जपान जिन भागातील मूलभूत सुविधांसाठी राष्ट्रवादीचा नगरपरिषदेला इशारा १५ दिवसांत निर्णय न झाल्यास आंदोलनाचा इशारा

अमळनेर प्रतिनिधी : अमळनेर शहरातील जपान जिन भागातील नागरिकांना मूलभूत सुविधा मिळाव्यात, या मागणीसाठी राष्ट्रवादी काँग्रेस पक्षाच्या अल्पसंख्याक विभागाचे शहराध्यक्ष सैय्यद अजहर अली यांच्या नेतृत्वाखाली नगरपरिषदेच्या मुख्याधिकाऱ्यांना निवेदन देण्यात आले.

जपान जिन परिसराला निवासी क्षेत्र असूनही औद्योगिक दराने कर आकारणी होत असल्याचा आरोप निवेदनातून करण्यात आला. नागरिक नियमितपणे घरपट्टी, पाणीपट्टी व इतर कर भरत असतानाही रस्ते, गटारी आणि पथदिव्यांसारख्या प्राथमिक सुविधा उपलब्ध नसल्याने नाराजी व्यक्त करण्यात आली.

निवेदनात औद्योगिक कर रद्द करून निवासी दराने कर आकारणी करणे, रस्त्यांचे काँक्रीटीकरण, भूमिगत गटार योजना, LED पथदिवे व हायमास्ट बसविणे तसेच आरक्षित मोकळ्या जागेचे सुशोभीकरण करून उद्यान व ज्येष्ठांसाठी बाकांची व्यवस्था करण्याची मागणी करण्यात आली.

यापूर्वी २०२३ व २०२४ मध्ये निवेदने देऊनही दखल न घेतल्याचे सांगत, १५ दिवसांत परिसराची पाहणी करून सकारात्मक निर्णय न घेतल्यास लोकशाही मार्गाने आंदोलन छेडण्यात येईल, असा इशारा सैय्यद अजहर अली यांनी दिला.

यावेळी शराफत अली ढेकेदार, इकबाल लोहार, मोहसीन अली, इम्रान बागवान, सैय्यद आसिफ, शरूख शेख, शरूख पठाण, अबीद शेख, फौजन शेख यांच्यासह जपान जिन परिसरातील नागरिक मोठ्या संख्येने उपस्थित होते. निवेदनाची प्रत आमदार अनिल भाईदास पाटील, नगररचना विभाग व जिल्हाधिकारी, जळगाव यांना पाठविण्यात आली.