे यांच्याशी विस्तृत चर्चा केली.

या बैठकीदरम्यान सफाई कर्मचाऱ्यांना कामाचे सुरक्षा साहित्य जसे की झाडू, तगारी, पावडी, हँड ग्लोव्हज आणि मास्क वेळेवर उपलब्ध करून देण्याची मागणी करण्यात आली. तसेच डॉ. बाबासाहेब आंबेडकर श्रमसाफल्य आवास योजनेअंतर्गत कर्मचाऱ्यांना मोफत घरे मिळावीत, ते राहत असलेली शासकीय निवासस्थाने त्यांच्या मालकी हक्काने नाव करून घरभाडे बंद करावे आणि सर्व कर्मचांची सेवापुस्तके अद्ययावत केली जावीत, अशा विविध विषयांवर भर देण्यात आला.

याव्यतिरिक्त, सन २००५ नंतर सेवेत रुजू होऊन सेवानिवृत्त झालेल्या कर्मचाऱ्यांना रजारोखीकरणाची रक्कम व इतर थकबाकी तात्काळ देणे, काही कर्मचाऱ्यांच्या ग्रेज्युटीमधून नगरपरिषदेने कपात केलेल्या रकमा परत करणे, वैद्यकीयदृष्ट्या अपात्र किंवा सेवेत मयत झालेल्या कर्मचाऱ्यांच्या वारसांना शासकीय नियमानुसार पेन्शन लाभ देणे आणि लाड-पागे वारसा हक्काच्या प्रलंबित प्रकरणांवर तात्काळ कारवाई करून पात्र वारसांना नेमणूक आदेश देण्याबाबत सविस्तर चर्चा झाली.

बैठकीत मांडण्यात आलेल्या सर्व विषयांवर आयोग व मुख्याधिकारी यांनी सकारात्मक भूमिका घेत योग्य कार्यवाहीचे आश्वासन दिले. या बैठकीस नगरपरिषदेचे विविध विभाग प्रमुख, संघटनेचे पदाधिकारी आणि सफाई कर्मचारी मोठ्या संख्येने उपस्थित होते.

“युवा वर्गाला रोटरीच्या माध्यमातून मार्गदर्शनाची गरज” -खासदार अॅड. उज्ज्वल निकम

अमळनेर, दि. २० ऑगस्ट २०२६ : रोटरी क्लब ऑफ अमळनेरचा पदग्रहण समारंभ नर्मदा रिसॉर्ट येथे उत्साहपूर्ण वातावरणात संपन्न झाला. या सोहळ्यास पद्मश्री मान. खासदार ॲड. उज्ज्वल निकम प्रमुख पाहुणे म्हणून उपस्थित होते. असिस्टंट गव्हर्नर रोटे. ॲड. रुपेश पाटील तसेच रोटे. गनी मेमन, जळगाव यांची विशेष उपस्थिती होती.

कार्यक्रमाच्या प्रारंभी रोटरी परिवारातील सदस्य तसेच साने गुरुजी स्मारकाचे संस्थापक माजी प्राचार्य अरविंद सराफ सर यांच्यासह सर्व दिवंगतांना श्रद्धांजली अर्पण करण्यात आली. त्यानंतर उपस्थित मान्यवरांचा पुष्पगुच्छ देऊन यथोचित सत्कार करण्यात आला.

मावळते अध्यक्ष रोटे. देवेंद्र कोठारी यांनी गतवर्षातील रोटरीच्या कार्याचा अहवाल सादर केला. त्यानंतर त्यांनी नूतन अध्यक्ष रोटे. महेश पाटील यांना कॉलर, रोटरी चार्टर व हॅमर प्रदान करून पदभार सोपविला. मावळते सचिव रोटे. आशिष चौधरी यांनी नूतन सचिव रोटे. प्रशांत निकम यांच्याकडे सचिवपदाचा पदभार सुपूर्द केला. नूतन अध्यक्ष रोटे. महेश पाटील यांनी यावेळी आपले मनोगत व्यक्त केले.

असिस्टंट गव्हर्नर ॲड. रुपेश पाटील यांनी आर.आय. डिस्ट्रिक्ट ३०३० चे गव्हर्नर डॉ. राजेश पाटील यांचा संदेश वाचून दाखविला. प्रमुख पाहुणे मान. खासदार ॲड. उज्ज्वल निकम यांच्या हस्ते रोटे. मकसूद बोहरी यांनी संपादित केलेल्या ‘सेवाचक्र’ रोटरी बुलेटीनचे विमोचन करण्यात आले.

आर.आय. डिस्ट्रिक्ट ३०३० मध्ये रोटरी इन्क्लेव्ह म्हणून रोटे. कीर्तीकुमार कोठारी यांची सेक्रेटरी, तर रोटे. प्रीतपाल सिंग बग्गा यांची जॉईंट सेक्रेटरी म्हणून निवड करण्यात आली. या दोघांचाही प्रमुख पाहुणे मान. खासदार ॲड. उज्ज्वल निकम यांच्या हस्ते सत्कार करण्यात आला.

यावेळी मार्गदर्शन करताना खासदार ॲड. उज्ज्वल निकम म्हणाले की, समाजाचे आपण काही देणे लागतो, या सामाजिक बांधिलकीतून रोटरीचे कार्य जगभर सुरू आहे, ही समाधानाची बाब आहे. रोटरीच्या माध्यमातून रक्तदान शिबिरे, आरोग्य शिबिरे यांसह विविध सामाजिक उपक्रम राबविले जातात. मात्र, आजचा युवा वर्ग काही प्रमाणात भरकटलेला दिसत असून त्यांना योग्य दिशा देण्यासाठी रोटरीच्या माध्यमातून मार्गदर्शन व समुपदेशनाची गरज आहे. हे महत्त्वाचे काम रोटरीने हाती घ्यावे, असे आवाहन त्यांनी केले.

रोटे. गनी मेमन यांनी समाजातील वृद्धाश्रमांची वाढती संख्या आणि तेथे प्रवेशासाठी ३ ते ५ वर्षांची प्रतीक्षा यादी सुरू झाल्याबद्दल चिंता व्यक्त केली. मुलांनी आई-वडिलांची जबाबदारी घेणे ही काळाची गरज असल्याचे त्यांनी सांगितले.

कार्यक्रमाचे सूत्रसंचालन रोटे. अजय रोडगे, रोटे. प्रतीक जैन आणि रोटरी एनी. आरती रेजा यांनी केले. आभार प्रदर्शन रोटे. प्रशांत निकम यांनी केले, तर पसायदान रोटरी एनी. पूर्वा वशिष्ठ यांनी सादर केले.

या प्रसंगी मान. खासदार श्रीमती स्मिताताई वाघ, सौ. ज्योती निकम, धरणगाव, पारोळा व चोपडा येथील रोटरी पदाधिकारी, लायन्स क्लब, अमळनेर वकील संघ, अखिल भारतीय ग्राहक पंचायत अमळनेर, मराठा समाजाचे अध्यक्ष जयवंतराव पाटील, श्री मंगलग्रह मंदिराचे अध्यक्ष डॉक्टर दिगंबर महाले, खाशी मंडळाच्या माधुरीताई पाटील, नीरज अग्रवाल, मनोहर निकम, एडवोकेट विलास वाणी, एडवोकेट मनोहर पवार, एडवोकेट तीलोत्तमा पाटील, सौ. भारती सोनवणे यांच्यासह शहरातील मान्यवर, व्यापारी, रोटरी परिवार व पत्रकार मोठ्या संख्येने उपस्थित होते.

अशी बातमी रोटे. मकसूद बोहरी यांनी कळविली आहे.

अमळनेरमध्ये समाजकार्य पंधरवड्यात संविधान जागर

अमळनेर : राज्यभरात राबविण्यात येत असलेल्या समाजकार्य पंधरवड्याच्या उपक्रमांतर्गत अमळनेर येथे मासवे, संविधान जागर अभियान आणि समाजकार्य महाविद्यालय यांच्या संयुक्त विद्यमाने संविधान जागर अभियान उत्साहात राबविण्यात आले. विद्यार्थ्यांमध्ये संविधानाची मूल्ये, लोकशाही व्यवस्था, मूलभूत अधिकार व कर्तव्यांबाबत जागृती निर्माण करणे, हा या अभियानाचा प्रमुख उद्देश होता.

यावेळी संविधान जागर अभियानाचे समन्वयक निखिल रांजणकर यांनी समाजकार्य महाविद्यालयातील विद्यार्थ्यांना संविधानाच्या विविध पैलूंवर सविस्तर मार्गदर्शन केले. संविधान हे केवळ कायद्याचे पुस्तक नसून देशातील प्रत्येक नागरिकाला समानता, स्वातंत्र्य, न्याय आणि बंधुतेची हमी देणारे सर्वोच्च मार्गदर्शक तत्त्व असल्याचे त्यांनी स्पष्ट केले. विद्यार्थ्यांनी संविधानातील मूल्ये आत्मसात करून ती समाजजीवनात रुजविण्यासाठी पुढाकार घ्यावा, असे आवाहनही त्यांनी केले.

कार्यक्रमाच्या अध्यक्षस्थानी प्राचार्य डॉ. पी. एस. पाटील होते. त्यांनी संविधान जागृतीची आवश्यकता अधोरेखित करताना युवकांनी संविधानाचा सखोल अभ्यास करून लोकशाही बळकट करण्यासाठी सामाजिक जबाबदारी स्वीकारावी, असे प्रतिपादन केले.

कार्यक्रमास राष्ट्रीय सेवा योजना विभागाच्या कार्यक्रम अधिकारी डॉ. अनिता खेडकर, डॉ. विजयकुमार वाघमारे, विद्यार्थी विकास अधिकारी डॉ. अस्मिता सर्वय्या, प्रा. धनराज ढगे, डॉ. भरत खंडागळे, डॉ. सागरराज चव्हाण यांच्यासह राष्ट्रीय सेवा योजनेचे स्वयंसेवक मोठ्या संख्येने सहभागी झाले होते.

समाजकार्य पंधरवड्याच्या माध्यमातून संविधानाच्या लोकशाही मूल्यांचा प्रसार करण्यासाठी राबविण्यात आलेल्या या उपक्रमाला विद्यार्थ्यांचा उत्स्फूर्त प्रतिसाद मिळाला.

अमळनेर भावसार क्षत्रिय समाजातर्फे गुणवंत विद्यार्थ्यांचा गुणगौरव व बक्षीस वितरण सोहळा उत्साहात संपन्न

अमळनेर : भावसार क्षत्रिय समाज, अमळनेर तसेच पारितोषिक दात्यांच्या वतीने गुणवंत विद्यार्थ्यांचा बक्षीस वितरण व गुणगौरव सोहळा रविवार, दि. १६ ऑगस्ट २०२६ रोजी श्री संत सखाराम महाराज भक्त निवास, वाडी चौक येथे उत्साहपूर्ण वातावरणात संपन्न झाला. कार्यक्रमाच्या अध्यक्षस्थानी जव्हार येथील श्री. सुरेश सिताराम शेठ भावसार होते.

कार्यक्रमाच्या प्रारंभी समाजाचे अध्यक्ष श्री. परेश शांतीलाल भावसार यांनी प्रास्ताविकातून कार्यक्रमाची भूमिका व उद्देश स्पष्ट केला. यावेळी प्रमुख पाहुणे प्रा. डॉ. प्रभाकर जोशी सर, ज्येष्ठ समाज बांधव श्री. भावलाल पोपट भावसार, श्री. सुभाष यशवंत भावसार, श्री. प्रकाश फकीरा भावसार, श्री. मनोहर गुरुदास भावसार, तसेच पारितोषिक दाते श्री. राजेश रघुनाथ करंजे व सौ. प्रतिभा कृष्णकांत भावसार यांचे शाल, श्रीफळ व सन्मानपत्र देऊन स्वागत करण्यात आले.

शिक्षणाला प्रोत्साहन देण्यासाठी देणगी व पारितोषिकांची घोषणा

गुणगौरव सोहळ्याच्या निमित्ताने समाजातील ज्येष्ठ समाज बांधवांनी विद्यार्थ्यांच्या शैक्षणिक प्रगतीला प्रोत्साहन देण्यासाठी उदार देणगी जाहीर केली. श्री. अॅड. चंद्रकांत गोकुळदासशेठ भावसार यांनी रु. ११,१११/-, श्री. सुभाष यशवंत सारजे यांनी रु. १,१११/-, तर श्री. प्रकाश फकीरा भावसार यांनी रु. २००/- शिक्षण फंडासाठी देणगी जाहीर केली.

तसेच श्री. मनोहर गुरुदास भावसार यांनी इयत्ता १ ली ते १० वीमध्ये प्रथम येणाऱ्या विद्यार्थ्यांसाठी प्रत्येकी रु. १०१/- पारितोषिक देण्याची घोषणा केली. श्री. सुभाष यशवंत सारजे यांनीदेखील इयत्ता १ ली ते ४ थीमध्ये प्रथम येणाऱ्या विद्यार्थ्यांना प्रत्येकी रु. १०१/- पारितोषिक देण्याचे जाहीर केले. त्यांच्या या शैक्षणिक प्रोत्साहनपर योगदानाबद्दल कार्यकारी मंडळातर्फे आभार व्यक्त करण्यात आले.

याप्रसंगी पारितोषिक दाते श्रीकृष्णकांत वासुदेव शेठ भावसार तसेच प्रा. मनीष रघुनाथ करंजे सर यांनी मनोगत व्यक्त करून विद्यार्थ्यांना शुभेच्छा दिल्या.

विद्यार्थ्यांना मार्गदर्शन; गुणवंतांचा सन्मान

यावेळी उपस्थित मान्यवरांपैकी प्रा. डॉ. प्रभाकर जोशी सर यांनी विद्यार्थ्यांना यथोचित मार्गदर्शन केले. त्यांनी विद्यार्थ्यांनी शिक्षणासोबतच सातत्य, मेहनत, शिस्त आणि सकारात्मक दृष्टिकोन अंगीकारण्याचे आवाहन केले.

कार्यक्रमाचे अध्यक्ष श्री. सुरेश सिताराम शेठ भावसार यांच्या वतीने त्यांच्या सुकन्या सौ. वंदनाताई भावसार, मुख्याध्यापिका, मनमाड यांनी आपले विचार मांडले. त्यानंतर गुणवंत विद्यार्थ्यांना समाजातर्फे तसेच पारितोषिक दात्यांतर्फे देण्यात येणारी विविध बक्षिसे उपस्थित मान्यवरांच्या शुभहस्ते प्रदान करून त्यांचा गौरव करण्यात आला.

गुणवंत विद्यार्थ्यांच्या यशाचा गौरव करताना उपस्थित समाज बांधवांमध्ये उत्साहाचे वातावरण पाहायला मिळाले. विद्यार्थ्यांच्या शैक्षणिक प्रगतीला प्रोत्साहन देणाऱ्या या उपक्रमाचे उपस्थितांनी कौतुक केले. याप्रसंगी समाज बांधव मोठ्या संख्येने उपस्थित होते.

कार्यक्रमाचे सूत्रसंचालन शिक्षण समितीचे चेअरमन प्रा. प्रवीणकुमार रणछोडदास भावसार यांनी केले, तर आभार श्री. सुरेश नारायण भावसार यांनी मानले.

कार्यक्रमाच्या यशस्वीतेसाठी उपाध्यक्ष नंदलाल रतिलाल भावसार, सेक्रेटरी कुंदन गोपीनाथ भावसार, सहसेक्रेटरी निलेश गोकुळ भावसार, खजिनदार रविंद्र प्रभाकर भावसार, कार्यकारी सदस्य शांमकांत मिठाराम भावसार, दीपक तुकाराम भावसार, कृष्णकांत जगन्नाथ भावसार, तसेच सागर सुभाष भावसार, निलेश विजय भावसार, लक्ष्मीकांत मणिलाल भावसार, हेमंत भावसार (सेवक) यांनी परिश्रम घेतले.

गुणवंत विद्यार्थ्यांचा गौरव, शिक्षणासाठी आर्थिक पाठबळ आणि समाजातील दातृत्वाची परंपरा जपणारा हा सोहळा भावसार क्षत्रिय समाजासाठी प्रेरणादायी ठरला.

अनुसूचित जाती उपवर्गीकरणाविरोधात अमळनेरमध्ये वज्रमूठ; तालुक्यात भव्य मोर्चा काढण्याचा निर्धार

अमळनेर (प्रतिनिधी) अनुसूचित जाती संवर्गाच्या उपवर्गीकरणाला विरोध दर्शवण्यासाठी शहरातील साने गुरुजी विद्यालयात १९ ऑगस्ट रोजी सायंकाळी ५ वाजता अनुसूचित जाती संवर्गातील विविध समाज घटकांची सहविचार सभा खेळीमेळीच्या वातावरणात पार पडली. या बैठकीत उपवर्गीकरणाविरोधात एकजुटीने लढा उभारण्याचा आणि तालुक्यात भव्य मोर्चा काढण्याचा ठराव एकमुखाने मंजूर करण्यात आला.

येत्या पुढील महिन्यात जिल्हास्तरावर उपवर्गीकरण विरोधी मोर्चाचे आयोजन करण्यात आले आहे. त्या पार्श्वभूमीवर, पूर्वतयारी म्हणून अमळनेर तालुक्यात सर्वप्रथम उपवर्गीकरण विरोधी मोर्चा काढण्याचे बैठकीत ठरवण्यात आले. चर्मकार महासंघाचे ज्येष्ठ नेते भानुदास विसावे यांनी मार्गदर्शन करताना सांगितले की, “भविष्यात येणाऱ्या असंवैधानिक संकटाला परतवून लावण्यासाठी सर्व समाज घटकांनी एकत्र येऊन वज्रमूठ आवळण्याची गरज आहे.”

या सहविचार सभेला बौद्ध, चांभार, होलार, मातंग व मेहतर समाजाचे प्रतिनिधी मोठ्या संख्येने उपस्थित होते. सर्व समाज बांधवांनी या लढ्यात खांद्याला खांदा लावून सहभागी होण्याची आणि मोर्चा यशस्वी करण्याची शपथ घेतली. उपवर्गीकरण विरोधी कृती समितीच्या वतीने तालुक्यातील सर्व अनुसूचित जाती घटकांना या मोर्चात मोठ्या संख्येने सामील होण्याचे आवाहन करण्यात आले आहे.

याप्रसंगी चर्मकार महासंघाचे भानुदास विसावे, नरेश कांबळे, विजय बिऱ्हाडे, आरपीआयचे यशवंत बैसाने, ॲड. प्रशांत संदानशिव, सनी गायकवाड,अरुण मोरे,सोमचंद संदानशिव, हृदयनाथ मोरे, अतुल डोळस, बापूराव संदानशिव, योगराज संदानशिव, अर्जुन संदानशिव, अरुण घोलप, गौतम मोरे, अशोक बिऱ्हाडे, सुभाष आगळे, भगवान संदानशिव, अनिकेत ब्रम्हे,अशोक सैंदाने, दगडू सोनवणे,राहुल वाडेकर, मच्छिंद्र साळुंखे, राजेंद्र सैंदाने, गौतम शिरसाठ , उत्तर वानखेडे यांच्यासह ग्रामीण भागातील अनेक कार्यकर्ते व समाज बांधव उपस्थित होते.

महाराष्ट्र राज्य पत्रकार संघाच्या अमळनेर तालुका कार्यकारिणीची घोषणा उपाध्यक्षपदी ‘लोक जागर न्यूज’चे संपादक हृदयनाथ मोरे यांची निवड

अमळनेर : महाराष्ट्र राज्य पत्रकार संघ, मुंबईच्या खानदेशी विभागांतर्गत अमळनेर तालुका कार्यकारिणीची घोषणा करण्यात आली असून, ‘लोक जागर न्यूज’चे संपादक तथा पत्रकार हृदयनाथ मोरे यांची तालुका उपाध्यक्षपदी नियुक्ती करण्यात आली आहे. त्यांच्या निवडीमुळे अमळनेर तालुक्यातील पत्रकारिता क्षेत्रातून त्यांचे अभिनंदन होत आहे.

महाराष्ट्र राज्य पत्रकार संघाचे प्रदेशाध्यक्ष निलेश सोमानी, प्रदेश संघटक संजयजी भोकरे आणि प्रदेश सरचिटणीस डॉ. विश्वासराव आरोटे यांच्या मार्गदर्शन व आदेशानुसार ही नियुक्ती करण्यात आली. खानदेशी विभागाचे विभागीय अध्यक्ष डॉ. समाधान मैराळे यांनी अमळनेर तालुका कार्यकारिणी जाहीर करत हृदयनाथ मोरे यांची उपाध्यक्षपदी नियुक्ती केली.

हृदयनाथ मोरे हे ‘लोक जागर न्यूज’च्या माध्यमातून अमळनेर शहरासह तालुक्यातील विविध सामाजिक, शैक्षणिक, राजकीय, प्रशासकीय तसेच जनहिताच्या प्रश्नांना सातत्याने वाचा फोडत आहेत. सामान्य नागरिकांच्या समस्या प्रशासनापर्यंत पोहोचविण्यासोबतच सामाजिक उपक्रम, लोकजागृती आणि सकारात्मक घडामोडींना प्रसिद्धी देण्याचे कार्य त्यांनी केले आहे.

पत्रकारांच्या हक्कांसाठी आणि पत्रकारिता क्षेत्राच्या सक्षमीकरणासाठी संघटित प्रयत्नांची गरज असताना अमळनेर तालुका कार्यकारिणीच्या माध्यमातून पत्रकारांच्या विविध प्रश्नांना प्रभावीपणे वाचा फोडण्याचा प्रयत्न केला जाणार आहे. पत्रकारांमध्ये समन्वय वाढविणे, पत्रकारांच्या अडचणी सोडविण्यासाठी पाठपुरावा करणे तसेच समाजहिताच्या विषयांना प्राधान्य देणे, यासाठी कार्यकारिणी सक्रियपणे काम करेल, असा विश्वास व्यक्त करण्यात आला.

हृदयनाथ मोरे यांच्या नियुक्तीबद्दल पत्रकार, सामाजिक कार्यकर्ते, विविध क्षेत्रातील मान्यवर तसेच मित्रपरिवाराकडून त्यांचे अभिनंदन करण्यात येत असून, नवीन जबाबदारीच्या माध्यमातून पत्रकारिता क्षेत्रात अधिक प्रभावीपणे कार्य करण्यासाठी त्यांना शुभेच्छा देण्यात आल्या.

पत्रकार, विक्की जाधव यांची महाराष्ट्र राज्य मराठी पत्रकार संघाच्या अमळनेर तालुका उपअध्यक्षपदी नियुक्ती

अमळनेर : पत्रकारितेच्या माध्यमातून जनसामान्यांच्या प्रश्नांना सातत्याने वाचा फोडणारे पत्रकार विक्की जाधव यांची महाराष्ट्र राज्य मराठी पत्रकार संघ, मुंबई विभागाच्या अमळनेर तालुका उपाध्यक्षपदी नियुक्ती करण्यात आली आहे. संघटनेचे प्रदेशाध्यक्ष तथा पत्रकार संवाद यात्रेचे शिल्पकार वसंतराव मुंडे, कार्याध्यक्ष प्रविण सपकाळे यांच्या सूचनेनुसार आणि तालुकाध्यक्ष रवींद्र मोरे यांच्या मार्गदर्शनाखाली ही नियुक्ती करण्यात आली. पत्रकारांच्या हितासाठी काम करण्याची नवी जबाबदारी जाधव यांच्या खांद्यावर सोपविण्यात आल्याने पत्रकार वर्तुळातून त्यांचे अभिनंदन होत आहे.

स्थानिक प्रश्नांवर निर्भीड भूमिका, डिजिटल आणि प्रिंट च्या माध्यमातून प्रभावी मांडणी आणि जनहिताच्या विषयांचा सातत्याने पाठपुरावा ही पत्रकार विक्की जाधव यांच्या कार्याची ठळक वैशिष्ट्ये मानली जातात.* तालुक्यातील पत्रकारांच्या विविध अडचणी, हक्क आणि प्रश्नांना संघटनात्मक व्यासपीठ मिळवून देण्यासोबतच पत्रकारांमध्ये समन्वय वाढविणे, संघटनेचा विस्तार करणे आणि पत्रकारिता अधिक सक्षम करण्यासाठी प्रभावीपणे कार्य करण्याची जबाबदारी त्यांच्यावर राहणार आहे.

या नियुक्तीचे पत्रकारिता, सामाजिक, राजकीय व शैक्षणिक क्षेत्रातून स्वागत करण्यात येत आहे. यावेळी नव्या जबाबदारीबाबत पत्रकार विक्की जाधव यांनी संघटनेच्या माध्यमातून पत्रकारांच्या हितासाठी प्रामाणिकपणे काम करण्याचा निर्धार व्यक्त केला. त्यांच्या नियुक्तीमुळे अमळनेर तालुक्यातील पत्रकारांना एकत्रित व्यासपीठ मिळण्यासह पत्रकारांच्या प्रश्नांना अधिक संघटित आणि प्रभावी आवाज मिळेल, अशी अपेक्षा व्यक्त होत आहे.

डॉ. समाधान मैराळे यांची राज्य पत्रकार संघाच्या खान्देश विभागीय अध्यक्षपदी निवड जळगाव, धुळे व नंदुरबारमधील पत्रकार संघटन बळकट करण्यावर भर

अमळनेर : महाराष्ट्र राज्य पत्रकार संघ, मुंबईच्या खान्देश विभागीय अध्यक्षपदी डॉ. समाधान एकनाथ मैराळे यांची निवड करण्यात आली आहे. संघटनेच्या वरिष्ठ पदाधिकाऱ्यांनी ही नियुक्ती जाहीर केली.

महाराष्ट्र राज्य पत्रकार संघाचे प्रदेशाध्यक्ष निलेश सोमाणी, प्रदेश संघटक संजय भोकरे, प्रदेश सरचिटणीस डॉ. विश्वासराव आरोटे आणि संघटन सरचिटणीस किशोर रायसाकडा यांच्या मार्गदर्शनाखाली डॉ. मैराळे यांच्यावर खान्देश विभागाची जबाबदारी सोपविण्यात आली आहे.

खान्देश विभागात जळगाव, धुळे आणि नंदुरबार या तीन जिल्ह्यांचा समावेश होतो. या तिन्ही जिल्ह्यांतील पत्रकारांना संघटित करून त्यांच्या व्यावसायिक, सामाजिक आणि संघटनात्मक प्रश्नांना प्रभावी व्यासपीठ उपलब्ध करून देणे हे आगामी काळातील प्रमुख उद्दिष्ट राहणार आहे.

पत्कारितेच्या बदलत्या स्वरूपाच्या पार्श्वभूमीवर पारंपरिक पत्रकारितेसोबतच डिजिटल मीडिया, सोशल मीडिया, मोबाईल पत्रकारिता, कृत्रिम बुद्धिमत्ता (AI), माहितीची पडताळणी, फेक न्यूज आणि पत्रकारितेतील आधुनिक तंत्रज्ञान या विषयांवर प्रशिक्षण उपक्रम राबविण्याचे नियोजन करण्यात येणार आहे. नवोदित पत्रकारांना मार्गदर्शन तसेच कार्यरत पत्रकारांसाठी विविध कार्यशाळा घेण्यावरही भर दिला जाणार आहे.

पत्रकारांच्या स्थानिक पातळीवरील अडचणी, शासकीय यंत्रणांशी समन्वय, पत्रकारांच्या व्यावसायिक कौशल्यविकासाच्या संधी आणि पत्रकारिता क्षेत्रातील बदल यावर विभागीय पातळीवर सातत्याने संवाद साधण्याचा प्रयत्न केला जाणार आहे.

“खान्देशातील पत्रकारांना एकत्रित करून पत्रकारितेची गुणवत्ता, विश्वासार्हता आणि व्यावसायिकता वाढविण्यासाठी काम करण्याचा प्रयत्न राहील. संघटनेच्या माध्यमातून पत्रकारांच्या प्रश्नांना योग्य व्यासपीठ मिळवून देण्यास प्राधान्य दिले जाईल,” असे डॉ. समाधान मैराळे यांनी सांगितले.

डॉ. मैराळे यांच्या निवडीमुळे खान्देश विभागातील पत्रकार संघटनेच्या कार्याला अधिक व्यापक स्वरूप मिळण्याची अपेक्षा व्यक्त होत असून, आगामी काळात विभागातील विविध जिल्हे व तालुक्यांमध्ये संघटनात्मक उपक्रम, पत्रकार संवाद आणि प्रशिक्षण कार्यक्रम राबविण्याच्या दृष्टीने नियोजन केले जाणार आहे.

आपत्ती व्यवस्थापनवर समाजकार्य महाविद्यालयात विषयी दोन दिवसाची कार्यशाळा संपन्न अनिरुध्दाज अकॅडमी ऑफ डिसास्टर मॅनेजमेंट मुंबई कडून आयोजन

अमळनेर – दिनांक 17 व 18 ऑगस्ट 2026 रोजी श्रम साफल्य एज्युकेशन सोसायटी अमळनेर संचलित पंडित जवाहरलाल नेहरू समाजकार्य महाविद्यालय अमळनेर येथे आपत्ती व्यवस्थापन या विषयास अनुसरून कार्यशाळेचे आयोजन करण्यात आले.

 समाजकार्याचा प्रशिक्षण 

घेणाऱ्या विद्यार्थ्यांसाठी आपत्ती व्यवस्थापन महत्त्व याविषयी मुंबई येथील अनिरुद्धाज अकॅडमी ऑफ डिझास्टर मॅनेजमेंट या संस्थेकडून कार्यशाळेचे आयोजन करण्यात आले.

 सदर कार्यशाळेच्या उद्घाटन प्रसंगी अध्यक्षस्थानी संस्थेच्या संचालिका सौ अनुरुपा अभिजीत भांडारकर यांनी भूषविले. विभाग प्रमुख डॉ. जगदीश सोनवणे, कार्यशाळेसाठी साधन व्यक्ती आशिष वाणी, वसंत पाटील हे विचार मंचावर उपस्थित होते. 

कार्यशाळेच्या सुरुवातीला रत्ना खैरनार व तेजस्विनी पाटील यांनी पाहुण्यांचे स्वागत स्वागत गीताने केले.

 प्रथम सत्राचे मार्गदर्शक आशिष वाणी यांनी नैसर्गिक आपत्ती, मानवनिर्मित आपत्ती, याविषयी विद्यार्थ्यांना प्रशिक्षण दिले. आपत्ती व्यवस्थापन मूलभूत बचाव तंत्र, आग आणि प्रतिबंध, प्रतिसाद, प्रथमोपचार, यावर सखोल मार्गदर्शन केले. आपत्कालीन व्यवस्थापन चक्र समजून सांगितले की, सज्जता, प्रतिबंध, प्रतिसाद, विमोचन , विकास व पुनरुत्थान, आपत्ती व्यवस्थापन आराखड्याची आवश्यकता महत्त्वाची आहे. तसेच आपत्तीचे प्रकार नैसर्गिक व मानवनिर्मित आपत्तीला कसे सामोरे जावं याविषयी देखील त्यांनी सखोल मार्गदर्शन केले. 

आपत्ती व्यवस्थापन प्रात्यक्षिक पण केले गेले.

सदर सत्राच्या सत्र समन्वयक म्हणून प्रा डॉ अस्मिता सरवैया यांनी जबाबदारी सांभाळली. दुपारच्या सत्रात डॉ. धनश्री देवरे यांनी सखोल मार्गदर्शन केले. सदर सत्राच्या सत्र समन्वयक प्रा डॉ अनिता खेडकर यांनी जबाबदारी सांभाळली. डॉ धनश्री देवरे यांनी सांगितले की, अचानक कुटुंबातील किंवा परिसरातील एखाद्या व्यक्तींवर हृदयविकाराचा झटका आल्यास, त्याला सीपीसीआर द्वारे कसे जागृत अवस्थेत आणावे, याविषयी डॉ धनश्री देवरे यांनी प्रात्यक्षिक करून दाखविले. 

सदर कार्यशाळा यशस्वी करण्यासाठी महाविद्यालयाचे प्राचार्य डॉ.पी एस पाटील यांच्या मार्गदर्शनातून कार्यक्रमाचे समन्वयक तथा राष्ट्रीय सेवा योजना विभागाच्या कार्यक्रम अधिकारी डॉ अनिता खेडकर, डॉ विजयकुमार वाघमारे व विद्यार्थी विकास अधिकारी प्रा डॉ अस्मिता सरवैया, प्रा डी आर. ढगे, डॉ. एस आर चव्हाण. डॉ. भरत खंडागळे. ग्रंथपाल प्रा उदय महाजन, शिक्षकेतर कर्मचारी महेश शेलार, कोमल सूर्यवंशी, श्रीमती ज्योती सोनार यांनी सहकार्य केले. कार्यशाळेसाठी महाविद्यालयातील बीएसडब्ल्यू व एम एस डब्ल्यू चे विद्यार्थी व विद्यार्थिनी उपस्थित होते. कार्यक्रमाचे सूत्रसंचालन तेजस्विनी पाटील यांनी केले व आभार प्रदर्शन डॉ.अनिता खेडकर यांनी केले.

तालुका विज्ञान मेळावा उत्साहात; मयुरी महाजन प्रथम, मोहक साळुंखे द्वितीय तर सोहम भोसले तृतीय

‘भारतीय ऊर्जा क्षेत्र २०४७ : भवितव्य (संधी) व आव्हाने’ विषयावर विद्यार्थ्यांची चुरशीची स्पर्धा

अमळनेर : समग्र शिक्षा जिल्हा परिषद गटसाधन केंद्र, पंचायत समिती अमळनेर यांच्या वतीने अखिल भारतीय विद्यार्थी विज्ञान मेळावा २०२६ उत्साहात संपन्न झाला. साने गुरुजी नूतन माध्यमिक विद्यालयात आयोजित या मेळाव्यात तालुक्यातील अनेक शाळांमधील विद्यार्थ्यांनी सहभाग नोंदविला. ‘भारतीय ऊर्जा क्षेत्र २०४७ : भवितव्य (संधी) व आव्हाने’ या विषयावर विद्यार्थ्यांनी आपले विचार प्रभावीपणे मांडले.

कार्यक्रमाच्या अध्यक्षस्थानी पंचायत समितीचे गटशिक्षणाधिकारी श्री. प्रमोद पाटील होते. कार्यक्रमाचे उद्घाटक म्हणून साने गुरुजी नूतन माध्यमिक विद्यालयाचे मुख्याध्यापक श्री. सुनील पाटील सर उपस्थित होते. प्रमुख पाहुणे म्हणून साने गुरुजी कन्या हायस्कूलच्या मुख्याध्यापिका अनिता बोरसे व डी. ए. धनगर सर उपस्थित होते.

स्पर्धेत सहभागी प्रत्येक विद्यार्थ्याला आपले विचार मांडण्यासाठी सहा मिनिटांचा कालावधी देण्यात आला होता. विद्यार्थ्यांनी ऊर्जा क्षेत्रातील भविष्यातील संधी, आव्हाने आणि भारताच्या ऊर्जा विकासाची दिशा यावर प्रभावीपणे मते मांडल्याने स्पर्धा अत्यंत चुरशीची झाली.

स्पर्धेचे परीक्षक म्हणून सौ. नंदा पाटील मॅडम व श्री. आकाश पाटील यांनी कामकाज पाहिले. या स्पर्धेत डी. आर. कन्या हायस्कूल, अमळनेरच्या मयुरी संदीप महाजन हिने प्रथम क्रमांक पटकावला. साने गुरुजी नूतन माध्यमिक विद्यालय, अमळनेरच्या मोहक मुकेश साळुंखे याने द्वितीय क्रमांक मिळविला, तर पीबीए इंग्लिश मीडियम स्कूलच्या सोहम अमोल भोसले याने तृतीय क्रमांक पटकावला. एस. एस. पाटील हायस्कूल, लोंढवेच्या जयेश निंबा पाटील याची उत्तेजनार्थ पारितोषिकासाठी निवड करण्यात आली.

कार्यक्रमाच्या समारोपप्रसंगी अध्यक्षस्थानी पंचायत समितीचे गटशिक्षणाधिकारी श्री. प्रमोद पाटील सर होते. प्रमुख पाहुणे म्हणून अमळनेर शिक्षण प्रसारक मंडळ संस्थेचे सचिव दादासाहेब संदीप घोरपडे, मुख्याध्यापक सुनील पाटील, मुख्याध्यापिका अनिता बोरसे व डी. ए. धनगर उपस्थित होते. यावेळी विद्यार्थी, शिक्षक व परीक्षकांनी आपले मनोगत व्यक्त केले.

या यशाबद्दल खानदेश शिक्षण मंडळाचे कार्याध्यक्ष व शाळेचे शालेय समिती चेअरमन भाऊसो जितेंद्रजी जैन, मुख्याध्यापिका सौ. एस. एस. सूर्यवंशी मॅडम, उपमुख्याध्यापक श्री. एस. आर. शिंगाणे, पर्यवेक्षक श्री. एस. पी. वाघ सर, शिक्षक प्रतिनिधी सौ. पी. पी. जोशी मॅडम, श्रीमती आर. एस. सोनवणे मॅडम, श्री. एस. एस. माळी सर, श्री. के. पी. सनेर, श्री. श्याम पवार सर, श्रीमती एस. एस. कसबे मॅडम तसेच सर्व विज्ञान व गणित शिक्षिका, सर्व शिक्षक आणि कर्मचारी बंधू-भगिनी यांनी मयुरी महाजन हिचे अभिनंदन केले.

विज्ञान मंडळाचे अध्यक्ष निरंजन पेंढारे यांनी कार्यक्रमासाठी सहकार्य केले. कार्यक्रमाचे सूत्रसंचालन सौ. भाग्यश्री वानखेडे मॅडम यांनी केले, तर आभार प्रदर्शन श्री. यशोदीप बागल यांनी केले.

तालुक्याचे गटशिक्षणाधिकारी प्रमोद पाटील, सचिव संदीप घोरपडे, मुख्याध्यापक सुनील पाटील, मुख्याध्यापिका अनिता बोरसे, गणित मंडळाचे अध्यक्ष डी. ए. धनगर, नंदा पाटील व आकाश पाटील यांच्या हस्ते पारितोषिक वितरण करण्यात आले.

या कार्यक्रमासाठी विज्ञान शिक्षक श्री. दीपक महाजन सर, सौ. वैशाली पाटील मॅडम, श्री. हर्षल पवार, सौ. भारती पाटील मॅडम, एन. डी. पाटील, सौ. एस. एस. कसबे मॅडम, सौ. डिंपल देसाई मॅडम उपस्थित होते. कार्यक्रम यशस्वी करण्यासाठी सर्व शिक्षक व शिक्षकेतर कर्मचारी यांनी परिश्रम घेतले. विद्यार्थ्यांमध्ये वैज्ञानिक दृष्टिकोन, जिज्ञासा आणि संशोधनवृत्ती निर्माण करण्याच्या दृष्टीने हा विज्ञान मेळावा प्रेरणादायी ठरला.